১. ৱিভঙ্গৱাৰো

নহেতুপচ্চযো

৬. নোউপাদানং ধম্মং পটিচ্চ নোউপাদানো ধম্মো উপ্পজ্জতি নহেতুপচ্চযা – অহেতুকং নোউপাদানং একং খন্ধং পটিচ্চ তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে…পে… অহেতুকপটিসন্ধিক্খণে…পে… খন্ধে পটিচ্চ ৱত্থু, ৱত্থুং পটিচ্চ খন্ধা, একং মহাভূতং…পে… মহাভূতে পটিচ্চ চিত্তসমুট্ঠানং ৰূপং কটত্তাৰূপং উপাদাৰূপং; বাহিৰং… আহাৰসমুট্ঠানং… উতুসমুট্ঠানং… অসঞ্ঞসত্তানং…পে… ৱিচিকিচ্ছাসহগতে উদ্ধচ্চসহগতে খন্ধে পটিচ্চ ৱিচিকিচ্ছাসহগতো উদ্ধচ্চসহগতো মোহো. (১)

নআৰম্মণপচ্চযাদি

৭. উপাদানং ধম্মং পটিচ্চ নোউপাদানো ধম্মো উপ্পজ্জতি নআৰম্মণপচ্চযা – উপাদানে পটিচ্চ চিত্তসমুট্ঠানং ৰূপং. (১)

নোউপাদানং ধম্মং পটিচ্চ নোউপাদানো ধম্মো উপ্পজ্জতি নআৰম্মণপচ্চযা – নোউপাদানে খন্ধে পটিচ্চ চিত্তসমুট্ঠানং ৰূপং; পটিসন্ধিক্খণে নোউপাদানে খন্ধে পটিচ্চ কটত্তাৰূপং, খন্ধে পটিচ্চ ৱত্থু, একং মহাভূতং…পে… (যাৱ অসঞ্ঞসত্তা). (১)

উপাদানঞ্চ নোউপাদানং চ ধম্মং পটিচ্চ নোউপাদানো ধম্মো উপ্পজ্জতি নআৰম্মণপচ্চযা – উপাদানে চ সম্পযুত্তকে চ খন্ধে পটিচ্চ চিত্তসমুট্ঠানং ৰূপং, উপাদানে চ মহাভূতে চ পটিচ্চ চিত্তসমুট্ঠানং ৰূপং. (১)

নঅধিপতিপচ্চযা… নঅনন্তৰপচ্চযা…পে… নউপনিস্সযপচ্চযা.

নপুৰেজাতপচ্চযো

৮. উপাদানং ধম্মং পটিচ্চ উপাদানো ধম্মো উপ্পজ্জতি নপুৰেজাতপচ্চযা – অৰূপে অত্তৱাদুপাদানং পটিচ্চ কামুপাদানং, কামুপাদানং পটিচ্চ অত্তৱাদুপাদানং. (১)

উপাদানং ধম্মং পটিচ্চ নোউপাদানো ধম্মো উপ্পজ্জতি নপুৰেজাতপচ্চযা – অৰূপে উপাদানে পটিচ্চ সম্পযুত্তকা খন্ধা, উপাদানে পটিচ্চ চিত্তসমুট্ঠানং ৰূপং (সংখিত্তং, নৱপি পঞ্হা অৰূপে দ্ৱে উপাদানা).