১. ৱিভঙ্গৱাৰো

হেতুপচ্চযো

২৪৫. ৰূপাৱচৰো ধম্মো ৰূপাৱচৰস্স ধম্মস্স হেতুপচ্চযেন পচ্চযো – ৰূপাৱচৰা হেতূ সম্পযুত্তকানং খন্ধানং হেতুপচ্চযেন পচ্চযো; পটিসন্ধিক্খণে…পে…. (মূলং কাতব্বং.) ৰূপাৱচৰা হেতূ চিত্তসমুট্ঠানানং ৰূপানং হেতুপচ্চযেন পচ্চযো; পটিসন্ধিক্খণে…পে…. (মূলং কাতব্বং.) ৰূপাৱচৰা হেতূ সম্পযুত্তকানং খন্ধানং চিত্তসমুট্ঠানানঞ্চ ৰূপানং হেতুপচ্চযেন পচ্চযো; পটিসন্ধিক্খণে…পে…. (৩)

নৰূপাৱচৰো ধম্মো নৰূপাৱচৰস্স ধম্মস্স হেতুপচ্চযেন পচ্চযো – নৰূপাৱচৰা হেতূ সম্পযুত্তকানং খন্ধানং চিত্তসমুট্ঠানানঞ্চ ৰূপানং হেতুপচ্চযেন পচ্চযো; পটিসন্ধিক্খণে…পে…. (১)

আৰম্মণপচ্চযো

২৪৬. ৰূপাৱচৰো ধম্মো ৰূপাৱচৰস্স ধম্মস্স আৰম্মণপচ্চযেন পচ্চযো – চেতোপৰিযঞাণেন ৰূপাৱচৰচিত্তসমঙ্গিস্স চিত্তং জানাতি, ৰূপাৱচৰা খন্ধা ইদ্ধিৱিধঞাণস্স, চেতোপৰিযঞাণস্স, পুব্বেনিৱাসানুস্সতিঞাণস্স, যথাকম্মূপগঞাণস্স, অনাগতংসঞাণস্স আৰম্মণপচ্চযেন পচ্চযো. ৰূপাৱচৰো ধম্মো নৰূপাৱচৰস্স ধম্মস্স আৰম্মণপচ্চযেন পচ্চযো – পঠমং ঝানং পচ্চৱেক্খতি…পে… চতুত্থং ঝানং পচ্চৱেক্খতি, দিব্বং চক্খুং পচ্চৱেক্খতি, দিব্বং সোতধাতুং…পে… ইদ্ধিৱিধঞাণং…পে… চেতোপৰিযঞাণং…পে… পুব্বেনিৱাসানুস্সতিঞাণং…পে… যথাকম্মূপগঞাণং…পে… অনাগতংসঞাণং পচ্চৱেক্খতি, ৰূপাৱচৰে খন্ধে অনিচ্চতো…পে… দোমনস্সং উপ্পজ্জতি. (২)

২৪৭. নৰূপাৱচৰো ধম্মো নৰূপাৱচৰস্স ধম্মস্স আৰম্মণপচ্চযেন পচ্চযো – দানং দত্ৱা সীলং…পে… উপোসথকম্মং…পে… পুব্বে সুচিণ্ণানি পচ্চৱেক্খতি অস্সাদেতি অভিনন্দতি, তং আৰব্ভ ৰাগো…পে… দোমনস্সং উপ্পজ্জতি; অৰিযা মগ্গা ৱুট্ঠহিত্ৱা মগ্গং পচ্চৱেক্খন্তি, ফলং পচ্চৱেক্খন্তি, নিব্বানং পচ্চৱেক্খন্তি, নিব্বানং গোত্ৰভুস্স, ৱোদানস্স, মগ্গস্স, ফলস্স, আৱজ্জনায আৰম্মণপচ্চযেন পচ্চযো; অৰিযা পহীনে কিলেসে…পে… ৱিক্খম্ভিতে কিলেসে…পে… পুব্বে…পে… চক্খুং…পে… ৱত্থুং নৰূপাৱচৰে খন্ধে অনিচ্চতো…পে… দোমনস্সং উপ্পজ্জতি; আকাসানঞ্চাযতনং ৱিঞ্ঞাণঞ্চাযতনস্স…পে… আকিঞ্চঞ্ঞাযতনং নেৱসঞ্ঞানাসঞ্ঞাযতনস্স…পে… ৰূপাযতনং চক্খুৱিঞ্ঞাণস্স…পে… ফোট্ঠব্বাযতনং কাযৱিঞ্ঞাণস্স আৰম্মণপচ্চযেন পচ্চযো. (১)

