১-৭. পটিচ্চৱাৰাদি

২০. কুসলং সপ্পীতিকং ধম্মং পটিচ্চ কুসলো সপ্পীতিকো ধম্মো উপ্পজ্জতি হেতুপচ্চযা. (১)

অকুসলং সপ্পীতিকং ধম্মং পটিচ্চ অকুসলো সপ্পীতিকো ধম্মো উপ্পজ্জতি হেতুপচ্চযা. (১)

অব্যাকতং সপ্পীতিকং ধম্মং পটিচ্চ অব্যাকতো সপ্পীতিকো ধম্মো উপ্পজ্জতি হেতুপচ্চযা. (১) (সংখিত্তং.)

২১. হেতুযা তীণি, আৰম্মণে তীণি…পে… অৱিগতে তীণি (সংখিত্তং. সহজাতৱাৰম্পি…পে… সম্পযুত্তৱাৰম্পি পটিচ্চৱাৰসদিসং).

২২. কুসলো সপ্পীতিকো ধম্মো কুসলস্স সপ্পীতিকস্স ধম্মস্স হেতুপচ্চযেন পচ্চযো. (১)

অকুসলো সপ্পীতিকো ধম্মো অকুসলস্স সপ্পীতিকস্স ধম্মস্স হেতুপচ্চযেন পচ্চযো. (১)

অব্যাকতো সপ্পীতিকো ধম্মো অব্যাকতস্স সপ্পীতিকস্স ধম্মস্স হেতুপচ্চযেন পচ্চযো. (১) (সংখিত্তং.)

২৩. হেতুযা তীণি, আৰম্মণে নৱ…পে… অৱিগতে তীণি (সংখিত্তং).

২৪. কুসলং অপ্পীতিকং ধম্মং পটিচ্চ কুসলো অপ্পীতিকো ধম্মো উপ্পজ্জতি হেতুপচ্চযা… তীণি.

অকুসলং অপ্পীতিকং ধম্মং পটিচ্চ অকুসলো অপ্পীতিকো ধম্মো উপ্পজ্জতি হেতুপচ্চযা… তীণি.

অব্যাকতং অপ্পীতিকং ধম্মং পটিচ্চ অব্যাকতো অপ্পীতিকো ধম্মো উপ্পজ্জতি হেতুপচ্চযা. (১)

কুসলং অপ্পীতিকঞ্চ অব্যাকতং অপ্পীতিকঞ্চ ধম্মং পটিচ্চ অব্যাকতো অপ্পীতিকো ধম্মো উপ্পজ্জতি হেতুপচ্চযা. (১)

অকুসলং অপ্পীতিকঞ্চ অব্যাকতং অপ্পীতিকঞ্চ ধম্মং পটিচ্চ অব্যাকতো অপ্পীতিকো ধম্মো উপ্পজ্জতি হেতুপচ্চযা. (১) (সংখিত্তং.)

২৫. হেতুযা নৱ, আৰম্মণে তীণি…পে… অৱিগতে নৱ (সংখিত্তং. সহজাতৱাৰম্পি…পে… সম্পযুত্তৱাৰম্পি পটিচ্চৱাৰসদিসং).

২৬. কুসলো অপ্পীতিকো ধম্মো কুসলস্স অপ্পীতিকস্স ধম্মস্স হেতুপচ্চযেন পচ্চযো (সংখিত্তং).

হেতুযা সত্ত, আৰম্মণে নৱ…পে… অৱিগতে তেৰস (সংখিত্তং. যথা কুসলত্তিকে পঞ্হাৱাৰং, এৱং ৱিত্থাৰেতব্বং).