(১) পচ্চুপ্পন্নৱাৰো

(ক) অনুলোমপুগ্গলো

১৮. (ক) যস্স চক্খুধাতু উপ্পজ্জতি তস্স সোতধাতু উপ্পজ্জতীতি?

সচক্খুকানং অসোতকানং উপপজ্জন্তানং তেসং চক্খুধাতু উপ্পজ্জতি, নো চ তেসং সোতধাতু উপ্পজ্জতি. সচক্খুকানং সসোতকানং উপপজ্জন্তানং তেসং চক্খুধাতু চ উপ্পজ্জতি সোতধাতু চ উপ্পজ্জতি.

(খ) যস্স ৱা পন সোতধাতু উপ্পজ্জতি তস্স চক্খুধাতু উপ্পজ্জতীতি?

সসোতকানং অচক্খুকানং উপপজ্জন্তানং তেসং সোতধাতু উপ্পজ্জতি, নো চ তেসং চক্খুধাতু উপ্পজ্জতি. সসোতকানং সচক্খুকানং উপপজ্জন্তানং তেসং সোতধাতু চ উপ্পজ্জতি চক্খুধাতু চ উপ্পজ্জতি.

(ক) যস্স চক্খুধাতু উপ্পজ্জতি তস্স ঘানধাতু উপ্পজ্জতীতি?

সচক্খুকানং অঘানকানং উপপজ্জন্তানং তেসং চক্খুধাতু উপ্পজ্জতি, নো চ তেসং ঘানধাতু উপ্পজ্জতি. সচক্খুকানং সঘানকানং উপপজ্জন্তানং তেসং চক্খুধাতু চ উপ্পজ্জতি ঘানধাতু চ উপ্পজ্জতি.

(খ) যস্স ৱা পন ঘানধাতু উপ্পজ্জতি তস্স চক্খুধাতু উপ্পজ্জতীতি?

সঘানকানং অচক্খুকানং উপপজ্জন্তানং তেসং ঘানধাতু উপ্পজ্জতি, নো চ তেসং চক্খুধাতু উপ্পজ্জতি. সঘানকানং সচক্খুকানং উপপজ্জন্তানং তেসং ঘানধাতু চ উপ্পজ্জতি চক্খুধাতু চ উপ্পজ্জতি.

(ক) যস্স চক্খুধাতু উপ্পজ্জতি তস্স ৰূপধাতু উপ্পজ্জতীতি? আমন্তা.

(খ) যস্স ৱা পন ৰূপধাতু উপ্পজ্জতি তস্স চক্খুধাতু উপ্পজ্জতীতি?

সৰূপকানং অচক্খুকানং উপপজ্জন্তানং তেসং ৰূপধাতু উপ্পজ্জতি, নো চ তেসং চক্খুধাতু উপ্পজ্জতি. সচক্খুকানং উপপজ্জন্তানং তেসং ৰূপধাতু চ উপ্পজ্জতি চক্খুধাতু চ উপ্পজ্জতি.

(ক) যস্স চক্খুধাতু উপ্পজ্জতি তস্স মনোৱিঞ্ঞাণধাতু উপ্পজ্জতীতি? আমন্তা.

(খ) যস্স ৱা পন মনোৱিঞ্ঞাণধাতু উপ্পজ্জতি তস্স চক্খুধাতু উপ্পজ্জতীতি?

সচিত্তকানং অচক্খুকানং উপপজ্জন্তানং তেসং মনোৱিঞ্ঞাণধাতু উপ্পজ্জতি, নো চ তেসং চক্খুধাতু উপ্পজ্জতি. সচক্খুকানং উপপজ্জন্তানং তেসং মনোৱিঞ্ঞাণধাতু চ উপ্পজ্জতি চক্খুধাতু চ উপ্পজ্জতি.

(ক) যস্স চক্খুধাতু উপ্পজ্জতি তস্স ধম্মধাতু উপ্পজ্জতীতি? আমন্তা.

(খ) যস্স ৱা পন ধম্মধাতু উপ্পজ্জতি তস্স চক্খুধাতু উপ্পজ্জতীতি?

অচক্খুকানং উপপজ্জন্তানং তেসং ধম্মধাতু উপ্পজ্জতি, নো চ তেসং চক্খুধাতু উপ্পজ্জতি. সচক্খুকানং উপপজ্জন্তানং তেসং ধম্মধাতু চ উপ্পজ্জতি চক্খুধাতু চ উপ্পজ্জতি.

(যথা আযতনযমকং ৱিভত্তং এৱং ধাতুযমকম্পি ৱিভজিতব্বং, সদিসং কাতব্বং).