১. ৱিভঙ্গৱাৰো

হেতুপচ্চযো

৫১. সংকিলিট্ঠো ধম্মো সংকিলিট্ঠস্স ধম্মস্স হেতুপচ্চযেন পচ্চযো – সংকিলিট্ঠা হেতূ সম্পযুত্তকানং খন্ধানং হেতুপচ্চযেন পচ্চযো. (১)

সংকিলিট্ঠো ধম্মো অসংকিলিট্ঠস্স ধম্মস্স হেতুপচ্চযেন পচ্চযো – সংকিলিট্ঠা হেতূ চিত্তসমুট্ঠানানং ৰূপানং হেতুপচ্চযেন পচ্চযো. (২)

সংকিলিট্ঠো ধম্মো সংকিলিট্ঠস্স চ অসংকিলিট্ঠস্স চ ধম্মস্স হেতুপচ্চযেন পচ্চযো – সংকিলিট্ঠা হেতূ সম্পযুত্তকানং খন্ধানং চিত্তসমুট্ঠানানঞ্চ ৰূপানং হেতুপচ্চযেন পচ্চযো. (৩)

অসংকিলিট্ঠো ধম্মো অসংকিলিট্ঠস্স ধম্মস্স হেতুপচ্চযেন পচ্চযো – অসংকিলিট্ঠা হেতূ সম্পযুত্তকানং খন্ধানং চিত্তসমুট্ঠানানঞ্চ ৰূপানং হেতুপচ্চযেন পচ্চযো; পটিসন্ধিক্খণে…পে…. (১)

আৰম্মণপচ্চযো

৫২. সংকিলিট্ঠো ধম্মো সংকিলিট্ঠস্স ধম্মস্স আৰম্মণপচ্চযেন পচ্চযো – ৰাগং অস্সাদেতি অভিনন্দতি, তং আৰব্ভ ৰাগো উপ্পজ্জতি, দিট্ঠি উপ্পজ্জতি; ৱিচিকিচ্ছা…পে… উদ্ধচ্চ…পে… দোমনস্সং উপ্পজ্জতি; দিট্ঠিং অস্সাদেতি…পে… (কুসলত্তিকসদিসং); ৱিচিকিচ্ছং আৰব্ভ…পে… উদ্ধচ্চং আৰব্ভ…পে… দোমনস্সং উপ্পজ্জতি; দিট্ঠি…পে… ৱিচিকিচ্ছা…পে… উদ্ধচ্চং উপ্পজ্জতি. (১)

সংকিলিট্ঠো ধম্মো অসংকিলিট্ঠস্স ধম্মস্স আৰম্মণপচ্চযেন পচ্চযো – অৰিযা পহীনে কিলেসে পচ্চৱেক্খন্তি, ৱিক্খম্ভিতে কিলেসে…পে… পুব্বে সমুদাচিণ্ণে…পে… সংকিলিট্ঠে খন্ধে অনিচ্চতো…পে… ৱিপস্সতি, চেতোপৰিযঞাণেন সংকিলিট্ঠচিত্তসমঙ্গিস্স চিত্তং জানাতি; সংকিলিট্ঠা খন্ধা চেতোপৰিযঞাণস্স, পুব্বেনিৱাসানুস্সতিঞাণস্স, যথাকম্মূপগঞাণস্স, অনাগতংসঞাণস্স, আৱজ্জনায আৰম্মণপচ্চযেন পচ্চযো. (২)

৫৩. অসংকিলিট্ঠো ধম্মো অসংকিলিট্ঠস্স ধম্মস্স আৰম্মণপচ্চযেন পচ্চযো – দানং…পে… সীলং…পে… উপোসথকম্মং…পে… পুব্বে…পে… ঝানা ৱুট্ঠহিত্ৱা ঝানং পচ্চৱেক্খতি, অৰিযা মগ্গা ৱুট্ঠহিত্ৱা মগ্গং পচ্চৱেক্খন্তি…পে… আৱজ্জনায আৰম্মণপচ্চযেন পচ্চযো; চক্খুং…পে… ৱত্থুং অসংকিলিট্ঠে খন্ধে অনিচ্চতো…পে… ৱিপস্সতি, দিব্বেন চক্খুনা ৰূপং পস্সতি…পে… অনাগতংসঞাণস্স, আৱজ্জনায আৰম্মণপচ্চযেন পচ্চযো. (১)

