(খ) অনুলোমওকাসো

১১০. যত্থ কাযসঙ্খাৰো নিৰুজ্ঝতি…পে….

(গ) অনুলোমপুগ্গলোকাসা

১১১. (ক) যস্স যত্থ কাযসঙ্খাৰো নিৰুজ্ঝতি তস্স তত্থ ৱচীসঙ্খাৰো নিৰুজ্ঝিস্সতীতি?

দুতিযজ্ঝানং ততিযজ্ঝানং সমাপন্নানং অস্সাসপস্সাসানং ভঙ্গক্খণে তেসং তত্থ কাযসঙ্খাৰো নিৰুজ্ঝতি, নো চ তেসং তত্থ ৱচীসঙ্খাৰো নিৰুজ্ঝিস্সতি. পঠমজ্ঝানং সমাপন্নানং কামাৱচৰানং অস্সাসপস্সাসানং ভঙ্গক্খণে তেসং তত্থ কাযসঙ্খাৰো চ নিৰুজ্ঝতি ৱচীসঙ্খাৰো চ নিৰুজ্ঝিস্সতি.

(খ) যস্স ৱা পন যত্থ ৱচীসঙ্খাৰো নিৰুজ্ঝিস্সতি তস্স তত্থ কাযসঙ্খাৰো নিৰুজ্ঝতীতি?

পঠমজ্ঝানং সমাপন্নানং কামাৱচৰানং অস্সাসপস্সাসানং উপ্পাদক্খণে তেসংযেৱ ৱিনা অস্সাসপস্সাসেহি চিত্তস্স ভঙ্গক্খণে ৰূপাৱচৰানং অৰূপাৱচৰানং তেসং তত্থ ৱচীসঙ্খাৰো নিৰুজ্ঝিস্সতি, নো চ তেসং তত্থ কাযসঙ্খাৰো নিৰুজ্ঝতি. পঠমজ্ঝানং সমাপন্নানং কামাৱচৰানং অস্সাসপস্সাসানং ভঙ্গক্খণে তেসং তত্থ ৱচীসঙ্খাৰো চ নিৰুজ্ঝিস্সতি কাযসঙ্খাৰো চ নিৰুজ্ঝতি.

(ক) যস্স যত্থ কাযসঙ্খাৰো নিৰুজ্ঝতি তস্স তত্থ চিত্তসঙ্খাৰো নিৰুজ্ঝিস্সতীতি? আমন্তা.

(খ) যস্স ৱা পন যত্থ চিত্তসঙ্খাৰো নিৰুজ্ঝিস্সতি তস্স তত্থ কাযসঙ্খাৰো নিৰুজ্ঝতীতি?

সব্বেসং চিত্তস্স উপ্পাদক্খণে ৱিনা অস্সাসপস্সাসেহি চিত্তস্স ভঙ্গক্খণে তেসং তত্থ চিত্তসঙ্খাৰো নিৰুজ্ঝিস্সতি, নো চ তেসং তত্থ কাযসঙ্খাৰো নিৰুজ্ঝতি. অস্সাসপস্সাসানং ভঙ্গক্খণে তেসং তত্থ চিত্তসঙ্খাৰো চ নিৰুজ্ঝিস্সতি কাযসঙ্খাৰো চ নিৰুজ্ঝতি.

১১২. (ক) যস্স যত্থ ৱচীসঙ্খাৰো নিৰুজ্ঝতি তস্স তত্থ চিত্তসঙ্খাৰো নিৰুজ্ঝিস্সতীতি?

সৱিতক্কসৱিচাৰপচ্ছিমচিত্তস্স ভঙ্গক্খণে তেসং তত্থ ৱচীসঙ্খাৰো নিৰুজ্ঝতি, নো চ তেসং তত্থ চিত্তসঙ্খাৰো নিৰুজ্ঝিস্সতি. ইতৰেসং ৱিতক্কৱিচাৰানং ভঙ্গক্খণে তেসং তত্থ ৱচীসঙ্খাৰো চ নিৰুজ্ঝতি চিত্তসঙ্খাৰো চ নিৰুজ্ঝিস্সতি.

(খ) যস্স ৱা পন যত্থ চিত্তসঙ্খাৰো নিৰুজ্ঝিস্সতি তস্স তত্থ ৱচীসঙ্খাৰো নিৰুজ্ঝতীতি?

সব্বেসং চিত্তস্স উপ্পাদক্খণে ৱিনা ৱিতক্কৱিচাৰেহি চিত্তস্স ভঙ্গক্খণে তেসং তত্থ চিত্তসঙ্খাৰো নিৰুজ্ঝিস্সতি, নো চ তেসং তত্থ ৱচীসঙ্খাৰো নিৰুজ্ঝতি. ৱিতক্কৱিচাৰানং ভঙ্গক্খণে তেসং তত্থ চিত্তসঙ্খাৰো চ নিৰুজ্ঝিস্সতি ৱচীসঙ্খাৰো চ নিৰুজ্ঝতি.

