৩. পঞ্হাপুচ্ছকং

৪৮২. সত্ত বোজ্ঝঙ্গা – সতিসম্বোজ্ঝঙ্গো, ধম্মৱিচযসম্বোজ্ঝঙ্গো, ৱীৰিযসম্বোজ্ঝঙ্গো, পীতিসম্বোজ্ঝঙ্গো, পস্সদ্ধিসম্বোজ্ঝঙ্গো, সমাধিসম্বোজ্ঝঙ্গো, উপেক্খাসম্বোজ্ঝঙ্গো.

৪৮৩. সত্তন্নং বোজ্ঝঙ্গানং কতি কুসলা, কতি অকুসলা, কতি অব্যাকতা…পে… কতি সৰণা, কতি অৰণা?

১. তিকং

৪৮৪. সিযা কুসলা, সিযা অব্যাকতা. পীতিসম্বোজ্ঝঙ্গো সুখায ৱেদনায সম্পযুত্তো; ছ বোজ্ঝঙ্গা সিযা সুখায ৱেদনায সম্পযুত্তা, সিযা অদুক্খমসুখায ৱেদনায সম্পযুত্তা. সিযা ৱিপাকা, সিযা ৱিপাকধম্মধম্মা. অনুপাদিন্নঅনুপাদানিযা. অসংকিলিট্ঠঅসংকিলেসিকা. সিযা সৱিতক্কসৱিচাৰা, সিযা অৱিতক্কৱিচাৰমত্তা, সিযা অৱিতক্কঅৱিচাৰা. পীতিসম্বোজ্ঝঙ্গো ন পীতিসহগতো, সুখসহগতো, ন উপেক্খাসহগতো; ছ বোজ্ঝঙ্গা সিযা পীতিসহগতা, সিযা সুখসহগতা, সিযা উপেক্খাসহগতা. নেৱ দস্সনেন ন ভাৱনায পহাতব্বা. নেৱ দস্সনেন ন ভাৱনায পহাতব্বহেতুকা. সিযা অপচযগামিনো, সিযা নেৱাচযগামিনাপচযগামিনো. সিযা সেক্খা, সিযা অসেক্খা. অপ্পমাণা. অপ্পমাণাৰম্মণা. পণীতা. সিযা সম্মত্তনিযতা, সিযা অনিযতা. ন মগ্গাৰম্মণা, সিযা মগ্গহেতুকা, সিযা মগ্গাধিপতিনো; সিযা ন ৱত্তব্বা মগ্গহেতুকাতিপি, মগ্গাধিপতিনোতিপি. সিযা উপ্পন্না, সিযা অনুপ্পন্না, সিযা উপ্পাদিনো. সিযা অতীতা, সিযা অনাগতা, সিযা পচ্চুপ্পন্না. ন ৱত্তব্বা অতীতাৰম্মণাতিপি, অনাগতাৰম্মণাতিপি, পচ্চুপ্পন্নাৰম্মণাতিপি. সিযা অজ্ঝত্তা, সিযা বহিদ্ধা, সিযা অজ্ঝত্তবহিদ্ধা. বহিদ্ধাৰম্মণা. অনিদস্সনঅপ্পটিঘা.

২. দুকং

৪৮৫. ধম্মৱিচযসম্বোজ্ঝঙ্গো হেতু, ছ বোজ্ঝঙ্গা হেতুসম্পযুত্তা. ধম্মৱিচযসম্বোজ্ঝঙ্গো হেতু চেৱ সহেতুকো চ, ছ বোজ্ঝঙ্গা ন ৱত্তব্বা হেতূ চেৱ সহেতুকা চাতি, সহেতুকা চেৱ ন চ হেতূ. ধম্মৱিচযসম্বোজ্ঝঙ্গো হেতু চেৱ হেতুসম্পযুত্তো চ, ছ বোজ্ঝঙ্গা ন ৱত্তব্বা হেতূ চেৱ হেতুসম্পযুত্তা চাতি, হেতুসম্পযুত্তা চেৱ ন চ হেতূ. ছ বোজ্ঝঙ্গা ন হেতূ সহেতুকা, ধম্মৱিচযসম্বোজ্ঝঙ্গো ন ৱত্তব্বো ন হেতুসহেতুকোতিপি, ন হেতুঅহেতুকোতিপি. সপ্পচ্চযা. সঙ্খতা. অনিদস্সনা. অপ্পটিঘা. অৰূপা. লোকুত্তৰা. কেনচি ৱিঞ্ঞেয্যা, কেনচি ন ৱিঞ্ঞেয্যা. নো আসৱা. অনাসৱা আসৱৱিপ্পযুত্তা. ন ৱত্তব্বা আসৱা চেৱ সাসৱা চাতিপি, সাসৱা চেৱ নো চ আসৱাতিপি. আসৱা চেৱ আসৱসম্পযুত্তা চাতিপি, আসৱসম্পযুত্তা চেৱ নো চ আসৱাতিপি. আসৱৱিপ্পযুত্তা. অনাসৱা. নো সংযোজনা…পে… নো গন্থা…পে… নো ওঘা…পে… নো যোগা…পে… নো নীৱৰণা…পে… নো পৰামাসা…পে… সাৰম্মণা. নো চিত্তা. চেতসিকা. চিত্তসম্পযুত্তা. চিত্তসংসট্ঠা. চিত্তসমুট্ঠানা. চিত্তসহভুনো. চিত্তানুপৰিৱত্তিনো. চিত্তসংসট্ঠসমুট্ঠানা. চিত্তসংসট্ঠসমুট্ঠানসহভুনো. চিত্তসংসট্ঠসমুট্ঠানানুপৰিৱত্তিনো. বাহিৰা. নো উপাদা. অনুপাদিন্না. নো উপাদানা…পে… নো কিলেসা…পে… ন দস্সনেন পহাতব্বা. ন ভাৱনায পহাতব্বা. ন দস্সনেন পহাতব্বহেতুকা. ন ভাৱনায পহাতব্বহেতুকা. সিযা সৱিতক্কা, সিযা অৱিতক্কা. সিযা সৱিচাৰা, সিযা অৱিচাৰা.

পীতিসম্বোজ্ঝঙ্গো অপ্পীতিকো, ছ বোজ্ঝঙ্গা সিযা সপ্পীতিকা, সিযা অপ্পীতিকা. পীতিসম্বোজ্ঝঙ্গো ন পীতিসহগতো, ছ বোজ্ঝঙ্গা সিযা পীতিসহগতা, সিযা ন পীতিসহগতা. পীতিসম্বোজ্ঝঙ্গো সুখসহগতো, ছ বোজ্ঝঙ্গা সিযা সুখসহগতা, সিযা ন সুখসহগতা. পীতিসম্বোজ্ঝঙ্গো ন উপেক্খাসহগতো, ছ বোজ্ঝঙ্গা সিযা উপেক্খাসহগতা, সিযা ন উপেক্খাসহগতা. ন কামাৱচৰা. ন ৰূপাৱচৰা. ন অৰূপাৱচৰা. অপৰিযাপন্না. সিযা নিয্যানিকা, সিযা অনিয্যানিকা. সিযা নিযতা, সিযা অনিযতা. অনুত্তৰা. অৰণাতি.

পঞ্হাপুচ্ছকং.

বোজ্ঝঙ্গৱিভঙ্গো নিট্ঠিতো.