১০. তিকাদিদস্সনৱাৰো

১. কুসলত্তিকং

১০৩৮. পঞ্চন্নং খন্ধানং কতি কুসলা, কতি অকুসলা, কতি অব্যাকতা…পে… সত্তন্নং চিত্তানং কতি কুসলা, কতি অকুসলা, কতি অব্যাকতা?

ৰূপক্খন্ধো অব্যাকতো. চত্তাৰো খন্ধা সিযা কুসলা, সিযা অকুসলা, সিযা অব্যাকতা. দসাযতনা অব্যাকতা. দ্ৱাযতনা সিযা কুসলা, সিযা অকুসলা, সিযা অব্যাকতা. সোড়স ধাতুযো অব্যাকতা. দ্ৱে ধাতুযো সিযা কুসলা, সিযা অকুসলা, সিযা অব্যাকতা. সমুদযসচ্চং অকুসলং. মগ্গসচ্চং কুসলং. নিৰোধসচ্চং অব্যাকতং. দুক্খসচ্চং সিযা কুসলং, সিযা অকুসলং, সিযা অব্যাকতং.

দসিন্দ্ৰিযা অব্যাকতা. দোমনস্সিন্দ্ৰিযং অকুসলং. অনঞ্ঞাতঞ্ঞস্সামীতিন্দ্ৰিযং কুসলং. চত্তাৰিন্দ্ৰিযা সিযা কুসলা, সিযা অব্যাকতা. ছ ইন্দ্ৰিযা সিযা কুসলা, সিযা অকুসলা, সিযা অব্যাকতা.

তযো কুসলহেতূ কুসলা. তযো অকুসলহেতূ অকুসলা. তযো অব্যাকতহেতূ অব্যাকতা. কবড়ীকাৰো আহাৰো অব্যাকতো. তযো আহাৰা সিযা কুসলা, সিযা অকুসলা, সিযা অব্যাকতা. ছ ফস্সা অব্যাকতা. মনোৱিঞ্ঞাণধাতুসম্ফস্সো সিযা কুসলো, সিযা অকুসলো, সিযা অব্যাকতো. ছ ৱেদনা… ছ সঞ্ঞা… ছ চেতনা… ছ চিত্তা অব্যাকতা. মনোৱিঞ্ঞাণধাতু সিযা কুসলা, সিযা অকুসলা, সিযা অব্যাকতা.

২. ৱেদনাতিকং

১০৩৯. পঞ্চন্নং খন্ধানং কতি সুখায ৱেদনায সম্পযুত্তা, কতি দুক্খায ৱেদনায সম্পযুত্তা, কতি অদুক্খমসুখায ৱেদনায সম্পযুত্তা…পে… সত্তন্নং চিত্তানং কতি সুখায ৱেদনায সম্পযুত্তা, কতি দুক্খায ৱেদনায সম্পযুত্তা, কতি অদুক্খমসুখায ৱেদনায সম্পযুত্তা?

দ্ৱে খন্ধা ন ৱত্তব্বা সুখায ৱেদনায সম্পযুত্তাতিপি, দুক্খায ৱেদনায সম্পযুত্তাতিপি, অদুক্খমসুখায ৱেদনায সম্পযুত্তাতিপি. তযো খন্ধা সিযা সুখায ৱেদনায সম্পযুত্তা, সিযা দুক্খায ৱেদনায সম্পযুত্তা, সিযা অদুক্খমসুখায ৱেদনায সম্পযুত্তা.

