৪. ধম্মদস্সনৱাৰো

১. কামধাতু

১০০৭. কামধাতুযা উপপত্তিক্খণে কতি খন্ধা পাতুভৱন্তি…পে… কতি চিত্তানি পাতুভৱন্তি?

কামধাতুযা উপপত্তিক্খণে সব্বেসং পঞ্চক্খন্ধা পাতুভৱন্তি; কস্সচি একাদসাযতনানি পাতুভৱন্তি; কস্সচি দসাযতনানি পাতুভৱন্তি; কস্সচি অপৰানি দসাযতনানি পাতুভৱন্তি; কস্সচি নৱাযতনানি পাতুভৱন্তি; কস্সচি সত্তাযতনানি পাতুভৱন্তি; কস্সচি একাদস ধাতুযো পাতুভৱন্তি; কস্সচি দস ধাতুযো পাতুভৱন্তি; কস্সচি অপৰা দস ধাতুযো পাতুভৱন্তি; কস্সচি নৱ ধাতুযো পাতুভৱন্তি; কস্সচি সত্ত ধাতুযো পাতুভৱন্তি; সব্বেসং একং সচ্চং পাতুভৱতি; কস্সচি চুদ্দসিন্দ্ৰিযানি পাতুভৱন্তি; কস্সচি তেৰসিন্দ্ৰিযানি পাতুভৱন্তি; কস্সচি অপৰানি তেৰসিন্দ্ৰিযানি পাতুভৱন্তি; কস্সচি দ্ৱাদসিন্দ্ৰিযানি পাতুভৱন্তি; কস্সচি দসিন্দ্ৰিযানি পাতুভৱন্তি; কস্সচি নৱিন্দ্ৰিযানি পাতুভৱন্তি; কস্সচি অপৰানি নৱিন্দ্ৰিযানি পাতুভৱন্তি; কস্সচি অট্ঠিন্দ্ৰিযানি পাতুভৱন্তি; কস্সচি অপৰানি অট্ঠিন্দ্ৰিযানি পাতুভৱন্তি; কস্সচি সত্তিন্দ্ৰিযানি পাতুভৱন্তি; কস্সচি পঞ্চিন্দ্ৰিযানি পাতুভৱন্তি; কস্সচি চত্তাৰিন্দ্ৰিযানি পাতুভৱন্তি; কস্সচি তযো হেতূ পাতুভৱন্তি; কস্সচি দ্ৱে হেতূ পাতুভৱন্তি; কস্সচি [কেচি (স্যা.)] অহেতুকা পাতুভৱন্তি; সব্বেসং চত্তাৰো আহাৰা পাতুভৱন্তি; সব্বেসং একো ফস্সো পাতুভৱতি; সব্বেসং একা ৱেদনা… একা সঞ্ঞা… একা চেতনা… একং চিত্তং পাতুভৱতি.

১০০৮. কামধাতুযা উপপত্তিক্খণে সব্বেসং কতমে পঞ্চক্খন্ধা পাতুভৱন্তি? ৰূপক্খন্ধো…পে… ৱিঞ্ঞাণক্খন্ধো – কামধাতুযা উপপত্তিক্খণে সব্বেসং ইমে পঞ্চক্খন্ধা পাতুভৱন্তি.

১০০৯. কামধাতুযা উপপত্তিক্খণে কস্স একাদসাযতনানি পাতুভৱন্তি? কামাৱচৰানং দেৱানং, পঠমকপ্পিকানং মনুস্সানং, ওপপাতিকানং পেতানং, ওপপাতিকানং অসুৰানং, ওপপাতিকানং তিৰচ্ছানগতানং, নেৰযিকানং পৰিপুণ্ণাযতনানং উপপত্তিক্খণে একাদসাযতনানি পাতুভৱন্তি – চক্খাযতনং, ৰূপাযতনং, সোতাযতনং, ঘানাযতনং, গন্ধাযতনং, জিৱ্হাযতনং, ৰসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং. কামধাতুযা উপপত্তিক্খণে এতেসং ইমানি একাদসাযতনানি পাতুভৱন্তি.

কামধাতুযা উপপত্তিক্খণে কস্স দসাযতনানি পাতুভৱন্তি? ওপপাতিকানং পেতানং, ওপপাতিকানং অসুৰানং, ওপপাতিকানং তিৰচ্ছানগতানং নেৰযিকানং, জচ্চন্ধানং উপপত্তিক্খণে দসাযতনানি পাতুভৱন্তি – ৰূপাযতনং, সোতাযতনং, ঘানাযতনং, গন্ধাযতনং, জিৱ্হাযতনং, ৰসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং. কামধাতুযা উপপত্তিক্খণে এতেসং ইমানি দসাযতনানি পাতুভৱন্তি.

