(৫) পচ্চুপ্পন্নানাগতৱাৰো

(ক) অনুলোমপুগ্গলো

৫৯. (ক) যস্স কাযসঙ্খাৰো উপ্পজ্জতি তস্স ৱচীসঙ্খাৰো উপ্পজ্জিস্সতীতি? আমন্তা.

(খ) যস্স ৱা পন ৱচীসঙ্খাৰো উপ্পজ্জিস্সতি তস্স কাযসঙ্খাৰো উপ্পজ্জতীতি?

সব্বেসং চিত্তস্স ভঙ্গক্খণে ৱিনা অস্সাসপস্সাসেহি চিত্তস্স উপ্পাদক্খণে নিৰোধসমাপন্নানং অসঞ্ঞসত্তানং তেসং ৱচীসঙ্খাৰো উপ্পজ্জিস্সতি, নো চ তেসং কাযসঙ্খাৰো উপ্পজ্জতি. অস্সাসপস্সাসানং উপ্পাদক্খণে তেসং ৱচীসঙ্খাৰো চ উপ্পজ্জিস্সতি কাযসঙ্খাৰো চ উপ্পজ্জতি.

(ক) যস্স কাযসঙ্খাৰো উপ্পজ্জতি তস্স চিত্তসঙ্খাৰো উপ্পজ্জিস্সতীতি? আমন্তা.

(খ) যস্স ৱা পন চিত্তসঙ্খাৰো উপ্পজ্জিস্সতি তস্স কাযসঙ্খাৰো উপ্পজ্জতীতি?

সব্বেসং চিত্তস্স ভঙ্গক্খণে ৱিনা অস্সাসপস্সাসেহি চিত্তস্স উপ্পাদক্খণে নিৰোধসমাপন্নানং অসঞ্ঞসত্তানং তেসং চিত্তসঙ্খাৰো উপ্পজ্জিস্সতি, নো চ তেসং কাযসঙ্খাৰো উপ্পজ্জতি. অস্সাসপস্সাসানং উপ্পাদক্খণে তেসং চিত্তসঙ্খাৰো চ উপ্পজ্জিস্সতি কাযসঙ্খাৰো চ উপ্পজ্জতি.

৬০. (ক) যস্স ৱচীসঙ্খাৰো উপ্পজ্জতি তস্স চিত্তসঙ্খাৰো উপ্পজ্জিস্সতীতি?

সৱিতক্কসৱিচাৰপচ্ছিমচিত্তস্স উপ্পাদক্খণে তেসং ৱচীসঙ্খাৰো উপ্পজ্জতি, নো চ তেসং চিত্তসঙ্খাৰো উপ্পজ্জিস্সতি. ইতৰেসং ৱিতক্কৱিচাৰানং উপ্পাদক্খণে তেসং ৱচীসঙ্খাৰো চ উপ্পজ্জতি চিত্তসঙ্খাৰো চ উপ্পজ্জিস্সতি.

(খ) যস্স ৱা পন চিত্তসঙ্খাৰো উপ্পজ্জিস্সতি তস্স ৱচীসঙ্খাৰো উপ্পজ্জতীতি?

সব্বেসং চিত্তস্স ভঙ্গক্খণে ৱিনা ৱিতক্কৱিচাৰেহি চিত্তস্স উপ্পাদক্খণে নিৰোধসমাপন্নানং অসঞ্ঞসত্তানং তেসং চিত্তসঙ্খাৰো উপ্পজ্জিস্সতি, নো চ তেসং ৱচীসঙ্খাৰো উপ্পজ্জতি. ৱিতক্কৱিচাৰানং উপ্পাদক্খণে তেসং চিত্তসঙ্খাৰো চ উপ্পজ্জিস্সতি ৱচীসঙ্খাৰো চ উপ্পজ্জতি.

(খ) অনুলোমওকাসো

৬১. যত্থ কাযসঙ্খাৰো উপ্পজ্জতি…পে….

(গ) অনুলোমপুগ্গলোকাসা

৬২. (ক) যস্স যত্থ কাযসঙ্খাৰো উপ্পজ্জতি তস্স তত্থ ৱচীসঙ্খাৰো উপ্পজ্জিস্সতীতি?

দুতিযজ্ঝানং ততিযজ্ঝানং সমাপন্নানং অস্সাসপস্সাসানং উপ্পাদক্খণে তেসং তত্থ কাযসঙ্খাৰো উপ্পজ্জতি, নো চ তেসং তত্থ ৱচীসঙ্খাৰো উপ্পজ্জিস্সতি. পঠমজ্ঝানং সমাপন্নানং কামাৱচৰানং অস্সাসপস্সাসানং উপ্পাদক্খণে তেসং তত্থ কাযসঙ্খাৰো চ উপ্পজ্জতি ৱচীসঙ্খাৰো চ উপ্পজ্জিস্সতি.