দসাযতনা ন ৱত্তব্বা সুখায ৱেদনায সম্পযুত্তাতিপি, দুক্খায ৱেদনায সম্পযুত্তাতিপি, অদুক্খমসুখায ৱেদনায সম্পযুত্তাতিপি. মনাযতনং সিযা সুখায ৱেদনায সম্পযুত্তং, সিযা দুক্খায ৱেদনায সম্পযুত্তং, সিযা অদুক্খমসুখায ৱেদনায সম্পযুত্তং. ধম্মাযতনং সিযা সুখায ৱেদনায সম্পযুত্তং, সিযা দুক্খায ৱেদনায সম্পযুত্তং, সিযা অদুক্খমসুখায ৱেদনায সম্পযুত্তং, সিযা ন ৱত্তব্বং সুখায ৱেদনায সম্পযুত্তন্তিপি, দুক্খায ৱেদনায সম্পযুত্তন্তিপি, অদুক্খমসুখায ৱেদনায সম্পযুত্তন্তিপি.

দস ধাতুযো ন ৱত্তব্বা সুখায ৱেদনায সম্পযুত্তাতিপি, দুক্খায ৱেদনায সম্পযুত্তাতিপি, অদুক্খমসুখায ৱেদনায সম্পযুত্তাতিপি. পঞ্চ ধাতুযো অদুক্খমসুখায ৱেদনায সম্পযুত্তা, কাযৱিঞ্ঞাণধাতু সিযা সুখায ৱেদনায সম্পযুত্তা, সিযা দুক্খায ৱেদনায সম্পযুত্তা. মনোৱিঞ্ঞাণধাতু সিযা সুখায ৱেদনায সম্পযুত্তা, সিযা দুক্খায ৱেদনায সম্পযুত্তা, সিযা অদুক্খমসুখায ৱেদনায সম্পযুত্তা. ধম্মধাতু সিযা সুখায ৱেদনায সম্পযুত্তা, সিযা দুক্খায ৱেদনায সম্পযুত্তা, সিযা অদুক্খমসুখায ৱেদনায সম্পযুত্তা, সিযা ন ৱত্তব্বা সুখায ৱেদনায সম্পযুত্তাতিপি, দুক্খায ৱেদনায সম্পযুত্তাতিপি, অদুক্খমসুখায ৱেদনায সম্পযুত্তাতিপি.

দ্ৱে সচ্চা সিযা সুখায ৱেদনায সম্পযুত্তা, সিযা অদুক্খমসুখায ৱেদনায সম্পযুত্তা. নিৰোধসচ্চং ন ৱত্তব্বং সুখায ৱেদনায সম্পযুত্তন্তিপি, দুক্খায ৱেদনায সম্পযুত্তন্তিপি, অদুক্খমসুখায ৱেদনায সম্পযুত্তন্তিপি. দুক্খসচ্চং সিযা সুখায ৱেদনায সম্পযুত্তং, সিযা দুক্খায ৱেদনায সম্পযুত্তং, সিযা অদুক্খমসুখায ৱেদনায সম্পযুত্তং, সিযা ন ৱত্তব্বং সুখায ৱেদনায সম্পযুত্তন্তিপি, দুক্খায ৱেদনায সম্পযুত্তন্তিপি, অদুক্খমসুখায ৱেদনায সম্পযুত্তন্তিপি.

দ্ৱাদসিন্দ্ৰিযা ন ৱত্তব্বা সুখায ৱেদনায সম্পযুত্তাতিপি, দুক্খায ৱেদনায সম্পযুত্তাতিপি, অদুক্খমসুখায ৱেদনায সম্পযুত্তাতিপি. ছ ইন্দ্ৰিযা সিযা সুখায ৱেদনায সম্পযুত্তা, সিযা অদুক্খমসুখায ৱেদনায সম্পযুত্তা. তীণিন্দ্ৰিযা সিযা সুখায ৱেদনায সম্পযুত্তা, সিযা দুক্খায ৱেদনায সম্পযুত্তা, সিযা অদুক্খমসুখায ৱেদনায সম্পযুত্তা. জীৱিতিন্দ্ৰিযং সিযা সুখায ৱেদনায সম্পযুত্তং, সিযা দুক্খায ৱেদনায সম্পযুত্তং, সিযা অদুক্খমসুখায ৱেদনায সম্পযুত্তং, সিযা ন ৱত্তব্বং সুখায ৱেদনায সম্পযুত্তন্তিপি, দুক্খায ৱেদনায সম্পযুত্তন্তিপি, অদুক্খমসুখায ৱেদনায সম্পযুত্তন্তিপি.

