৯. উপালিসুত্তৱণ্ণনা
৯৯. নৱমে দুৰভিসম্ভৱানীতি সম্ভৱিতুং দুক্খানি দুস্সহানি, ন সক্কা অপ্পেসক্খেহি অজ্ঝোগাহিতুন্তি ৱুত্তং হোতি. অৰঞ্ঞৱনপত্থানীতি অৰঞ্ঞানি চ ৱনপত্থানি চ. আৰঞ্ঞকঙ্গনিপ্ফাদনেন অৰঞ্ঞানি, গামন্তং অতিক্কমিত্ৱা মনুস্সানং অনুপচাৰট্ঠানভাৱেন ৱনপত্থানি. পন্তানীতি পৰিযন্তানি অতিদূৰানি. দুক্কৰং পৱিৱেকন্তি কাযৱিৱেকো দুক্কৰো. দুৰভিৰমন্তি অভিৰমিতুং ন সুকৰং. একত্তেতি একীভাৱে. কিং দস্সেতি? কাযৱিৱেকে কতেপি তত্থ চিত্তং অভিৰমাপেতুং দুক্কৰং. দ্ৱযংদ্ৱযাৰামো হি অযং লোকোতি. হৰন্তি মঞ্ঞেতি হৰন্তি ৱিয ঘসন্তি ৱিয. মনোতি চিত্তং. সমাধিং অলভমানস্সাতি উপচাৰসমাধিং ৱা অপ্পনাসমাধিং ৱা অলভন্তস্স. কিং দস্সেতি? ঈদিসস্স ভিক্খুনো তিণপণ্ণমিগাদিসদ্দেহি ৱিৱিধেহি চ ভীসনকেহি ৱনানি চিত্তং ৱিক্খিপন্তি মঞ্ঞেতি. সংসীদিস্সতীতি কামৱিতক্কেন সংসীদিস্সতি. উপ্লৱিস্সতীতি ব্যাপাদৱিহিংসাৱিতক্কেহি উদ্ধং প্লৱিস্সতি.
কণ্ণসংধোৱিকন্তি কণ্ণে ধোৱন্তেন কীড়িতব্বং. পিট্ঠিসংধোৱিকন্তি পিট্ঠিং ধোৱন্তেন কীড়িতব্বং. তত্থ উদকং সোণ্ডায গহেত্ৱা দ্ৱীসু কণ্ণেসু আসিঞ্চনং কণ্ণসংধোৱিকা নাম, পিট্ঠিযং আসিঞ্চনং পিট্ঠিসংধোৱিকা নাম. গাধং ৱিন্দতীতি পতিট্ঠং লভতি. কো চাহং কো চ হত্থিনাগোতি অহং কো, হত্থিনাগো কো, অহম্পি তিৰচ্ছানগতো, অযম্পি, ময্হম্পি চত্তাৰো পাদা, ইমস্সপি, ননু উভোপি মযং সমসমাতি.
ৱঙ্ককন্তি কুমাৰকানং কীড়নকং খুদ্দকনঙ্গলং. ঘটিকন্তি দীঘদণ্ডকেন ৰস্সদণ্ডকং পহৰণকীড়ং. মোক্খচিকন্তি সংপৰিৱত্তককীড়ং, আকাসে দণ্ডকং গহেত্ৱা ভূমিযং ৱা সীসং ঠপেত্ৱা হেট্ঠুপৰিযভাৱেন পৰিৱত্তনকীড়ন্তি ৱুত্তং হোতি. চিঙ্গুলকন্তি তালপণ্ণাদীহি কতং ৱাতপ্পহাৰেন পৰিব্ভমনচক্কং. পত্তাড়্হকং ৱুচ্চতি পণ্ণনাড়ি, তায ৱালুকাদীনি মিনন্তা কীড়ন্তি. ৰথকন্তি খুদ্দকৰথং. ধনুকন্তি খুদ্দকধনুমেৱ.
ইধ খো পন ৱোতি এত্থ ৱোতি নিপাতমত্তং, ইধ খো পনাতি অত্থো. ইঙ্ঘ ত্ৱং, উপালি, সঙ্ঘে ৱিহৰাহীতি এত্থ ইঙ্ঘাতি চোদনত্থে নিপাতো. তেন থেৰং সঙ্ঘমজ্ঝে ৱিহাৰত্থায চোদেতি, নাস্স অৰঞ্ঞৱাসং অনুজানাতি. কস্মা? অৰঞ্ঞসেনাসনে ৱসতো কিৰস্স ৱাসধুৰমেৱ পূৰিস্সতি, ন গন্থধুৰং. সঙ্ঘমজ্ঝে ৱসন্তো পন দ্ৱে ধুৰানি পূৰেত্ৱা অৰহত্তং পাপুণিস্সতি, ৱিনযপিটকে চ পামোক্খো ভৱিস্সতি. অথস্সাহং পৰিসমজ্ঝে পুব্বপত্থনং পুব্বাভিনীহাৰঞ্চ কথেত্ৱা ইমং ভিক্খুং ৱিনযধৰানং অগ্গট্ঠানে ঠপেস্সামীতি ইমমত্থং পস্সমানো সত্থা থেৰস্স অৰঞ্ঞৱাসং নানুজানীতি. দসমং উত্তানত্থমেৱাতি.
উপালিৱগ্গো পঞ্চমো.
দুতিযপণ্ণাসকং নিট্ঠিতং.