(৬) অতীতানাগতৱাৰো

(ক) অনুলোমপুগ্গলো

১৫৮. (ক) যস্স কাযসঙ্খাৰো উপ্পজ্জিত্থ তস্স ৱচীসঙ্খাৰো নিৰুজ্ঝিস্সতীতি?

সৱিতক্কসৱিচাৰপচ্ছিমচিত্তস্স ভঙ্গক্খণে অৱিতক্কঅৱিচাৰপচ্ছিমচিত্তসমঙ্গীনং যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি তেসং কাযসঙ্খাৰো উপ্পজ্জিত্থ, নো চ তেসং ৱচীসঙ্খাৰো নিৰুজ্ঝিস্সতি. ইতৰেসং তেসং কাযসঙ্খাৰো চ উপ্পজ্জিত্থ ৱচীসঙ্খাৰো চ নিৰুজ্ঝিস্সতি.

(খ) যস্স ৱা পন ৱচীসঙ্খাৰো নিৰুজ্ঝিস্সতি তস্স কাযসঙ্খাৰো উপ্পজ্জিত্থাতি? আমন্তা.

(ক) যস্স কাযসঙ্খাৰো উপ্পজ্জিত্থ তস্স চিত্তসঙ্খাৰো নিৰুজ্ঝিস্সতীতি?

পচ্ছিমচিত্তস্স ভঙ্গক্খণে তেসং কাযসঙ্খাৰো উপ্পজ্জিত্থ, নো চ তেসং চিত্তসঙ্খাৰো নিৰুজ্ঝিস্সতি. ইতৰেসং তেসং কাযসঙ্খাৰো চ উপ্পজ্জিত্থ চিত্তসঙ্খাৰো চ নিৰুজ্ঝিস্সতি.

(খ) যস্স ৱা পন চিত্তসঙ্খাৰো নিৰুজ্ঝিস্সতি তস্স কাযসঙ্খাৰো উপ্পজ্জিত্থাতি? আমন্তা.

(যথা নিৰোধৱাৰে অতীতানাগতা পুচ্ছা অনুলোমম্পি পচ্চনীকম্পি এৱং উপ্পাদনিৰোধৱাৰেপি অতীতানাগতা পুচ্ছা অনুলোমম্পি পচ্চনীকম্পি ৱিভজিতব্বং অসম্মোহন্তেন নিৰোধৱাৰেন সদিসং, নত্থি নানাকৰণং.)

উপ্পাদনিৰোধৱাৰো.