(খ) যস্স ৱা পন যত্থ ৱচীসঙ্খাৰো উপ্পজ্জিস্সতি তস্স তত্থ কাযসঙ্খাৰো উপ্পজ্জতীতি?

পঠমজ্ঝানং সমাপন্নানং কামাৱচৰানং অস্সাসপস্সাসানং ভঙ্গক্খণে তেসংযেৱ ৱিনা অস্সাসপস্সাসেহি চিত্তস্স উপ্পাদক্খণে ৰূপাৱচৰানং অৰূপাৱচৰানং তেসং তত্থ ৱচীসঙ্খাৰো উপ্পজ্জিস্সতি, নো চ তেসং তত্থ কাযসঙ্খাৰো উপ্পজ্জতি. পঠমজ্ঝানং সমাপন্নানং কামাৱচৰানং অস্সাসপস্সাসানং উপ্পাদক্খণে তেসং তত্থ ৱচীসঙ্খাৰো চ উপ্পজ্জিস্সতি কাযসঙ্খাৰো চ উপ্পজ্জতি.

(ক) যস্স যত্থ কাযসঙ্খাৰো উপ্পজ্জতি তস্স তত্থ চিত্তসঙ্খাৰো উপ্পজ্জিস্সতীতি? আমন্তা.

(খ) যস্স ৱা পন যত্থ চিত্তসঙ্খাৰো উপ্পজ্জিস্সতি তস্স তত্থ কাযসঙ্খাৰো উপ্পজ্জতীতি?

সব্বেসং চিত্তস্স ভঙ্গক্খণে ৱিনা অস্সাসপস্সাসেহি চিত্তস্স উপ্পাদক্খণে তেসং তত্থ চিত্তসঙ্খাৰো উপ্পজ্জিস্সতি, নো চ তেসং তত্থ কাযসঙ্খাৰো উপ্পজ্জতি. অস্সাসপস্সাসানং উপ্পাদক্খণে তেসং তত্থ চিত্তসঙ্খাৰো চ উপ্পজ্জিস্সতি কাযসঙ্খাৰো চ উপ্পজ্জতি.

৬৩. (ক) যস্স যত্থ ৱচীসঙ্খাৰো উপ্পজ্জতি তস্স তত্থ চিত্তসঙ্খাৰো উপ্পজ্জিস্সতীতি?

সৱিতক্কসৱিচাৰপচ্ছিমচিত্তস্স উপ্পাদক্খণে তেসং তত্থ ৱচীসঙ্খাৰো উপ্পজ্জতি, নো চ তেসং তত্থ চিত্তসঙ্খাৰো উপ্পজ্জিস্সতি. ইতৰেসং ৱিতক্কৱিচাৰানং উপ্পাদক্খণে তেসং তত্থ ৱচীসঙ্খাৰো চ উপ্পজ্জতি চিত্তসঙ্খাৰো চ উপ্পজ্জিস্সতি.

(খ) যস্স ৱা পন যত্থ চিত্তসঙ্খাৰো উপ্পজ্জিস্সতি তস্স তত্থ ৱচীসঙ্খাৰো উপ্পজ্জতীতি?

সব্বেসং চিত্তস্স ভঙ্গক্খণে ৱিনা ৱিতক্কৱিচাৰেহি চিত্তস্স উপ্পাদক্খণে তেসং তত্থ চিত্তসঙ্খাৰো উপ্পজ্জিস্সতি, নো চ তেসং তত্থ ৱচীসঙ্খাৰো উপ্পজ্জতি. ৱিতক্কৱিচাৰানং উপ্পাদক্খণে তেসং তত্থ চিত্তসঙ্খাৰো চ উপ্পজ্জিস্সতি ৱচীসঙ্খাৰো চ উপ্পজ্জতি.

(ঘ) পচ্চনীকপুগ্গলো

৬৪. (ক) যস্স কাযসঙ্খাৰো নুপ্পজ্জতি তস্স ৱচীসঙ্খাৰো নুপ্পজ্জিস্সতীতি?

সব্বেসং চিত্তস্স ভঙ্গক্খণে ৱিনা অস্সাসপস্সাসেহি চিত্তস্স উপ্পাদক্খণে নিৰোধসমাপন্নানং অসঞ্ঞসত্তানং তেসং কাযসঙ্খাৰো নুপ্পজ্জতি, নো চ তেসং ৱচীসঙ্খাৰো নুপ্পজ্জিস্সতি. পচ্ছিমচিত্তসমঙ্গীনং যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি তেসং কাযসঙ্খাৰো চ নুপ্পজ্জতি ৱচীসঙ্খাৰো চ নুপ্পজ্জিস্সতি.

