(৫) পচ্চুপ্পন্নানাগতৱাৰো

(ক) অনুলোমপুগ্গলো

১৪৮. (ক) যস্স কাযসঙ্খাৰো উপ্পজ্জতি তস্স ৱচীসঙ্খাৰো নিৰুজ্ঝিস্সতীতি? আমন্তা.

(খ) যস্স ৱা পন ৱচীসঙ্খাৰো নিৰুজ্ঝিস্সতি তস্স কাযসঙ্খাৰো উপ্পজ্জতীতি?

সব্বেসং চিত্তস্স ভঙ্গক্খণে ৱিনা অস্সাসপস্সাসেহি চিত্তস্স উপ্পাদক্খণে নিৰোধসমাপন্নানং অসঞ্ঞসত্তানং তেসং ৱচীসঙ্খাৰো নিৰুজ্ঝিস্সতি, নো চ তেসং কাযসঙ্খাৰো উপ্পজ্জতি. অস্সাসপস্সাসানং উপ্পাদক্খণে তেসং ৱচীসঙ্খাৰো চ নিৰুজ্ঝিস্সতি কাযসঙ্খাৰো চ উপ্পজ্জতি.

(ক) যস্স কাযসঙ্খাৰো উপ্পজ্জতি তস্স চিত্তসঙ্খাৰো নিৰুজ্ঝিস্সতীতি? আমন্তা.

(খ) যস্স ৱা পন চিত্তসঙ্খাৰো নিৰুজ্ঝিস্সতি তস্স কাযসঙ্খাৰো উপ্পজ্জতীতি?

সব্বেসং চিত্তস্স ভঙ্গক্খণে ৱিনা অস্সাসপস্সাসেহি চিত্তস্স উপ্পাদক্খণে নিৰোধসমাপন্নানং অসঞ্ঞসত্তানং তেসং চিত্তসঙ্খাৰো নিৰুজ্ঝিস্সতি, নো চ তেসং কাযসঙ্খাৰো উপ্পজ্জতি. অস্সাসপস্সাসানং উপ্পাদক্খণে তেসং চিত্তসঙ্খাৰো চ নিৰুজ্ঝিস্সতি কাযসঙ্খাৰো চ উপ্পজ্জতি.

১৪৯. (ক) যস্স ৱচীসঙ্খাৰো উপ্পজ্জতি তস্স চিত্তসঙ্খাৰো নিৰুজ্ঝিস্সতীতি? আমন্তা.

(খ) যস্স ৱা পন চিত্তসঙ্খাৰো নিৰুজ্ঝিস্সতি তস্স ৱচীসঙ্খাৰো উপ্পজ্জতীতি?

সব্বেসং চিত্তস্স ভঙ্গক্খণে ৱিনা ৱিতক্কৱিচাৰেহি চিত্তস্স উপ্পাদক্খণে নিৰোধসমাপন্নানং অসঞ্ঞসত্তানং তেসং চিত্তসঙ্খাৰো নিৰুজ্ঝিস্সতি, নো চ তেসং ৱচীসঙ্খাৰো উপ্পজ্জতি. ৱিতক্কৱিচাৰানং উপ্পাদক্খণে তেসং চিত্তসঙ্খাৰো চ নিৰুজ্ঝিস্সতি ৱচীসঙ্খাৰো চ উপ্পজ্জতি.

(খ) অনুলোমওকাসো

১৫০. যত্থ কাযসঙ্খাৰো উপ্পজ্জতি…পে….

(গ) অনুলোমপুগ্গলোকাসা

১৫১. (ক) যস্স যত্থ কাযসঙ্খাৰো উপ্পজ্জতি তস্স তত্থ ৱচীসঙ্খাৰো নিৰুজ্ঝিস্সতীতি?

দুতিযজ্ঝানং ততিযজ্ঝানং সমাপন্নানং অস্সাসপস্সাসানং উপ্পাদক্খণে তেসং তত্থ কাযসঙ্খাৰো উপ্পজ্জতি, নো চ তেসং তত্থ ৱচীসঙ্খাৰো নিৰুজ্ঝিস্সতি. পঠমজ্ঝানং সমাপন্নানং কামাৱচৰানং অস্সাসপস্সাসানং উপ্পাদক্খণে তেসং তত্থ কাযসঙ্খাৰো চ উপ্পজ্জতি ৱচীসঙ্খাৰো চ নিৰুজ্ঝিস্সতি.

