১. ৱিভঙ্গৱাৰো

হেতুপচ্চযো

৪৮. আসৱসম্পযুত্তং ধম্মং পটিচ্চ আসৱসম্পযুত্তো ধম্মো উপ্পজ্জতি হেতুপচ্চযা – আসৱসম্পযুত্তং একং খন্ধং পটিচ্চ তযো খন্ধা…পে… দ্ৱে খন্ধে…পে…. (১)

আসৱসম্পযুত্তং ধম্মং পটিচ্চ আসৱৱিপ্পযুত্তো ধম্মো উপ্পজ্জতি হেতুপচ্চযা – আসৱসম্পযুত্তে খন্ধে পটিচ্চ চিত্তসমুট্ঠানং ৰূপং, দোমনস্সসহগতে খন্ধে পটিচ্চ মোহো চিত্তসমুট্ঠানঞ্চ ৰূপং. (২)

আসৱসম্পযুত্তং ধম্মং পটিচ্চ আসৱসম্পযুত্তো চ আসৱৱিপ্পযুত্তো চ ধম্মা উপ্পজ্জন্তি হেতুপচ্চযা – আসৱসম্পযুত্তং একং খন্ধং পটিচ্চ তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে…পে… দোমনস্সসহগতং একং খন্ধং পটিচ্চ তযো খন্ধা মোহো চিত্তসমুট্ঠানঞ্চ ৰূপং…পে… দ্ৱে খন্ধে…পে…. (৩)

৪৯. আসৱৱিপ্পযুত্তং ধম্মং পটিচ্চ আসৱৱিপ্পযুত্তো ধম্মো উপ্পজ্জতি হেতুপচ্চযা – আসৱৱিপ্পযুত্তং একং খন্ধং পটিচ্চ তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে…পে… দোমনস্সসহগতং ৱিচিকিচ্ছাসহগতং উদ্ধচ্চসহগতং মোহং পটিচ্চ চিত্তসমুট্ঠানং ৰূপং; পটিসন্ধিক্খণে…পে… খন্ধে পটিচ্চ ৱত্থু, ৱত্থুং পটিচ্চ খন্ধা, একং মহাভূতং পটিচ্চ তযো মহাভূতা, তযো মহাভূতে পটিচ্চ একং মহাভূতং, দ্ৱে মহাভূতে পটিচ্চ দ্ৱে মহাভূতা, মহাভূতে পটিচ্চ চিত্তসমুট্ঠানং ৰূপং কটত্তাৰূপং উপাদাৰূপং. (১)

আসৱৱিপ্পযুত্তং ধম্মং পটিচ্চ আসৱসম্পযুত্তো ধম্মো উপ্পজ্জতি হেতুপচ্চযা – দোমনস্সসহগতং ৱিচিকিচ্ছাসহগতং উদ্ধচ্চসহগতং মোহং পটিচ্চ সম্পযুত্তকা খন্ধা. (২)

আসৱৱিপ্পযুত্তং ধম্মং পটিচ্চ আসৱসম্পযুত্তো চ আসৱৱিপ্পযুত্তো চ ধম্মা উপ্পজ্জন্তি হেতুপচ্চযা – দোমনস্সসহগতং ৱিচিকিচ্ছাসহগতং উদ্ধচ্চসহগতং মোহং পটিচ্চ সম্পযুত্তকা খন্ধা চিত্তসমুট্ঠানঞ্চ ৰূপং. (৩)

৫০. আসৱসম্পযুত্তঞ্চ আসৱৱিপ্পযুত্তঞ্চ ধম্মং পটিচ্চ আসৱসম্পযুত্তো ধম্মো উপ্পজ্জতি হেতুপচ্চযা – দোমনস্সসহগতং ৱিচিকিচ্ছাসহগতং উদ্ধচ্চসহগতং একং খন্ধঞ্চ মোহঞ্চ পটিচ্চ তযো খন্ধা…পে… দ্ৱে খন্ধে…পে…. (১)

আসৱসম্পযুত্তঞ্চ আসৱৱিপ্পযুত্তঞ্চ ধম্মং পটিচ্চ আসৱৱিপ্পযুত্তো ধম্মো উপ্পজ্জতি হেতুপচ্চযা – আসৱসম্পযুত্তে খন্ধে চ মহাভূতে চ পটিচ্চ চিত্তসমুট্ঠানং ৰূপং, দোমনস্সসহগতে ৱিচিকিচ্ছাসহগতে উদ্ধচ্চসহগতে খন্ধে চ মোহঞ্চ পটিচ্চ চিত্তসমুট্ঠানং ৰূপং. (২)

আসৱসম্পযুত্তঞ্চ আসৱৱিপ্পযুত্তঞ্চ ধম্মং পটিচ্চ আসৱসম্পযুত্তো চ আসৱৱিপ্পযুত্তো চ ধম্মা উপ্পজ্জন্তি হেতুপচ্চযা – দোমনস্সসহগতং ৱিচিকিচ্ছাসহগতং উদ্ধচ্চসহগতং একং খন্ধঞ্চ মোহঞ্চ পটিচ্চ তযো খন্ধা চিত্তসমুট্ঠানঞ্চ ৰূপং, দ্ৱে খন্ধে…পে…. (৩)

আৰম্মণপচ্চযো

৫১. আসৱসম্পযুত্তং ধম্মং পটিচ্চ আসৱসম্পযুত্তো ধম্মো উপ্পজ্জতি আৰম্মণপচ্চযা – আসৱসম্পযুত্তং একং খন্ধং পটিচ্চ তযো খন্ধা…পে… দ্ৱে খন্ধে…পে…. (১)