কামধাতুযা উপপত্তিক্খণে কস্স অপৰানি দসাযতনানি পাতুভৱন্তি? ওপপাতিকানং পেতানং, ওপপাতিকানং অসুৰানং, ওপপাতিকানং তিৰচ্ছানগতানং নেৰযিকানং, জচ্চবধিৰানং উপপত্তিক্খণে দসাযতনানি পাতুভৱন্তি – চক্খাযতনং, ৰূপাযতনং, ঘানাযতনং, গন্ধাযতনং, জিৱ্হাযতনং, ৰসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং. কামধাতুযা উপপত্তিক্খণে এতেসং ইমানি দসাযতনানি পাতুভৱন্তি.

কামধাতুযা উপপত্তিক্খণে কস্স নৱাযতনানি পাতুভৱন্তি? ওপপাতিকানং পেতানং, ওপপাতিকানং অসুৰানং, ওপপাতিকানং তিৰচ্ছানগতানং নেৰযিকানং, জচ্চন্ধবধিৰানং উপপত্তিক্খণে নৱাযতনানি পাতুভৱন্তি – ৰূপাযতনং, ঘানাযতনং, গন্ধাযতনং, জিৱ্হাযতনং, ৰসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং. কামধাতুযা উপপত্তিক্খণে এতেসং ইমানি নৱাযতনানি পাতুভৱন্তি.

কামধাতুযা উপপত্তিক্খণে কস্স সত্তাযতনানি পাতুভৱন্তি? গব্ভসেয্যকানং সত্তানং উপপত্তিক্খণে সত্তাযতনানি পাতুভৱন্তি – ৰূপাযতনং, গন্ধাযতনং, ৰসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং. কামধাতুযা উপপত্তিক্খণে এতেসং ইমানি সত্তাযতনানি পাতুভৱন্তি.

১০১০. কামধাতুযা উপপত্তিক্খণে কস্স একাদস ধাতুযো পাতুভৱন্তি? কামাৱচৰানং দেৱানং, পঠমকপ্পিকানং মনুস্সানং, ওপপাতিকানং পেতানং, ওপপাতিকানং অসুৰানং, ওপপাতিকানং তিৰচ্ছানগতানং নেৰযিকানং পৰিপুণ্ণাযতনানং উপপত্তিক্খণে একাদস ধাতুযো পাতুভৱন্তি – চক্খুধাতু, ৰূপধাতু, সোতধাতু, ঘানধাতু, গন্ধধাতু, জিৱ্হাধাতু, ৰসধাতু, কাযধাতু, ফোট্ঠব্বধাতু, মনোৱিঞ্ঞাণধাতু, ধম্মধাতু. কামধাতুযা উপপত্তিক্খণে এতেসং ইমা একাদস ধাতুযো পাতুভৱন্তি.

কামধাতুযা উপপত্তিক্খণে কস্স দস ধাতুযো পাতুভৱন্তি? ওপপাতিকানং পেতানং, ওপপাতিকানং অসুৰানং, ওপপাতিকানং তিৰচ্ছানগতানং নেৰযিকানং, জচ্চন্ধানং উপপত্তিক্খণে দস ধাতুযো পাতুভৱন্তি – ৰূপধাতু, সোতধাতু, ঘানধাতু, গন্ধধাতু, জিৱ্হাধাতু, ৰসধাতু, কাযধাতু, ফোট্ঠব্বধাতু, মনোৱিঞ্ঞাণধাতু, ধম্মধাতু. কামধাতুযা উপপত্তিক্খণে এতেসং ইমা দস ধাতুযো পাতুভৱন্তি.

কামধাতুযা উপপত্তিক্খণে কস্স অপৰা দস ধাতুযো পাতুভৱন্তি? ওপপাতিকানং পেতানং, ওপপাতিকানং অসুৰানং, ওপপাতিকানং তিৰচ্ছানগতানং নেৰযিকানং, জচ্চবধিৰানং উপপত্তিক্খণে দস ধাতুযো পাতুভৱন্তি – চক্খুধাতু, ৰূপধাতু, ঘানধাতু, গন্ধধাতু, জিৱ্হাধাতু, ৰসধাতু, কাযধাতু, ফোট্ঠব্বধাতু, মনোৱিঞ্ঞাণধাতু, ধম্মধাতু. কামধাতুযা উপপত্তিক্খণে এতেসং ইমা দস ধাতুযো পাতুভৱন্তি.

