১-৭. পটিচ্চৱাৰাদি

পচ্চযচতুক্কং

৬২. কামাৱচৰং কুসলং ধম্মং পটিচ্চ কামাৱচৰো কুসলো ধম্মো উপ্পজ্জতি হেতুপচ্চযা. (১)

নকামাৱচৰং কুসলং ধম্মং পটিচ্চ নকামাৱচৰো কুসলো ধম্মো উপ্পজ্জতি হেতুপচ্চযা. (১) (সংখিত্তং.)

৬৩. হেতুযা দ্ৱে, আৰম্মণে দ্ৱে (সব্বত্থ দ্ৱে), অৱিগতে দ্ৱে (সংখিত্তং).

নঅধিপতিযা দ্ৱে…পে… নৱিপ্পযুত্তে দ্ৱে. (সংখিত্তং.)

(সহজাতৱাৰাদি ৱিত্থাৰেতব্বো.)

৬৪. কামাৱচৰো কুসলো ধম্মো কামাৱচৰস্স কুসলস্স ধম্মস্স হেতুপচ্চযেন পচ্চযো. (১)

নকামাৱচৰো কুসলো ধম্মো নকামাৱচৰস্স কুসলস্স ধম্মস্স হেতুপচ্চযেন পচ্চযো. (১) (সংখিত্তং.)

৬৫. হেতুযা দ্ৱে, আৰম্মণে চত্তাৰি, অধিপতিযা তীণি (কামাৱচৰে একং, নকামাৱচৰে দ্ৱে), অনন্তৰে তীণি (কামাৱচৰে দ্ৱে, নকামাৱচৰে একং)…পে… সহজাতে দ্ৱে …পে… উপনিস্সযে চত্তাৰি, আসেৱনে তীণি, কম্মে দ্ৱে, আহাৰে দ্ৱে…পে… নত্থিযা তীণি…পে… অৱিগতে দ্ৱে (সংখিত্তং).

৬৬. কামাৱচৰং অকুসলং ধম্মং পটিচ্চ কামাৱচৰো অকুসলো ধম্মো উপ্পজ্জতি হেতুপচ্চযা (সংখিত্তং).

হেতুযা একং, আৰম্মণে একং…পে… অৱিগতে একং (সংখিত্তং).

(সহজাতৱাৰেপি…পে… পঞ্হাৱাৰেপি সব্বত্থ একং.)

৬৭. কামাৱচৰং অব্যাকতং ধম্মং পটিচ্চ কামাৱচৰো অব্যাকতো ধম্মো উপ্পজ্জতি হেতুপচ্চযা… তীণি.

নকামাৱচৰং অব্যাকতং ধম্মং পটিচ্চ নকামাৱচৰো অব্যাকতো ধম্মো উপ্পজ্জতি হেতুপচ্চযা… তীণি.

কামাৱচৰং অব্যাকতঞ্চ নকামাৱচৰং অব্যাকতঞ্চ ধম্মং পটিচ্চ কামাৱচৰো অব্যাকতো ধম্মো উপ্পজ্জতি হেতুপচ্চযা… তীণি (সংখিত্তং).

৬৮. হেতুযা নৱ, আৰম্মণে চত্তাৰি, অধিপতিযা পঞ্চ…পে… অঞ্ঞমঞ্ঞে ছ…পে… পুৰেজাতে দ্ৱে, আসেৱনে দ্ৱে…পে… অৱিগতে নৱ (সংখিত্তং).

নহেতুযা একং, নআৰম্মণে তীণি, নঅধিপতিযা নৱ…পে… নকম্মে দ্ৱে, নৱিপাকে পঞ্চ, নআহাৰে একং, নইন্দ্ৰিযে একং, নঝানে একং, নমগ্গে একং, নসম্পযুত্তে তীণি, নৱিপ্পযুত্তে দ্ৱে, নোনত্থিযা তীণি, নোৱিগতে তীণি (সংখিত্তং. সহজাতৱাৰাদি ৱিত্থাৰেতব্বো).

৬৯. কামাৱচৰো অব্যাকতো ধম্মো কামাৱচৰস্স অব্যাকতস্স ধম্মস্স হেতুপচ্চযেন পচ্চযো. (১)

নকামাৱচৰো অব্যাকতো ধম্মো নকামাৱচৰস্স অব্যাকতস্স ধম্মস্স হেতুপচ্চযেন পচ্চযো… তীণি (সংখিত্তং).

৭০. হেতুযা চত্তাৰি, আৰম্মণে চত্তাৰি, অধিপতিযা চত্তাৰি (কামাৱচৰে একং, নকামাৱচৰে তীণি, কামাৱচৰে সহজাতাধিপতিযেৱ), অনন্তৰে চত্তাৰি, সমনন্তৰে চত্তাৰি, সহজাতে সত্ত, অঞ্ঞমঞ্ঞে ছ, নিস্সযে সত্ত, উপনিস্সযে চত্তাৰি, পুৰেজাতে দ্ৱে, পচ্ছাজাতে দ্ৱে, আসেৱনে তীণি, কম্মে চত্তাৰি, ৱিপাকে চত্তাৰি, আহাৰে চত্তাৰি…পে… সম্পযুত্তে দ্ৱে, ৱিপ্পযুত্তে তীণি, অত্থিযা সত্ত, নত্থিযা চত্তাৰি…পে… অৱিগতে সত্ত (সংখিত্তং).