৩. পঞ্হাপুচ্ছকং

৫০৪. অৰিযো অট্ঠঙ্গিকো মগ্গো, সেয্যথিদং – সম্মাদিট্ঠি, সম্মাসঙ্কপ্পো, সম্মাৱাচা, সম্মাকম্মন্তো, সম্মাআজীৱো, সম্মাৱাযামো, সম্মাসতি, সম্মাসমাধি.

৫০৫. অট্ঠন্নং মগ্গঙ্গানং কতি কুসলা, কতি অকুসলা, কতি অব্যাকতা…পে… কতি সৰণা, কতি অৰণা?

১. তিকং

৫০৬. সিযা কুসলা, সিযা অব্যাকতা. সম্মাসঙ্কপ্পো সুখায ৱেদনায সম্পযুত্তো; সত্ত মগ্গঙ্গা সিযা সুখায ৱেদনায সম্পযুত্তা, সিযা অদুক্খমসুখায ৱেদনায সম্পযুত্তা. সিযা ৱিপাকা, সিযা ৱিপাকধম্মধম্মা. অনুপাদিন্নঅনুপাদানিযা. অসংকিলিট্ঠঅসংকিলেসিকা. সম্মাসঙ্কপ্পো অৱিতক্কৱিচাৰমত্তো; সত্ত মগ্গঙ্গা সিযা সৱিতক্কসৱিচাৰা, সিযা অৱিতক্কৱিচাৰমত্তা, সিযা অৱিতক্কঅৱিচাৰা. সম্মাসঙ্কপ্পো পীতিসহগতো, সুখসহগতো, ন উপেক্খাসহগতো; সত্ত মগ্গঙ্গা সিযা পীতিসহগতা, সিযা সুখসহগতা, সিযা উপেক্খাসহগতা. নেৱ দস্সনেন ন ভাৱনায পহাতব্বা. নেৱ দস্সনেন ন ভাৱনায পহাতব্বহেতুকা. সিযা অপচযগামিনো, সিযা নেৱাচযগামিনাপচযগামিনো. সিযা সেক্খা, সিযা অসেক্খা. অপ্পমাণা. অপ্পমাণাৰম্মণা. পণীতা. সিযা সম্মত্তনিযতা, সিযা অনিযতা. ন মগ্গাৰম্মণা, সিযা মগ্গহেতুকা, সিযা মগ্গাধিপতিনো; সিযা ন ৱত্তব্বা মগ্গহেতুকাতিপি, মগ্গাধিপতিনোতিপি. সিযা উপ্পন্না, সিযা অনুপ্পন্না, সিযা উপ্পাদিনো. সিযা অতীতা, সিযা অনাগতা, সিযা পচ্চুপ্পন্না. ন ৱত্তব্বা অতীতাৰম্মণাতিপি, অনাগতাৰম্মণাতিপি, পচ্চুপ্পন্নাৰম্মণাতিপি. সিযা অজ্ঝত্তা, সিযা বহিদ্ধা, সিযা অজ্ঝত্তবহিদ্ধা. বহিদ্ধাৰম্মণা. অনিদস্সনঅপ্পটিঘা.

২. দুকং

৫০৭. সম্মাদিট্ঠি হেতু, সত্ত মগ্গঙ্গা ন হেতূ. সহেতুকা. হেতুসম্পযুত্তা. সম্মাদিট্ঠি হেতু চেৱ সহেতুকা চ, সত্ত মগ্গঙ্গা ন ৱত্তব্বা হেতূ চেৱ সহেতুকা চাতি, সহেতুকা চেৱ ন চ হেতূ. সম্মাদিট্ঠি হেতু চেৱ হেতুসম্পযুত্তা চ, সত্ত মগ্গঙ্গা ন ৱত্তব্বা হেতূ চেৱ হেতুসম্পযুত্তা চাতি, হেতুসম্পযুত্তা চেৱ ন চ হেতূ. সত্ত মগ্গঙ্গা ন হেতূ সহেতুকা, সম্মাদিট্ঠি ন ৱত্তব্বা ন হেতু সহেতুকাতিপি, ন হেতু অহেতুকাতিপি.

সপ্পচ্চযা. সঙ্খতা. অনিদস্সনা. অপ্পটিঘা. অৰূপা. লোকুত্তৰা. কেনচি ৱিঞ্ঞেয্যা, কেনচি ন ৱিঞ্ঞেয্যা.

নো আসৱা. অনাসৱা. আসৱৱিপ্পযুত্তা. ন ৱত্তব্বা আসৱা চেৱ সাসৱা চাতিপি, সাসৱা চেৱ নো চ আসৱাতিপি. ন ৱত্তব্বা আসৱা চেৱ আসৱসম্পযুত্তা চাতিপি, আসৱসম্পযুত্তা চেৱ নো চ আসৱাতিপি. আসৱৱিপ্পযুত্তা. অনাসৱা.

নো সংযোজনা…পে… নো গন্থা…পে… নো ওঘা…পে… নো যোগা…পে… নো নীৱৰণা…পে… নো পৰামাসা…পে… সাৰম্মণা. নো চিত্তা. চেতসিকা. চিত্তসম্পযুত্তা. চিত্তসংসট্ঠা. চিত্তসমুট্ঠানা. চিত্তসহভুনো. চিত্তানুপৰিৱত্তিনো. চিত্তসংসট্ঠসমুট্ঠানা. চিত্তসংসট্ঠসমুট্ঠানসহভুনো. চিত্তসংসট্ঠসমুট্ঠানানুপৰিৱত্তিনো. বাহিৰা. নো উপাদা. অনুপাদিন্না.

নো উপাদানা…পে… নো কিলেসা…পে… ন দস্সনেন পহাতব্বা. ন ভাৱনায পহাতব্বা. ন দস্সনেন পহাতব্বহেতুকা. ন ভাৱনায পহাতব্বহেতুকা. সম্মাসঙ্কপ্পো অৱিতক্কো, সত্ত মগ্গঙ্গা সিযা সৱিতক্কা, সিযা অৱিতক্কা. সম্মাসঙ্কপ্পো সৱিচাৰো, সত্ত মগ্গঙ্গা সিযা সৱিচাৰা, সিযা অৱিচাৰা. সম্মাসঙ্কপ্পো সপ্পীতিকো, সত্ত মগ্গঙ্গা সিযা সপ্পীতিকা, সিযা অপ্পীতিকা. সম্মাসঙ্কপ্পো পীতিসহগতো, সত্ত মগ্গঙ্গা সিযা পীতিসহগতা, সিযা ন পীতিসহগতা. সম্মাসঙ্কপ্পো সুখসহগতো, সত্ত মগ্গঙ্গা সিযা সুখসহগতা, সিযা ন সুখসহগতা. সম্মাসঙ্কপ্পো ন উপেক্খাসহগতো, সত্ত মগ্গঙ্গা সিযা উপেক্খাসহগতা, সিযা ন উপেক্খাসহগতা. ন কামাৱচৰা. ন ৰূপাৱচৰা. ন অৰূপাৱচৰা. অপৰিযাপন্না. সিযা নিয্যানিকা, সিযা অনিয্যানিকা. সিযা নিযতা, সিযা অনিযতা. অনুত্তৰা. অৰণাতি.

পঞ্হাপুচ্ছকং.

মগ্গঙ্গৱিভঙ্গো নিট্ঠিতো.