(খ) যস্স ৱা পন ৱচীসঙ্খাৰো নুপ্পজ্জিস্সতি তস্স কাযসঙ্খাৰো নুপ্পজ্জতীতি? আমন্তা.

(ক) যস্স কাযসঙ্খাৰো নুপ্পজ্জতি তস্স চিত্তসঙ্খাৰো নুপ্পজ্জিস্সতীতি?

সব্বেসং চিত্তস্স ভঙ্গক্খণে ৱিনা অস্সাসপস্সাসেহি চিত্তস্স উপ্পাদক্খণে নিৰোধসমাপন্নানং অসঞ্ঞসত্তানং তেসং কাযসঙ্খাৰো নুপ্পজ্জতি, নো চ তেসং চিত্তসঙ্খাৰো নুপ্পজ্জিস্সতি. পচ্ছিমচিত্তসমঙ্গীনং তেসং কাযসঙ্খাৰো চ নুপ্পজ্জতি চিত্তসঙ্খাৰো চ নুপ্পজ্জিস্সতি.

(খ) যস্স ৱা পন…পে…? আমন্তা.

৬৫. (ক) যস্স ৱচীসঙ্খাৰো নুপ্পজ্জতি তস্স চিত্তসঙ্খাৰো নুপ্পজ্জিস্সতীতি?

সব্বেসং চিত্তস্স ভঙ্গক্খণে ৱিনা ৱিতক্কৱিচাৰেহি চিত্তস্স উপ্পাদক্খণে নিৰোধসমাপন্নানং অসঞ্ঞসত্তানং তেসং ৱচীসঙ্খাৰো নুপ্পজ্জতি, নো চ তেসং চিত্তসঙ্খাৰো নুপ্পজ্জিস্সতি. সৱিতক্কসৱিচাৰপচ্ছিমচিত্তস্স ভঙ্গক্খণে অৱিতক্কঅৱিচাৰপচ্ছিমচিত্তসমঙ্গীনং তেসং ৱচীসঙ্খাৰো চ নুপ্পজ্জতি চিত্তসঙ্খাৰো চ নুপ্পজ্জিস্সতি.

(খ) যস্স ৱা পন চিত্তসঙ্খাৰো নুপ্পজ্জিস্সতি তস্স ৱচীসঙ্খাৰো নুপ্পজ্জতীতি?

সৱিতক্কসৱিচাৰপচ্ছিমচিত্তস্স উপ্পাদক্খণে তেসং চিত্তসঙ্খাৰো নুপ্পজ্জিস্সতি, নো চ তেসং ৱচীসঙ্খাৰো নুপ্পজ্জতি. সৱিতক্কসৱিচাৰপচ্ছিমচিত্তস্স ভঙ্গক্খণে অৱিতক্কঅৱিচাৰপচ্ছিমচিত্তসমঙ্গীনং তেসং চিত্তসঙ্খাৰো চ নুপ্পজ্জিস্সতি ৱচীসঙ্খাৰো চ নুপ্পজ্জতি.

৪. (ঙ) পচ্চনীকওকাসো

৬৬. যত্থ কাযসঙ্খাৰো নুপ্পজ্জতি…পে….

(চ) পচ্চনীকপুগ্গলোকাসা

৬৭. (ক) যস্স যত্থ কাযসঙ্খাৰো নুপ্পজ্জতি তস্স তত্থ ৱচীসঙ্খাৰো নুপ্পজ্জিস্সতীতি?

পঠমজ্ঝানং সমাপন্নানং কামাৱচৰানং অস্সাসপস্সাসানং ভঙ্গক্খণে তেসংযেৱ ৱিনা অস্সাসপস্সাসেহি চিত্তস্স উপ্পাদক্খণে ৰূপাৱচৰানং অৰূপাৱচৰানং তেসং তত্থ কাযসঙ্খাৰো নুপ্পজ্জতি, নো চ তেসং তত্থ ৱচীসঙ্খাৰো নুপ্পজ্জিস্সতি. পচ্ছিমচিত্তসমঙ্গীনং যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি দুতিযজ্ঝানং ততিযজ্ঝানং সমাপন্নানং অস্সাসপস্সাসানং ভঙ্গক্খণে তেসংযেৱ ৱিনা অস্সাসপস্সাসেহি চিত্তস্স উপ্পাদক্খণে চতুত্থজ্ঝানং সমাপন্নানং অসঞ্ঞসত্তানং তেসং তত্থ কাযসঙ্খাৰো চ নুপ্পজ্জতি ৱচীসঙ্খাৰো চ নুপ্পজ্জিস্সতি.

