(৫) পচ্চুপ্পন্নানাগতৱাৰো

(ক) অনুলোমপুগ্গলো

১৮৬. (ক) যস্স ৰূপক্খন্ধো উপ্পজ্জতি তস্স ৱেদনাক্খন্ধো নিৰুজ্ঝিস্সতীতি? আমন্তা.

(খ) যস্স ৱা পন ৱেদনাক্খন্ধো নিৰুজ্ঝিস্সতি তস্স ৰূপক্খন্ধো উপ্পজ্জতীতি?

সব্বেসং চৱন্তানং অৰূপং উপপজ্জন্তানং তেসং ৱেদনাক্খন্ধো নিৰুজ্ঝিস্সতি, নো চ তেসং ৰূপক্খন্ধো উপ্পজ্জতি. পঞ্চৱোকাৰং উপপজ্জন্তানং অসঞ্ঞসত্তং উপপজ্জন্তানং তেসং ৱেদনাক্খন্ধো চ নিৰুজ্ঝিস্সতি ৰূপক্খন্ধো চ উপ্পজ্জতি.

১৮৭. (ক) যস্স ৱেদনাক্খন্ধো উপ্পজ্জতি তস্স সঞ্ঞাক্খন্ধো নিৰুজ্ঝিস্সতীতি? আমন্তা.

(খ) যস্স ৱা পন সঞ্ঞাক্খন্ধো নিৰুজ্ঝিস্সতি তস্স ৱেদনাক্খন্ধো উপ্পজ্জতীতি?

সব্বেসং চৱন্তানং অসঞ্ঞসত্তং উপপজ্জন্তানং তেসং সঞ্ঞাক্খন্ধো নিৰুজ্ঝিস্সতি, নো চ তেসং ৱেদনাক্খন্ধো উপ্পজ্জতি. চতুৱোকাৰং পঞ্চৱোকাৰং উপপজ্জন্তানং তেসং সঞ্ঞাক্খন্ধো চ নিৰুজ্ঝিস্সতি ৱেদনাক্খন্ধো চ উপ্পজ্জতি.

(খ) অনুলোমওকাসো

১৮৮. যত্থ ৰূপক্খন্ধো উপ্পজ্জতি…পে….

(গ) অনুলোমপুগ্গলোকাসা

১৮৯. (ক) যস্স যত্থ ৰূপক্খন্ধো উপ্পজ্জতি তস্স তত্থ ৱেদনাক্খন্ধো নিৰুজ্ঝিস্সতীতি?

অসঞ্ঞসত্তং উপপজ্জন্তানং তেসং তত্থ ৰূপক্খন্ধো উপ্পজ্জতি, নো চ তেসং তত্থ ৱেদনাক্খন্ধো নিৰুজ্ঝিস্সতি. পঞ্চৱোকাৰং উপপজ্জন্তানং তেসং তত্থ ৰূপক্খন্ধো চ উপ্পজ্জতি ৱেদনাক্খন্ধো চ নিৰুজ্ঝিস্সতি.

(খ) যস্স ৱা পন যত্থ ৱেদনাক্খন্ধো নিৰুজ্ঝিস্সতি তস্স তত্থ ৰূপক্খন্ধো উপ্পজ্জতীতি?

পঞ্চৱোকাৰা চৱন্তানং অৰূপানং তেসং তত্থ ৱেদনাক্খন্ধো নিৰুজ্ঝিস্সতি, নো চ তেসং তত্থ ৰূপক্খন্ধো উপ্পজ্জতি. পঞ্চৱোকাৰং উপপজ্জন্তানং তেসং তত্থ ৱেদনাক্খন্ধো চ নিৰুজ্ঝিস্সতি ৰূপক্খন্ধো চ উপ্পজ্জতি.

১৯০. (ক) যস্স যত্থ ৱেদনাক্খন্ধো উপ্পজ্জতি তস্স তত্থ সঞ্ঞাক্খন্ধো নিৰুজ্ঝিস্সতীতি? আমন্তা.

(খ) যস্স ৱা পন যত্থ সঞ্ঞাক্খন্ধো নিৰুজ্ঝিস্সতি তস্স তত্থ ৱেদনাক্খন্ধো উপ্পজ্জতীতি?

চতুৱোকাৰা পঞ্চৱোকাৰা চৱন্তানং তেসং তত্থ সঞ্ঞাক্খন্ধো নিৰুজ্ঝিস্সতি, নো চ তেসং তত্থ ৱেদনাক্খন্ধো উপ্পজ্জতি. চতুৱোকাৰং পঞ্চৱোকাৰং উপপজ্জন্তানং তেসং তত্থ সঞ্ঞাক্খন্ধো চ নিৰুজ্ঝিস্সতি ৱেদনাক্খন্ধো চ উপ্পজ্জতি.

