গন্থাৰম্ভকথা

‘‘কৰুণাসীতলহদযং, পঞ্ঞাপজ্জোতৱিহতমোহতমং;

সনৰামৰলোকগৰুং, ৱন্দে সুগতং গতিৱিমুত্তং.

‘‘বুদ্ধোপি বুদ্ধভাৱং, ভাৱেত্ৱা চেৱ সচ্ছিকত্ৱা চ;

যং উপগতো গতমলং, ৱন্দে তমনুত্তৰং ধম্মং.

‘‘সুগতস্স ওৰসানং, পুত্তানং মাৰসেনমথনানং;

অট্ঠন্নম্পি সমূহং, সিৰসা ৱন্দে অৰিযসঙ্ঘং.

‘‘ইতি মে পসন্নমতিনো, ৰতনত্তযৱন্দনামযং পুঞ্ঞং;

যং সুৱিহতন্তৰাযো, হুত্ৱা তস্সানুভাৱেন.

‘‘এককদুকাদিপটিমণ্ডিতস্স অঙ্গুত্তৰাগমৱৰস্স;

ধম্মকথিকপুঙ্গৱানং, ৱিচিত্তপটিভানজননস্স.

‘‘অত্থপ্পকাসনত্থং, অট্ঠকথা আদিতো ৱসিসতেহি;

পঞ্চহি যা সঙ্গীতা, অনুসঙ্গীতা চ পচ্ছাপি.

‘‘সীহড়দীপং পন আভতাথ ৱসিনা মহামহিন্দেন;

ঠপিতা সীহড়ভাসায, দীপৱাসীনমত্থায.

‘‘অপনেত্ৱান ততোহং, সীহড়ভাসং মনোৰমং ভাসং;

তন্তিনযানুচ্ছৱিকং, আৰোপেন্তো ৱিগতদোসং.

‘‘সমযং অৱিলোমেন্তো, থেৰানং থেৰৱংসদীপানং;

সুনিপুণৱিনিচ্ছযানং, মহাৱিহাৰে নিৱাসীনং.

‘‘হিত্ৱা পুনপ্পুনাগতমত্থং, অত্থং পকাসযিস্সামি;

সুজনস্স চ তুট্ঠত্থং, চিৰট্ঠিতত্থঞ্চ ধম্মস্স.

‘‘সাৱত্থিপভূতীনং, নগৰানং ৱণ্ণনা কতা হেট্ঠা;

দীঘস্স মজ্ঝিমস্স চ, যা মে অত্থং ৱদন্তেন.

‘‘ৱিত্থাৰৱসেন সুদং, ৱত্থূনি চ তত্থ যানি ৱুত্তানি;

তেসম্পি ন ইধ ভিয্যো, ৱিত্থাৰকথং কৰিস্সামি.

‘‘সুত্তানং পন অত্থা, ন ৱিনা ৱত্থূহি যে পকাসন্তি;

তেসং পকাসনত্থং, ৱত্থূনিপি দস্সযিস্সামি.

‘‘সীলকথা ধুতধম্মা, কম্মট্ঠানানি চেৱ সব্বানি;

চৰিযাৱিধানসহিতো, ঝানসমাপত্তিৱিত্থাৰো.

‘‘সব্বা চ অভিঞ্ঞাযো, পঞ্ঞাসঙ্কলননিচ্ছযো চেৱ;

খন্ধাধাতাযতনিন্দ্ৰিযানি, অৰিযানি চেৱ চত্তাৰি.

‘‘সচ্চানি পচ্চযাকাৰদেসনা সুপৰিসুদ্ধনিপুণনযা;

অৱিমুত্ততন্তিমগ্গা, ৱিপস্সনাভাৱনা চেৱ.

‘‘ইতি পন সব্বং যস্মা, ৱিসুদ্ধিমগ্গে মযা সুপৰিসুদ্ধং;

ৱুত্তং তস্মা ভিয্যো, ন তং ইধ ৱিচাৰযিস্সামি.

‘‘মজ্ঝে ৱিসুদ্ধিমগ্গো, এস চতুন্নম্পি আগমানঞ্হি;

ঠত্ৱা পকাসযিস্সতি, তত্থ যথাভাসিতমত্থং.

‘‘ইচ্চেৱ কতো তস্মা, তম্পি গহেত্ৱান সদ্ধিমেতায;

অট্ঠকথায ৱিজানথ, অঙ্গুত্তৰনিস্সিতং অত্থ’’ন্তি.

সংখেপকথা