(৬) অতীতানাগতৱাৰো

(ক) অনুলোমপুগ্গলো

৬৯. (ক) যস্স কাযসঙ্খাৰো উপ্পজ্জিত্থ তস্স ৱচীসঙ্খাৰো উপ্পজ্জিস্সতীতি?

পচ্ছিমচিত্তসমঙ্গীনং যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি তেসং কাযসঙ্খাৰো উপ্পজ্জিত্থ, নো চ তেসং ৱচীসঙ্খাৰো উপ্পজ্জিস্সতি. ইতৰেসং তেসং কাযসঙ্খাৰো চ উপ্পজ্জিত্থ ৱচীসঙ্খাৰো চ উপ্পজ্জিস্সতি.

(খ) যস্স ৱা পন…পে…? আমন্তা.

(ক) যস্স কাযসঙ্খাৰো উপ্পজ্জিত্থ তস্স চিত্তসঙ্খাৰো উপ্পজ্জিস্সতীতি?

পচ্ছিমচিত্তসমঙ্গীনং তেসং কাযসঙ্খাৰো উপ্পজ্জিত্থ, নো চ তেসং চিত্তসঙ্খাৰো উপ্পজ্জিস্সতি. ইতৰেসং তেসং কাযসঙ্খাৰো চ উপ্পজ্জিত্থ চিত্তসঙ্খাৰো চ উপ্পজ্জিস্সতি.

(খ) যস্স ৱা পন…পে…. আমন্তা.

৭০. (ক) যস্স ৱচীসঙ্খাৰো উপ্পজ্জিত্থ তস্স চিত্তসঙ্খাৰো উপ্পজ্জিস্সতীতি?

পচ্ছিমচিত্তসমঙ্গীনং তেসং ৱচীসঙ্খাৰো উপ্পজ্জিত্থ, নো চ তেসং চিত্তসঙ্খাৰো উপ্পজ্জিস্সতি. ইতৰেসং তেসং ৱচীসঙ্খাৰো চ উপ্পজ্জিত্থ চিত্তসঙ্খাৰো চ উপ্পজ্জিস্সতি.

(খ) যস্স ৱা পন…পে…? আমন্তা.

(খ) অনুলোমওকাসো

৭১. যত্থ কাযসঙ্খাৰো উপ্পজ্জিত্থ…পে….

(গ) অনুলোমপুগ্গলোকাসা

৭২. (ক) যস্স যত্থ কাযসঙ্খাৰো উপ্পজ্জিত্থ তস্স তত্থ ৱচীসঙ্খাৰো উপ্পজ্জিস্সতীতি?

কামাৱচৰে পচ্ছিমচিত্তসমঙ্গীনং দুতিযজ্ঝানং ততিযজ্ঝানং সমাপন্নানং তেসং তত্থ কাযসঙ্খাৰো উপ্পজ্জিত্থ, নো চ তেসং তত্থ ৱচীসঙ্খাৰো উপ্পজ্জিস্সতি. পঠমজ্ঝানং সমাপন্নানং ইতৰেসং কামাৱচৰানং তেসং তত্থ কাযসঙ্খাৰো চ উপ্পজ্জিত্থ ৱচীসঙ্খাৰো চ উপ্পজ্জিস্সতি.

(খ) যস্স ৱা পন যত্থ ৱচীসঙ্খাৰো উপ্পজ্জিস্সতি তস্স তত্থ কাযসঙ্খাৰো উপ্পজ্জিত্থাতি?

ৰূপাৱচৰানং অৰূপাৱচৰানং তেসং তত্থ ৱচীসঙ্খাৰো উপ্পজ্জিস্সতি, নো চ তেসং তত্থ কাযসঙ্খাৰো উপ্পজ্জিত্থ. পঠমজ্ঝানং সমাপন্নানং কামাৱচৰানং তেসং তত্থ ৱচীসঙ্খাৰো চ উপ্পজ্জিস্সতি কাযসঙ্খাৰো চ উপ্পজ্জিত্থ.

(ক) যস্স যত্থ কাযসঙ্খাৰো উপ্পজ্জিত্থ তস্স তত্থ চিত্তসঙ্খাৰো উপ্পজ্জিস্সতীতি?

কামাৱচৰে পচ্ছিমচিত্তসমঙ্গীনং তেসং তত্থ কাযসঙ্খাৰো উপ্পজ্জিত্থ, নো চ তেসং তত্থ চিত্তসঙ্খাৰো উপ্পজ্জিস্সতি. পঠমজ্ঝানং দুতিযজ্ঝানং ততিযজ্ঝানং সমাপন্নানং ইতৰেসং কামাৱচৰানং তেসং তত্থ কাযসঙ্খাৰো চ উপ্পজ্জিত্থ চিত্তসঙ্খাৰো চ উপ্পজ্জিস্সতি.

