১. ৱিভঙ্গৱাৰো

নহেতুপচ্চযো

৫৬. আসৱসম্পযুত্তং ধম্মং পটিচ্চ আসৱৱিপ্পযুত্তো ধম্মো উপ্পজ্জতি নহেতুপচ্চযা – ৱিচিকিচ্ছাসহগতে উদ্ধচ্চসহগতে খন্ধে পটিচ্চ ৱিচিকিচ্ছাসহগতো উদ্ধচ্চসহগতো মোহো. (১)

আসৱৱিপ্পযুত্তং ধম্মং পটিচ্চ আসৱৱিপ্পযুত্তো ধম্মো উপ্পজ্জতি নহেতুপচ্চযা – অহেতুকং আসৱৱিপ্পযুত্তং একং খন্ধং পটিচ্চ তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে…পে… অহেতুকপটিসন্ধিক্খণে…পে… (যাৱ আসঞ্ঞসত্তা). (১)

নআৰম্মণপচ্চযো

৫৭. আসৱসম্পযুত্তং ধম্মং পটিচ্চ আসৱৱিপ্পযুত্তো ধম্মো উপ্পজ্জতি নআৰম্মণপচ্চযা – আসৱসম্পযুত্তে খন্ধে পটিচ্চ চিত্তসমুট্ঠানং ৰূপং. (১)

আসৱৱিপ্পযুত্তং ধম্মং পটিচ্চ আসৱৱিপ্পযুত্তো ধম্মো উপ্পজ্জতি নআৰম্মণপচ্চযা – আসৱৱিপ্পযুত্তে খন্ধে পটিচ্চ চিত্তসমুট্ঠানং ৰূপং, দোমনস্সসহগতং ৱিচিকিচ্ছাসহগতং উদ্ধচ্চসহগতং মোহং পটিচ্চ চিত্তসমুট্ঠানং ৰূপং; পটিসন্ধিক্খণে…পে… খন্ধে পটিচ্চ ৱত্থু, একং মহাভূতং…পে… (যাৱ অসঞ্ঞসত্তা). (১)

আসৱসম্পযুত্তঞ্চ আসৱৱিপ্পযুত্তঞ্চ ধম্মং পটিচ্চ আসৱৱিপ্পযুত্তো ধম্মো উপ্পজ্জতি নআৰম্মণপচ্চযা – আসৱসম্পযুত্তে খন্ধে চ মহাভূতে চ পটিচ্চ চিত্তসমুট্ঠানং ৰূপং, দোমনস্সসহগতে ৱিচিকিচ্ছাসহগতে উদ্ধচ্চসহগতে খন্ধে চ মোহঞ্চ পটিচ্চ চিত্তসমুট্ঠানং ৰূপং. (১)

নঅধিপতিপচ্চযো

৫৮. আসৱসম্পযুত্তং ধম্মং পটিচ্চ আসৱসম্পযুত্তো ধম্মো উপ্পজ্জতি নঅধিপতিপচ্চযা (সংখিত্তং).

নপুৰেজাতপচ্চযাদি

৫৯. আসৱসম্পযুত্তং ধম্মং পটিচ্চ আসৱসম্পযুত্তো ধম্মো উপ্পজ্জতি নপুৰেজাতপচ্চযা – অৰূপে আসৱসম্পযুত্তং একং খন্ধং পটিচ্চ তযো খন্ধা…পে… দ্ৱে খন্ধে…পে…. (১)

আসৱসম্পযুত্তং ধম্মং পটিচ্চ আসৱৱিপ্পযুত্তো ধম্মো উপ্পজ্জতি নপুৰেজাতপচ্চযা – অৰূপে ৱিচিকিচ্ছাসহগতে উদ্ধচ্চসহগতে খন্ধে পটিচ্চ ৱিচিকিচ্ছাসহগতো উদ্ধচ্চসহগতো মোহো, আসৱসম্পযুত্তে খন্ধে পটিচ্চ চিত্তসমুট্ঠানং ৰূপং. (২)

আসৱসম্পযুত্তং ধম্মং পটিচ্চ আসৱসম্পযুত্তো চ আসৱৱিপ্পযুত্তো চ ধম্মা উপ্পজ্জন্তি নপুৰেজাতপচ্চযা – অৰূপে ৱিচিকিচ্ছাসহগতং উদ্ধচ্চসহগতং একং খন্ধং পটিচ্চ তযো খন্ধা মোহো চ…পে… দ্ৱে খন্ধে…পে…. (৩)