(ঘ) পচ্চনীকপুগ্গলো

১১৩. (ক) যস্স কাযসঙ্খাৰো ন নিৰুজ্ঝতি তস্স ৱচীসঙ্খাৰো ন নিৰুজ্ঝিস্সতীতি?

সব্বেসং চিত্তস্স উপ্পাদক্খণে ৱিনা অস্সাসপস্সাসেহি চিত্তস্স ভঙ্গক্খণে নিৰোধসমাপন্নানং অসঞ্ঞসত্তানং তেসং কাযসঙ্খাৰো ন নিৰুজ্ঝতি, নো চ তেসং ৱচীসঙ্খাৰো ন নিৰুজ্ঝিস্সতি. সৱিতক্কসৱিচাৰপচ্ছিমচিত্তস্স ভঙ্গক্খণে অৱিতক্কঅৱিচাৰপচ্ছিমচিত্তসমঙ্গীনং যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি তেসং কাযসঙ্খাৰো চ ন নিৰুজ্ঝতি ৱচীসঙ্খাৰো চ ন নিৰুজ্ঝিস্সতি.

(খ) যস্স ৱা পন ৱচীসঙ্খাৰো ন নিৰুজ্ঝিস্সতি তস্স কাযসঙ্খাৰো ন নিৰুজ্ঝতীতি? আমন্তা.

(ক) যস্স কাযসঙ্খাৰো ন নিৰুজ্ঝতি তস্স চিত্তসঙ্খাৰো ন নিৰুজ্ঝিস্সতীতি?

সব্বেসং চিত্তস্স উপ্পাদক্খণে ৱিনা অস্সাসপস্সাসেহি চিত্তস্স ভঙ্গক্খণে নিৰোধসমাপন্নানং অসঞ্ঞসত্তানং তেসং কাযসঙ্খাৰো ন নিৰুজ্ঝতি, নো চ তেসং চিত্তসঙ্খাৰো ন নিৰুজ্ঝিস্সতি. পচ্ছিমচিত্তস্স ভঙ্গক্খণে তেসং কাযসঙ্খাৰো চ ন নিৰুজ্ঝতি চিত্তসঙ্খাৰো চ ন নিৰুজ্ঝিস্সতি.

(খ) যস্স ৱা পন…পে…? আমন্তা.

১১৪. (ক) যস্স ৱচীসঙ্খাৰো ন নিৰুজ্ঝতি তস্স চিত্তসঙ্খাৰো ন নিৰুজ্ঝিস্সতীতি?

সব্বেসং চিত্তস্স উপ্পাদক্খণে ৱিনা ৱিতক্কৱিচাৰেহি চিত্তস্স ভঙ্গক্খণে নিৰোধসমাপন্নানং অসঞ্ঞসত্তানং তেসং ৱচীসঙ্খাৰো ন নিৰুজ্ঝতি, নো চ তেসং চিত্তসঙ্খাৰো ন নিৰুজ্ঝিস্সতি. অৱিতক্কঅৱিচাৰপচ্ছিমচিত্তস্স ভঙ্গক্খণে তেসং ৱচীসঙ্খাৰো চ ন নিৰুজ্ঝতি চিত্তসঙ্খাৰো চ ন নিৰুজ্ঝিস্সতি.

(খ) যস্স ৱা পন চিত্তসঙ্খাৰো ন নিৰুজ্ঝিস্সতি তস্স ৱচীসঙ্খাৰো ন নিৰুজ্ঝতীতি?

সৱিতক্কসৱিচাৰপচ্ছিমচিত্তস্স ভঙ্গক্খণে তেসং চিত্তসঙ্খাৰো ন নিৰুজ্ঝিস্সতি, নো চ তেসং ৱচীসঙ্খাৰো ন নিৰুজ্ঝতি. অৱিতক্কঅৱিচাৰপচ্ছিমচিত্তস্স ভঙ্গক্খণে তেসং চিত্তসঙ্খাৰো চ ন নিৰুজ্ঝিস্সতি ৱচীসঙ্খাৰো চ ন নিৰুজ্ঝতি.

(ঙ) পচ্চনীকওকাসো

১১৫. যত্থ কাযসঙ্খাৰো ন নিৰুজ্ঝতি…পে….

(চ) পচ্চনীকপুগ্গলোকাসা

১১৬. (ক) যস্স যত্থ কাযসঙ্খাৰো ন নিৰুজ্ঝতি তস্স তত্থ ৱচীসঙ্খাৰো ন নিৰুজ্ঝিস্সতীতি?