নৰূপাৱচৰো ধম্মো ৰূপাৱচৰস্স ধম্মস্স আৰম্মণপচ্চযেন পচ্চযো – দিব্বেন চক্খুনা ৰূপং পস্সতি, দিব্বায সোতধাতুযা সদ্দং সুণাতি, চেতোপৰিযঞাণেন নৰূপাৱচৰচিত্তসমঙ্গিস্স চিত্তং জানাতি, নৰূপাৱচৰা খন্ধা ইদ্ধিৱিধঞাণস্স, চেতোপৰিযঞাণস্স, পুব্বেনিৱাসানুস্সতিঞাণস্স, যথাকম্মূপগঞাণস্স, অনাগতংসঞাণস্স আৰম্মণপচ্চযেন পচ্চযো. (২)

অধিপতিপচ্চযো

২৪৮. ৰূপাৱচৰো ধম্মো ৰূপাৱচৰস্স ধম্মস্স অধিপতিপচ্চযেন পচ্চযো. সহজাতাধিপতি – ৰূপাৱচৰাধিপতি সম্পযুত্তকানং খন্ধানং অধিপতিপচ্চযেন পচ্চযো. ৰূপাৱচৰো ধম্মো নৰূপাৱচৰস্স ধম্মস্স অধিপতিপচ্চযেন পচ্চযো – আৰম্মণাধিপতি, সহজাতাধিপতি. আৰম্মণাধিপতি – পঠমং ঝানং গৰুং কত্ৱা পচ্চৱেক্খতি, অস্সাদেতি অভিনন্দতি, তং গৰুং কত্ৱা ৰাগো উপ্পজ্জতি, দিট্ঠি উপ্পজ্জতি…পে… চতুত্থং ঝানং…পে… দিব্বং চক্খুং…পে… দিব্বং সোতধাতুং…পে… ইদ্ধিৱিধঞাণং…পে… চেতোপৰিযঞাণং…পে… পুব্বেনিৱাসানুস্সতিঞাণং…পে… যথাকম্মূপগঞাণং…পে… অনাগতংসঞাণং গৰুং কত্ৱা পচ্চৱেক্খতি অস্সাদেতি অভিনন্দতি, তং গৰুং কত্ৱা ৰাগো উপ্পজ্জতি, দিট্ঠি উপ্পজ্জতি, ৰূপাৱচৰে খন্ধে গৰুং কত্ৱা অস্সাদেতি অভিনন্দতি, তং গৰুং কত্ৱা ৰাগো উপ্পজ্জতি, দিট্ঠি উপ্পজ্জতি. সহজাতাধিপতি – ৰূপাৱচৰাধিপতি চিত্তসমুট্ঠানানং ৰূপানং অধিপতিপচ্চযেন পচ্চযো. ৰূপাৱচৰো ধম্মো ৰূপাৱচৰস্স চ নৰূপাৱচৰস্স চ ধম্মস্স অধিপতিপচ্চযেন পচ্চযো. সহজাতাধিপতি – ৰূপাৱচৰাধিপতি সম্পযুত্তকানং খন্ধানং চিত্তসমুট্ঠানানঞ্চ ৰূপানং অধিপতিপচ্চযেন পচ্চযো. (৩)

