৬. সক্কসুত্তৱণ্ণনা

৪৬. ছট্ঠে সোকসভযেতি সোকেন সভযে. সোকভযেতি ৱা পাঠো, অযমেৱত্থো. দুতিযপদেপি এসেৱ নযো. যেন কেনচি কম্মট্ঠানেনাতি কসিৱণিজ্জাদিকম্মেসু যেন কেনচি কম্মেন. অনাপজ্জ অকুসলন্তি কিঞ্চি অকুসলং অনাপজ্জিত্ৱা. নিব্বিসেয্যাতি উপ্পাদেয্য আচিনেয্য. দক্খোতি ছেকো. উট্ঠানসম্পন্নোতি উট্ঠানৱীৰিযেন সমন্নাগতো. অলং ৱচনাযাতি যুত্তো ৱচনায. একন্তসুখপ্পটিসংৱেদী ৱিহৰেয্যাতি একন্তমেৱ কাযিকচেতসিকসুখং ঞাণেন পটিসংৱেদেন্তো ৱিহৰেয্য. অনিচ্চাতি হুত্ৱা অভাৱতো. তুচ্ছাতি সাৰৰহিতা. মুসাতি নিচ্চসুভসুখা ৱিয খাযমানাপি তথা ন হোন্তীতি মুসা. মোসধম্মাতি নস্সনসভাৱা. তস্মা তে পটিচ্চ দুক্খং উপ্পজ্জতীতি সন্দস্সেতি. ইধ পন ৱোতি এত্থ ৱো তি নিপাতমত্তং. অপণ্ণকং ৱা সোতাপন্নোতি অৱিৰাধিতং একংসেন সোতাপন্নো ৱা হোতি. সোপি ঝানং নিব্বত্তেতি, ব্ৰহ্মলোকং ৱা গন্ত্ৱা ছসু ৱা কামসগ্গেসু একন্তসুখপ্পটিসংৱেদী হুত্ৱা ৱিহৰেয্য. ইমস্মিং সুত্তে সত্থা অট্ঠঙ্গুপোসথস্স গুণং কথেসি.