১. তিকং

১৭০. দসাযতনা অব্যাকতা. দ্ৱাযতনা সিযা কুসলা, সিযা অকুসলা, সিযা অব্যাকতা. দসাযতনা ন ৱত্তব্বা – ‘‘সুখায ৱেদনায সম্পযুত্তা’’তিপি, ‘‘দুক্খায ৱেদনায সম্পযুত্তা’’তিপি, ‘‘অদুক্খমসুখায ৱেদনায সম্পযুত্তা’’তিপি. মনাযতনং সিযা সুখায ৱেদনায সম্পযুত্তং, সিযা দুক্খায ৱেদনায সম্পযুত্তং, সিযা অদুক্খমসুখায ৱেদনায সম্পযুত্তং. ধম্মাযতনং সিযা সুখায ৱেদনায সম্পযুত্তং, সিযা দুক্খায ৱেদনায সম্পযুত্তং, সিযা অদুক্খমসুখায ৱেদনায সম্পযুত্তং, সিযা ন ৱত্তব্বং – ‘‘সুখায ৱেদনায সম্পযুত্ত’’ন্তিপি, ‘‘দুক্খায ৱেদনায সম্পযুত্ত’’ন্তিপি, ‘‘অদুক্খমসুখায ৱেদনায সম্পযুত্ত’’ন্তিপি. দসাযতনা নেৱৱিপাকনৱিপাকধম্মধম্মা. দ্ৱাযতনা সিযা ৱিপাকা, সিযা ৱিপাকধম্মধম্মা, সিযা নেৱৱিপাকনৱিপাকধম্মধম্মা.

পঞ্চাযতনা উপাদিন্নুপাদানিযা. সদ্দাযতনং অনুপাদিন্নুপাদানিযং. চত্তাৰো আযতনা সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদানিযা. দ্ৱাযতনা সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা. দসাযতনা অসংকিলিট্ঠসংকিলেসিকা. দ্ৱাযতনা সিযা সংকিলিট্ঠসংকিলেসিকা, সিযা অসংকিলিট্ঠসংকিলেসিকা, সিযা অসংকিলিট্ঠঅসংকিলেসিকা. দসাযতনা অৱিতক্কঅৱিচাৰা. মনাযতনং সিযা সৱিতক্কসৱিচাৰং, সিযা অৱিতক্কৱিচাৰমত্তং, সিযা অৱিতক্কঅৱিচাৰং. ধম্মাযতনং সিযা সৱিতক্কসৱিচাৰং, সিযা অৱিতক্কৱিচাৰমত্তং, সিযা অৱিতক্কঅৱিচাৰং, সিযা ন ৱত্তব্বং – ‘‘সৱিতক্কসৱিচাৰ’’ন্তিপি, ‘‘অৱিতক্কৱিচাৰমত্ত’’ন্তিপি, ‘‘অৱিতক্কঅৱিচাৰ’’ন্তিপি. দসাযতনা ন ৱত্তব্বা – ‘‘পীতিসহগতা’’তিপি, ‘‘সুখসহগতা’’তিপি, ‘‘উপেক্খাসহগতা’’তিপি. দ্ৱাযতনা সিযা পীতিসহগতা, সিযা সুখসহগতা, সিযা উপেক্খাসহগতা, সিযা ন ৱত্তব্বা – ‘‘পীতিসহগতা’’তিপি, ‘‘সুখসহগতা’’তিপি, ‘‘উপেক্খাসহগতা’’তিপি.

