(৪) পচ্চুপ্পন্নাতীতৱাৰো

(ক) অনুলোমপুগ্গলো

১২২. (ক) যস্স ৰূপক্খন্ধো নিৰুজ্ঝতি তস্স ৱেদনাক্খন্ধো নিৰুজ্ঝিত্থাতি? আমন্তা.

(খ) যস্স ৱা পন ৱেদনাক্খন্ধো নিৰুজ্ঝিত্থ তস্স ৰূপক্খন্ধো নিৰুজ্ঝতীতি?

সব্বেসং উপপজ্জন্তানং অৰূপা চৱন্তানং তেসং ৱেদনাক্খন্ধো নিৰুজ্ঝিত্থ, নো চ তেসং ৰূপক্খন্ধো নিৰুজ্ঝতি. পঞ্চৱোকাৰা চৱন্তানং অসঞ্ঞসত্তা চৱন্তানং তেসং ৱেদনাক্খন্ধো চ নিৰুজ্ঝিত্থ ৰূপক্খন্ধো চ নিৰুজ্ঝতি.

১২৩. (ক) যস্স ৱেদনাক্খন্ধো নিৰুজ্ঝতি তস্স সঞ্ঞাক্খন্ধো নিৰুজ্ঝিত্থাতি? আমন্তা.

(খ) যস্স ৱা পন সঞ্ঞাক্খন্ধো নিৰুজ্ঝিত্থ তস্স ৱেদনাক্খন্ধো নিৰুজ্ঝতীতি?

সব্বেসং উপপজ্জন্তানং অসঞ্ঞসত্তা চৱন্তানং তেসং সঞ্ঞাক্খন্ধো নিৰুজ্ঝিত্থ, নো চ তেসং ৱেদনাক্খন্ধো নিৰুজ্ঝতি. চতুৱোকাৰা পঞ্চৱোকাৰা চৱন্তানং তেসং সঞ্ঞাক্খন্ধো চ নিৰুজ্ঝিত্থ ৱেদনাক্খন্ধো চ নিৰুজ্ঝতি.

(খ) অনুলোমওকাসো

১২৪. (ক) যত্থ ৰূপক্খন্ধো নিৰুজ্ঝতি তত্থ ৱেদনাক্খন্ধো নিৰুজ্ঝিত্থাতি?

অসঞ্ঞসত্তে তত্থ ৰূপক্খন্ধো নিৰুজ্ঝতি, নো চ তত্থ ৱেদনাক্খন্ধো নিৰুজ্ঝিত্থ. পঞ্চৱোকাৰে তত্থ ৰূপক্খন্ধো চ নিৰুজ্ঝতি ৱেদনাক্খন্ধো চ নিৰুজ্ঝিত্থ.

(খ) যত্থ ৱা পন ৱেদনাক্খন্ধো নিৰুজ্ঝিত্থ তত্থ ৰূপক্খন্ধো নিৰুজ্ঝতীতি?

অৰূপে তত্থ ৱেদনাক্খন্ধো নিৰুজ্ঝিত্থ, নো চ তত্থ ৰূপক্খন্ধো নিৰুজ্ঝতি. পঞ্চৱোকাৰে তত্থ ৱেদনাক্খন্ধো চ নিৰুজ্ঝিত্থ ৰূপক্খন্ধো চ নিৰুজ্ঝতি.

১২৫. (ক) যত্থ ৱেদনাক্খন্ধো নিৰুজ্ঝতি তত্থ সঞ্ঞাক্খন্ধো নিৰুজ্ঝিত্থাতি? আমন্তা.

(খ) যত্থ ৱা পন সঞ্ঞাক্খন্ধো নিৰুজ্ঝিত্থ তত্থ ৱেদনাক্খন্ধো নিৰুজ্ঝতীতি? আমন্তা.

