৬. নিজ্জৰসুত্তৱণ্ণনা

১০৬. ছট্ঠে নিজ্জৰৱত্থূনীতি নিজ্জৰকাৰণানি. মিচ্ছাদিট্ঠি নিজ্জিণ্ণা হোতীতি অযং হেট্ঠা ৱিপস্সনাযপি নিজ্জিণ্ণা এৱ পহীনা. কস্মা পুন গহিতাতি? অসমুচ্ছিন্নত্তা. ৱিপস্সনায হি কিঞ্চাপি নিজ্জিণ্ণা, ন পন সমুচ্ছিন্না. মগ্গো পন উপ্পজ্জিত্ৱা তং সমুচ্ছিন্দতি, ন পুন ৱুট্ঠাতুং দেতি. তস্মা পুন গহিতা. এৱং সব্বপদেসু যোজেতব্বো. এত্থ চ সম্মাৱিমুত্তিপচ্চযা চতুসট্ঠি ধম্মা ভাৱনাপাৰিপূৰিং গচ্ছন্তি. কতমে চতুসট্ঠি? সোতাপত্তিমগ্গক্খণে অধিমোক্খট্ঠেন সদ্ধিন্দ্ৰিযং পৰিপূৰতি, পগ্গহট্ঠেন ৱীৰিযিন্দ্ৰিযং, উপট্ঠানট্ঠেন সতিন্দ্ৰিযং, অৱিক্খেপট্ঠেন সমাধিন্দ্ৰিযং, দস্সনট্ঠেন পঞ্ঞিন্দ্ৰিযং পৰিপূৰেতি, ৱিজাননট্ঠেন মনিন্দ্ৰিযং, অভিনন্দনট্ঠেন সোমনস্সিন্দ্ৰিযং, পৱত্তসন্ততিআধিপতেয্যট্ঠেন জীৱিতিন্দ্ৰিযং পৰিপূৰতি…পে… অৰহত্তফলক্খণে অধিমোক্খট্ঠেন সদ্ধিন্দ্ৰিযং…পে… পৱত্তসন্ততিআধিপতেয্যট্ঠেন জীৱিতিন্দ্ৰিযং পৰিপূৰতীতি এৱং চতূসু চ মগ্গেসু চতূসু চ ফলেসু অট্ঠট্ঠ হুত্ৱা চতুসট্ঠি ধম্মা পাৰিপূৰিং গচ্ছন্তি.