(৩) অনাগতৱাৰো

(ক) অনুলোমপুগ্গলো

১৭৫. (ক) যস্স ৰূপক্খন্ধো উপ্পজ্জিস্সতি তস্স ৱেদনাক্খন্ধো নিৰুজ্ঝিস্সতীতি? আমন্তা.

(খ) যস্স ৱা পন ৱেদনাক্খন্ধো নিৰুজ্ঝিস্সতি তস্স ৰূপক্খন্ধো উপ্পজ্জিস্সতীতি?

পচ্ছিমভৱিকানং উপপজ্জন্তানং যে চ অৰূপং উপপজ্জিত্ৱা পৰিনিব্বাযিস্সন্তি তেসং ৱেদনাক্খন্ধো নিৰুজ্ঝিস্সতি, নো চ তেসং ৰূপক্খন্ধো উপ্পজ্জিস্সতি. ইতৰেসং তেসং ৱেদনাক্খন্ধো চ নিৰুজ্ঝিস্সতি ৰূপক্খন্ধো চ উপ্পজ্জিস্সতি.

১৭৬. (ক) যস্স ৱেদনাক্খন্ধো উপ্পজ্জিস্সতি তস্স সঞ্ঞাক্খন্ধো নিৰুজ্ঝিস্সতীতি? আমন্তা.

(খ) যস্স ৱা পন সঞ্ঞাক্খন্ধো নিৰুজ্ঝিস্সতি তস্স ৱেদনাক্খন্ধো উপ্পজ্জিস্সতীতি?

পচ্ছিমভৱিকানং উপপজ্জন্তানং তেসং সঞ্ঞাক্খন্ধো নিৰুজ্ঝিস্সতি, নো চ তেসং ৱেদনাক্খন্ধো উপ্পজ্জিস্সতি. ইতৰেসং তেসং সঞ্ঞাক্খন্ধো চ নিৰুজ্ঝিস্সতি ৱেদনাক্খন্ধো চ উপ্পজ্জিস্সতি.

(খ) অনুলোমওকাসো

১৭৭. যত্থ ৰূপক্খন্ধো উপ্পজ্জিস্সতি…পে….

(গ) অনুলোমপুগ্গলোকাসা

১৭৮. (ক) যস্স যত্থ ৰূপক্খন্ধো উপ্পজ্জিস্সতি তস্স তত্থ ৱেদনাক্খন্ধো নিৰুজ্ঝিস্সতীতি?

অসঞ্ঞসত্তানং তেসং তত্থ ৰূপক্খন্ধো উপ্পজ্জিস্সতি, নো চ তেসং তত্থ ৱেদনাক্খন্ধো নিৰুজ্ঝিস্সতি. পঞ্চৱোকাৰানং তেসং তত্থ ৰূপক্খন্ধো চ উপ্পজ্জিস্সতি ৱেদনাক্খন্ধো চ নিৰুজ্ঝিস্সতি.

(খ) যস্স ৱা পন যত্থ ৱেদনাক্খন্ধো নিৰুজ্ঝিস্সতি তস্স তত্থ ৰূপক্খন্ধো উপ্পজ্জিস্সতীতি?

পচ্ছিমভৱিকানং পঞ্চৱোকাৰং উপপজ্জন্তানং অৰূপানং তেসং তত্থ ৱেদনাক্খন্ধো নিৰুজ্ঝিস্সতি, নো চ তেসং তত্থ ৰূপক্খন্ধো উপ্পজ্জিস্সতি. ইতৰেসং পঞ্চৱোকাৰানং তেসং তত্থ ৱেদনাক্খন্ধো চ নিৰুজ্ঝিস্সতি ৰূপক্খন্ধো চ উপ্পজ্জিস্সতি.

১৭৯. (ক) যস্স যত্থ ৱেদনাক্খন্ধো উপ্পজ্জিস্সতি তস্স তত্থ সঞ্ঞাক্খন্ধো নিৰুজ্ঝিস্সতীতি? আমন্তা.

(খ) যস্স ৱা পন যত্থ সঞ্ঞাক্খন্ধো নিৰুজ্ঝিস্সতি তস্স তত্থ ৱেদনাক্খন্ধো উপ্পজ্জিস্সতীতি?

পচ্ছিমভৱিকানং উপপজ্জন্তানং তেসং তত্থ সঞ্ঞাক্খন্ধো নিৰুজ্ঝিস্সতি, নো চ তেসং তত্থ ৱেদনাক্খন্ধো উপ্পজ্জিস্সতি. ইতৰেসং চতুৱোকাৰানং পঞ্চৱোকাৰানং তেসং তত্থ সঞ্ঞাক্খন্ধো চ নিৰুজ্ঝিস্সতি ৱেদনাক্খন্ধো চ উপ্পজ্জিস্সতি.