(ঘ) পচ্চনীকপুগ্গলো

১৯১. (ক) যস্স ৰূপক্খন্ধো নুপ্পজ্জতি তস্স ৱেদনাক্খন্ধো ন নিৰুজ্ঝিস্সতীতি?

সব্বেসং চৱন্তানং অৰূপং উপপজ্জন্তানং তেসং ৰূপক্খন্ধো নুপ্পজ্জতি, নো চ তেসং ৱেদনাক্খন্ধো ন নিৰুজ্ঝিস্সতি. পৰিনিব্বন্তানং তেসং ৰূপক্খন্ধো চ নুপ্পজ্জতি ৱেদনাক্খন্ধো চ ন নিৰুজ্ঝিস্সতি.

(খ) যস্স ৱা পন ৱেদনাক্খন্ধো ন নিৰুজ্ঝিস্সতি তস্স ৰূপক্খন্ধো নুপ্পজ্জতীতি? আমন্তা.

১৯২. (ক) যস্স ৱেদনাক্খন্ধো নুপ্পজ্জতি তস্স সঞ্ঞাক্খন্ধো ন নিৰুজ্ঝিস্সতীতি?

সব্বেসং চৱন্তানং অসঞ্ঞসত্তং উপপজ্জন্তানং তেসং ৱেদনাক্খন্ধো নুপ্পজ্জতি, নো চ তেসং সঞ্ঞাক্খন্ধো ন নিৰুজ্ঝিস্সতি. পৰিনিব্বন্তানং তেসং ৱেদনাক্খন্ধো চ নুপ্পজ্জতি সঞ্ঞাক্খন্ধো চ ন নিৰুজ্ঝিস্সতি.

(খ) যস্স ৱা পন সঞ্ঞাক্খন্ধো ন নিৰুজ্ঝিস্সতি তস্স ৱেদনাক্খন্ধো নুপ্পজ্জতীতি? আমন্তা.

(ঙ) পচ্চনীকওকাসো

১৯৩. যত্থ ৰূপক্খন্ধো নুপ্পজ্জতি…পে….

(চ) পচ্চনীকপুগ্গলোকাসা

১৯৪. (ক) যস্স যত্থ ৰূপক্খন্ধো নুপ্পজ্জতি তস্স তত্থ ৱেদনাক্খন্ধো ন নিৰুজ্ঝিস্সতীতি?

পঞ্চৱোকাৰা চৱন্তানং অৰূপানং তেসং তত্থ ৰূপক্খন্ধো নুপ্পজ্জতি, নো চ তেসং তত্থ ৱেদনাক্খন্ধো ন নিৰুজ্ঝিস্সতি. পৰিনিব্বন্তানং অসঞ্ঞসত্তা চৱন্তানং তেসং তত্থ ৰূপক্খন্ধো চ নুপ্পজ্জতি ৱেদনাক্খন্ধো চ ন নিৰুজ্ঝিস্সতি.

(খ) যস্স ৱা পন যত্থ ৱেদনাক্খন্ধো ন নিৰুজ্ঝিস্সতি তস্স তত্থ ৰূপক্খন্ধো নুপ্পজ্জতীতি?

অসঞ্ঞসত্তং উপপজ্জন্তানং তেসং তত্থ ৱেদনাক্খন্ধো ন নিৰুজ্ঝিস্সতি, নো চ তেসং তত্থ ৰূপক্খন্ধো নুপ্পজ্জতি. পৰিনিব্বন্তানং অসঞ্ঞসত্তা চৱন্তানং তেসং তত্থ ৱেদনাক্খন্ধো চ ন নিৰুজ্ঝিস্সতি ৰূপক্খন্ধো চ নুপ্পজ্জতি.

১৯৫. (ক) যস্স যত্থ ৱেদনাক্খন্ধো নুপ্পজ্জতি তস্স তত্থ সঞ্ঞাক্খন্ধো ন নিৰুজ্ঝিস্সতীতি?

চতুৱোকাৰা পঞ্চৱোকাৰা চৱন্তানং তেসং তত্থ ৱেদনাক্খন্ধো নুপ্পজ্জতি, নো চ তেসং তত্থ সঞ্ঞাক্খন্ধো ন নিৰুজ্ঝিস্সতি. পৰিনিব্বন্তানং অসঞ্ঞসত্তানং তেসং তত্থ ৱেদনাক্খন্ধো চ নুপ্পজ্জতি সঞ্ঞাক্খন্ধো চ ন নিৰুজ্ঝিস্সতি.

(খ) যস্স ৱা পন যত্থ সঞ্ঞাক্খন্ধো ন নিৰুজ্ঝিস্সতি তস্স তত্থ ৱেদনাক্খন্ধো নুপ্পজ্জতীতি? আমন্তা.