অসংকিলিট্ঠো ধম্মো সংকিলিট্ঠস্স ধম্মস্স আৰম্মণপচ্চযেন পচ্চযো – দানং…পে… সীলং…পে… ঝানা ৱুট্ঠহিত্ৱা…পে… চক্খুং…পে… ৱত্থুং অসংকিলিট্ঠে খন্ধে অস্সাদেতি অভিনন্দতি, তং আৰব্ভ ৰাগো…পে… দোমনস্সং উপ্পজ্জতি. (২)

অধিপতিপচ্চযো

৫৪. সংকিলিট্ঠো ধম্মো সংকিলিট্ঠস্স ধম্মস্স অধিপতিপচ্চযেন পচ্চযো – আৰম্মণাধিপতি, সহজাতাধিপতি. আৰম্মণাধিপতি – ৰাগং গৰুং কত্ৱা অস্সাদেতি অভিনন্দতি, তং গৰুং কত্ৱা ৰাগো উপ্পজ্জতি, দিট্ঠি উপ্পজ্জতি; দিট্ঠিং গৰুং কত্ৱা অস্সাদেতি অভিনন্দতি, তং গৰুং কত্ৱা ৰাগো উপ্পজ্জতি, দিট্ঠি উপ্পজ্জতি. সহজাতাধিপতি – সংকিলিট্ঠাধিপতি সম্পযুত্তকানং খন্ধানং অধিপতিপচ্চযেন পচ্চযো. (১)

সংকিলিট্ঠো ধম্মো অসংকিলিট্ঠস্স ধম্মস্স অধিপতিপচ্চযেন পচ্চযো. সহজাতাধিপতি – সংকিলিট্ঠাধিপতি চিত্তসমুট্ঠানানং ৰূপানং অধিপতিপচ্চযেন পচ্চযো. (২)

সংকিলিট্ঠো ধম্মো সংকিলিট্ঠস্স চ অসংকিলিট্ঠস্স চ ধম্মস্স অধিপতিপচ্চযেন পচ্চযো. সহজাতাধিপতি – সংকিলিট্ঠাধিপতি সম্পযুত্তকানং খন্ধানং চিত্তসমুট্ঠানানঞ্চ ৰূপানং অধিপতিপচ্চযেন পচ্চযো. (৩)

৫৫. অসংকিলিট্ঠো ধম্মো অসংকিলিট্ঠস্স ধম্মস্স অধিপতিপচ্চযেন পচ্চযো – আৰম্মণাধিপতি, সহজাতাধিপতি. আৰম্মণাধিপতি – দানং…পে… সীলং…পে… উপোসথকম্মং…পে… পুব্বে…পে… ঝানা ৱুট্ঠহিত্ৱা ঝানং গৰুং কত্ৱা পচ্চৱেক্খতি, অৰিযা মগ্গা ৱুট্ঠহিত্ৱা মগ্গং গৰুং কত্ৱা পচ্চৱেক্খন্তি…পে… নিব্বানং ফলস্স অধিপতিপচ্চযেন পচ্চযো. সহজাতাধিপতি – অসংকিলিট্ঠাধিপতি সম্পযুত্তকানং খন্ধানং চিত্তসমুট্ঠানানঞ্চ ৰূপানং অধিপতিপচ্চযেন পচ্চযো. (১)

অসংকিলিট্ঠো ধম্মো সংকিলিট্ঠস্স ধম্মস্স অধিপতিপচ্চযেন পচ্চযো. আৰম্মণাধিপতি – দানং…পে… সীলং…পে… উপোসথকম্মং…পে… পুব্বে…পে… ঝানা ৱুট্ঠহিত্ৱা…পে… চক্খুং…পে… ৱত্থুং অসংকিলিট্ঠে খন্ধে গৰুং কত্ৱা অস্সাদেতি অভিনন্দতি, তং গৰুং কত্ৱা ৰাগো উপ্পজ্জতি, দিট্ঠি উপ্পজ্জতি. (২)