কামধাতুযা উপপত্তিক্খণে কস্স নৱ ধাতুযো পাতুভৱন্তি? ওপপাতিকানং পেতানং, ওপপাতিকানং অসুৰানং, ওপপাতিকানং তিৰচ্ছানগতানং নেৰযিকানং, জচ্চন্ধবধিৰানং উপপত্তিক্খণে নৱ ধাতুযো পাতুভৱন্তি – ৰূপধাতু, ঘানধাতু, গন্ধধাতু, জিৱ্হাধাতু, ৰসধাতু, কাযধাতু, ফোট্ঠব্বধাতু, মনোৱিঞ্ঞাণধাতু, ধম্মধাতু. কামধাতুযা উপপত্তিক্খণে এতেসং ইমা নৱ ধাতুযো পাতুভৱন্তি.

কামধাতুযা উপপত্তিক্খণে কস্স সত্ত ধাতুযো পাতুভৱন্তি? গব্ভসেয্যকানং সত্তানং উপপত্তিক্খণে সত্ত ধাতুযো পাতুভৱন্তি – ৰূপধাতু, গন্ধধাতু, ৰসধাতু, কাযধাতু, ফোট্ঠব্বধাতু, মনোৱিঞ্ঞাণধাতু, ধম্মধাতু. কামধাতুযা উপপত্তিক্খণে এতেসং ইমা সত্ত ধাতুযো পাতুভৱন্তি.

১০১১. কামধাতুযা উপপত্তিক্খণে সব্বেসং কতমং একং সচ্চং পাতুভৱতি? দুক্খসচ্চং – কামধাতুযা উপপত্তিক্খণে সব্বেসং ইদং একং সচ্চং পাতুভৱতি.

১০১২. কামধাতুযা উপপত্তিক্খণে কস্স চুদ্দসিন্দ্ৰিযানি পাতুভৱন্তি? কামাৱচৰানং দেৱানং, সহেতুকানং ঞাণসম্পযুত্তানং উপপত্তিক্খণে চুদ্দসিন্দ্ৰিযানি পাতুভৱন্তি – চক্খুন্দ্ৰিযং, সোতিন্দ্ৰিযং, ঘানিন্দ্ৰিযং, জিৱ্হিন্দ্ৰিযং, কাযিন্দ্ৰিযং, মনিন্দ্ৰিযং, ইত্থিন্দ্ৰিযং ৱা পুৰিসিন্দ্ৰিযং ৱা, জীৱিতিন্দ্ৰিযং, সোমনস্সিন্দ্ৰিযং ৱা উপেক্খিন্দ্ৰিযং ৱা, সদ্ধিন্দ্ৰিযং, ৱীৰিযিন্দ্ৰিযং, সতিন্দ্ৰিযং, সমাধিন্দ্ৰিযং, পঞ্ঞিন্দ্ৰিযং. কামধাতুযা উপপত্তিক্খণে এতেসং ইমানি চুদ্দসিন্দ্ৰিযানি পাতুভৱন্তি.

কামধাতুযা উপপত্তিক্খণে কস্স তেৰসিন্দ্ৰিযানি পাতুভৱন্তি? কামাৱচৰানং দেৱানং সহেতুকানং ঞাণৱিপ্পযুত্তানং উপপত্তিক্খণে তেৰসিন্দ্ৰিযানি পাতুভৱন্তি – চক্খুন্দ্ৰিযং, সোতিন্দ্ৰিযং, ঘানিন্দ্ৰিযং, জিৱ্হিন্দ্ৰিযং, কাযিন্দ্ৰিযং, মনিন্দ্ৰিযং, ইত্থিন্দ্ৰিযং ৱা পুৰিসিন্দ্ৰিযং ৱা, জীৱিতিন্দ্ৰিযং, সোমনস্সিন্দ্ৰিযং ৱা উপেক্খিন্দ্ৰিযং ৱা, সদ্ধিন্দ্ৰিযং, ৱীৰিযিন্দ্ৰিযং, সতিন্দ্ৰিযং, সমাধিন্দ্ৰিযং. কামধাতুযা উপপত্তিক্খণে এতেসং ইমানি তেৰসিন্দ্ৰিযানি পাতুভৱন্তি.

