২. হেতুচতুক্কং

২৪৪. অৱিজ্জাপচ্চযা সঙ্খাৰো অৱিজ্জাহেতুকো, সঙ্খাৰপচ্চযা ৱিঞ্ঞাণং সঙ্খাৰহেতুকং, ৱিঞ্ঞাণপচ্চযা নামং ৱিঞ্ঞাণহেতুকং, নামপচ্চযা ছট্ঠাযতনং নামহেতুকং, ছট্ঠাযতনপচ্চযা ফস্সো ছট্ঠাযতনহেতুকো, ফস্সপচ্চযা ৱেদনা ফস্সহেতুকা, ৱেদনাপচ্চযা তণ্হা ৱেদনাহেতুকা, তণ্হাপচ্চযা উপাদানং তণ্হাহেতুকং; উপাদানপচ্চযা ভৱো, ভৱপচ্চযা জাতি, জাতিপচ্চযা জৰামৰণং. এৱমেতস্স কেৱলস্স দুক্খক্খন্ধস্স সমুদযো হোতি.

অৱিজ্জাপচ্চযা সঙ্খাৰো অৱিজ্জাহেতুকো, সঙ্খাৰপচ্চযা ৱিঞ্ঞাণং সঙ্খাৰহেতুকং, ৱিঞ্ঞাণপচ্চযা নামং ৱিঞ্ঞাণহেতুকং, নামপচ্চযা ফস্সো নামহেতুকো, ফস্সপচ্চযা ৱেদনা ফস্সহেতুকা, ৱেদনাপচ্চযা তণ্হা ৱেদনাহেতুকা, তণ্হাপচ্চযা উপাদানং তণ্হাহেতুকং; উপাদানপচ্চযা ভৱো, ভৱপচ্চযা জাতি, জাতিপচ্চযা জৰামৰণং. এৱমেতস্স কেৱলস্স দুক্খক্খন্ধস্স সমুদযো হোতি.

অৱিজ্জাপচ্চযা সঙ্খাৰো অৱিজ্জাহেতুকো, সঙ্খাৰপচ্চযা ৱিঞ্ঞাণং সঙ্খাৰহেতুকং, ৱিঞ্ঞাণপচ্চযা নামৰূপং ৱিঞ্ঞাণহেতুকং, নামৰূপপচ্চযা ছট্ঠাযতনং নামৰূপহেতুকং, ছট্ঠাযতনপচ্চযা ফস্সো ছট্ঠাযতনহেতুকো, ফস্সপচ্চযা ৱেদনা ফস্সহেতুকা, ৱেদনাপচ্চযা তণ্হা ৱেদনাহেতুকা, তণ্হাপচ্চযা উপাদানং তণ্হাহেতুকং; উপাদানপচ্চযা ভৱো, ভৱপচ্চযা জাতি, জাতিপচ্চযা জৰামৰণং. এৱমেতস্স কেৱলস্স দুক্খক্খন্ধস্স সমুদযো হোতি.

অৱিজ্জাপচ্চযা সঙ্খাৰো অৱিজ্জাহেতুকো, সঙ্খাৰপচ্চযা ৱিঞ্ঞাণং সঙ্খাৰহেতুকং, ৱিঞ্ঞাণপচ্চযা নামৰূপং ৱিঞ্ঞাণহেতুকং, নামৰূপপচ্চযা সড়াযতনং নামৰূপহেতুকং, ছট্ঠাযতনপচ্চযা ফস্সো ছট্ঠাযতনহেতুকো, ফস্সপচ্চযা ৱেদনা ফস্সহেতুকা, ৱেদনাপচ্চযা তণ্হা ৱেদনাহেতুকা, তণ্হাপচ্চযা উপাদানং তণ্হাহেতুকং; উপাদানপচ্চযা ভৱো, ভৱপচ্চযা জাতি, জাতিপচ্চযা জৰামৰণং. এৱমেতস্স কেৱলস্স দুক্খক্খন্ধস্স সমুদযো হোতি.

হেতুচতুক্কং.