(খ) যস্স ৱা পন যত্থ ৱচীসঙ্খাৰো নিৰুজ্ঝিস্সতি তস্স তত্থ কাযসঙ্খাৰো উপ্পজ্জতীতি?

পঠমজ্ঝানং সমাপন্নানং কামাৱচৰানং অস্সাসপস্সাসানং ভঙ্গক্খণে তেসংযেৱ ৱিনা অস্সাসপস্সাসেহি চিত্তস্স উপ্পাদক্খণে ৰূপাৱচৰানং অৰূপাৱচৰানং তেসং তত্থ ৱচীসঙ্খাৰো নিৰুজ্ঝিস্সতি, নো চ তেসং তত্থ কাযসঙ্খাৰো উপ্পজ্জতি. পঠমজ্ঝানং সমাপন্নানং কামাৱচৰানং অস্সাসপস্সাসানং উপ্পাদক্খণে তেসং তত্থ ৱচীসঙ্খাৰো চ নিৰুজ্ঝিস্সতি কাযসঙ্খাৰো চ উপ্পজ্জতি.

(ক) যস্স যত্থ কাযসঙ্খাৰো উপ্পজ্জতি তস্স তত্থ চিত্তসঙ্খাৰো নিৰুজ্ঝিস্সতীতি? আমন্তা.

(খ) যস্স ৱা পন যত্থ চিত্তসঙ্খাৰো নিৰুজ্ঝিস্সতি তস্স তত্থ কাযসঙ্খাৰো উপ্পজ্জতীতি?

সব্বেসং চিত্তস্স ভঙ্গক্খণে ৱিনা অস্সাসপস্সাসেহি চিত্তস্স উপ্পাদক্খণে তেসং তত্থ চিত্তসঙ্খাৰো নিৰুজ্ঝিস্সতি, নো চ তেসং তত্থ কাযসঙ্খাৰো উপ্পজ্জতি. অস্সাসপস্সাসানং উপ্পাদক্খণে তেসং তত্থ চিত্তসঙ্খাৰো চ নিৰুজ্ঝিস্সতি কাযসঙ্খাৰো চ উপ্পজ্জতি.

১৫২. (ক) যস্স যত্থ ৱচীসঙ্খাৰো উপ্পজ্জতি তস্স তত্থ চিত্তসঙ্খাৰো নিৰুজ্ঝিস্সতীতি? আমন্তা.

(খ) যস্স ৱা পন যত্থ চিত্তসঙ্খাৰো নিৰুজ্ঝিস্সতি তস্স তত্থ ৱচীসঙ্খাৰো উপ্পজ্জতীতি?

সব্বেসং চিত্তস্স ভঙ্গক্খণে ৱিনা ৱিতক্কৱিচাৰেহি চিত্তস্স উপ্পাদক্খণে তেসং তত্থ চিত্তসঙ্খাৰো নিৰুজ্ঝিস্সতি, নো চ তেসং তত্থ ৱচীসঙ্খাৰো উপ্পজ্জতি. ৱিতক্কৱিচাৰানং উপ্পাদক্খণে তেসং তত্থ চিত্তসঙ্খাৰো চ নিৰুজ্ঝিস্সতি ৱচীসঙ্খাৰো চ উপ্পজ্জতি.

(ঘ) পচ্চনীকপুগ্গলো

১৫৩. (ক) যস্স কাযসঙ্খাৰো নুপ্পজ্জতি তস্স ৱচীসঙ্খাৰো ন নিৰুজ্ঝিস্সতীতি?

