১. ৱিভঙ্গৱাৰো

হেতুপচ্চযো

১. আসৱং ধম্মং পটিচ্চ আসৱো ধম্মো উপ্পজ্জতি হেতুপচ্চযা – কামাসৱং পটিচ্চ দিট্ঠাসৱো অৱিজ্জাসৱো, দিট্ঠাসৱং পটিচ্চ কামাসৱো অৱিজ্জাসৱো, অৱিজ্জাসৱং পটিচ্চ কামাসৱো দিট্ঠাসৱো, ভৱাসৱং পটিচ্চ অৱিজ্জাসৱো, দিট্ঠাসৱং পটিচ্চ অৱিজ্জাসৱো (একেকম্পি চক্কং কাতব্বং). (১)

আসৱং ধম্মং পটিচ্চ নোআসৱো ধম্মো উপ্পজ্জতি হেতুপচ্চযা – আসৱং পটিচ্চ আসৱসম্পযুত্তকা খন্ধা চিত্তসমুট্ঠানঞ্চ ৰূপং. (২)

আসৱং ধম্মং পটিচ্চ আসৱো চ নোআসৱো চ ধম্মা উপ্পজ্জন্তি হেতুপচ্চযা – কামাসৱং পটিচ্চ দিট্ঠাসৱো অৱিজ্জাসৱো সম্পযুত্তকা চ খন্ধা চিত্তসমুট্ঠানঞ্চ ৰূপং (চক্কং). (৩)

২. নোআসৱং ধম্মং পটিচ্চ নোআসৱো ধম্মো উপ্পজ্জতি হেতুপচ্চযা – নোআসৱং একং খন্ধং পটিচ্চ তযো খন্ধা চিত্তসমুট্ঠানং ৰূপং…পে… দ্ৱে খন্ধে…পে… পটিসন্ধিক্খণে…পে… খন্ধে পটিচ্চ ৱত্থু, ৱত্থুং পটিচ্চ খন্ধা, একং মহাভূতং…পে… মহাভূতে পটিচ্চ চিত্তসমুট্ঠানং ৰূপং কটত্তাৰূপং উপাদাৰূপং. (১)

নোআসৱং ধম্মং পটিচ্চ আসৱো ধম্মো উপ্পজ্জতি হেতুপচ্চযা – নোআসৱে খন্ধে পটিচ্চ আসৱা. (২)

নোআসৱং ধম্মং পটিচ্চ আসৱো চ নোআসৱো চ ধম্মা উপ্পজ্জন্তি হেতুপচ্চযা – নোআসৱং একং খন্ধং পটিচ্চ তযো খন্ধা আসৱা চ চিত্তসমুট্ঠানঞ্চ ৰূপং…পে… দ্ৱে খন্ধে…পে…. (৩)

৩. আসৱঞ্চ নোআসৱঞ্চ ধম্মং পটিচ্চ আসৱো ধম্মো উপ্পজ্জতি হেতুপচ্চযা – কামাসৱঞ্চ সম্পযুত্তকে চ খন্ধে পটিচ্চ দিট্ঠাসৱো অৱিজ্জাসৱো (চক্কং বন্ধিতব্বং). (১)

আসৱঞ্চ নোআসৱঞ্চ ধম্মং পটিচ্চ নোআসৱো ধম্মো উপ্পজ্জতি হেতুপচ্চযা – নোআসৱং একং খন্ধঞ্চ আসৱে চ পটিচ্চ তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে…পে…. (২)

আসৱঞ্চ নোআসৱঞ্চ ধম্মং পটিচ্চ আসৱো চ নোআসৱো চ ধম্মা উপ্পজ্জন্তি হেতুপচ্চযা – নোআসৱং একং খন্ধঞ্চ কামাসৱঞ্চ পটিচ্চ তযো খন্ধা দিট্ঠাসৱো অৱিজ্জাসৱো চিত্তসমুট্ঠানঞ্চ ৰূপং…পে… দ্ৱে খন্ধে চ…পে… (চক্কং. সংখিত্তং). (৩)