২৪৯. নৰূপাৱচৰো ধম্মো নৰূপাৱচৰস্স ধম্মস্স অধিপতিপচ্চযেন পচ্চযো – আৰম্মণাধিপতি, সহজাতাধিপতি. আৰম্মণাধিপতি – দানং…পে… সীলং…পে… উপোসথকম্মং…পে… পুব্বে সুচিণ্ণানি গৰুং কত্ৱা পচ্চৱেক্খতি অস্সাদেতি অভিনন্দতি, তং গৰুং কত্ৱা ৰাগো উপ্পজ্জতি, দিট্ঠি উপ্পজ্জতি; অৰিযা মগ্গা ৱুট্ঠহিত্ৱা মগ্গং গৰুং কত্ৱা…পে… ফলং…পে… নিব্বানং গৰুং কত্ৱা পচ্চৱেক্খন্তি, নিব্বানং গোত্ৰভুস্স, ৱোদানস্স, মগ্গস্স, ফলস্স অধিপতিপচ্চযেন পচ্চযো; চক্খুং…পে… ৱত্থুং নৰূপাৱচৰে খন্ধে গৰুং কত্ৱা অস্সাদেতি অভিনন্দতি, তং গৰুং কত্ৱা ৰাগো উপ্পজ্জতি, দিট্ঠি উপ্পজ্জতি; আকাসানঞ্চাযতনং গৰুং কত্ৱা পচ্চৱেক্খতি…পে… নেৱসঞ্ঞানাসঞ্ঞাযতনং গৰুং কত্ৱা পচ্চৱেক্খতি. সহজাতাধিপতি – নৰূপাৱচৰাধিপতি সম্পযুত্তকানং খন্ধানং চিত্তসমুট্ঠানানঞ্চ ৰূপানং অধিপতিপচ্চযেন পচ্চযো. (১)

অনন্তৰপচ্চযাদি

২৫০. ৰূপাৱচৰো ধম্মো ৰূপাৱচৰস্স ধম্মস্স অনন্তৰপচ্চযেন পচ্চযো – পুৰিমা পুৰিমা ৰূপাৱচৰা খন্ধা পচ্ছিমানং পচ্ছিমানং ৰূপাৱচৰানং খন্ধানং অনন্তৰপচ্চযেন পচ্চযো. ৰূপাৱচৰো ধম্মো নৰূপাৱচৰস্স ধম্মস্স অনন্তৰপচ্চযেন পচ্চযো – ৰূপাৱচৰং চুতিচিত্তং নৰূপাৱচৰস্স উপপত্তিচিত্তস্স অনন্তৰপচ্চযেন পচ্চযো; ৰূপাৱচৰং ভৱঙ্গং আৱজ্জনায… ৰূপাৱচৰা খন্ধা নৰূপাৱচৰস্স ৱুট্ঠানস্স অনন্তৰপচ্চযেন পচ্চযো. (২)

২৫১. নৰূপাৱচৰো ধম্মো নৰূপাৱচৰস্স ধম্মস্স অনন্তৰপচ্চযেন পচ্চযো – পুৰিমা পুৰিমা নৰূপাৱচৰা খন্ধা পচ্ছিমানং পচ্ছিমানং নৰূপাৱচৰানং খন্ধানং অনন্তৰপচ্চযেন পচ্চযো; অনুলোমং গোত্ৰভুস্স…পে… নেৱসঞ্ঞানাসঞ্ঞাযতনং ফলসমাপত্তিযা অনন্তৰপচ্চযেন পচ্চযো. নৰূপাৱচৰো ধম্মো ৰূপাৱচৰস্স ধম্মস্স অনন্তৰপচ্চযেন পচ্চযো – নৰূপাৱচৰং চুতিচিত্তং ৰূপাৱচৰস্স উপপত্তিচিত্তস্স অনন্তৰপচ্চযেন পচ্চযো; নৰূপাৱচৰা খন্ধা ৰূপাৱচৰস্স ৱুট্ঠানস্স অনন্তৰপচ্চযেন পচ্চযো; পঠমস্স ঝানস্স পৰিকম্মং পঠমস্স ঝানস্স অনন্তৰপচ্চযেন পচ্চযো…পে… চতুত্থস্স ঝানস্স…পে… দিব্বস্স চক্খুস্স…পে… দিব্বায সোতধাতুযা…পে… ইদ্ধিৱিধঞাণস্স…পে… চেতোপৰিযঞাণস্স…পে… পুব্বেনিৱাসানুস্সতিঞাণস্স…পে… যথাকম্মূপগঞাণস্স…পে… অনাগতংসঞাণস্স, পৰিকম্মং অনাগতংসঞাণস্স অনন্তৰপচ্চযেন পচ্চযো. (২)