দোসো অকুসলহেতু দুক্খায ৱেদনায সম্পযুত্তো. সত্ত হেতূ সিযা সুখায ৱেদনায সম্পযুত্তা, সিযা অদুক্খমসুখায ৱেদনায সম্পযুত্তা. মোহো অকুসলহেতু সিযা সুখায ৱেদনায সম্পযুত্তো, সিযা দুক্খায ৱেদনায সম্পযুত্তো, সিযা দুক্খমসুখায ৱেদনায সম্পযুত্তো.

কবড়ীকাৰো আহাৰো ন ৱত্তব্বো সুখায ৱেদনায সম্পযুত্তোতি পি, দুক্খায ৱেদনায সম্পযুত্তোতিপি, অদুক্খমসুখায ৱেদনায সম্পযুত্তোতিপি. তযো আহাৰা সিযা সুখায ৱেদনায সম্পযুত্তা, সিযা দুক্খায ৱেদনায সম্পযুত্তা, সিযা অদুক্খমসুখায ৱেদনায সম্পযুত্তা.

পঞ্চ ফস্সা অদুক্খমসুখায ৱেদনায সম্পযুত্তা. কাযৱিঞ্ঞাণধাতুসম্ফস্সো সিযা সুখায ৱেদনায সম্পযুত্তো, সিযা দুক্খায ৱেদনায সম্পযুত্তো. মনোৱিঞ্ঞাণধাতুসম্ফস্সো সিযা সুখায ৱেদনায সম্পযুত্তো, সিযা দুক্খায ৱেদনায সম্পযুত্তো, সিযা অদুক্খমসুখায ৱেদনায সম্পযুত্তো.

সত্ত ৱেদনা ন ৱত্তব্বা সুখায ৱেদনায সম্পযুত্তাতিপি, দুক্খায ৱেদনায সম্পযুত্তাতিপি, অদুক্খমসুখায ৱেদনায সম্পযুত্তাতিপি. পঞ্চ সঞ্ঞা… পঞ্চ চেতনা… পঞ্চ চিত্তা অদুক্খমসুখায ৱেদনায সম্পযুত্তা, কাযৱিঞ্ঞাণধাতু সিযা সুখায ৱেদনায সম্পযুত্তা, সিযা দুক্খায ৱেদনায সম্পযুত্তা. মনোৱিঞ্ঞাণধাতু সিযা সুখায ৱেদনায সম্পযুত্তা, সিযা দুক্খায ৱেদনায সম্পযুত্তা, সিযা অদুক্খমসুখায ৱেদনায সম্পযুত্তা.

৩. ৱিপাকত্তিকং

১০৪০. পঞ্চন্নং খন্ধানং কতি ৱিপাকা, কতি ৱিপাকধম্মধম্মা, কতি নেৱৱিপাকনৱিপাকধম্মধম্মা…পে… সত্তন্নং চিত্তানং কতি ৱিপাকা, কতি ৱিপাকধম্মধম্মা, কতি নেৱৱিপাকনৱিপাকধম্মধম্মা?

ৰূপক্খন্ধো নেৱৱিপাকনৱিপাকধম্মধম্মো. চত্তাৰো খন্ধা সিযা ৱিপাকা, সিযা ৱিপাকধম্মধম্মা, সিযা নেৱৱিপাকনৱিপাকধম্মধম্মা.

দসাযতনা নেৱৱিপাকনৱিপাকধম্মধম্মা. দ্ৱাযতনা সিযা ৱিপাকা, সিযা ৱিপাকধম্মধম্মা, সিযা নেৱৱিপাকনৱিপাকধম্মধম্মা.