সব্বেসং চিত্তস্স ভঙ্গক্খণে ৱিনা অস্সাসপস্সাসেহি চিত্তস্স উপ্পাদক্খণে নিৰোধসমাপন্নানং অসঞ্ঞসত্তানং তেসং কাযসঙ্খাৰো নুপ্পজ্জতি, নো চ তেসং ৱচীসঙ্খাৰো ন নিৰুজ্ঝিস্সতি. সৱিতক্কসৱিচাৰপচ্ছিমচিত্তস্স ভঙ্গক্খণে অৱিতক্কঅৱিচাৰপচ্ছিমচিত্তসমঙ্গীনং যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি তেসং কাযসঙ্খাৰো চ নুপ্পজ্জতি ৱচীসঙ্খাৰো চ ন নিৰুজ্ঝিস্সতি.

(খ) যস্স ৱা পন ৱচীসঙ্খাৰো ন নিৰুজ্ঝিস্সতি তস্স কাযসঙ্খাৰো নুপ্পজ্জতীতি? আমন্তা.

(ক) যস্স কাযসঙ্খাৰো নুপ্পজ্জতি তস্স চিত্তসঙ্খাৰো ন নিৰুজ্ঝিস্সতীতি?

সব্বেসং চিত্তস্স ভঙ্গক্খণে ৱিনা অস্সাসপস্সাসেহি চিত্তস্স উপ্পাদক্খণে নিৰোধসমাপন্নানং অসঞ্ঞসত্তানং তেসং কাযসঙ্খাৰো নুপ্পজ্জতি, নো চ তেসং চিত্তসঙ্খাৰো ন নিৰুজ্ঝিস্সতি. পচ্ছিমচিত্তস্স ভঙ্গক্খণে তেসং কাযসঙ্খাৰো চ নুপ্পজ্জতি চিত্তসঙ্খাৰো চ ন নিৰুজ্ঝিস্সতি.

(খ) যস্স ৱা পন চিত্তসঙ্খাৰো ন নিৰুজ্ঝিস্সতি তস্স কাযসঙ্খাৰো নুপ্পজ্জতীতি? আমন্তা.

১৫৪. (ক) যস্স ৱচীসঙ্খাৰো নুপ্পজ্জতি তস্স চিত্তসঙ্খাৰো ন নিৰুজ্ঝিস্সতীতি?

সব্বেসং চিত্তস্স ভঙ্গক্খণে ৱিনা ৱিতক্কৱিচাৰেহি চিত্তস্স উপ্পাদক্খণে নিৰোধসমাপন্নানং অসঞ্ঞসত্তানং তেসং ৱচীসঙ্খাৰো নুপ্পজ্জতি, নো চ তেসং চিত্তসঙ্খাৰো ন নিৰুজ্ঝিস্সতি. পচ্ছিমচিত্তস্স ভঙ্গক্খণে তেসং ৱচীসঙ্খাৰো চ নুপ্পজ্জতি চিত্তসঙ্খাৰো চ ন নিৰুজ্ঝিস্সতি.

(খ) যস্স ৱা পন চিত্তসঙ্খাৰো ন নিৰুজ্ঝিস্সতি তস্স ৱচীসঙ্খাৰো নুপ্পজ্জতীতি? আমন্তা.

(ঙ) পচ্চনীকওকাসো

১৫৫. যত্থ কাযসঙ্খাৰো নুপ্পজ্জতি…পে….

(চ) পচ্চনীকপুগ্গলোকাসা

১৫৬. (ক) যস্স যত্থ কাযসঙ্খাৰো নুপ্পজ্জতি তস্স তত্থ ৱচীসঙ্খাৰো ন নিৰুজ্ঝিস্সতীতি?

পঠমজ্ঝানং সমাপন্নানং কামাৱচৰানং অস্সাসপস্সাসানং ভঙ্গক্খণে তেসংযেৱ ৱিনা অস্সাসপস্সাসেহি চিত্তস্স উপ্পাদক্খণে ৰূপাৱচৰানং অৰূপাৱচৰানং তেসং তত্থ কাযসঙ্খাৰো নুপ্পজ্জতি, নো চ তেসং তত্থ ৱচীসঙ্খাৰো ন নিৰুজ্ঝিস্সতি. সৱিতক্কসৱিচাৰপচ্ছিমচিত্তস্স ভঙ্গক্খণে অৱিতক্কঅৱিচাৰপচ্ছিমচিত্তসমঙ্গীনং যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি দুতিযজ্ঝানং ততিযজ্ঝানং সমাপন্নানং অস্সাসপস্সাসানং ভঙ্গক্খণে তেসংযেৱ ৱিনা অস্সাসপস্সাসেহি চিত্তস্স উপ্পাদক্খণে চতুত্থজ্ঝানং সমাপন্নানং অসঞ্ঞসত্তানং তেসং তত্থ কাযসঙ্খাৰো চ নুপ্পজ্জতি ৱচীসঙ্খাৰো চ ন নিৰুজ্ঝিস্সতি.