কামধাতুযা উপপত্তিক্খণে কস্স অপৰানি তেৰসিন্দ্ৰিযানি পাতুভৱন্তি? পঠমকপ্পিকানং মনুস্সানং সহেতুকানং ঞাণসম্পযুত্তানং উপপত্তিক্খণে তেৰসিন্দ্ৰিযানি পাতুভৱন্তি – চক্খুন্দ্ৰিযং, সোতিন্দ্ৰিযং, ঘানিন্দ্ৰিযং, জিৱ্হিন্দ্ৰিযং, কাযিন্দ্ৰিযং, মনিন্দ্ৰিযং, জীৱিতিন্দ্ৰিযং, সোমনস্সিন্দ্ৰিযং ৱা উপেক্খিন্দ্ৰিযং ৱা, সদ্ধিন্দ্ৰিযং, ৱীৰিযিন্দ্ৰিযং, সতিন্দ্ৰিযং, সমাধিন্দ্ৰিযং, পঞ্ঞিন্দ্ৰিযং. কামধাতুযা উপপত্তিক্খণে এতেসং ইমানি তেৰসিন্দ্ৰিযানি পাতুভৱন্তি.

কামধাতুযা উপপত্তিক্খণে কস্স দ্ৱাদসিন্দ্ৰিযানি পাতুভৱন্তি? পঠমকপ্পিকানং মনুস্সানং সহেতুকানং ঞাণৱিপ্পযুত্তানং উপপত্তিক্খণে দ্ৱাদসিন্দ্ৰিযানি পাতুভৱন্তি – চক্খুন্দ্ৰিযং, সোতিন্দ্ৰিযং, ঘানিন্দ্ৰিযং, জিৱ্হিন্দ্ৰিযং, কাযিন্দ্ৰিযং, মনিন্দ্ৰিযং, জীৱিতিন্দ্ৰিযং, সোমনস্সিন্দ্ৰিযং ৱা উপেক্খিন্দ্ৰিযং ৱা, সদ্ধিন্দ্ৰিযং, ৱীৰিযিন্দ্ৰিযং, সতিন্দ্ৰিযং, সমাধিন্দ্ৰিযং. কামধাতুযা উপপত্তিক্খণে এতেসং ইমানি দ্ৱাদসিন্দ্ৰিযানি পাতুভৱন্তি.

কামধাতুযা উপপত্তিক্খণে কস্স দসিন্দ্ৰিযানি পাতুভৱন্তি? গব্ভসেয্যকানং সত্তানং সহেতুকানং ঞাণসম্পযুত্তানং উপপত্তিক্খণে দসিন্দ্ৰিযানি পাতুভৱন্তি – কাযিন্দ্ৰিযং, মনিন্দ্ৰিযং, ইত্থিন্দ্ৰিযং ৱা পুৰিসিন্দ্ৰিযং ৱা, জীৱিতিন্দ্ৰিযং, সোমনস্সিন্দ্ৰিযং ৱা উপেক্খিন্দ্ৰিযং ৱা, সদ্ধিন্দ্ৰিযং, ৱীৰিযিন্দ্ৰিযং, সতিন্দ্ৰিযং, সমাধিন্দ্ৰিযং, পঞ্ঞিন্দ্ৰিযং. কামধাতুযা উপপত্তিক্খণে এতেসং ইমানি দসিন্দ্ৰিযানি পাতুভৱন্তি.

কামধাতুযা উপপত্তিক্খণে কস্স নৱিন্দ্ৰিযানি পাতুভৱন্তি? গব্ভসেয্যকানং সত্তানং সহেতুকানং ঞাণৱিপ্পযুত্তানং উপপত্তিক্খণে নৱিন্দ্ৰিযানি পাতুভৱন্তি – কাযিন্দ্ৰিযং, মনিন্দ্ৰিযং, ইত্থিন্দ্ৰিযং ৱা পুৰিসিন্দ্ৰিযং ৱা, জীৱিতিন্দ্ৰিযং, সোমনস্সিন্দ্ৰিযং ৱা উপেক্খিন্দ্ৰিযং ৱা, সদ্ধিন্দ্ৰিযং, ৱীৰিযিন্দ্ৰিযং, সতিন্দ্ৰিযং, সমাধিন্দ্ৰিযং. কামধাতুযা উপপত্তিক্খণে এতেসং ইমানি নৱিন্দ্ৰিযানি পাতুভৱন্তি.