দস ধাতুযো নেৱৱিপাকনৱিপাকধম্মধম্মা. পঞ্চ ধাতুযো ৱিপাকা. মনোধাতু সিযা ৱিপাকা, সিযা নেৱৱিপাকনৱিপাকধম্মধম্মা. দ্ৱে ধাতুযো সিযা ৱিপাকা সিযা ৱিপাকধম্মধম্মা, সিযা নেৱৱিপাকনৱিপাকধম্মধম্মা.

দ্ৱে সচ্চা ৱিপাকধম্মধম্মা. নিৰোধসচ্চং নেৱৱিপাকনৱিপাকধম্মধম্মং. দুক্খসচ্চং সিযা ৱিপাকং, সিযা ৱিপাকধম্মধম্মং, সিযা নেৱৱিপাকনৱিপাকধম্মধম্মং.

সত্তিন্দ্ৰিযা নেৱৱিপাকনৱিপাকধম্মধম্মা. তীণিন্দ্ৰিযা ৱিপাকা. দ্ৱিন্দ্ৰিযা ৱিপাকধম্মধম্মা. অঞ্ঞিন্দ্ৰিযং সিযা ৱিপাকং, সিযা ৱিপাকধম্মধম্মং. নৱিন্দ্ৰিযা সিযা ৱিপাকা, সিযা ৱিপাকধম্মধম্মা, সিযা নেৱৱিপাকনৱিপাকধম্মধম্মা.

ছ হেতূ ৱিপাকধম্মধম্মা. তযো অব্যাকতহেতূ সিযা ৱিপাকা, সিযা নেৱৱিপাকনৱিপাকধম্মধম্মা.

কবড়ীকাৰো আহাৰো নেৱৱিপাকনৱিপাকধম্মধম্মো. তযো আহাৰা সিযা ৱিপাকা, সিযা ৱিপাকধম্মধম্মা, সিযা নেৱৱিপাকনৱিপাকধম্মধম্মা. পঞ্চ ফস্সা ৱিপাকা. মনোধাতুসম্ফস্সো সিযা ৱিপাকো, সিযা নেৱৱিপাকনৱিপাকধম্মধম্মো. মনোৱিঞ্ঞাণধাতুসম্ফস্সো সিযা ৱিপাকো, সিযা ৱিপাকধম্মধম্মো, সিযা নেৱৱিপাকনৱিপাকধম্মধম্মো. পঞ্চ ৱেদনা… পঞ্চ সঞ্ঞা… পঞ্চ চেতনা… পঞ্চ চিত্তা ৱিপাকা. মনোধাতু সিযা ৱিপাকা, সিযা নেৱৱিপাকনৱিপাকধম্মধম্মা. মনোৱিঞ্ঞাণধাতু সিযা ৱিপাকা, সিযা ৱিপাকধম্মধম্মা, সিযা নেৱৱিপাকনৱিপাকধম্মধম্মা.

৪. উপাদিন্নত্তিকং

১০৪১. পঞ্চন্নং খন্ধানং কতি উপাদিন্নুপাদানিযা, কতি অনুপাদিন্নুপাদানিযা, কতি অনুপাদিন্নঅনুপাদানিযা…পে… সত্তন্নং চিত্তানং কতি উপাদিন্নুপাদানিযা, কতি অনুপাদিন্নুপাদানিযা, কতি অনুপাদিন্নঅনুপাদানিযা?

ৰূপক্খন্ধো সিযা উপাদিন্নুপাদানিযো, সিযা অনুপাদিন্নুপাদানিযো ৪. চত্তাৰো খন্ধা সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা.

পঞ্চাযতনা উপাদিন্নুপাদানিযা. সদ্দাযতনং অনুপাদিন্নুপাদানিযং. চত্তাৰো আযতনা সিযা উপাদিন্নুপাদানিযা, সিযা অনুপাদিন্নুপাদানিযা. দ্ৱাযতনা সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা.

দস ধাতুযো উপাদিন্নুপাদানিযা. সদ্দধাতু অনুপাদিন্নুপাদানিযা. পঞ্চ ধাতুযো সিযা উপাদিন্নুপাদানিযা, সিযা অনুপাদিন্নুপাদানিযা. দ্ৱে ধাতুযো সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা.