আসৱসম্পযুত্তং ধম্মং পটিচ্চ আসৱৱিপ্পযুত্তো ধম্মো উপ্পজ্জতি আৰম্মণপচ্চযা – দোমনস্সসহগতে ৱিচিকিচ্ছাসহগতে উদ্ধচ্চসহগতে খন্ধে পটিচ্চ মোহো. (২)

আসৱসম্পযুত্তং ধম্মং পটিচ্চ আসৱসম্পযুত্তো চ আসৱৱিপ্পযুত্তো চ ধম্মা উপ্পজ্জন্তি আৰম্মণপচ্চযা – দোমনস্সসহগতং ৱিচিকিচ্ছাসহগতং উদ্ধচ্চসহগতং একং খন্ধং পটিচ্চ তযো খন্ধা মোহো চ…পে… দ্ৱে খন্ধে…পে…. (৩)

৫২. আসৱৱিপ্পযুত্তং ধম্মং পটিচ্চ আসৱৱিপ্পযুত্তো ধম্মো উপ্পজ্জতি আৰম্মণপচ্চযা – আসৱৱিপ্পযুত্তং একং খন্ধং পটিচ্চ তযো খন্ধা…পে… দ্ৱে খন্ধে…পে… পটিসন্ধিক্খণে…পে… ৱত্থুং পটিচ্চ খন্ধা. (১) আসৱৱিপ্পযুত্তং ধম্মং পটিচ্চ আসৱসম্পযুত্তো ধম্মো উপ্পজ্জতি আৰম্মণপচ্চযা – দোমনস্সসহগতং ৱিচিকিচ্ছাসহগতং উদ্ধচ্চসহগতং মোহং পটিচ্চ সম্পযুত্তকা খন্ধা. (২)

আসৱসম্পযুত্তঞ্চ আসৱৱিপ্পযুত্তঞ্চ ধম্মং পটিচ্চ আসৱসম্পযুত্তো ধম্মো উপ্পজ্জতি আৰম্মণপচ্চযা – দোমনস্সসহগতং ৱিচিকিচ্ছাসহগতং উদ্ধচ্চসহগতং একং খন্ধঞ্চ মোহঞ্চ পটিচ্চ তযো খন্ধা…পে… দ্ৱে খন্ধে…পে…. (১)

অধিপতিপচ্চযো

৫৩. আসৱসম্পযুত্তং ধম্মং পটিচ্চ আসৱসম্পযুত্তো ধম্মো উপ্পজ্জতি অধিপতিপচ্চযা… তীণি.

আসৱৱিপ্পযুত্তং ধম্মং পটিচ্চ আসৱৱিপ্পযুত্তো ধম্মো উপ্পজ্জতি অধিপতিপচ্চযা – আসৱৱিপ্পযুত্তং একং খন্ধং পটিচ্চ তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে…পে… দোমনস্সসহগতং মোহং পটিচ্চ চিত্তসমুট্ঠানং ৰূপং, একং মহাভূতং…পে… মহাভূতে পটিচ্চ চিত্তসমুট্ঠানং ৰূপং উপাদাৰূপং. (১)

আসৱৱিপ্পযুত্তং ধম্মং পটিচ্চ আসৱসম্পযুত্তো ধম্মো উপ্পজ্জতি অধিপতিপচ্চযা – দোমনস্সসহগতং মোহং পটিচ্চ সম্পযুত্তকা খন্ধা. (২)

আসৱৱিপ্পযুত্তং ধম্মং পটিচ্চ আসৱসম্পযুত্তো চ আসৱৱিপ্পযুত্তো চ ধম্মা উপ্পজ্জন্তি অধিপতিপচ্চযা – দোমনস্সসহগতং মোহং পটিচ্চ সম্পযুত্তকা খন্ধা চিত্তসমুট্ঠানঞ্চ ৰূপং. (৩)

৫৪. আসৱসম্পযুত্তঞ্চ আসৱৱিপ্পযুত্তঞ্চ ধম্মং পটিচ্চ আসৱসম্পযুত্তো ধম্মো উপ্পজ্জতি অধিপতিপচ্চযা – দোমনস্সসহগতং একং খন্ধঞ্চ মোহঞ্চ পটিচ্চ তযো খন্ধা…পে… দ্ৱে খন্ধে…পে…. (১)

আসৱসম্পযুত্তঞ্চ আসৱৱিপ্পযুত্তঞ্চ ধম্মং পটিচ্চ আসৱৱিপ্পযুত্তো ধম্মো উপ্পজ্জতি অধিপতিপচ্চযা – আসৱসম্পযুত্তে খন্ধে চ মহাভূতে চ পটিচ্চ চিত্তসমুট্ঠানং ৰূপং, দোমনস্সসহগতে খন্ধে চ মোহঞ্চ পটিচ্চ চিত্তসমুট্ঠানং ৰূপং. (২)

আসৱসম্পযুত্তঞ্চ আসৱৱিপ্পযুত্তঞ্চ ধম্মং পটিচ্চ আসৱসম্পযুত্তো চ আসৱৱিপ্পযুত্তো চ ধম্মা উপ্পজ্জন্তি অধিপতিপচ্চযা – দোমনস্সসহগতং একং খন্ধঞ্চ মোহঞ্চ পটিচ্চ তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে…পে…. (৩)

(এৱং সব্বে পচ্চযা ৱিত্থাৰেতব্বা. সংখিত্তং.)