সমনন্তৰপচ্চযেন পচ্চযো… সহজাতপচ্চযেন পচ্চযো… সত্ত… অঞ্ঞমঞ্ঞপচ্চযেন পচ্চযো… ছ… নিস্সযপচ্চযেন পচ্চযো… সত্ত.

উপনিস্সযপচ্চযো

২৫২. ৰূপাৱচৰো ধম্মো ৰূপাৱচৰস্স ধম্মস্স উপনিস্সযপচ্চযেন পচ্চযো – অনন্তৰূপনিস্সযো, পকতূপনিস্সযো…পে…. পকতূপনিস্সযো – ৰূপাৱচৰং সদ্ধং উপনিস্সায ৰূপাৱচৰং ঝানং উপ্পাদেতি, অভিঞ্ঞং…পে… সমাপত্তিং উপ্পাদেতি; ৰূপাৱচৰং সীলং…পে… পঞ্ঞং উপনিস্সায ৰূপাৱচৰং ঝানং…পে… অভিঞ্ঞং…পে… সমাপত্তিং উপ্পাদেতি; ৰূপাৱচৰা সদ্ধা…পে… পঞ্ঞা ৰূপাৱচৰায সদ্ধায…পে… পঞ্ঞায উপনিস্সযপচ্চযেন পচ্চযো, পঠমং ঝানং দুতিযস্স ঝানস্স উপনিস্সযপচ্চযেন পচ্চযো, দুতিযং ঝানং ততিযস্স ঝানস্স…পে… ততিযং ঝানং চতুত্থস্স ঝানস্স উপনিস্সযপচ্চযেন পচ্চযো. (১)

ৰূপাৱচৰো ধম্মো নৰূপাৱচৰস্স ধম্মস্স উপনিস্সযপচ্চযেন পচ্চযো – আৰম্মণূপনিস্সযো, অনন্তৰূপনিস্সযো, পকতূপনিস্সযো…পে…. পকতূপনিস্সযো – ৰূপাৱচৰং সদ্ধং উপনিস্সায দানং দেতি, সীলং…পে… উপোসথকম্মং কৰোতি; ৰূপাৱচৰং ঝানং…পে… ৱিপস্সনং…পে… মগ্গং…পে… সমাপত্তিং উপ্পাদেতি, মানং জপ্পেতি, দিট্ঠিং গণ্হাতি; ৰূপাৱচৰং সীলং…পে… পঞ্ঞং উপনিস্সায দানং দেতি…পে… মানং জপ্পেতি, দিট্ঠিং গণ্হাতি; ৰূপাৱচৰা সদ্ধা…পে… পঞ্ঞা নৰূপাৱচৰায সদ্ধায…পে… পঞ্ঞায… ৰাগস্স…পে… পত্থনায… কাযিকস্স সুখস্স… কাযিকস্স দুক্খস্স… মগ্গস্স, ফলসমাপত্তিযা উপনিস্সযপচ্চযেন পচ্চযো. (২)