৬০. আসৱৱিপ্পযুত্তং ধম্মং পটিচ্চ আসৱৱিপ্পযুত্তো ধম্মো উপ্পজ্জতি নপুৰেজাতপচ্চযা – অৰূপে আসৱৱিপ্পযুত্তং একং খন্ধং পটিচ্চ তযো খন্ধা…পে… দ্ৱে খন্ধে…পে… আসৱৱিপ্পযুত্তে খন্ধে পটিচ্চ চিত্তসমুট্ঠানং ৰূপং, দোমনস্সসহগতং ৱিচিকিচ্ছাসহগতং উদ্ধচ্চসহগতং মোহং পটিচ্চ চিত্তসমুট্ঠানং ৰূপং; পটিসন্ধিক্খণে…পে… (যাৱ অসঞ্ঞসত্তা). (১)

আসৱৱিপ্পযুত্তং ধম্মং পটিচ্চ আসৱসম্পযুত্তো ধম্মো উপ্পজ্জতি নপুৰেজাতপচ্চযা – অৰূপে ৱিচিকিচ্ছাসহগতং উদ্ধচ্চসহগতং মোহং পটিচ্চ সম্পযুত্তকা খন্ধা. (২)

৬১. আসৱসম্পযুত্তঞ্চ আসৱৱিপ্পযুত্তঞ্চ ধম্মং পটিচ্চ আসৱসম্পযুত্তো ধম্মো উপ্পজ্জতি নপুৰেজাতপচ্চযা – অৰূপে ৱিচিকিচ্ছাসহগতং উদ্ধচ্চসহগতং একং খন্ধঞ্চ মোহঞ্চ পটিচ্চ তযো খন্ধা…পে… দ্ৱে খন্ধে চ…পে…. (১)

আসৱসম্পযুত্তঞ্চ আসৱৱিপ্পযুত্তঞ্চ ধম্মং পটিচ্চ আসৱৱিপ্পযুত্তো ধম্মো উপ্পজ্জতি নপুৰেজাতপচ্চযা – আসৱসম্পযুত্তে খন্ধে চ মহাভূতে চ পটিচ্চ চিত্তসমুট্ঠানং ৰূপং, দোমনস্সসহগতে ৱিচিকিচ্ছাসহগতে উদ্ধচ্চসহগতে খন্ধে চ মোহঞ্চ পটিচ্চ চিত্তসমুট্ঠানং ৰূপং. (২)

(নপচ্ছাজাতপচ্চযা নৱ, নআসেৱনপচ্চযা নৱ.)

নকম্মপচ্চযাদি

৬২. আসৱসম্পযুত্তং ধম্মং পটিচ্চ আসৱসম্পযুত্তো ধম্মো উপ্পজ্জতি নকম্মপচ্চযা – আসৱসম্পযুত্তে খন্ধে পটিচ্চ সম্পযুত্তকা চেতনা. (১)

আসৱৱিপ্পযুত্তং ধম্মং পটিচ্চ আসৱৱিপ্পযুত্তো ধম্মো উপ্পজ্জতি নকম্মপচ্চযা – আসৱৱিপ্পযুত্তে খন্ধে পটিচ্চ ৱিপ্পযুত্তকা চেতনা. (১)

আসৱৱিপ্পযুত্তং ধম্মং পটিচ্চ আসৱসম্পযুত্তো ধম্মো উপ্পজ্জতি নকম্মপচ্চযা – দোমনস্সসহগতং ৱিচিকিচ্ছাসহগতং উদ্ধচ্চসহগতং মোহং পটিচ্চ সম্পযুত্তকা চেতনা. (২)

আসৱসম্পযুত্তঞ্চ আসৱৱিপ্পযুত্তঞ্চ ধম্মং পটিচ্চ আসৱসম্পযুত্তো ধম্মো উপ্পজ্জতি নকম্মপচ্চযা – দোমনস্সসহগতে ৱিচিকিচ্ছাসহগতে উদ্ধচ্চসহগতে খন্ধে চ মোহঞ্চ পটিচ্চ সম্পযুত্তকা চেতনা… নৱিপাকপচ্চযা… নআহাৰপচ্চযা… নইন্দ্ৰিযপচ্চযা… নঝানপচ্চযা… নমগ্গপচ্চযা… নসম্পযুত্তপচ্চযা… নৱিপ্পযুত্তপচ্চযা… নোনত্থিপচ্চযা… নোৱিগতপচ্চযা.