১. ৱিভঙ্গৱাৰো

নহেতুপচ্চযো

১০৬. সৱিতক্কং ধম্মং পটিচ্চ সৱিতক্কো ধম্মো উপ্পজ্জতি নহেতুপচ্চযা – অহেতুকং সৱিতক্কং একং খন্ধং পটিচ্চ তযো খন্ধা…পে… দ্ৱে খন্ধে…পে… অহেতুকপটিসন্ধিক্খণে…পে… ৱিচিকিচ্ছাসহগতে উদ্ধচ্চসহগতে খন্ধে পটিচ্চ ৱিচিকিচ্ছাসহগতো উদ্ধচ্চসহগতো মোহো. (সৱিতক্কমূলকা অৱসেসা দ্ৱে পঞ্হা কাতব্বা, অহেতুকং নিন্নানং.) (৩)

অৱিতক্কং ধম্মং পটিচ্চ অৱিতক্কো ধম্মো উপ্পজ্জতি নহেতুপচ্চযা – অহেতুকং অৱিতক্কং একং খন্ধং পটিচ্চ তযো খন্ধা…পে… দ্ৱে খন্ধে…পে… অহেতুকং ৱিতক্কং পটিচ্চ চিত্তসমুট্ঠানং ৰূপং; অহেতুকপটিসন্ধিক্খণে ৱিতক্কং পটিচ্চ কটত্তাৰূপং, ৱিতক্কং পটিচ্চ ৱত্থু, ৱত্থুং পটিচ্চ ৱিতক্কো, একং মহাভূতং…পে…. (১)

অৱিতক্কং ধম্মং পটিচ্চ সৱিতক্কো ধম্মো উপ্পজ্জতি নহেতুপচ্চযা – অহেতুকং ৱিতক্কং পটিচ্চ সম্পযুত্তকা খন্ধা, অহেতুকপটিসন্ধিক্খণে ৱিতক্কং পটিচ্চ সম্পযুত্তকা খন্ধা; পটিসন্ধিক্খণে ৱত্থুং পটিচ্চ অহেতুকা সৱিতক্কা খন্ধা, ৱিতক্কং পটিচ্চ ৱিচিকিচ্ছাসহগতো উদ্ধচ্চসহগতো মোহো. (২)

অৱিতক্কং ধম্মং পটিচ্চ সৱিতক্কো চ অৱিতক্কো চ ধম্মা উপ্পজ্জন্তি নহেতুপচ্চযা. (সংখিত্তং. হেতুপচ্চযসদিসং. ‘‘অহেতুক’’ন্তি নিযামেতব্বং.) (৩)

সৱিতক্কঞ্চ অৱিতক্কঞ্চ ধম্মং পটিচ্চ সৱিতক্কো ধম্মো উপ্পজ্জতি নহেতুপচ্চযা – অহেতুকং সৱিতক্কং একং খন্ধঞ্চ ৱিতক্কঞ্চ পটিচ্চ তযো খন্ধা…পে… দ্ৱে খন্ধে…পে… অহেতুকপটিসন্ধিক্খণে সৱিতক্কং একং খন্ধঞ্চ ৱিতক্কঞ্চ পটিচ্চ তযো খন্ধা…পে… দ্ৱে খন্ধে…পে… অহেতুকপটিসন্ধিক্খণে সৱিতক্কং একং খন্ধঞ্চ ৱত্থুঞ্চ ৱিতক্কঞ্চ পটিচ্চ তযো খন্ধা…পে… দ্ৱে খন্ধে…পে… ৱিচিকিচ্ছাসহগতে উদ্ধচ্চসহগতে খন্ধে চ ৱিতক্কঞ্চ পটিচ্চ ৱিচিকিচ্ছাসহগতো উদ্ধচ্চসহগতো মোহো. (অৱসেসা দ্ৱে পঞ্হা হেতুপচ্চযসদিসা নিন্নানা, অহেতুকন্তি নিযামেতব্বং.) (৩)