২৫৩. নৰূপাৱচৰো ধম্মো নৰূপাৱচৰস্স ধম্মস্স উপনিস্সযপচ্চযেন পচ্চযো – আৰম্মণূপনিস্সযো, অনন্তৰূপনিস্সযো, পকতূপনিস্সযো…পে…. পকতূপনিস্সযো – নৰূপাৱচৰং সদ্ধং উপনিস্সায দানং…পে… সীলং…পে… উপোসথকম্মং কৰোতি; নৰূপাৱচৰং ঝানং…পে… ৱিপস্সনং…পে… মগ্গং…পে… সমাপত্তিং উপ্পাদেতি, মানং জপ্পেতি, দিট্ঠিং গণ্হাতি; নৰূপাৱচৰং সীলং…পে… পঞ্ঞং, ৰাগং…পে… ভোজনং, সেনাসনং উপনিস্সায দানং দেতি…পে… পাণং হনতি…পে… সঙ্ঘং ভিন্দতি; নৰূপাৱচৰা সদ্ধা…পে… পঞ্ঞা… ৰাগো…পে… সেনাসনং নৰূপাৱচৰায সদ্ধায…পে… পঞ্ঞায… ৰাগস্স…পে… পত্থনায… কাযিকস্স সুখস্স… কাযিকস্স দুক্খস্স… মগ্গস্স, ফলসমাপত্তিযা উপনিস্সযপচ্চযেন পচ্চযো. (১)

নৰূপাৱচৰো ধম্মো ৰূপাৱচৰস্স ধম্মস্স উপনিস্সযপচ্চযেন পচ্চযো – অনন্তৰূপনিস্সযো, পকতূপনিস্সযো…পে…. পকতূপনিস্সযো – নৰূপাৱচৰং সদ্ধং উপনিস্সায ৰূপাৱচৰং ঝানং…পে… অভিঞ্ঞং …পে… সমাপত্তিং উপ্পাদেতি; নৰূপাৱচৰং সীলং…পে… সেনাসনং উপনিস্সায ৰূপাৱচৰং ঝানং…পে… অভিঞ্ঞং…পে… সমাপত্তিং উপ্পাদেতি; নৰূপাৱচৰা সদ্ধা…পে… সেনাসনং ৰূপাৱচৰায সদ্ধায…পে… পঞ্ঞায উপনিস্সযপচ্চযেন পচ্চযো, পঠমস্স ঝানস্স পৰিকম্মং পঠমস্স ঝানস্স উপনিস্সযপচ্চযেন পচ্চযো…পে… চতুত্থস্স ঝানস্স…পে… দিব্বস্স চক্খুস্স পৰিকম্মং…পে… দিব্বায সোতধাতুযা…পে… ইদ্ধিৱিধঞাণস্স…পে… চেতোপৰিযঞাণস্স…পে… পুব্বেনিৱাসানুস্সতিঞাণস্স…পে… যথাকম্মূপগঞাণস্স…পে… অনাগতংসঞাণস্স পৰিকম্মং অনাগতংসঞাণস্স উপনিস্সযপচ্চযেন পচ্চযো. (২)

পুৰেজাতপচ্চযাদি

২৫৪. নৰূপাৱচৰো ধম্মো নৰূপাৱচৰস্স ধম্মস্স পুৰেজাতপচ্চযেন পচ্চযো – আৰম্মণপুৰেজাতং, ৱত্থুপুৰেজাতং. আৰম্মণপুৰেজাতং – চক্খুং …পে… ৱত্থুং অনিচ্চতো…পে… দোমনস্সং উপ্পজ্জতি, ৰূপাযতনং চক্খুৱিঞ্ঞাণস্স…পে… ফোট্ঠব্বাযতনং কাযৱিঞ্ঞাণস্স পুৰেজাতপচ্চযেন পচ্চযো. ৱত্থুপুৰেজাতং – চক্খাযতনং চক্খুৱিঞ্ঞাণস্স…পে… কাযাযতনং কাযৱিঞ্ঞাণস্স পুৰেজাতপচ্চযেন পচ্চযো; ৱত্থু নৰূপাৱচৰানং খন্ধানং পুৰেজাতপচ্চযেন পচ্চযো. নৰূপাৱচৰো ধম্মো ৰূপাৱচৰস্স ধম্মস্স পুৰেজাতপচ্চযেন পচ্চযো – আৰম্মণপুৰেজাতং, ৱত্থুপুৰেজাতং. আৰম্মণপুৰেজাতং – দিব্বেন চক্খুনা ৰূপং পস্সতি, দিব্বায সোতধাতুযা সদ্দং সুণাতি. ৱত্থুপুৰেজাতং – ৱত্থু ৰূপাৱচৰানং খন্ধানং পুৰেজাতপচ্চযেন পচ্চযো. (২)

পচ্ছাজাতপচ্চযেন পচ্চযো… দ্ৱে… আসেৱনপচ্চযেন পচ্চযো… তীণি.