কামধাতুযা উপপত্তিক্খণে কস্স অপৰানি নৱিন্দ্ৰিযানি পাতুভৱন্তি? ওপপাতিকানং পেতানং, ওপপাতিকানং অসুৰানং, ওপপাতিকানং তিৰচ্ছানগতানং নেৰযিকানং পৰিপুণ্ণাযতনানং উপপত্তিক্খণে নৱিন্দ্ৰিযানি পাতুভৱন্তি – চক্খুন্দ্ৰিযং, সোতিন্দ্ৰিযং, ঘানিন্দ্ৰিযং, জিৱ্হিন্দ্ৰিযং, কাযিন্দ্ৰিযং, মনিন্দ্ৰিযং, ইত্থিন্দ্ৰিযং ৱা পুৰিসিন্দ্ৰিযং ৱা, জীৱিতিন্দ্ৰিযং, উপেক্খিন্দ্ৰিযং. কামধাতুযা উপপত্তিক্খণে এতেসং ইমানি নৱিন্দ্ৰিযানি পাতুভৱন্তি.

কামধাতুযা উপপত্তিক্খণে কস্স অট্ঠিন্দ্ৰিযানি পাতুভৱন্তি? ওপপাতিকানং পেতানং, ওপপাতিকানং অসুৰানং, ওপপাতিকানং তিৰচ্ছানগতানং নেৰযিকানং, জচ্চন্ধানং উপপত্তিক্খণে অট্ঠিন্দ্ৰিযানি পাতুভৱন্তি – সোতিন্দ্ৰিযং, ঘানিন্দ্ৰিযং, জিৱ্হিন্দ্ৰিযং, কাযিন্দ্ৰিযং, মনিন্দ্ৰিযং, ইত্থিন্দ্ৰিযং ৱা পুৰিসিন্দ্ৰিযং ৱা, জীৱিতিন্দ্ৰিযং, উপেক্খিন্দ্ৰিযং. কামধাতুযা উপপত্তিক্খণে এতেসং ইমানি অট্ঠিন্দ্ৰিযানি পাতুভৱন্তি.

কামধাতুযা উপপত্তিক্খণে কস্স অপৰানি অট্ঠিন্দ্ৰিযানি পাতুভৱন্তি? ওপপাতিকানং পেতানং, ওপপাতিকানং অসুৰানং, ওপপাতিকানং তিৰচ্ছানগতানং নেৰযিকানং, জচ্চবধিৰানং উপপত্তিক্খণে অট্ঠিন্দ্ৰিযানি পাতুভৱন্তি – চক্খুন্দ্ৰিযং, ঘানিন্দ্ৰিযং, জিৱ্হিন্দ্ৰিযং, কাযিন্দ্ৰিযং মনিন্দ্ৰিযং, ইত্থিন্দ্ৰিযং ৱা পুৰিসিন্দ্ৰিযং ৱা, জীৱিতিন্দ্ৰিযং, উপেক্খিন্দ্ৰিযং. কামধাতুযা উপপত্তিক্খণে এতেসং ইমানি অট্ঠিন্দ্ৰিযানি পাতুভৱন্তি.

কামধাতুযা উপপত্তিক্খণে কস্স সত্তিন্দ্ৰিযানি পাতুভৱন্তি? ওপপাতিকানং পেতানং, ওপপাতিকানং অসুৰানং, ওপপাতিকানং তিৰচ্ছানগতানং নেৰযিকানং, জচ্চন্ধবধিৰানং উপপত্তিক্খণে সত্তিন্দ্ৰিযানি পাতুভৱন্তি – ঘানিন্দ্ৰিযং, জিৱ্হিন্দ্ৰিযং, কাযিন্দ্ৰিযং, মনিন্দ্ৰিযং, ইত্থিন্দ্ৰিযং ৱা পুৰিসিন্দ্ৰিযং ৱা, জীৱিতিন্দ্ৰিযং, উপেক্খিন্দ্ৰিযং. কামধাতুযা উপপত্তিক্খণে এতেসং ইমানি সত্তিন্দ্ৰিযানি পাতুভৱন্তি.

কামধাতুযা উপপত্তিক্খণে কস্স পঞ্চিন্দ্ৰিযানি পাতুভৱন্তি? গব্ভসেয্যকানং সত্তানং অহেতুকানং, ঠপেত্ৱা নপুংসকানং, উপপত্তিক্খণে পঞ্চিন্দ্ৰিযানি পাতুভৱন্তি – কাযিন্দ্ৰিযং, মনিন্দ্ৰিযং, ইত্থিন্দ্ৰিযং ৱা পুৰিসিন্দ্ৰিযং ৱা, জীৱিতিন্দ্ৰিযং, উপেক্খিন্দ্ৰিযং. কামধাতুযা উপপত্তিক্খণে এতেসং ইমানি পঞ্চিন্দ্ৰিযানি পাতুভৱন্তি.