সমুদযসচ্চং অনুপাদিন্নুপাদানিযং. দ্ৱে সচ্চা অনুপাদিন্নঅনুপাদানিযা. দুক্খসচ্চং সিযা উপাদিন্নুপাদানিযং, সিযা অনুপাদিন্নুপাদানিযং.

নৱিন্দ্ৰিযা উপাদিন্নুপাদানিযা. দোমনস্সিন্দ্ৰিযং অনুপাদিন্নুপাদানিযং. তীণিন্দ্ৰিযা অনুপাদিন্নঅনুপাদানিযা. নৱিন্দ্ৰিযা সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা. তযো অকুসলহেতূ অনুপাদিন্নুপাদানিযা. তযো কুসলহেতূ সিযা অনুপাদিন্নুপাদানিযা, সিযা অনুপাদিন্নঅনুপাদানিযা. তযো অব্যাকতহেতূ সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা.

কবড়ীকাৰো আহাৰো সিযা উপাদিন্নুপাদানিযো, সিযা অনুপাদিন্নুপাদানিযো. তযো আহাৰা সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা.

পঞ্চ ফস্সা উপাদিন্নুপাদানিযা. মনোধাতুসম্ফস্সো সিযা উপাদিন্নুপাদানিযো, সিযা অনুপাদিন্নুপাদানিযো. মনোৱিঞ্ঞাণধাতুসম্ফস্সো সিযা উপাদিন্নুপাদানিযো, সিযা অনুপাদিন্নুপাদানিযো, সিযা অনুপাদিন্নঅনুপাদানিযো. পঞ্চ ৱেদনা… পঞ্চ সঞ্ঞা… পঞ্চ চেতনা… পঞ্চ চিত্তা উপাদিন্নুপাদানিযা. মনোধাতু সিযা উপাদিন্নুপাদানিযা, সিযা অনুপাদিন্নুপাদানিযা. মনোৱিঞ্ঞাণধাতু সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা.

৫. ৱিতক্কত্তিকং

১০৪২. পঞ্চন্নং খন্ধানং কতি সৱিতক্কসৱিচাৰা, কতি অৱিতক্কৱিচাৰমত্তা, কতি অৱিতক্কঅৱিচাৰা…পে… সত্তন্নং চিত্তানং কতি সৱিতক্কসৱিচাৰা, কতি অৱিতক্কৱিচাৰমত্তা, কতি অৱিতক্কঅৱিচাৰা?

ৰূপক্খন্ধো অৱিতক্কঅৱিচাৰো. তযো খন্ধা সিযা সৱিতক্কসৱিচাৰা, সিযা অৱিতক্কৱিচাৰমত্তা, সিযা অৱিতক্কঅৱিচাৰা. সঙ্খাৰক্খন্ধো সিযা সৱিতক্কসৱিচাৰো, সিযা অৱিতক্কৱিচাৰমত্তো, সিযা অৱিতক্কঅৱিচাৰো সিযা ন ৱত্তব্বো সৱিতক্কসৱিচাৰোতিপি, অৱিতক্কৱিচাৰমত্তোতিপি, অৱিতক্কঅৱিচাৰোতিপি.

দসাযতনা অৱিতক্কঅৱিচাৰা. মনাযতনং সিযা সৱিতক্কসৱিচাৰং, সিযা অৱিতক্কৱিচাৰমত্তং, সিযা অৱিতক্কঅৱিচাৰং. ধম্মাযতনং সিযা সৱিতক্কসৱিচাৰং, সিযা অৱিতক্কৱিচাৰমত্তং, সিযা অৱিতক্কঅৱিচাৰং, সিযা ন ৱত্তব্বং সৱিতক্কসৱিচাৰন্তিপি, অৱিতক্কৱিচাৰমত্তন্তিপি, অৱিতক্কঅৱিচাৰন্তিপি.