(গ) অনুলোমপুগ্গলোকাসা

১২৬. (ক) যস্স যত্থ ৰূপক্খন্ধো নিৰুজ্ঝতি তস্স তত্থ ৱেদনাক্খন্ধো নিৰুজ্ঝিত্থাতি?

সুদ্ধাৱাসে পৰিনিব্বন্তানং অসঞ্ঞসত্তা চৱন্তানং তেসং তত্থ ৰূপক্খন্ধো নিৰুজ্ঝতি, নো চ তেসং তত্থ ৱেদনাক্খন্ধো নিৰুজ্ঝিত্থ. ইতৰেসং পঞ্চৱোকাৰা চৱন্তানং তেসং তত্থ ৰূপক্খন্ধো চ নিৰুজ্ঝতি ৱেদনাক্খন্ধো চ নিৰুজ্ঝিত্থ.

(খ) যস্স ৱা পন যত্থ ৱেদনাক্খন্ধো নিৰুজ্ঝিত্থ তস্স তত্থ ৰূপক্খন্ধো নিৰুজ্ঝতীতি?

পঞ্চৱোকাৰং উপপজ্জন্তানং অৰূপানং তেসং তত্থ ৱেদনাক্খন্ধো নিৰুজ্ঝিত্থ, নো চ তেসং তত্থ ৰূপক্খন্ধো নিৰুজ্ঝতি. পঞ্চৱোকাৰা চৱন্তানং তেসং তত্থ ৱেদনাক্খন্ধো চ নিৰুজ্ঝিত্থ ৰূপক্খন্ধো চ নিৰুজ্ঝতি.

১২৭. (ক) যস্স যত্থ ৱেদনাক্খন্ধো নিৰুজ্ঝতি তস্স তত্থ সঞ্ঞাক্খন্ধো নিৰুজ্ঝিত্থাতি?

সুদ্ধাৱাসে পৰিনিব্বন্তানং তেসং তত্থ ৱেদনাক্খন্ধো নিৰুজ্ঝতি, নো চ তেসং তত্থ সঞ্ঞাক্খন্ধো নিৰুজ্ঝিত্থ. ইতৰেসং চতুৱোকাৰা পঞ্চৱোকাৰা চৱন্তানং তেসং তত্থ ৱেদনাক্খন্ধো চ নিৰুজ্ঝতি সঞ্ঞাক্খন্ধো চ নিৰুজ্ঝিত্থ.

(খ) যস্স ৱা পন যত্থ সঞ্ঞাক্খন্ধো নিৰুজ্ঝিত্থ তস্স তত্থ ৱেদনাক্খন্ধো নিৰুজ্ঝতীতি?

চতুৱোকাৰং পঞ্চৱোকাৰং উপপজ্জন্তানং তেসং তত্থ সঞ্ঞাক্খন্ধো নিৰুজ্ঝিত্থ, নো চ তেসং তত্থ ৱেদনাক্খন্ধো নিৰুজ্ঝতি. চতুৱোকাৰা পঞ্চৱোকাৰা চৱন্তানং তেসং তত্থ সঞ্ঞাক্খন্ধো চ নিৰুজ্ঝিত্থ ৱেদনাক্খন্ধো চ নিৰুজ্ঝতি.

(ঘ) পচ্চনীকপুগ্গলো

১২৮. (ক) যস্স ৰূপক্খন্ধো ন নিৰুজ্ঝতি তস্স ৱেদনাক্খন্ধো ন নিৰুজ্ঝিত্থাতি? নিৰুজ্ঝিত্থ.

(খ) যস্স ৱা পন ৱেদনাক্খন্ধো ন নিৰুজ্ঝিত্থ তস্স ৰূপক্খন্ধো ন নিৰুজ্ঝতীতি? নত্থি.

১২৯. (ক) যস্স ৱেদনাক্খন্ধো ন নিৰুজ্ঝতি তস্স সঞ্ঞাক্খন্ধো ন নিৰুজ্ঝিত্থাতি? নিৰুজ্ঝিত্থ.