অনন্তৰপচ্চযাদি

৫৬. সংকিলিট্ঠো ধম্মো সংকিলিট্ঠস্স ধম্মস্স অনন্তৰপচ্চযেন পচ্চযো – পুৰিমা পুৰিমা সংকিলিট্ঠা খন্ধা পচ্ছিমানং পচ্ছিমানং সংকিলিট্ঠানং খন্ধানং অনন্তৰপচ্চযেন পচ্চযো. (১)

সংকিলিট্ঠো ধম্মো অসংকিলিট্ঠস্স ধম্মস্স অনন্তৰপচ্চযেন পচ্চযো – সংকিলিট্ঠা খন্ধা ৱুট্ঠানস্স অনন্তৰপচ্চযেন পচ্চযো. (২)

৫৭. অসংকিলিট্ঠো ধম্মো অসংকিলিট্ঠস্স ধম্মস্স অনন্তৰপচ্চযেন পচ্চযো – পুৰিমা পুৰিমা অসংকিলিট্ঠা খন্ধা পচ্ছিমানং পচ্ছিমানং অসংকিলিট্ঠানং খন্ধানং…পে… ফলসমাপত্তিযা অনন্তৰপচ্চযেন পচ্চযো. (১)

অসংকিলিট্ঠো ধম্মো সংকিলিট্ঠস্স ধম্মস্স অনন্তৰপচ্চযেন পচ্চযো – আৱজ্জনা সংকিলিট্ঠানং খন্ধানং অনন্তৰপচ্চযেন পচ্চযো. (২)

সমনন্তৰপচ্চযেন পচ্চযো… চত্তাৰি… সহজাতপচ্চযেন পচ্চযো… পঞ্চ… অঞ্ঞমঞ্ঞপচ্চযেন পচ্চযো… দ্ৱে… নিস্সযপচ্চযেন পচ্চযো… সত্ত.

উপনিস্সযপচ্চযো

৫৮. সংকিলিট্ঠো ধম্মো সংকিলিট্ঠস্স ধম্মস্স উপনিস্সযপচ্চযেন পচ্চযো – আৰম্মণূপনিস্সযো, অনন্তৰূপনিস্সযো, পকতূপনিস্সযো…পে…. পকতূপনিস্সযো – ৰাগং উপনিস্সায পাণং হনতি…পে… সঙ্ঘং ভিন্দতি, দোসং…পে… পত্থনং উপনিস্সায পাণং হনতি…পে… সঙ্ঘং ভিন্দতি, ৰাগো…পে… পত্থনা ৰাগস্স…পে… পত্থনায উপনিস্সযপচ্চযেন পচ্চযো. (১)

সংকিলিট্ঠো ধম্মো অসংকিলিট্ঠস্স ধম্মস্স উপনিস্সযপচ্চযেন পচ্চযো – অনন্তৰূপনিস্সযো, পকতূপনিস্সযো…পে…. পকতূপনিস্সযো – ৰাগং উপনিস্সায দানং দেতি…পে… সমাপত্তিং উপ্পাদেতি, দোসং…পে… পত্থনং উপনিস্সায দানং দেতি…পে… সমাপত্তিং উপ্পাদেতি, ৰাগো…পে… পত্থনা সদ্ধায…পে… পঞ্ঞায কাযিকস্স সুখস্স… কাযিকস্স দুক্খস্স… মগ্গস্স, ফলসমাপত্তিযা উপনিস্সযপচ্চযেন পচ্চযো. (২)

৫৯. অসংকিলিট্ঠো ধম্মো অসংকিলিট্ঠস্স ধম্মস্স উপনিস্সযপচ্চযেন পচ্চযো – আৰম্মণূপনিস্সযো, অনন্তৰূপনিস্সযো, পকতূপনিস্সযো…পে…. পকতূপনিস্সযো – সদ্ধং উপনিস্সায দানং দেতি…পে… সমাপত্তিং উপ্পাদেতি; সীলং…পে… পঞ্ঞং, কাযিকং সুখং… কাযিকং দুক্খং… উতুং… ভোজনং… সেনাসনং উপনিস্সায দানং দেতি…পে… সমাপত্তিং উপ্পাদেতি; সদ্ধা…পে… সেনাসনং সদ্ধায…পে… ফলসমাপত্তিযা উপনিস্সযপচ্চযেন পচ্চযো. (১)