পন্নৰস ধাতুযো অৱিতক্কঅৱিচাৰা. মনোধাতু সৱিতক্কসৱিচাৰা. মনোৱিঞ্ঞাণধাতু সিযা সৱিতক্কসৱিচাৰা, সিযা অৱিতক্কৱিচাৰমত্তা, সিযা অৱিতক্কঅৱিচাৰা. ধম্মধাতু সিযা সৱিতক্কসৱিচাৰা, সিযা অৱিতক্কৱিচাৰমত্তা, সিযা অৱিতক্কঅৱিচাৰা, সিযা ন ৱত্তব্বা সৱিতক্কসৱিচাৰাতিপি, অৱিতক্কৱিচাৰমত্তাতিপি, অৱিতক্কঅৱিচাৰাতিপি.

সমুদযসচ্চং সৱিতক্কসৱিচাৰং. নিৰোধসচ্চং অৱিতক্কঅৱিচাৰং. মগ্গসচ্চং সিযা সৱিতক্কসৱিচাৰং, সিযা অৱিতক্কৱিচাৰমত্তং, সিযা অৱিতক্কঅৱিচাৰং. দুক্খসচ্চং সিযা সৱিতক্কসৱিচাৰং, সিযা অৱিতক্কৱিচাৰমত্তং, সিযা অৱিতক্কঅৱিচাৰং, সিযা ন ৱত্তব্বং সৱিতক্কসৱিচাৰন্তিপি, অৱিতক্কৱিচাৰমত্তন্তিপি, অৱিতক্কঅৱিচাৰন্তিপি.

নৱিন্দ্ৰিযা অৱিতক্কঅৱিচাৰা. দোমনস্সিন্দ্ৰিযং সৱিতক্কসৱিচাৰং. উপেক্খিন্দ্ৰিযং সিযা সৱিতক্কসৱিচাৰং, সিযা অৱিতক্কঅৱিচাৰং. একাদসিন্দ্ৰিযা সিযা সৱিতক্কসৱিচাৰা, সিযা অৱিতক্কৱিচাৰমত্তা, সিযা অৱিতক্কঅৱিচাৰা.

তযো অকুসলহেতূ সৱিতক্কসৱিচাৰা. ছ হেতূ সিযা সৱিতক্কসৱিচাৰা, সিযা অৱিতক্কৱিচাৰমত্তা, সিযা অৱিতক্কঅৱিচাৰা. কবড়ীকাৰো আহাৰো অৱিতক্কঅৱিচাৰো. তযো আহাৰা সিযা সৱিতক্কসৱিচাৰা, সিযা অৱিতক্কৱিচাৰমত্তা, সিযা অৱিতক্কঅৱিচাৰা. পঞ্চ ফস্সা অৱিতক্কঅৱিচাৰা. মনোধাতুসম্ফস্সো সৱিতক্কসৱিচাৰো. মনোৱিঞ্ঞাণধাতুসম্ফস্সো সিযা সৱিতক্কসৱিচাৰো, সিযা অৱিতক্কৱিচাৰমত্তো, সিযা অৱিতক্কঅৱিচাৰো. পঞ্চ ৱেদনা… পঞ্চ সঞ্ঞা… পঞ্চ চেতনা… পঞ্চ চিত্তা অৱিতক্কঅৱিচাৰা মনোধাতু সৱিতক্কসৱিচাৰা, মনোৱিঞ্ঞাণধাতু সিযা সৱিতক্কসৱিচাৰা, সিযা অৱিতক্কৱিচাৰমত্তা, সিযা অৱিতক্কঅৱিচাৰা.

(১) ৰূপদুকং

১০৪৩. পঞ্চন্নং খন্ধানং কতি ৰূপা, কতি অৰূপা…পে… সত্তন্নং চিত্তানং কতি ৰূপা, কতি অৰূপা?

