১২. অনাপত্তিৱগ্গৱণ্ণনা

১৫০. দ্ৱাদসমে পন অনাপত্তিং আপত্তীতিআদীসু ‘‘অনাপত্তি অজানন্তস্স অথেয্যচিত্তস্স নমৰণাধিপ্পাযস্স অনুল্লপনাধিপ্পাযস্স নমোচনাধিপ্পাযস্সা’’তি তত্থ তত্থ ৱুত্তা অনাপত্তি অনাপত্তি নাম, ‘‘জানন্তস্স থেয্যচিত্তস্সা’’তিআদিনা নযেন ৱুত্তা আপত্তি আপত্তি নাম, পঞ্চাপত্তিক্খন্ধা লহুকাপত্তি নাম, দ্ৱে আপত্তিক্খন্ধা গৰুকাপত্তি নাম. দ্ৱে আপত্তিক্খন্ধা দুট্ঠুল্লাপত্তি নাম, পঞ্চাপত্তিক্খন্ধা অদুট্ঠুল্লাপত্তি নাম. ছ আপত্তিক্খন্ধা সাৱসেসাপত্তি নাম, একো পাৰাজিকাপত্তিক্খন্ধো অনৱসেসাপত্তি নাম. সপ্পটিকম্মাপত্তি নাম সাৱসেসাপত্তিযেৱ, অপ্পটিকম্মাপত্তি নাম অনৱসেসাপত্তিযেৱ. সেসং সব্বত্থ উত্তানমেৱাতি.

অনাপত্তিৱগ্গৱণ্ণনা.