৩. অৰূপধাতু

১০০৩. পঞ্চন্নং খন্ধানং কতি অৰূপধাতুপৰিযাপন্না, কতি ন অৰূপধাতুপৰিযাপন্না…পে… সত্তন্নং চিত্তানং কতি অৰূপধাতুপৰিযাপন্না, কতি ন অৰূপধাতুপৰিযাপন্না?

১০০৪. ৰূপক্খন্ধো ন অৰূপধাতুপৰিযাপন্নো; চত্তাৰো খন্ধা সিযা অৰূপধাতুপৰিযাপন্না, সিযা ন অৰূপধাতুপৰিযাপন্না.

দসাযতনা ন অৰূপধাতুপৰিযাপন্না; দ্ৱে আযতনা সিযা অৰূপধাতুপৰিযাপন্না, সিযা ন অৰূপধাতুপৰিযাপন্না.

সোড়স ধাতুযো ন অৰূপধাতুপৰিযাপন্না; দ্ৱে ধাতুযো সিযা অৰূপধাতুপৰিযাপন্না, সিযা ন অৰূপধাতুপৰিযাপন্না.

তীণি সচ্চানি ন অৰূপধাতুপৰিযাপন্নানি.

দুক্খসচ্চং সিযা অৰূপধাতুপৰিযাপন্নং, সিযা ন অৰূপধাতুপৰিযাপন্নং.

চুদ্দসিন্দ্ৰিযা ন অৰূপধাতুপৰিযাপন্না; অট্ঠিন্দ্ৰিযা সিযা অৰূপধাতুপৰিযাপন্না, সিযা ন অৰূপধাতুপৰিযাপন্না.

তযো অকুসলহেতূ ন অৰূপধাতুপৰিযাপন্না; ছ হেতূ সিযা অৰূপধাতুপৰিযাপন্না, সিযা ন অৰূপধাতুপৰিযাপন্না.

কবড়ীকাৰো আহাৰো ন অৰূপধাতুপৰিযাপন্নো; তযো আহাৰা সিযা অৰূপধাতুপৰিযাপন্না, সিযা ন অৰূপধাতুপৰিযাপন্না.

ছ ফস্সা ন অৰূপধাতুপৰিযাপন্না; মনোৱিঞ্ঞাণধাতুসম্ফস্সো সিযা অৰূপধাতুপৰিযাপন্নো, সিযা ন অৰূপধাতুপৰিযাপন্নো.

ছ ৱেদনা…পে… ছ সঞ্ঞা … ছ চেতনা… ছ চিত্তা ন অৰূপধাতুপৰিযাপন্না; মনোৱিঞ্ঞাণধাতু সিযা অৰূপধাতুপৰিযাপন্না, সিযা ন অৰূপধাতুপৰিযাপন্না.