কম্মপচ্চযাদি

২৫৫. ৰূপাৱচৰো ধম্মো ৰূপাৱচৰস্স ধম্মস্স কম্মপচ্চযেন পচ্চযো – সহজাতা, নানাক্খণিকা. সহজাতা – ৰূপাৱচৰা চেতনা সম্পযুত্তকানং খন্ধানং কম্মপচ্চযেন পচ্চযো; পটিসন্ধিক্খণে…পে…. নানাক্খণিকা – ৰূপাৱচৰা চেতনা ৱিপাকানং ৰূপাৱচৰানং খন্ধানং কম্মপচ্চযেন পচ্চযো. ৰূপাৱচৰো ধম্মো নৰূপাৱচৰস্স ধম্মস্স কম্মপচ্চযেন পচ্চযো – সহজাতা, নানাক্খণিকা. সহজাতা – ৰূপাৱচৰা চেতনা চিত্তসমুট্ঠানানং ৰূপানং কম্মপচ্চযেন পচ্চযো; পটিসন্ধিক্খণে…পে…. নানাক্খণিকা – ৰূপাৱচৰা চেতনা কটত্তাৰূপানং কম্মপচ্চযেন পচ্চযো. ৰূপাৱচৰো ধম্মো ৰূপাৱচৰস্স চ নৰূপাৱচৰস্স চ ধম্মস্স কম্মপচ্চযেন পচ্চযো – সহজাতা, নানাক্খণিকা. সহজাতা – ৰূপাৱচৰা চেতনা সম্পযুত্তকানং খন্ধানং চিত্তসমুট্ঠানানঞ্চ ৰূপানং কম্মপচ্চযেন পচ্চযো; পটিসন্ধিক্খণে…পে…. নানাক্খণিকা – ৰূপাৱচৰা চেতনা ৱিপাকানং ৰূপাৱচৰানং খন্ধানং কটত্তা চ ৰূপানং কম্মপচ্চযেন পচ্চযো. (৩)

নৰূপাৱচৰো ধম্মো নৰূপাৱচৰস্স ধম্মস্স কম্মপচ্চযেন পচ্চযো – সহজাতা, নানাক্খণিকা. সহজাতা – নৰূপাৱচৰা চেতনা সম্পযুত্তকানং খন্ধানং চিত্তসমুট্ঠানানঞ্চ ৰূপানং কম্মপচ্চযেন পচ্চযো; পটিসন্ধিক্খণে…পে…. নানাক্খণিকা – নৰূপাৱচৰা চেতনা ৱিপাকানং নৰূপাৱচৰানং খন্ধানং কটত্তা চ ৰূপানং কম্মপচ্চযেন পচ্চযো…. (১)

ৱিপাকপচ্চযেন পচ্চযো… চত্তাৰি… আহাৰপচ্চযেন পচ্চযো… চত্তাৰি… ইন্দ্ৰিযপচ্চযেন পচ্চযো… চত্তাৰি… ঝানপচ্চযেন পচ্চযো… চত্তাৰি… মগ্গপচ্চযেন পচ্চযো… চত্তাৰি… সম্পযুত্তপচ্চযেন পচ্চযো… দ্ৱে.