কামধাতুযা উপপত্তিক্খণে কস্স চত্তাৰিন্দ্ৰিযানি পাতুভৱন্তি? গব্ভসেয্যকানং সত্তানং অহেতুকানং, নপুংসকানং উপপত্তিক্খণে চত্তাৰিন্দ্ৰিযানি পাতুভৱন্তি – কাযিন্দ্ৰিযং, মনিন্দ্ৰিযং, জীৱিতিন্দ্ৰিযং, উপেক্খিন্দ্ৰিযং. কামধাতুযা উপপত্তিক্খণে এতেসং ইমানি চত্তাৰিন্দ্ৰিযানি পাতুভৱন্তি.

১০১৩. কামধাতুযা উপপত্তিক্খণে কস্স তযো হেতূ পাতুভৱন্তি? কামাৱচৰানং দেৱানং, পঠমকপ্পিকানং মনুস্সানং, গব্ভসেয্যকানং সত্তানং সহেতুকানং ঞাণসম্পযুত্তানং উপপত্তিক্খণে তযো হেতূ পাতুভৱন্তি – অলোভো ৱিপাকহেতু, অদোসো ৱিপাকহেতু, অমোহো ৱিপাকহেতু. কামধাতুযা উপপত্তিক্খণে এতেসং ইমে তযো হেতূ পাতুভৱন্তি.

কামধাতুযা উপপত্তিক্খণে কস্স দ্ৱে হেতূ পাতুভৱন্তি? কামাৱচৰানং দেৱানং, পঠমকপ্পিকানং মনুস্সানং, গব্ভসেয্যকানং সত্তানং সহেতুকানং ঞাণৱিপ্পযুত্তানং উপপত্তিক্খণে দ্ৱে হেতূ পাতুভৱন্তি – অলোভো ৱিপাকহেতু, অদোসো ৱিপাকহেতু. কামধাতুযা উপপত্তিক্খণে এতেসং ইমে দ্ৱে হেতূ পাতুভৱন্তি. অৱসেসানং সত্তানং [অৱসেসা সত্তা (?)] অহেতুকা পাতুভৱন্তি.

১০১৪. কামধাতুযা উপপত্তিক্খণে সব্বেসং কতমে চত্তাৰো আহাৰা পাতুভৱন্তি. কবড়ীকাৰো আহাৰো, ফস্সাহাৰো, মনোসঞ্চেতনাহাৰো, ৱিঞ্ঞাণাহাৰো – কামধাতুযা উপপত্তিক্খণে সব্বেসং ইমে চত্তাৰো আহাৰা পাতুভৱন্তি.

কামধাতুযা উপপত্তিক্খণে সব্বেসং কতমো একো ফস্সো পাতুভৱতি? মনোৱিঞ্ঞাণধাতুসম্ফস্সো – কামধাতুযা উপপত্তিক্খণে সব্বেসং অযং একো ফস্সো পাতুভৱতি.

কামধাতুযা উপপত্তিক্খণে সব্বেসং কতমা একা ৱেদনা … একা সঞ্ঞা… একা চেতনা… একং চিত্তং পাতুভৱতি? মনোৱিঞ্ঞাণধাতু – কামধাতুযা উপপত্তিক্খণে সব্বেসং ইদং একং চিত্তং পাতুভৱতি.

২. ৰূপধাতু

১০১৫. ৰূপধাতুযা উপপত্তিক্খণে কতি খন্ধা পাতুভৱন্তি…পে… কতি চিত্তানি পাতুভৱন্তি?

ৰূপধাতুযা উপপত্তিক্খণে, ঠপেত্ৱা অসঞ্ঞসত্তানং দেৱানং, পঞ্চক্খন্ধা পাতুভৱন্তি, পঞ্চাযতনানি পাতুভৱন্তি, পঞ্চ ধাতুযো পাতুভৱন্তি, একং সচ্চং পাতুভৱতি, দসিন্দ্ৰিযানি পাতুভৱন্তি, তযো হেতূ পাতুভৱন্তি, তযো আহাৰা পাতুভৱন্তি, একো ফস্সো পাতুভৱতি, একা ৱেদনা… একা সঞ্ঞা… একা চেতনা… একং চিত্তং পাতুভৱতি.