অসংকিলিট্ঠো ধম্মো সংকিলিট্ঠস্স ধম্মস্স উপনিস্সযপচ্চযেন পচ্চযো – আৰম্মণূপনিস্সযো, অনন্তৰূপনিস্সযো, পকতূপনিস্সযো…পে…. পকতূপনিস্সযো – সদ্ধং উপনিস্সায মানং জপ্পেতি, দিট্ঠিং গণ্হাতি; সীলং…পে… পঞ্ঞং… কাযিকং সুখং… কাযিকং দুক্খং… উতুং… ভোজনং… সেনাসনং উপনিস্সায পাণং হনতি…পে… সঙ্ঘং ভিন্দতি; সদ্ধা…পে… সেনাসনং ৰাগস্স…পে… পত্থনায উপনিস্সযপচ্চযেন পচ্চযো. (২)

পুৰেজাতপচ্চযো

৬০. অসংকিলিট্ঠো ধম্মো অসংকিলিট্ঠস্স ধম্মস্স পুৰেজাতপচ্চযেন পচ্চযো – আৰম্মণপুৰেজাতং, ৱত্থুপুৰেজাতং (সংখিত্তং). অসংকিলিট্ঠো ধম্মো সংকিলিট্ঠস্স ধম্মস্স পুৰেজাতপচ্চযেন পচ্চযো – আৰম্মণপুৰেজাতং, ৱত্থুপুৰেজাতং (সংখিত্তং). (২)

পচ্ছাজাতাসেৱনপচ্চযা

৬১. সংকিলিট্ঠো ধম্মো অসংকিলিট্ঠস্স ধম্মস্স পচ্ছাজাতপচ্চযেন পচ্চযো (সংখিত্তং). অসংকিলিট্ঠো ধম্মো অসংকিলিট্ঠস্স ধম্মস্স পচ্ছাজাতপচ্চযেন পচ্চযো (সংখিত্তং). …আসেৱনপচ্চযেন পচ্চযো… দ্ৱে.

কম্মপচ্চযো

৬২. সংকিলিট্ঠো ধম্মো সংকিলিট্ঠস্স ধম্মস্স কম্মপচ্চযেন পচ্চযো – সংকিলিট্ঠা চেতনা সম্পযুত্তকানং খন্ধানং কম্মপচ্চযেন পচ্চযো. (১)

সংকিলিট্ঠো ধম্মো অসংকিলিট্ঠস্স ধম্মস্স কম্মপচ্চযেন পচ্চযো – সহজাতা, নানাক্খণিকা. সহজাতা – সংকিলিট্ঠা চেতনা চিত্তসমুট্ঠানানং ৰূপানং কম্মপচ্চযেন পচ্চযো. নানাক্খণিকা – সংকিলিট্ঠা চেতনা ৱিপাকানং খন্ধানং কটত্তা চ ৰূপানং কম্মপচ্চযেন পচ্চযো. (মূলং কাতব্বং.) সংকিলিট্ঠা চেতনা সম্পযুত্তকানং খন্ধানং চিত্তসমুট্ঠানানঞ্চ ৰূপানং কম্মপচ্চযেন পচ্চযো. (৩)

অসংকিলিট্ঠো ধম্মো অসংকিলিট্ঠস্স ধম্মস্স কম্মপচ্চযেন পচ্চযো – সহজাতা, নানাক্খণিকা. সহজাতা – অসংকিলিট্ঠা চেতনা সম্পযুত্তকানং খন্ধানং চিত্তসমুট্ঠানানঞ্চ ৰূপানং কম্মপচ্চযেন পচ্চযো; পটিসন্ধিক্খণে…পে…. নানাক্খণিকা – অসংকিলিট্ঠা চেতনা ৱিপাকানং খন্ধানং কটত্তা চ ৰূপানং কম্মপচ্চযেন পচ্চযো. (১)

ৱিপাকপচ্চযাদি

৬৩. অসংকিলিট্ঠো ধম্মো অসংকিলিট্ঠস্স ধম্মস্স ৱিপাকপচ্চযেন পচ্চযো… একং.

