(৫৪) সেয্যস্স হীনোহমস্মীতি মানো

৮৭১. তত্থ কতমো সেয্যস্স হীনোহমস্মীতি মানো? ইধেকচ্চো সেয্যো হোতি জাতিযা ৱা গোত্তেন ৱা কোলপুত্তিযেন ৱা ৱণ্ণপোক্খৰতায ৱা ধনেন ৱা অজ্ঝেনেন ৱা কম্মাযতনেন ৱা সিপ্পাযতনেন ৱা ৱিজ্জাট্ঠানেন ৱা সুতেন ৱা পটিভানেন ৱা অঞ্ঞতৰঞ্ঞতৰেন ৱত্থুনা পৰেহি হীনং অত্তানং দহতি; সো তং নিস্সায ওমানং জপ্পেতি. যো এৱৰূপো ওমানো ওমঞ্ঞনা ওমঞ্ঞিতত্তং হীড়না ওহীড়না ওহীড়িতত্তং অত্তুঞ্ঞা অত্তৱঞ্ঞা অত্তপৰিভৱো – অযং ৱুচ্চতি ‘‘সেয্যস্স হীনোহমস্মীতি মানো’’.