পঠমজ্ঝানং সমাপন্নানং কামাৱচৰানং অস্সাসপস্সাসানং উপ্পাদক্খণে তেসংযেৱ ৱিনা অস্সাসপস্সাসেহি চিত্তস্স ভঙ্গক্খণে ৰূপাৱচৰানং অৰূপাৱচৰানং তেসং তত্থ কাযসঙ্খাৰো ন নিৰুজ্ঝতি, নো চ তেসং তত্থ ৱচীসঙ্খাৰো ন নিৰুজ্ঝিস্সতি. সৱিতক্কসৱিচাৰপচ্ছিমচিত্তস্স ভঙ্গক্খণে অৱিতক্কঅৱিচাৰপচ্ছিমচিত্তসমঙ্গীনং যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি দুতিযজ্ঝানং ততিযজ্ঝানং সমাপন্নানং অস্সাসপস্সাসানং উপ্পাদক্খণে তেসংযেৱ ৱিনা অস্সাসপস্সাসেহি চিত্তস্স ভঙ্গক্খণে চতুত্থজ্ঝানং সমাপন্নানং অসঞ্ঞসত্তানং তেসং তত্থ কাযসঙ্খাৰো চ ন নিৰুজ্ঝতি ৱচীসঙ্খাৰো চ ন নিৰুজ্ঝিস্সতি.

(খ) যস্স ৱা পন যত্থ ৱচীসঙ্খাৰো ন নিৰুজ্ঝিস্সতি তস্স তত্থ কাযসঙ্খাৰো ন নিৰুজ্ঝতীতি?

দুতিযজ্ঝানং ততিযজ্ঝানং সমাপন্নানং অস্সাসপস্সাসানং ভঙ্গক্খণে তেসং তত্থ ৱচীসঙ্খাৰো ন নিৰুজ্ঝিস্সতি, নো চ তেসং তত্থ কাযসঙ্খাৰো ন নিৰুজ্ঝতি. সৱিতক্কসৱিচাৰপচ্ছিমচিত্তস্স ভঙ্গক্খণে অৱিতক্কঅৱিচাৰপচ্ছিমচিত্তসমঙ্গীনং যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি দুতিযজ্ঝানং ততিযজ্ঝানং সমাপন্নানং অস্সাসপস্সাসানং উপ্পাদক্খণে তেসংযেৱ ৱিনা অস্সাসপস্সাসেহি চিত্তস্স ভঙ্গক্খণে চতুত্থজ্ঝানং সমাপন্নানং অসঞ্ঞসত্তানং তেসং তত্থ ৱচীসঙ্খাৰো চ ন নিৰুজ্ঝিস্সতি কাযসঙ্খাৰো চ ন নিৰুজ্ঝতি.

(ক) যস্স যত্থ কাযসঙ্খাৰো ন নিৰুজ্ঝতি তস্স তত্থ চিত্তসঙ্খাৰো ন নিৰুজ্ঝিস্সতীতি?

সব্বেসং চিত্তস্স উপ্পাদক্খণে ৱিনা অস্সাসপস্সাসেহি চিত্তস্স ভঙ্গক্খণে তেসং তত্থ কাযসঙ্খাৰো ন নিৰুজ্ঝতি, নো চ তেসং তত্থ চিত্তসঙ্খাৰো ন নিৰুজ্ঝিস্সতি. পচ্ছিমচিত্তস্স ভঙ্গক্খণে অসঞ্ঞসত্তানং তেসং তত্থ কাযসঙ্খাৰো চ ন নিৰুজ্ঝতি চিত্তসঙ্খাৰো চ ন নিৰুজ্ঝিস্সতি.

(খ) যস্স ৱা পন…পে…? আমন্তা.

১১৭. (ক) যস্স যত্থ ৱচীসঙ্খাৰো ন নিৰুজ্ঝতি তস্স তত্থ চিত্তসঙ্খাৰো ন নিৰুজ্ঝিস্সতীতি?

সব্বেসং চিত্তস্স উপ্পাদক্খণে ৱিনা ৱিতক্কৱিচাৰেহি চিত্তস্স ভঙ্গক্খণে তেসং তত্থ ৱচীসঙ্খাৰো ন নিৰুজ্ঝতি, নো চ তেসং তত্থ চিত্তসঙ্খাৰো ন নিৰুজ্ঝিস্সতি. অৱিতক্কঅৱিচাৰপচ্ছিমচিত্তস্স ভঙ্গক্খণে অসঞ্ঞসত্তানং তেসং তত্থ ৱচীসঙ্খাৰো চ ন নিৰুজ্ঝতি চিত্তসঙ্খাৰো চ ন নিৰুজ্ঝিস্সতি.

(খ) যস্স ৱা পন যত্থ চিত্তসঙ্খাৰো ন নিৰুজ্ঝিস্সতি তস্স তত্থ ৱচীসঙ্খাৰো ন নিৰুজ্ঝতীতি?

সৱিতক্কসৱিচাৰপচ্ছিমচিত্তস্স ভঙ্গক্খণে তেসং তত্থ চিত্তসঙ্খাৰো ন নিৰুজ্ঝিস্সতি, নো চ তেসং তত্থ ৱচীসঙ্খাৰো ন নিৰুজ্ঝতি. অৱিতক্কঅৱিচাৰপচ্ছিমচিত্তস্স ভঙ্গক্খণে অসঞ্ঞসত্তানং তেসং তত্থ চিত্তসঙ্খাৰো চ ন নিৰুজ্ঝিস্সতি ৱচীসঙ্খাৰো চ ন নিৰুজ্ঝতি.