(খ) যস্স ৱা পন যত্থ ৱচীসঙ্খাৰো ন নিৰুজ্ঝিস্সতি তস্স তত্থ কাযসঙ্খাৰো নুপ্পজ্জতীতি?

দুতিযজ্ঝানং ততিযজ্ঝানং সমাপন্নানং অস্সাসপস্সাসানং উপ্পাদক্খণে তেসং তত্থ ৱচীসঙ্খাৰো ন নিৰুজ্ঝিস্সতি, নো চ তেসং তত্থ কাযসঙ্খাৰো নুপ্পজ্জতি. সৱিতক্কসৱিচাৰপচ্ছিমচিত্তস্স ভঙ্গক্খণে অৱিতক্কঅৱিচাৰপচ্ছিমচিত্তসমঙ্গীনং যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি দুতিযজ্ঝানং ততিযজ্ঝানং সমাপন্নানং অস্সাসপস্সাসানং ভঙ্গক্খণে তেসংযেৱ ৱিনা অস্সাসপস্সাসেহি চিত্তস্স উপ্পাদক্খণে চতুত্থজ্ঝানং সমাপন্নানং অসঞ্ঞসত্তানং তেসং তত্থ ৱচীসঙ্খাৰো চ ন নিৰুজ্ঝিস্সতি কাযসঙ্খাৰো চ নুপ্পজ্জতি.

(ক) যস্স যত্থ কাযসঙ্খাৰো নুপ্পজ্জতি তস্স তত্থ চিত্তসঙ্খাৰো ন নিৰুজ্ঝিস্সতীতি?

সব্বেসং চিত্তস্স ভঙ্গক্খণে ৱিনা অস্সাসপস্সাসেহি চিত্তস্স উপ্পাদক্খণে তেসং তত্থ কাযসঙ্খাৰো নুপ্পজ্জতি, নো চ তেসং তত্থ চিত্তসঙ্খাৰো ন নিৰুজ্ঝিস্সতি. পচ্ছিমচিত্তস্স ভঙ্গক্খণে অসঞ্ঞসত্তানং তেসং তত্থ কাযসঙ্খাৰো চ নুপ্পজ্জতি চিত্তসঙ্খাৰো চ ন নিৰুজ্ঝিস্সতি.

(খ) যস্স ৱা পন যত্থ চিত্তসঙ্খাৰো ন নিৰুজ্ঝিস্সতি তস্স তত্থ কাযসঙ্খাৰো নুপ্পজ্জতীতি? আমন্তা.

১৫৭. (ক) যস্স যত্থ ৱচীসঙ্খাৰো নুপ্পজ্জতি তস্স তত্থ চিত্তসঙ্খাৰো ন নিৰুজ্ঝিস্সতীতি?

সব্বেসং চিত্তস্স ভঙ্গক্খণে ৱিনা ৱিতক্কৱিচাৰেহি চিত্তস্স উপ্পাদক্খণে তেসং তত্থ ৱচীসঙ্খাৰো নুপ্পজ্জতি, নো চ তেসং তত্থ চিত্তসঙ্খাৰো ন নিৰুজ্ঝিস্সতি. পচ্ছিমচিত্তস্স ভঙ্গক্খণে অসঞ্ঞসত্তানং তেসং তত্থ ৱচীসঙ্খাৰো চ নুপ্পজ্জতি চিত্তসঙ্খাৰো চ ন নিৰুজ্ঝিস্সতি.

(খ) যস্স ৱা পন যত্থ চিত্তসঙ্খাৰো ন নিৰুজ্ঝিস্সতি তস্স তত্থ ৱচীসঙ্খাৰো নুপ্পজ্জতীতি? আমন্তা.