(ঘ) পচ্চনীকপুগ্গলো

১৮০. (ক) যস্স ৰূপক্খন্ধো নুপ্পজ্জিস্সতি তস্স ৱেদনাক্খন্ধো ন নিৰুজ্ঝিস্সতীতি?

পচ্ছিমভৱিকানং উপপজ্জন্তানং যে চ অৰূপং উপপজ্জিত্ৱা পৰিনিব্বাযিস্সন্তি তেসং ৰূপক্খন্ধো নুপ্পজ্জিস্সতি, নো চ তেসং ৱেদনাক্খন্ধো ন নিৰুজ্ঝিস্সতি. পৰিনিব্বন্তানং তেসং ৰূপক্খন্ধো চ নুপ্পজ্জিস্সতি ৱেদনাক্খন্ধো চ ন নিৰুজ্ঝিস্সতি.

(খ) যস্স ৱা পন ৱেদনাক্খন্ধো ন নিৰুজ্ঝিস্সতি তস্স ৰূপক্খন্ধো নুপ্পজ্জিস্সতীতি? আমন্তা.

১৮১. (ক) যস্স ৱেদনাক্খন্ধো নুপ্পজ্জিস্সতি তস্স সঞ্ঞাক্খন্ধো ন নিৰুজ্ঝিস্সতীতি?

পচ্ছিমভৱিকানং উপপজ্জন্তানং তেসং ৱেদনাক্খন্ধো নুপ্পজ্জিস্সতি, নো চ তেসং সঞ্ঞাক্খন্ধো ন নিৰুজ্ঝিস্সতি. পৰিনিব্বন্তানং তেসং ৱেদনাক্খন্ধো চ নুপ্পজ্জিস্সতি সঞ্ঞাক্খন্ধো চ ন নিৰুজ্ঝিস্সতি.

(খ) যস্স ৱা পন সঞ্ঞাক্খন্ধো ন নিৰুজ্ঝিস্সতি তস্স ৱেদনাক্খন্ধো নুপ্পজ্জিস্সতীতি? আমন্তা.

(ঙ) পচ্চনীকওকাসো

১৮২. যত্থ ৰূপক্খন্ধো নুপ্পজ্জিস্সতি…পে….

(চ) পচ্চনীকপুগ্গলোকাসা

১৮৩. (ক) যস্স যত্থ ৰূপক্খন্ধো নুপ্পজ্জিস্সতি তস্স তত্থ ৱেদনাক্খন্ধো ন নিৰুজ্ঝিস্সতীতি?

পচ্ছিমভৱিকানং পঞ্চৱোকাৰং উপপজ্জন্তানং অৰূপানং তেসং তত্থ ৰূপক্খন্ধো নুপ্পজ্জিস্সতি, নো চ তেসং তত্থ ৱেদনাক্খন্ধো ন নিৰুজ্ঝিস্সতি. পৰিনিব্বন্তানং তেসং তত্থ ৰূপক্খন্ধো চ নুপ্পজ্জিস্সতি ৱেদনাক্খন্ধো চ ন নিৰুজ্ঝিস্সতি.

(খ) যস্স ৱা পন যত্থ ৱেদনাক্খন্ধো ন নিৰুজ্ঝিস্সতি তস্স তত্থ ৰূপক্খন্ধো নুপ্পজ্জিস্সতীতি?

অসঞ্ঞসত্তানং তেসং তত্থ ৱেদনাক্খন্ধো ন নিৰুজ্ঝিস্সতি, নো চ তেসং তত্থ ৰূপক্খন্ধো নুপ্পজ্জিস্সতি. পৰিনিব্বন্তানং তেসং তত্থ ৱেদনাক্খন্ধো চ ন নিৰুজ্ঝিস্সতি ৰূপক্খন্ধো চ নুপ্পজ্জিস্সতি.

১৮৪. (ক) যস্স যত্থ ৱেদনাক্খন্ধো নুপ্পজ্জিস্সতি তস্স তত্থ সঞ্ঞাক্খন্ধো ন নিৰুজ্ঝিস্সতীতি?

পচ্ছিমভৱিকানং উপপজ্জন্তানং তেসং তত্থ ৱেদনাক্খন্ধো নুপ্পজ্জিস্সতি, নো চ তেসং তত্থ সঞ্ঞাক্খন্ধো ন নিৰুজ্ঝিস্সতি. পৰিনিব্বন্তানং অসঞ্ঞসত্তানং তেসং তত্থ ৱেদনাক্খন্ধো চ নুপ্পজ্জিস্সতি সঞ্ঞাক্খন্ধো চ ন নিৰুজ্ঝিস্সতি.

(খ) যস্স ৱা পন যত্থ সঞ্ঞাক্খন্ধো ন নিৰুজ্ঝিস্সতি তস্স তত্থ ৱেদনাক্খন্ধো নুপ্পজ্জিস্সতীতি? আমন্তা.