(খ) যস্স ৱা পন যত্থ চিত্তসঙ্খাৰো উপ্পজ্জিস্সতি তস্স তত্থ কাযসঙ্খাৰো উপ্পজ্জিত্থাতি?

চতুত্থজ্ঝানং সমাপন্নানং ৰূপাৱচৰানং অৰূপাৱচৰানং তেসং তত্থ চিত্তসঙ্খাৰো উপ্পজ্জিস্সতি, নো চ তেসং তত্থ কাযসঙ্খাৰো উপ্পজ্জিত্থ. পঠমজ্ঝানং দুতিযজ্ঝানং ততিযজ্ঝানং সমাপন্নানং কামাৱচৰানং তেসং তত্থ চিত্তসঙ্খাৰো চ উপ্পজ্জিস্সতি কাযসঙ্খাৰো চ উপ্পজ্জিত্থ.

৭৩. (ক) যস্স যত্থ ৱচীসঙ্খাৰো উপ্পজ্জিত্থ তস্স তত্থ চিত্তসঙ্খাৰো উপ্পজ্জিস্সতীতি?

সৱিতক্কসৱিচাৰভূমিযং পচ্ছিমচিত্তসমঙ্গীনং তেসং তত্থ ৱচীসঙ্খাৰো উপ্পজ্জিত্থ, নো চ তেসং তত্থ চিত্তসঙ্খাৰো উপ্পজ্জিস্সতি. ইতৰেসং সৱিতক্কসৱিচাৰভূমিযং তেসং তত্থ ৱচীসঙ্খাৰো চ উপ্পজ্জিত্থ চিত্তসঙ্খাৰো চ উপ্পজ্জিস্সতি.

(খ) যস্স ৱা পন যত্থ চিত্তসঙ্খাৰো উপ্পজ্জিস্সতি তস্স তত্থ ৱচীসঙ্খাৰো উপ্পজ্জিত্থাতি?

অৱিতক্কঅৱিচাৰভূমিযং তেসং তত্থ চিত্তসঙ্খাৰো উপ্পজ্জিস্সতি, নো চ তেসং তত্থ ৱচীসঙ্খাৰো উপ্পজ্জিত্থ. সৱিতক্কসৱিচাৰভূমিযং তেসং তত্থ চিত্তসঙ্খাৰো চ উপ্পজ্জিস্সতি ৱচীসঙ্খাৰো চ উপ্পজ্জিত্থ.

(ঘ) পচ্চনীকপুগ্গলো

৭৪. (ক) যস্স কাযসঙ্খাৰো নুপ্পজ্জিত্থ তস্স ৱচীসঙ্খাৰো নুপ্পজ্জিস্সতীতি? নত্থি.

(খ) যস্স ৱা পন ৱচীসঙ্খাৰো নুপ্পজ্জিস্সতি তস্স কাযসঙ্খাৰো নুপ্পজ্জিত্থাতি? উপ্পজ্জিত্থ.

(ক) যস্স কাযসঙ্খাৰো নুপ্পজ্জিত্থ তস্স চিত্তসঙ্খাৰো নুপ্পজ্জিস্সতীতি? নত্থি.

(খ) যস্স ৱা পন চিত্তসঙ্খাৰো নুপ্পজ্জিস্সতি তস্স কাযসঙ্খাৰো নুপ্পজ্জিত্থাতি? উপ্পজ্জিত্থ.

৭৫. (ক) যস্স ৱচীসঙ্খাৰো নুপ্পজ্জিত্থ তস্স চিত্তসঙ্খাৰো নুপ্পজ্জিস্সতীতি? নত্থি.

(খ) যস্স ৱা পন চিত্তসঙ্খাৰো নুপ্পজ্জিস্সতি তস্স ৱচীসঙ্খাৰো নুপ্পজ্জিত্থাতি? উপ্পজ্জিত্থ.

(ঙ) পচ্চনীকওকাসো

৭৬. যত্থ কাযসঙ্খাৰো নুপ্পজ্জিত্থ…পে….

(চ) পচ্চনীকপুগ্গলোকাসা

৭৭. (ক) যস্স যত্থ কাযসঙ্খাৰো নুপ্পজ্জিত্থ তস্স তত্থ ৱচীসঙ্খাৰো নুপ্পজ্জিস্সতীতি?

ৰূপাৱচৰানং অৰূপাৱচৰানং তেসং তত্থ কাযসঙ্খাৰো নুপ্পজ্জিত্থ, নো চ তেসং তত্থ ৱচীসঙ্খাৰো নুপ্পজ্জিস্সতি. ৰূপাৱচৰে অৰূপাৱচৰে পচ্ছিমচিত্তসমঙ্গীনং যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি চতুত্থজ্ঝানং সমাপন্নানং অসঞ্ঞসত্তানং তেসং তত্থ কাযসঙ্খাৰো চ নুপ্পজ্জিত্থ ৱচীসঙ্খাৰো চ নুপ্পজ্জিস্সতি.