১০১৬. ৰূপধাতুযা উপপত্তিক্খণে কতমে পঞ্চক্খন্ধা পাতুভৱন্তি? ৰূপক্খন্ধো, ৱেদনাক্খন্ধো, সঞ্ঞাক্খন্ধো, সঙ্খাৰক্খন্ধো, ৱিঞ্ঞাণক্খন্ধো – ৰূপধাতুযা উপপত্তিক্খণে ইমে পঞ্চক্খন্ধা পাতুভৱন্তি.

ৰূপধাতুযা উপপত্তিক্খণে কতমানি পঞ্চাযতনানি পাতুভৱন্তি? চক্খাযতনং, ৰূপাযতনং, সোতাযতনং, মনাযতনং, ধম্মাযতনং – ৰূপধাতুযা উপপত্তিক্খণে ইমানি পঞ্চাযতনানি পাতুভৱন্তি.

ৰূপধাতুযা উপপত্তিক্খণে কতমা পঞ্চ ধাতুযো পাতুভৱন্তি? চক্খুধাতু, ৰূপধাতু, সোতধাতু, মনোৱিঞ্ঞাণধাতু, ধম্মধাতু – ৰূপধাতুযা উপপত্তিক্খণে ইমা পঞ্চ ধাতুযো পাতুভৱন্তি.

ৰূপধাতুযা উপপত্তিক্খণে কতমং একং সচ্চং পাতুভৱতি? দুক্খসচ্চং – ৰূপধাতুযা উপপত্তিক্খণে ইদং একং সচ্চং পাতুভৱতি.

ৰূপধাতুযা উপপত্তিক্খণে কতমানি দসিন্দ্ৰিযানি পাতুভৱন্তি? চক্খুন্দ্ৰিযং, সোতিন্দ্ৰিযং, মনিন্দ্ৰিযং, জীৱিতিন্দ্ৰিযং, সোমনস্সিন্দ্ৰিযং ৱা উপেক্খিন্দ্ৰিযং ৱা, সদ্ধিন্দ্ৰিযং, ৱীৰিযিন্দ্ৰিযং, সতিন্দ্ৰিযং, সমাধিন্দ্ৰিযং, পঞ্ঞিন্দ্ৰিযং – ৰূপধাতুযা উপপত্তিক্খণে ইমানি দসিন্দ্ৰিযানি পাতুভৱন্তি.

ৰূপধাতুযা উপপত্তিক্খণে কতমে তযো হেতূ পাতুভৱন্তি? অলোভো ৱিপাকহেতু, অদোসো ৱিপাকহেতু, অমোহো ৱিপাকহেতু – ৰূপধাতুযা উপপত্তিক্খণে ইমে তযো হেতূ পাতুভৱন্তি.

ৰূপধাতুযা উপপত্তিক্খণে কতমে তযো আহাৰা পাতুভৱন্তি? ফস্সাহাৰো, মনোসঞ্চেতনাহাৰো, ৱিঞ্ঞাণাহাৰো – ৰূপধাতুযা উপপত্তিক্খণে ইমে তযো আহাৰা পাতুভৱন্তি.

ৰূপধাতুযা উপপত্তিক্খণে কতমো একো ফস্সো পাতুভৱতি? মনোৱিঞ্ঞাণধাতুসম্ফস্সো – ৰূপধাতুযা উপপত্তিক্খণে অযং একো ফস্সো পাতুভৱতি.

ৰূপধাতুযা উপপত্তিক্খণে কতমা একা ৱেদনা… একা সঞ্ঞা… একা চেতনা… একং চিত্তং পাতুভৱতি? মনোৱিঞ্ঞাণধাতু – ৰূপধাতুযা উপপত্তিক্খণে ইদং একং চিত্তং পাতুভৱতি.

৩. অসঞ্ঞসত্তা

১০১৭. অসঞ্ঞসত্তানং দেৱানং উপপত্তিক্খণে কতি খন্ধা পাতুভৱন্তি…পে… কতি চিত্তানি পাতুভৱন্তি?

অসঞ্ঞসত্তানং দেৱানং উপপত্তিক্খণে একো খন্ধো পাতুভৱতি – ৰূপক্খন্ধো; দ্ৱে আযতনানি পাতুভৱন্তি – ৰূপাযতনং, ধম্মাযতনং; দ্ৱে ধাতুযো পাতুভৱন্তি – ৰূপধাতু, ধম্মধাতু; একং সচ্চং পাতুভৱতি – দুক্খসচ্চং; একিন্দ্ৰিযং পাতুভৱতি – ৰূপজীৱিতিন্দ্ৰিযং. অসঞ্ঞসত্তা দেৱা অহেতুকা অনাহাৰা অফস্সকা অৱেদনকা অসঞ্ঞকা অচেতনকা অচিত্তকা পাতুভৱন্তি.

