১. ৱিভঙ্গৱাৰো

নহেতুপচ্চযো

৫. কিলেসং ধম্মং পটিচ্চ কিলেসো ধম্মো উপ্পজ্জতি নহেতুপচ্চযা – ৱিচিকিচ্ছং পটিচ্চ মোহো, উদ্ধচ্চং পটিচ্চ মোহো. (১)

নোকিলেসং ধম্মং পটিচ্চ নোকিলেসো ধম্মো উপ্পজ্জতি নহেতুপচ্চযা – অহেতুকং নোকিলেসং একং খন্ধং পটিচ্চ তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে…পে… অহেতুকপটিসন্ধিক্খণে…পে… (যাৱ অসঞ্ঞসত্তা). (১)

নোকিলেসং ধম্মং পটিচ্চ কিলেসো ধম্মো উপ্পজ্জতি নহেতুপচ্চযা – ৱিচিকিচ্ছাসহগতে উদ্ধচ্চসহগতে খন্ধে পটিচ্চ ৱিচিকিচ্ছাসহগতো উদ্ধচ্চসহগতো মোহো. (২)

কিলেসঞ্চ নোকিলেসঞ্চ ধম্মং পটিচ্চ কিলেসো ধম্মো উপ্পজ্জতি নহেতুপচ্চযা – ৱিচিকিচ্ছাসহগতে খন্ধে চ ৱিচিকিচ্ছঞ্চ পটিচ্চ ৱিচিকিচ্ছাসহগতো মোহো, উদ্ধচ্চসহগতে খন্ধে চ উদ্ধচ্চঞ্চ পটিচ্চ উদ্ধচ্চসহগতো মোহো. (১)

নআৰম্মণপচ্চযাদি

৬. কিলেসং ধম্মং পটিচ্চ নোকিলেসো ধম্মো উপ্পজ্জতি নআৰম্মণপচ্চযা – কিলেসে পটিচ্চ চিত্তসমুট্ঠানং ৰূপং. (১)

নোকিলেসং ধম্মং পটিচ্চ নোকিলেসো ধম্মো উপ্পজ্জতি নআৰম্মণপচ্চযা – নোকিলেসে খন্ধে পটিচ্চ চিত্তসমুট্ঠানং ৰূপং; পটিসন্ধিক্খণে…পে… খন্ধে পটিচ্চ ৱত্থু (যাৱ অসঞ্ঞসত্তা). (১)

কিলেসঞ্চ নোকিলেসঞ্চ ধম্মং পটিচ্চ নোকিলেসো ধম্মো উপ্পজ্জতি নআৰম্মণপচ্চযা – কিলেসে চ সম্পযুত্তকে চ খন্ধে পটিচ্চ চিত্তসমুট্ঠানং ৰূপং, কিলেসে চ মহাভূতে চ পটিচ্চ চিত্তসমুট্ঠানং ৰূপং. (১)

নঅধিপতিপচ্চযা… নঅনন্তৰপচ্চযা… নসমনন্তৰপচ্চযা… নঅঞ্ঞমঞ্ঞপচ্চযা… নউপনিস্সযপচ্চযা.

নপুৰেজাতপচ্চযাদি

৭. কিলেসং ধম্মং পটিচ্চ কিলেসো ধম্মো উপ্পজ্জতি নপুৰেজাতপচ্চযা – অৰূপে লোভং পটিচ্চ মোহো দিট্ঠি থিনং উদ্ধচ্চং অহিৰিকং অনোত্তপ্পং, লোভং পটিচ্চ মোহো দিট্ঠি উদ্ধচ্চং অহিৰিকং অনোত্তপ্পং, লোভং পটিচ্চ মোহো মানো থিনং উদ্ধচ্চং অহিৰিকং অনোত্তপ্পং, লোভং পটিচ্চ মোহো মানো উদ্ধচ্চং অহিৰিকং অনোত্তপ্পং, লোভং পটিচ্চ মোহো থিনং উদ্ধচ্চং অহিৰিকং অনোত্তপ্পং, লোভং পটিচ্চ মোহো উদ্ধচ্চং অহিৰিকং অনোত্তপ্পং; ৱিচিকিচ্ছং পটিচ্চ মোহো উদ্ধচ্চং অহিৰিকং অনোত্তপ্পং; উদ্ধচ্চং পটিচ্চ মোহো অহিৰিকং অনোত্তপ্পং (অৰূপে দোসমূলকং নত্থি). (১)

কিলেসং ধম্মং পটিচ্চ নোকিলেসো ধম্মো উপ্পজ্জতি নপুৰেজাতপচ্চযা – অৰূপে কিলেসে পটিচ্চ সম্পযুত্তকা খন্ধা, কিলেসে পটিচ্চ চিত্তসমুট্ঠানং ৰূপং (এৱং নৱপি পঞ্হা কাতব্বা), নপচ্ছাজাতপচ্চযা, নআসেৱনপচ্চযা.

নকম্মপচ্চযো

৮. কিলেসং ধম্মং পটিচ্চ নোকিলেসো ধম্মো উপ্পজ্জতি নকম্মপচ্চযা – কিলেসে পটিচ্চ সম্পযুত্তকা চেতনা. (১)

নোকিলেসং ধম্মং পটিচ্চ নোকিলেসো ধম্মো উপ্পজ্জতি নকম্মপচ্চযা – নোকিলেসে খন্ধে পটিচ্চ সম্পযুত্তকা চেতনা; বাহিৰং… আহাৰসমুট্ঠানং… উতুসমুট্ঠানং…পে…. (১)

কিলেসঞ্চ নোকিলেসঞ্চ ধম্মং পটিচ্চ নোকিলেসো ধম্মো উপ্পজ্জতি নকম্মপচ্চযা – কিলেসে চ সম্পযুত্তকে চ খন্ধে পটিচ্চ সম্পযুত্তকা চেতনা. (১) (এৱং সব্বে পচ্চযা কাতব্বা.)