১. কামধাতু

৯৯৯. পঞ্চন্নং খন্ধানং কতি কামধাতুপৰিযাপন্না, কতি ন কামধাতুপৰিযাপন্না…পে… সত্তন্নং চিত্তানং কতি কামধাতুপৰিযাপন্না, কতি ন কামধাতুপৰিযাপন্না?

১০০০. ৰূপক্খন্ধো কামধাতুপৰিযাপন্নো; চত্তাৰো খন্ধা সিযা কামধাতুপৰিযাপন্না, সিযা ন কামধাতুপৰিযাপন্না.

দসাযতনা কামধাতুপৰিযাপন্না; দ্ৱে আযতনা সিযা কামধাতুপৰিযাপন্না, সিযা ন কামধাতুপৰিযাপন্না.

সোড়স ধাতুযো কামধাতুপৰিযাপন্না; দ্ৱে ধাতুযো সিযা কামধাতুপৰিযাপন্না, সিযা ন কামধাতুপৰিযাপন্না.

সমুদযসচ্চং কামধাতুপৰিযাপন্নং; দ্ৱে সচ্চা ন কামধাতুপৰিযাপন্না; দুক্খসচ্চং সিযা কামধাতুপৰিযাপন্নং, সিযা ন কামধাতুপৰিযাপন্নং.

দসিন্দ্ৰিযা কামধাতুপৰিযাপন্না; তীণিন্দ্ৰিযা ন কামধাতুপৰিযাপন্না; নৱিন্দ্ৰিযা সিযা কামধাতুপৰিযাপন্না, সিযা ন কামধাতুপৰিযাপন্না.

তযো অকুসলহেতূ কামধাতুপৰিযাপন্না; ছ হেতূ সিযা কামধাতুপৰিযাপন্না, সিযা ন কামধাতুপৰিযাপন্না.

কবড়ীকাৰো আহাৰো কামধাতুপৰিযাপন্নো; তযো আহাৰা সিযা কামধাতুপৰিযাপন্না, সিযা ন কামধাতুপৰিযাপন্না.

ছ ফস্সা কামধাতুপৰিযাপন্না; মনোৱিঞ্ঞাণধাতুসম্ফস্সো সিযা কামধাতু পৰিযাপন্নো, সিযা ন কামধাতুপৰিযাপন্নো.

ছ ৱেদনা…পে… ছ সঞ্ঞা… ছ চেতনা… ছ চিত্তা কামধাতুপৰিযাপন্না; মনোৱিঞ্ঞাণধাতু সিযা কামধাতুপৰিযাপন্না, সিযা ন কামধাতুপৰিযাপন্না.