(খ) যস্স ৱা পন যত্থ ৱচীসঙ্খাৰো নুপ্পজ্জিস্সতি তস্স তত্থ কাযসঙ্খাৰো নুপ্পজ্জতীতি?

দুতিযজ্ঝানং ততিযজ্ঝানং সমাপন্নানং অস্সাসপস্সাসানং উপ্পাদক্খণে তেসং তত্থ ৱচীসঙ্খাৰো নুপ্পজ্জিস্সতি, নো চ তেসং তত্থ কাযসঙ্খাৰো নুপ্পজ্জতি. পচ্ছিমচিত্তসমঙ্গীনং যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি দুতিযজ্ঝানং ততিযজ্ঝানং সমাপন্নানং অস্সাসপস্সাসানং ভঙ্গক্খণে তেসংযেৱ ৱিনা অস্সাসপস্সাসেহি চিত্তস্স উপ্পাদক্খণে চতুত্থজ্ঝানং সমাপন্নানং অসঞ্ঞসত্তানং তেসং তত্থ ৱচীসঙ্খাৰো চ নুপ্পজ্জিস্সতি কাযসঙ্খাৰো চ নুপ্পজ্জতি.

(ক) যস্স যত্থ কাযসঙ্খাৰো নুপ্পজ্জতি তস্স তত্থ চিত্তসঙ্খাৰো নুপ্পজ্জিস্সতীতি?

সব্বেসং চিত্তস্স ভঙ্গক্খণে ৱিনা অস্সাসপস্সাসেহি চিত্তস্স উপ্পাদক্খণে তেসং তত্থ কাযসঙ্খাৰো নুপ্পজ্জতি, নো চ তেসং তত্থ চিত্তসঙ্খাৰো নুপ্পজ্জিস্সতি. পচ্ছিমচিত্তসমঙ্গীনং অসঞ্ঞসত্তানং তেসং তত্থ কাযসঙ্খাৰো চ নুপ্পজ্জতি চিত্তসঙ্খাৰো চ নুপ্পজ্জিস্সতি.

(খ) যস্স ৱা পন যত্থ চিত্তসঙ্খাৰো নুপ্পজ্জিস্সতি তস্স তত্থ কাযসঙ্খাৰো নুপ্পজ্জতীতি? আমন্তা.

৬৮. (ক) যস্স যত্থ ৱচীসঙ্খাৰো নুপ্পজ্জতি তস্স তত্থ চিত্তসঙ্খাৰো নুপ্পজ্জিস্সতীতি?

সব্বেসং চিত্তস্স ভঙ্গক্খণে ৱিনা ৱিতক্কৱিচাৰেহি চিত্তস্স উপ্পাদক্খণে তেসং তত্থ ৱচীসঙ্খাৰো নুপ্পজ্জতি, নো চ তেসং তত্থ চিত্তসঙ্খাৰো নুপ্পজ্জিস্সতি. সৱিতক্কসৱিচাৰপচ্ছিমচিত্তস্স ভঙ্গক্খণে অৱিতক্কঅৱিচাৰপচ্ছিমচিত্তসমঙ্গীনং অসঞ্ঞসত্তানং তেসং তত্থ ৱচীসঙ্খাৰো চ নুপ্পজ্জতি চিত্তসঙ্খাৰো চ নুপ্পজ্জিস্সতি.

(খ) যস্স ৱা পন যত্থ চিত্তসঙ্খাৰো নুপ্পজ্জিস্সতি তস্স তত্থ ৱচীসঙ্খাৰো নুপ্পজ্জতীতি?

সৱিতক্কসৱিচাৰপচ্ছিমচিত্তস্স উপ্পাদক্খণে তেসং তত্থ চিত্তসঙ্খাৰো নুপ্পজ্জিস্সতি, নো চ তেসং তত্থ ৱচীসঙ্খাৰো নুপ্পজ্জতি. সৱিতক্কসৱিচাৰপচ্ছিমচিত্তস্স ভঙ্গক্খণে অৱিতক্কঅৱিচাৰপচ্ছিমচিত্তসমঙ্গীনং অসঞ্ঞসত্তানং তেসং তত্থ চিত্তসঙ্খাৰো চ নুপ্পজ্জিস্সতি ৱচীসঙ্খাৰো চ নুপ্পজ্জতি.