ৰূপক্খন্ধো ৰূপং. চত্তাৰো খন্ধা অৰূপা. দসাযতনা ৰূপা. মনাযতনং অৰূপং. ধম্মাযতনং সিযা ৰূপং, সিযা অৰূপং. দস ধাতুযো ৰূপা. সত্ত ধাতুযো অৰূপা. ধম্মধাতু সিযা ৰূপা, সিযা অৰূপা. তীণি সচ্চানি অৰূপা. দুক্খসচ্চং সিযা ৰূপং, সিযা অৰূপং. সত্তিন্দ্ৰিযা ৰূপা. চুদ্দসিন্দ্ৰিযা অৰূপা. জীৱিতিন্দ্ৰিযং সিযা ৰূপং, সিযা অৰূপং. নৱ হেতূ অৰূপা. কবড়ীকাৰো আহাৰো ৰূপং. তযো আহাৰা অৰূপা. সত্ত ফস্সা অৰূপা. সত্ত ৱেদনা… সত্ত সঞ্ঞা… সত্ত চেতনা সত্ত চিত্তা অৰূপা.

(২) লোকিযদুকং

১০৪৪. পঞ্চন্নং খন্ধানং কতি লোকিযা, কতি লোকুত্তৰা? দ্ৱাদসন্নং আযতনানং কতি লোকিযা, কতি লোকুত্তৰা? অট্ঠাৰসন্নং ধাতূনং কতি লোকিযা, কতি লোকুত্তৰা? চতুন্নং সচ্চানং কতি লোকিযা, কতি লোকুত্তৰা…পে… সত্তন্নং চিত্তানং কতি লোকিযা, কতি লোকুত্তৰা?

ৰূপক্খন্ধো লোকিযো. চত্তাৰো খন্ধা সিযা লোকিযা, সিযা লোকুত্তৰা. দসাযতনা লোকিযা. দ্ৱে আযতনা সিযা লোকিযা, সিযা লোকুত্তৰা. সোড়স ধাতুযো লোকিযা. দ্ৱে ধাতুযো সিযা লোকিযা, সিযা লোকুত্তৰা. দ্ৱে সচ্চা লোকিযা. দ্ৱে সচ্চা লোকুত্তৰা.

দসিন্দ্ৰিযা লোকিযা. তীণিন্দ্ৰিযা লোকুত্তৰা. নৱিন্দ্ৰিযা সিযা লোকিযা, সিযা লোকুত্তৰা. তযো অকুসলহেতূ লোকিযা. ছ হেতূ সিযা লোকিযা, সিযা লোকুত্তৰা. কবড়ীকাৰো আহাৰো লোকিযো. তযো আহাৰা সিযা লোকিযা, সিযা লোকুত্তৰা. ছ ফস্সা লোকিযা. মনোৱিঞ্ঞাণধাতুসম্ফস্সো সিযা লোকিযো, সিযা লোকুত্তৰো. ছ ৱেদনা লোকিযা. মনোৱিঞ্ঞাণধাতুসম্ফস্সজা ৱেদনা সিযা লোকিযা, সিযা লোকুত্তৰা. ছ সঞ্ঞা লোকিযা. মনোৱিঞ্ঞাণধাতুসম্ফস্সজা সঞ্ঞা সিযা লোকিযা, সিযা লোকুত্তৰা. ছ চেতনা লোকিযা. মনোৱিঞ্ঞাণধাতুসম্ফস্সজা চেতনা সিযা লোকিযা, সিযা লোকুত্তৰা. ছ চিত্তা লোকিযা. মনোৱিঞ্ঞাণধাতু সিযা লোকিযা, সিযা লোকুত্তৰাতি.

অভিঞ্ঞা দ্ৱে সাৰম্মণা, দিট্ঠা কুসলৱেদনা;

ৱিপাকা চ উপাদিন্না, ৱিতক্কং ৰূপলোকিযাতি.

ধম্মহদযৱিভঙ্গো নিট্ঠিতো.

ৱিভঙ্গপকৰণং নিট্ঠিতং.