(খ) যস্স ৱা পন যত্থ ৱচীসঙ্খাৰো নুপ্পজ্জিস্সতি তস্স তত্থ কাযসঙ্খাৰো নুপ্পজ্জিত্থাতি?

কামাৱচৰে পচ্ছিমচিত্তসমঙ্গীনং দুতিযজ্ঝানং ততিযজ্ঝানং সমাপন্নানং তেসং তত্থ ৱচীসঙ্খাৰো নুপ্পজ্জিস্সতি, নো চ তেসং তত্থ কাযসঙ্খাৰো নুপ্পজ্জিত্থ. ৰূপাৱচৰে অৰূপাৱচৰে পচ্ছিমচিত্তসমঙ্গীনং যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি চতুত্থজ্ঝানং সমাপন্নানং অসঞ্ঞসত্তানং তেসং তত্থ ৱচীসঙ্খাৰো চ নুপ্পজ্জিস্সতি কাযসঙ্খাৰো চ নুপ্পজ্জিত্থ.

(ক) যস্স যত্থ কাযসঙ্খাৰো নুপ্পজ্জিত্থ তস্স তত্থ চিত্তসঙ্খাৰো নুপ্পজ্জিস্সতীতি?

চতুত্থজ্ঝানং সমাপন্নানং ৰূপাৱচৰানং অৰূপাৱচৰানং তেসং তত্থ কাযসঙ্খাৰো নুপ্পজ্জিত্থ, নো চ তেসং তত্থ চিত্তসঙ্খাৰো নুপ্পজ্জিস্সতি. ৰূপাৱচৰে অৰূপাৱচৰে পচ্ছিমচিত্তসমঙ্গীনং অসঞ্ঞসত্তানং তেসং তত্থ কাযসঙ্খাৰো চ নুপ্পজ্জিত্থ চিত্তসঙ্খাৰো চ নুপ্পজ্জিস্সতি.

(খ) যস্স ৱা পন যত্থ চিত্তসঙ্খাৰো নুপ্পজ্জিস্সতি তস্স তত্থ কাযসঙ্খাৰো নুপ্পজ্জিত্থাতি?

কামাৱচৰে পচ্ছিমচিত্তসমঙ্গীনং তেসং তত্থ চিত্তসঙ্খাৰো নুপ্পজ্জিস্সতি, নো চ তেসং তত্থ কাযসঙ্খাৰো নুপ্পজ্জিত্থ. ৰূপাৱচৰে অৰূপাৱচৰে পচ্ছিমচিত্তসমঙ্গীনং অসঞ্ঞসত্তানং তেসং তত্থ চিত্তসঙ্খাৰো চ নুপ্পজ্জিস্সতি কাযসঙ্খাৰো চ নুপ্পজ্জিত্থ.

৭৮. (ক) যস্স যত্থ ৱচীসঙ্খাৰো নুপ্পজ্জিত্থ তস্স তত্থ চিত্তসঙ্খাৰো নুপ্পজ্জিস্সতীতি?

অৱিতক্কঅৱিচাৰভূমিযং তেসং তত্থ ৱচীসঙ্খাৰো নুপ্পজ্জিত্থ, নো চ তেসং তত্থ চিত্তসঙ্খাৰো নুপ্পজ্জিস্সতি. অৱিতক্কঅৱিচাৰভূমিযং পচ্ছিমচিত্তসমঙ্গীনং অসঞ্ঞসত্তানং তেসং তত্থ ৱচীসঙ্খাৰো চ নুপ্পজ্জিত্থ চিত্তসঙ্খাৰো চ নুপ্পজ্জিস্সতি.

(খ) যস্স ৱা পন যত্থ চিত্তসঙ্খাৰো নুপ্পজ্জিস্সতি তস্স তত্থ ৱচীসঙ্খাৰো নুপ্পজ্জিত্থাতি?

সৱিতক্কসৱিচাৰভূমিযং পচ্ছিমচিত্তসমঙ্গীনং তেসং তত্থ চিত্তসঙ্খাৰো নুপ্পজ্জিস্সতি, নো চ তেসং তত্থ ৱচীসঙ্খাৰো নুপ্পজ্জিত্থ. অৱিতক্কঅৱিচাৰভূমিযং পচ্ছিমচিত্তসমঙ্গীনং অসঞ্ঞসত্তানং তেসং তত্থ চিত্তসঙ্খাৰো চ নুপ্পজ্জিস্সতি ৱচীসঙ্খাৰো চ নুপ্পজ্জিত্থ.

উপ্পাদৱাৰো.