১-৪. পচ্চযানুলোমাদি

হেতুপচ্চযো

১৬৮. সুখসহগতং ধম্মং পটিচ্চ সুখসহগতো ধম্মো উপ্পজ্জতি হেতুপচ্চযা – সুখসহগতং একং খন্ধং পটিচ্চ দ্ৱে খন্ধা, দ্ৱে খন্ধে পটিচ্চ একো খন্ধো; পটিসন্ধিক্খণে…পে…. সুখসহগতং ধম্মং পটিচ্চ নসুখসহগতো ধম্মো উপ্পজ্জতি হেতুপচ্চযা – সুখসহগতে খন্ধে পটিচ্চ সুখং চিত্তসমুট্ঠানঞ্চ ৰূপং. (এৱং সুখসহগতদুকং ৱিত্থাৰেতব্বং, যথা সপ্পীতিকদুকস্স অনুলোমপটিচ্চৱাৰো.)

হেতুযা নৱ, আৰম্মণে নৱ…পে… পুৰেজাতে ছ, আসেৱনে ছ, কম্মে নৱ…পে… অৱিগতে নৱ.

অনুলোমং.

১৬৯. সুখসহগতং ধম্মং পটিচ্চ সুখসহগতো ধম্মো উপ্পজ্জতি নহেতুপচ্চযা – অহেতুকং সুখসহগতং একং খন্ধং পটিচ্চ দ্ৱে খন্ধা, দ্ৱে খন্ধে…পে… (মূলং কাতব্বং.) অহেতুকে সুখসহগতে খন্ধে পটিচ্চ সুখঞ্চ চিত্তসমুট্ঠানঞ্চ ৰূপং. সুখসহগতং ধম্মং পটিচ্চ সুখসহগতো চ নসুখসহগতো চ ধম্মা উপ্পজ্জন্তি নহেতুপচ্চযা – অহেতুকং সুখসহগতং একং খন্ধং পটিচ্চ দ্ৱে খন্ধা সুখঞ্চ চিত্তসমুট্ঠানঞ্চ ৰূপং, দ্ৱে খন্ধে…পে…. (৩)

নসুখসহগতং ধম্মং পটিচ্চ নসুখসহগতো ধম্মো উপ্পজ্জতি নহেতুপচ্চযা – অহেতুকং নসুখসহগতং একং খন্ধং পটিচ্চ তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে…পে… অহেতুকং সুখং পটিচ্চ চিত্তসমুট্ঠানং ৰূপং; অহেতুকপটিসন্ধিক্খণে নসুখসহগতং একং খন্ধং পটিচ্চ তযো খন্ধা কটত্তা চ ৰূপং …পে… দ্ৱে খন্ধে…পে… খন্ধে পটিচ্চ ৱত্থু, ৱত্থুং পটিচ্চ খন্ধা, একং মহাভূতং…পে…. (যাৱ অসঞ্ঞসত্তা) ৱিচিকিচ্ছাসহগতে উদ্ধচ্চসহগতে খন্ধে পটিচ্চ ৱিচিকিচ্ছাসহগতো উদ্ধচ্চসহগতো মোহো. (যথা সপ্পীতিকে নহেতুপচ্চযসদিসং, নিন্নানং সব্বত্থমেৱ নৱ পঞ্হা.)

নহেতুযা নৱ, নআৰম্মণে তীণি…পে… নউপনিস্সযে তীণি, নপুৰেজাতে নৱ, নপচ্ছাজাতে নৱ, নআসেৱনে নৱ, নকম্মে চত্তাৰি, নৱিপাকে নৱ, নআহাৰে একং, নইন্দ্ৰিযে একং, নঝানে ছ, নমগ্গে নৱ, নসম্পযুত্তে তীণি, নৱিপ্পযুত্তে ছ, নোনত্থিযা তীণি, নোৱিগতে তীণি.

পচ্চনীযং.

(এৱং ইতৰে দ্ৱে গণনাপি সহজাতৱাৰোপি পটিচ্চৱাৰসদিসা. পচ্চযৱাৰে পৱত্তিপি পটিসন্ধিপি ৱিত্থাৰেতব্বা, যথা সপ্পীতিকদুকপচ্চযৱাৰপচ্চনীযেপি পৱত্তে ৱত্থু চ ৱিত্থাৰেতব্বং, যথা সপ্পীতিকদুকে একোযেৱ মোহো, এৱং ইতৰে দ্ৱে গণনাপি নিস্সযৱাৰোপি সংসট্ঠৱাৰোপি সম্পযুত্তৱাৰোপি যথা সপ্পীতিকদুকং, এৱং কাতব্বং.)