১-৪. পচ্চযানুলোমাদি

হেতুপচ্চযো

১০. সঞ্ঞোজনং ধম্মং পচ্চযা সঞ্ঞোজনো ধম্মো উপ্পজ্জতি হেতুপচ্চযা… তীণি (পটিচ্চসদিসং).

নোসঞ্ঞোজনং ধম্মং পচ্চযা নোসঞ্ঞোজনো ধম্মো উপ্পজ্জতি হেতুপচ্চযা – নোসঞ্ঞোজনং একং খন্ধং পচ্চযা তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে…পে… পটিসন্ধিক্খণে…পে… খন্ধে পচ্চযা ৱত্থু, ৱত্থুং পচ্চযা খন্ধা, একং মহাভূতং…পে… মহাভূতে পচ্চযা চিত্তসমুট্ঠানং ৰূপং, কটত্তাৰূপং, উপাদাৰূপং, ৱত্থুং পচ্চযা নোসঞ্ঞোজনা খন্ধা. (১)

নোসঞ্ঞোজনং ধম্মং পচ্চযা সঞ্ঞোজনো ধম্মো উপ্পজ্জতি হেতুপচ্চযা – নোসঞ্ঞোজনে খন্ধে পচ্চযা সঞ্ঞোজনা, ৱত্থুং পচ্চযা সঞ্ঞোজনা. (২)

নোসঞ্ঞোজনং ধম্মং পচ্চযা সঞ্ঞোজনো চ নোসঞ্ঞোজনো চ ধম্মা উপ্পজ্জন্তি হেতুপচ্চযা – নোসঞ্ঞোজনং একং খন্ধং পচ্চযা তযো খন্ধা সঞ্ঞোজনঞ্চ চিত্তসমুট্ঠানঞ্চ ৰূপং…পে… দ্ৱে খন্ধে…পে… ৱত্থুং পচ্চযা সঞ্ঞোজনা, মহাভূতে পচ্চযা চিত্তসমুট্ঠানং ৰূপং, ৱত্থুং পচ্চযা সঞ্ঞোজনা সম্পযুত্তকা চ খন্ধা. (৩)

১১. সঞ্ঞোজনঞ্চ নোসঞ্ঞোজনঞ্চ ধম্মং পচ্চযা সঞ্ঞোজনো ধম্মো উপ্পজ্জতি হেতুপচ্চযা – কামৰাগসঞ্ঞোজনঞ্চ সম্পযুত্তকে চ খন্ধে পচ্চযা দিট্ঠিসঞ্ঞোজনং অৱিজ্জাসঞ্ঞোজনং, কামৰাগসঞ্ঞোজনঞ্চ ৱত্থুঞ্চ পচ্চযা দিট্ঠিসঞ্ঞোজনং অৱিজ্জাসঞ্ঞোজনং (চক্কং) (১)

সঞ্ঞোজনঞ্চ নোসঞ্ঞোজনঞ্চ ধম্মং পচ্চযা নোসঞ্ঞোজনো ধম্মো উপ্পজ্জতি হেতুপচ্চযা – নোসঞ্ঞোজনং একং খন্ধঞ্চ সঞ্ঞোজনে চ পচ্চযা তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে…পে… (চক্কং). সঞ্ঞোজনে চ ৱত্থুঞ্চ পচ্চযা নোসঞ্ঞোজনা খন্ধা. (২)

সঞ্ঞোজনঞ্চ নোসঞ্ঞোজনঞ্চ ধম্মং পচ্চযা সঞ্ঞোজনো চ নোসঞ্ঞোজনো চ ধম্মা উপ্পজ্জন্তি হেতুপচ্চযা – নোসঞ্ঞোজনং একং খন্ধঞ্চ কামৰাগসঞ্ঞোজনঞ্চ পচ্চযা তযো খন্ধা দিট্ঠিসঞ্ঞোজনং অৱিজ্জাসঞ্ঞোজনং চিত্তসমুট্ঠানঞ্চ ৰূপং, দ্ৱে খন্ধে…পে… (চক্কং). কামৰাগসঞ্ঞোজনঞ্চ ৱত্থুঞ্চ পচ্চযা দিট্ঠিসঞ্ঞোজনং অৱিজ্জাসঞ্ঞোজনং সম্পযুত্তকা চ খন্ধা (চক্কং. সংখিত্তং). (৩)

১২. হেতুযা নৱ, আৰম্মণে নৱ (সব্বত্থ নৱ), ৱিপাকে একং…পে… অৱিগতে নৱ.

১৩. নহেতুযা চত্তাৰি (যত্থ যত্থ ৱত্থু লব্ভতি, তত্থ তত্থ নিন্নেতব্বং), নআৰম্মণে তীণি…পে… নোৱিগতে তীণি.