৪. অৰূপধাতু

১০১৮. অৰূপধাতুযা উপপত্তিক্খণে কতি খন্ধা পাতুভৱন্তি…পে… কতি চিত্তানি পাতুভৱন্তি?

অৰূপধাতুযা উপপত্তিক্খণে চত্তাৰো খন্ধা পাতুভৱন্তি, দ্ৱে আযতনানি পাতুভৱন্তি, দ্ৱে ধাতুযো পাতুভৱন্তি, একং সচ্চং পাতুভৱতি, অট্ঠিন্দ্ৰিযানি পাতুভৱন্তি, তযো হেতূ পাতুভৱন্তি, তযো আহাৰা পাতুভৱন্তি, একো ফস্সো পাতুভৱতি, একা ৱেদনা… একা সঞ্ঞা… একা চেতনা… একং চিত্তং পাতুভৱতি.

১০১৯. অৰূপধাতুযা উপপত্তিক্খণে কতমে চত্তাৰো খন্ধা পাতুভৱন্তি? ৱেদনাক্খন্ধো, সঞ্ঞাক্খন্ধো, সঙ্খাৰক্খন্ধো, ৱিঞ্ঞাণক্খন্ধো – অৰূপধাতুযা উপপত্তিক্খণে ইমে চত্তাৰো খন্ধা পাতুভৱন্তি.

অৰূপধাতুযা উপপত্তিক্খণে কতমানি দ্ৱে আযতনানি পাতুভৱন্তি? মনাযতনং, ধম্মাযতনং – অৰূপধাতুযা উপপত্তিক্খণে ইমানি দ্ৱে আযতনানি পাতুভৱন্তি.

অৰূপধাতুযা উপপত্তিক্খণে কতমা দ্ৱে ধাতুযো পাতুভৱন্তি? মনোৱিঞ্ঞাণধাতু, ধম্মধাতু – অৰূপধাতুযা উপপত্তিক্খণে ইমা দ্ৱে ধাতুযো পাতুভৱন্তি.

অৰূপধাতুযা উপপত্তিক্খণে কতমং একং সচ্চং পাতুভৱতি? দুক্খসচ্চং – অৰূপধাতুযা উপপত্তিক্খণে ইদং একং সচ্চং পাতুভৱতি.

অৰূপধাতুযা উপপত্তিক্খণে কতমানি অট্ঠিন্দ্ৰিযানি পাতুভৱন্তি? মনিন্দ্ৰিযং, জীৱিতিন্দ্ৰিযং, উপেক্খিন্দ্ৰিযং, সদ্ধিন্দ্ৰিযং, ৱীৰিযিন্দ্ৰিযং, সতিন্দ্ৰিযং, সমাধিন্দ্ৰিযং, পঞ্ঞিন্দ্ৰিযং – অৰূপধাতুযা উপপত্তিক্খণে ইমানি অট্ঠিন্দ্ৰিযানি পাতুভৱন্তি.

অৰূপধাতুযা উপপত্তিক্খণে কতমে তযো হেতূ পাতুভৱন্তি? অলোভো ৱিপাকহেতু, অদোসো ৱিপাকহেতু, অমোহো ৱিপাকহেতু – অৰূপধাতুযা উপপত্তিক্খণে ইমে তযো হেতূ পাতুভৱন্তি.

অৰূপধাতুযা উপপত্তিক্খণে কতমে তযো আহাৰা পাতুভৱন্তি? ফস্সাহাৰো, মনোসঞ্চেতনাহাৰো, ৱিঞ্ঞাণাহাৰো – অৰূপধাতুযা উপপত্তিক্খণে ইমে তযো আহাৰা পাতুভৱন্তি.

অৰূপধাতুযা উপপত্তিক্খণে কতমো একো ফস্সো পাতুভৱতি? মনোৱিঞ্ঞাণধাতুসম্ফস্সো – অৰূপধাতুযা উপপত্তিক্খণে অযং একো ফস্সো পাতুভৱতি.

অৰূপধাতুযা উপপত্তিক্খণে কতমা একা ৱেদনা…পে… একা সঞ্ঞা… একা চেতনা… একং চিত্তং পাতুভৱতি? মনোৱিঞ্ঞাণধাতু – অৰূপধাতুযা উপপত্তিক্খণে ইদং একং চিত্তং পাতুভৱতি.