১. ৱিভঙ্গৱাৰো

হেতুপচ্চযো

১৭৭. উপেক্খাসহগতং ধম্মং পটিচ্চ উপেক্খাসহগতো ধম্মো উপ্পজ্জতি হেতুপচ্চযা – উপেক্খাসহগতং একং খন্ধং পটিচ্চ দ্ৱে খন্ধা, দ্ৱে খন্ধে …পে… পটিসন্ধিক্খণে…পে… উপেক্খাসহগতং ধম্মং পটিচ্চ নউপেক্খাসহগতো ধম্মো উপ্পজ্জতি হেতুপচ্চযা – উপেক্খাসহগতে খন্ধে পটিচ্চ উপেক্খা চিত্তসমুট্ঠানঞ্চ ৰূপং; পটিসন্ধিক্খণে…পে…. উপেক্খাসহগতং ধম্মং পটিচ্চ উপেক্খাসহগতো চ নউপেক্খাসহগতো চ ধম্মা উপ্পজ্জন্তি হেতুপচ্চযা – উপেক্খাসহগতং একং খন্ধং পটিচ্চ দ্ৱে খন্ধা উপেক্খা চ চিত্তসমুট্ঠানঞ্চ ৰূপং, দ্ৱে খন্ধে…পে… পটিসন্ধিক্খণে…পে…. (৩)

নউপেক্খাসহগতং ধম্মং পটিচ্চ নউপেক্খাসহগতো ধম্মো উপ্পজ্জতি হেতুপচ্চযা – নউপেক্খাসহগতং একং খন্ধং পটিচ্চ তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে…পে… উপেক্খং পটিচ্চ চিত্তসমুট্ঠানং ৰূপং; পটিসন্ধিক্খণে নউপেক্খাসহগতং একং খন্ধং পটিচ্চ তযো খন্ধা কটত্তা চ ৰূপং…পে… দ্ৱে খন্ধে…পে… পটিসন্ধিক্খণে উপেক্খং পটিচ্চ কটত্তাৰূপং, খন্ধে পটিচ্চ ৱত্থু, ৱত্থুং পটিচ্চ খন্ধা, উপেক্খং পটিচ্চ ৱত্থু, ৱত্থুং পটিচ্চ উপেক্খা, একং মহাভূতং…পে…. (সপ্পীতিকদুকসদিসং, অনুলোমে নৱপি পঞ্হা.)