ৱিপ্পযুত্তপচ্চযো

২৫৬. ৰূপাৱচৰো ধম্মো নৰূপাৱচৰস্স ধম্মস্স ৱিপ্পযুত্তপচ্চযেন পচ্চযো – সহজাতং, পচ্ছাজাতং (সংখিত্তং). (১)

নৰূপাৱচৰো ধম্মো নৰূপাৱচৰস্স ধম্মস্স ৱিপ্পযুত্তপচ্চযেন পচ্চযো – সহজাতং, পুৰেজাতং, পচ্ছাজাতং (সংখিত্তং). নৰূপাৱচৰো ধম্মো ৰূপাৱচৰস্স ধম্মস্স ৱিপ্পযুত্তপচ্চযেন পচ্চযো – সহজাতং, পুৰেজাতং. সহজাতং – পটিসন্ধিক্খণে ৱত্থু ৰূপাৱচৰানং খন্ধানং ৱিপ্পযুত্তপচ্চযেন পচ্চযো. পুৰেজাতং – ৱত্থু ৰূপাৱচৰানং খন্ধানং ৱিপ্পযুত্তপচ্চযেন পচ্চযো. (২)

অত্থিপচ্চযাদি

২৫৭. ৰূপাৱচৰো ধম্মো ৰূপাৱচৰস্স ধম্মস্স অত্থিপচ্চযেন পচ্চযো (পটিচ্চসদিসং). ৰূপাৱচৰো ধম্মো নৰূপাৱচৰস্স ধম্মস্স অত্থিপচ্চযেন পচ্চযো – সহজাতং, পুৰেজাতং, পচ্ছাজাতং. ৰূপাৱচৰো ধম্মো ৰূপাৱচৰস্স চ নৰূপাৱচৰস্স চ ধম্মস্স অত্থিপচ্চযেন পচ্চযো (পটিচ্চসদিসং). (৩)

নৰূপাৱচৰো ধম্মো নৰূপাৱচৰস্স ধম্মস্স অত্থিপচ্চযেন পচ্চযো – সহজাতং, পুৰেজাতং, পচ্ছাজাতং, আহাৰং, ইন্দ্ৰিযং (সংখিত্তং). নৰূপাৱচৰো ধম্মো ৰূপাৱচৰস্স ধম্মস্স অত্থিপচ্চযেন পচ্চযো – সহজাতং, পুৰেজাতং. সহজাতং – পটিসন্ধিক্খণে ৱত্থু ৰূপাৱচৰানং খন্ধানং অত্থিপচ্চযেন পচ্চযো. পুৰেজাতং – দিব্বেন চক্খুনা ৰূপং পস্সতি, দিব্বায সোতধাতুযা সদ্দং সুণাতি, ৱত্থু ৰূপাৱচৰানং খন্ধানং অত্থিপচ্চযেন পচ্চযো. (২)

২৫৮. ৰূপাৱচৰো চ নৰূপাৱচৰো চ ধম্মা ৰূপাৱচৰস্স ধম্মস্স অত্থিপচ্চযেন পচ্চযো – সহজাতং, পুৰেজাতং. সহজাতো – ৰূপাৱচৰো একো খন্ধো চ ৱত্থু চ তিণ্ণন্নং খন্ধানং অত্থিপচ্চযেন পচ্চযো…পে… দ্ৱে খন্ধা চ…পে… পটিসন্ধিক্খণে…পে…. ৰূপাৱচৰো চ নৰূপাৱচৰো চ ধম্মা নৰূপাৱচৰস্স ধম্মস্স অত্থিপচ্চযেন পচ্চযো – সহজাতং, পচ্ছাজাতং, আহাৰং, ইন্দ্ৰিযং. সহজাতা – ৰূপাৱচৰা খন্ধা চ মহাভূতা চ চিত্তসমুট্ঠানানং ৰূপানং অত্থিপচ্চযেন পচ্চযো; পটিসন্ধিক্খণে…পে…. পচ্ছাজাতা – ৰূপাৱচৰা খন্ধা চ কবড়ীকাৰো আহাৰো চ পুৰেজাতস্স ইমস্স কাযস্স অত্থিপচ্চযেন পচ্চযো. পচ্ছাজাতা – ৰূপাৱচৰা খন্ধা চ ৰূপজীৱিতিন্দ্ৰিযঞ্চ কটত্তাৰূপানং অত্থিপচ্চযেন পচ্চযো. (২)

নত্থিপচ্চযেন পচ্চযো… ৱিগতপচ্চযেন পচ্চযো… অৱিগতপচ্চযেন পচ্চযো.