১. ৱিভঙ্গৱাৰো

হেতুপচ্চযো

১০. আসৱং ধম্মং পচ্চযা আসৱো ধম্মো উপ্পজ্জতি হেতুপচ্চযা (আসৱমূলকং তীণি, পটিচ্চসদিসা).

নোআসৱং ধম্মং পচ্চযা নোআসৱো ধম্মো উপ্পজ্জতি হেতুপচ্চযা – নোআসৱং একং খন্ধং পচ্চযা তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে…পে… পটিসন্ধিক্খণে…পে… খন্ধে পচ্চযা ৱত্থু, ৱত্থুং পচ্চযা খন্ধা, মহাভূতে পচ্চযা চিত্তসমুট্ঠানং ৰূপং কটত্তাৰূপং উপাদাৰূপং, ৱত্থুং পচ্চযা নোআসৱা খন্ধা. (১)

নোআসৱং ধম্মং পচ্চযা আসৱো ধম্মো উপ্পজ্জতি হেতুপচ্চযা – নোআসৱে খন্ধে পচ্চযা আসৱা, ৱত্থুং পচ্চযা আসৱা. (২)

নোআসৱং ধম্মং পচ্চযা আসৱো চ নোআসৱো চ ধম্মা উপ্পজ্জন্তি হেতুপচ্চযা – নোআসৱং একং খন্ধং পচ্চযা তযো খন্ধা আসৱা চ চিত্তসমুট্ঠানঞ্চ ৰূপং…পে… দ্ৱে খন্ধে…পে… ৱত্থুং পচ্চযা আসৱা সম্পযুত্তকা চ খন্ধা. (৩)

১১. আসৱঞ্চ নোআসৱঞ্চ ধম্মং পচ্চযা আসৱো ধম্মো উপ্পজ্জতি হেতুপচ্চযা – কামাসৱঞ্চ সম্পযুত্তকে চ খন্ধে পচ্চযা দিট্ঠাসৱো অৱিজ্জাসৱো (চক্কং). কামাসৱঞ্চ ৱত্থুঞ্চ পচ্চযা দিট্ঠাসৱো অৱিজ্জাসৱো (চক্কং). (১)

আসৱঞ্চ নোআসৱঞ্চ ধম্মং পচ্চযা নোআসৱো ধম্মো উপ্পজ্জতি হেতুপচ্চযা – নোআসৱং একং খন্ধঞ্চ আসৱে চ পচ্চযা তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে…পে… আসৱঞ্চ ৱত্থুঞ্চ পচ্চযা নোআসৱা খন্ধা. (২)

আসৱঞ্চ নোআসৱঞ্চ ধম্মং পচ্চযা আসৱো চ নোআসৱো চ ধম্মা উপ্পজ্জন্তি হেতুপচ্চযা – নোআসৱং একং খন্ধঞ্চ কামাসৱঞ্চ পচ্চযা তযো খন্ধা দিট্ঠাসৱো অৱিজ্জাসৱো চিত্তসমুট্ঠানঞ্চ ৰূপং…পে… দ্ৱে খন্ধে…পে… (চক্কং). কামাসৱঞ্চ ৱত্থুঞ্চ পচ্চযা দিট্ঠাসৱো অৱিজ্জাসৱো সম্পযুত্তকা চ খন্ধা (চক্কং. সংখিত্তং). (৩)