(২) অতীতৱাৰো

(ক) অনুলোমপুগ্গলো

১৬৫. (ক) যস্স ৰূপক্খন্ধো উপ্পজ্জিত্থ তস্স ৱেদনাক্খন্ধো নিৰুজ্ঝিত্থাতি? আমন্তা.

(খ) যস্স ৱা পন ৱেদনাক্খন্ধো নিৰুজ্ঝিত্থ তস্স ৰূপক্খন্ধো উপ্পজ্জিত্থাতি? আমন্তা.

১৬৬. (ক) যস্স ৱেদনাক্খন্ধো উপ্পজ্জিত্থ তস্স সঞ্ঞাক্খন্ধো নিৰুজ্ঝিত্থাতি? আমন্তা.

(খ) যস্স ৱা পন সঞ্ঞাক্খন্ধো নিৰুজ্ঝিত্থ তস্স ৱেদনাক্খন্ধো উপ্পজ্জিত্থাতি? আমন্তা.

(খ) অনুলোমওকাসো

১৬৭. যত্থ ৰূপক্খন্ধো উপ্পজ্জিত্থ…পে….

(গ) অনুলোমপুগ্গলোকাসা

১৬৮. (ক) যস্স যত্থ ৰূপক্খন্ধো উপ্পজ্জিত্থ তস্স তত্থ ৱেদনাক্খন্ধো নিৰুজ্ঝিত্থাতি?

অসঞ্ঞসত্তানং তেসং তত্থ ৰূপক্খন্ধো উপ্পজ্জিত্থ, নো চ তেসং তত্থ ৱেদনাক্খন্ধো নিৰুজ্ঝিত্থ. পঞ্চৱোকাৰানং তেসং তত্থ ৰূপক্খন্ধো চ উপ্পজ্জিত্থ ৱেদনাক্খন্ধো চ নিৰুজ্ঝিত্থ.

(খ) যস্স ৱা পন যত্থ ৱেদনাক্খন্ধো নিৰুজ্ঝিত্থ তস্স তত্থ ৰূপক্খন্ধো উপ্পজ্জিত্থাতি?

অৰূপানং তেসং তত্থ ৱেদনাক্খন্ধো নিৰুজ্ঝিত্থ, নো চ তেসং তত্থ ৰূপক্খন্ধো উপ্পজ্জিত্থ. পঞ্চৱোকাৰানং তেসং তত্থ ৱেদনাক্খন্ধো চ নিৰুজ্ঝিত্থ ৰূপক্খন্ধো চ উপ্পজ্জিত্থ.

১৬৯. (ক) যস্স যত্থ ৱেদনাক্খন্ধো উপ্পজ্জিত্থ তস্স তত্থ সঞ্ঞাক্খন্ধো নিৰুজ্ঝিত্থাতি? আমন্তা.

(খ) যস্স ৱা পন যত্থ সঞ্ঞাক্খন্ধো নিৰুজ্ঝিত্থ তস্স তত্থ ৱেদনাক্খন্ধো উপ্পজ্জিত্থাতি? আমন্তা.

(ঘ) পচ্চনীকপুগ্গলো

১৭০. (ক) যস্স ৰূপক্খন্ধো নুপ্পজ্জিত্থ তস্স ৱেদনাক্খন্ধো ন নিৰুজ্ঝিত্থাতি? নত্থি.

(খ) যস্স ৱা পন ৱেদনাক্খন্ধো ন নিৰুজ্ঝিত্থ তস্স ৰূপক্খন্ধো নুপ্পজ্জিত্থাতি? নত্থি.

১৭১. (ক) যস্স ৱেদনাক্খন্ধো নুপ্পজ্জিত্থ তস্স সঞ্ঞাক্খন্ধো ন নিৰুজ্ঝিত্থাতি? নত্থি.

(খ) যস্স ৱা পন সঞ্ঞাক্খন্ধো ন নিৰুজ্ঝিত্থ তস্স ৱেদনাক্খন্ধো নুপ্পজ্জিত্থাতি? নত্থি.

(ঙ) পচ্চনীকওকাসো

১৭২. যত্থ ৰূপক্খন্ধো নুপ্পজ্জিত্থ…পে….

(চ) পচ্চনীকপুগ্গলোকাসা

১৭৩. (ক) যস্স যত্থ ৰূপক্খন্ধো নুপ্পজ্জিত্থ তস্স তত্থ ৱেদনাক্খন্ধো ন নিৰুজ্ঝিত্থাতি?

অৰূপানং তেসং তত্থ ৰূপক্খন্ধো নুপ্পজ্জিত্থ, নো চ তেসং তত্থ ৱেদনাক্খন্ধো ন নিৰুজ্ঝিত্থ. সুদ্ধাৱাসানং তেসং তত্থ ৰূপক্খন্ধো চ নুপ্পজ্জিত্থ ৱেদনাক্খন্ধো চ ন নিৰুজ্ঝিত্থ.

(খ) যস্স ৱা পন যত্থ ৱেদনাক্খন্ধো ন নিৰুজ্ঝিত্থ তস্স তত্থ ৰূপক্খন্ধো নুপ্পজ্জিত্থাতি?

অসঞ্ঞসত্তানং তেসং তত্থ ৱেদনাক্খন্ধো ন নিৰুজ্ঝিত্থ, নো চ তেসং তত্থ ৰূপক্খন্ধো নুপ্পজ্জিত্থ. সুদ্ধাৱাসানং তেসং তত্থ ৱেদনাক্খন্ধো চ ন নিৰুজ্ঝিত্থ ৰূপক্খন্ধো চ নুপ্পজ্জিত্থ.

১৭৪. (ক) যস্স যত্থ ৱেদনাক্খন্ধো নুপ্পজ্জিত্থ তস্স তত্থ সঞ্ঞাক্খন্ধো ন নিৰুজ্ঝিত্থাতি? আমন্তা.

(খ) যস্স ৱা পন যত্থ সঞ্ঞাক্খন্ধো ন নিৰুজ্ঝিত্থ তস্স তত্থ ৱেদনাক্খন্ধো নুপ্পজ্জিত্থাতি? আমন্তা.