(খ) যস্স ৱা পন সঞ্ঞাক্খন্ধো ন নিৰুজ্ঝিত্থ তস্স ৱেদনাক্খন্ধো ন নিৰুজ্ঝতীতি? নত্থি.

(ঙ) পচ্চনীকওকাসো

১৩০. যত্থ ৰূপক্খন্ধো ন নিৰুজ্ঝতি (যত্থকং পৰিপুণ্ণং কাতব্বং).

(চ) পচ্চনীকপুগ্গলোকাসা

১৩১. (ক) যস্স যত্থ ৰূপক্খন্ধো ন নিৰুজ্ঝতি তস্স তত্থ ৱেদনাক্খন্ধো ন নিৰুজ্ঝিত্থাতি?

পঞ্চৱোকাৰং উপপজ্জন্তানং অৰূপানং তেসং তত্থ ৰূপক্খন্ধো ন নিৰুজ্ঝতি, নো চ তেসং তত্থ ৱেদনাক্খন্ধো ন নিৰুজ্ঝিত্থ. সুদ্ধাৱাসং উপপজ্জন্তানং অসঞ্ঞসত্তং উপপজ্জন্তানং তেসং তত্থ ৰূপক্খন্ধো চ ন নিৰুজ্ঝতি ৱেদনাক্খন্ধো চ ন নিৰুজ্ঝিত্থ.

(খ) যস্স ৱা পন যত্থ ৱেদনাক্খন্ধো ন নিৰুজ্ঝিত্থ তস্স তত্থ ৰূপক্খন্ধো ন নিৰুজ্ঝতীতি?

সুদ্ধাৱাসে পৰিনিব্বন্তানং অসঞ্ঞসত্তা চৱন্তানং তেসং তত্থ ৱেদনাক্খন্ধো ন নিৰুজ্ঝিত্থ, নো চ তেসং তত্থ ৰূপক্খন্ধো ন নিৰুজ্ঝতি. সুদ্ধাৱাসং উপপজ্জন্তানং অসঞ্ঞসত্তং উপপজ্জন্তানং তেসং তত্থ ৱেদনাক্খন্ধো চ ন নিৰুজ্ঝিত্থ ৰূপক্খন্ধো চ ন নিৰুজ্ঝতি.

১৩২. (ক) যস্স যত্থ ৱেদনাক্খন্ধো ন নিৰুজ্ঝতি তস্স তত্থ সঞ্ঞাক্খন্ধো ন নিৰুজ্ঝিত্থাতি?

চতুৱোকাৰং পঞ্চৱোকাৰং উপপজ্জন্তানং তেসং তত্থ ৱেদনাক্খন্ধো ন নিৰুজ্ঝতি, নো চ তেসং তত্থ সঞ্ঞাক্খন্ধো ন নিৰুজ্ঝিত্থ. সুদ্ধাৱাসং উপপজ্জন্তানং অসঞ্ঞসত্তানং তেসং তত্থ ৱেদনাক্খন্ধো চ ন নিৰুজ্ঝতি সঞ্ঞাক্খন্ধো চ ন নিৰুজ্ঝিত্থ.

(খ) যস্স ৱা পন যত্থ সঞ্ঞাক্খন্ধো ন নিৰুজ্ঝিত্থ তস্স তত্থ ৱেদনাক্খন্ধো ন নিৰুজ্ঝতীতি?

সুদ্ধাৱাসে পৰিনিব্বন্তানং তেসং তত্থ সঞ্ঞাক্খন্ধো ন নিৰুজ্ঝিত্থ, নো চ তেসং তত্থ ৱেদনাক্খন্ধো ন নিৰুজ্ঝতি. সুদ্ধাৱাসং উপপজ্জন্তানং অসঞ্ঞসত্তানং তেসং তত্থ সঞ্ঞাক্খন্ধো চ ন নিৰুজ্ঝিত্থ ৱেদনাক্খন্ধো চ ন নিৰুজ্ঝতি.