দসাযতনা নেৱ দস্সনেন ন ভাৱনায পহাতব্বা. দ্ৱাযতনা সিযা দস্সনেন পহাতব্বা, সিযা ভাৱনায পহাতব্বা, সিযা নেৱ দস্সনেন ন ভাৱনায পহাতব্বা. দসাযতনা নেৱ দস্সনেন ন ভাৱনায পহাতব্বহেতুকা. দ্ৱাযতনা সিযা দস্সনেন পহাতব্বহেতুকা, সিযা ভাৱনায পহাতব্বহেতুকা, সিযা নেৱ দস্সনেন ন ভাৱনায পহাতব্বহেতুকা. দসাযতনা নেৱাচযগামিনাপচযগামিনো. দ্ৱাযতনা সিযা আচযগামিনো, সিযা অপচযগামিনো, সিযা নেৱাচযগামিনাপচযগামিনো. দসাযতনা নেৱসেক্খনাসেক্খা. দ্ৱাযতনা সিযা সেক্খা, সিযা অসেক্খা, সিযা নেৱসেক্খনাসেক্খা. দসাযতনা পৰিত্তা. দ্ৱাযতনা সিযা পৰিত্তা, সিযা মহগ্গতা, সিযা অপ্পমাণা. দসাযতনা অনাৰম্মণা. দ্ৱাযতনা সিযা পৰিত্তাৰম্মণা, সিযা মহগ্গতাৰম্মণা, সিযা অপ্পমাণাৰম্মণা, সিযা ন ৱত্তব্বা – ‘‘পৰিত্তাৰম্মণা’’তিপি, ‘‘মহগ্গতাৰম্মণা’’তিপি, ‘‘অপ্পমাণাৰম্মণা’’তিপি. দসাযতনা মজ্ঝিমা. দ্ৱাযতনা সিযা হীনা, সিযা মজ্ঝিমা, সিযা পণীতা. দসাযতনা অনিযতা. দ্ৱাযতনা সিযা মিচ্ছত্তনিযতা, সিযা সম্মত্তনিযতা, সিযা অনিযতা.

দসাযতনা অনাৰম্মণা. দ্ৱাযতনা সিযা মগ্গাৰম্মণা, সিযা মগ্গহেতুকা, সিযা মগ্গাধিপতিনো, সিযা ন ৱত্তব্বা – ‘‘মগ্গাৰম্মণা’’তিপি, ‘‘মগ্গহেতুকা’’তিপি, ‘‘মগ্গাধিপতিনো’’তিপি. পঞ্চাযতনা সিযা উপ্পন্না, সিযা উপ্পাদিনো, ন ৱত্তব্বা – ‘‘অনুপ্পন্না’’তি. সদ্দাযতনং সিযা উপ্পন্নং, সিযা অনুপ্পন্নং, ন ৱত্তব্বং – ‘‘উপ্পাদী’’তি. পঞ্চাযতনা সিযা উপ্পন্না, সিযা অনুপ্পন্না, সিযা উপ্পাদিনো. ধম্মাযতনং সিযা উপ্পন্নং, সিযা অনুপ্পন্নং, সিযা উপ্পাদি, সিযা ন ৱত্তব্বং – ‘‘উপ্পন্ন’’ন্তিপি, ‘‘অনুপ্পন্ন’’ন্তিপি, ‘‘উপ্পাদী’’তিপি. একাদসাযতনা সিযা অতীতা, সিযা অনাগতা, সিযা পচ্চুপ্পন্না. ধম্মাযতনং সিযা অতীতং, সিযা অনাগতং, সিযা পচ্চুপ্পন্নং, সিযা ন ৱত্তব্বং – ‘‘অতীত’’ন্তিপি, ‘‘অনাগত’’ন্তিপি, ‘‘পচ্চুপ্পন্ন’’ন্তিপি. দসাযতনা অনাৰম্মণা. দ্ৱাযতনা সিযা অতীতাৰম্মণা, সিযা অনাগতাৰম্মণা, সিযা পচ্চুপ্পন্নাৰম্মণা, সিযা ন ৱত্তব্বা – ‘‘অতীতাৰম্মণা’’তিপি, ‘‘অনাগতাৰম্মণা’’তিপি, ‘‘পচ্চুপ্পন্নাৰম্মণা’’তিপি; সিযা অজ্ঝত্তা, সিযা বহিদ্ধা, সিযা অজ্ঝত্তবহিদ্ধা. দসাযতনা অনাৰম্মণা. দ্ৱাযতনা সিযা অজ্ঝত্তাৰম্মণা, সিযা বহিদ্ধাৰম্মণা, সিযা অজ্ঝত্তবহিদ্ধাৰম্মণা, সিযা ন ৱত্তব্বা – ‘‘অজ্ঝত্তাৰম্মণা’’তিপি, ‘‘বহিদ্ধাৰম্মণা’’তিপি, ‘‘অজ্ঝত্তবহিদ্ধাৰম্মণা’’তিপি. ৰূপাযতনং সনিদস্সনসপ্পটিঘং. নৱাযতনা অনিদস্সনসপ্পটিঘা. দ্ৱাযতনা অনিদস্সনঅপ্পটিঘা.