সংকিলিট্ঠো ধম্মো সংকিলিট্ঠস্স ধম্মস্স আহাৰপচ্চযেন পচ্চযো… ইন্দ্ৰিযপচ্চযেন পচ্চযো… ঝানপচ্চযেন পচ্চযো… মগ্গপচ্চযেন পচ্চযো… সম্পযুত্তপচ্চযেন পচ্চযো.

ৱিপ্পযুত্তপচ্চযো

৬৪. সংকিলিট্ঠো ধম্মো অসংকিলিট্ঠস্স ধম্মস্স ৱিপ্পযুত্তপচ্চযেন পচ্চযো – সহজাতং, পচ্ছাজাতং (সংখিত্তং). (১)

অসংকিলিট্ঠো ধম্মো অসংকিলিট্ঠস্স ধম্মস্স ৱিপ্পযুত্তপচ্চযেন পচ্চযো – সহজাতং, পুৰেজাতং, পচ্ছাজাতং (সংখিত্তং). (১)

অসংকিলিট্ঠো ধম্মো সংকিলিট্ঠস্স ধম্মস্স ৱিপ্পযুত্তপচ্চযেন পচ্চযো. পুৰেজাতং – ৱত্থু সংকিলিট্ঠানং খন্ধানং ৱিপ্পযুত্তপচ্চযেন পচ্চযো. (২)

অত্থিপচ্চযাদি

৬৫. সংকিলিট্ঠো ধম্মো সংকিলিট্ঠস্স ধম্মস্স অত্থিপচ্চযেন পচ্চযো … একং (পটিচ্চৱাৰসদিসং). সংকিলিট্ঠো ধম্মো অসংকিলিট্ঠস্স ধম্মস্স অত্থিপচ্চযেন পচ্চযো – সহজাতং, পচ্ছাজাতং (সংখিত্তং). সংকিলিট্ঠো ধম্মো সংকিলিট্ঠস্স চ অসংকিলিট্ঠস্স চ ধম্মস্স অত্থিপচ্চযেন পচ্চযো (পটিচ্চসদিসং). (৩)

অসংকিলিট্ঠো ধম্মো অসংকিলিট্ঠস্স ধম্মস্স অত্থিপচ্চযেন পচ্চযো – সহজাতং, পুৰেজাতং, পচ্ছাজাতং, আহাৰং, ইন্দ্ৰিযং (সংখিত্তং). অসংকিলিট্ঠো ধম্মো সংকিলিট্ঠস্স ধম্মস্স অত্থিপচ্চযেন পচ্চযো – পুৰেজাতং (সংখিত্তং). (২)

৬৬. সংকিলিট্ঠো চ অসংকিলিট্ঠো চ ধম্মা সংকিলিট্ঠস্স ধম্মস্স অত্থিপচ্চযেন পচ্চযো – সহজাতং, পুৰেজাতং. সহজাতো – সংকিলিট্ঠো একো খন্ধো চ ৱত্থু চ তিণ্ণন্নং খন্ধানং অত্থিপচ্চযেন পচ্চযো…পে… দ্ৱে খন্ধা চ…পে… (সংখিত্তং). (১)

সংকিলিট্ঠো চ অসংকিলিট্ঠো চ ধম্মা অসংকিলিট্ঠস্স ধম্মস্স অত্থিপচ্চযেন পচ্চযো – সহজাতং, পচ্ছাজাতং, আহাৰং, ইন্দ্ৰিযং. সহজাতা – সংকিলিট্ঠা খন্ধা চ মহাভূতা চ চিত্তসমুট্ঠানানং ৰূপানং অত্থিপচ্চযেন পচ্চযো. পচ্ছাজাতা – সংকিলিট্ঠা খন্ধা চ কবড়ীকাৰো আহাৰো চ ইমস্স কাযস্স অত্থিপচ্চযেন পচ্চযো. পচ্ছাজাতা – সংকিলিট্ঠা খন্ধা চ ৰূপজীৱিতিন্দ্ৰিযঞ্চ কটত্তাৰূপানং অত্থিপচ্চযেন পচ্চযো. (২)

নত্থিপচ্চযেন পচ্চযো… ৱিগতপচ্চযেন পচ্চযো… অৱিগতপচ্চযেন পচ্চযো.