১. ৱিভঙ্গৱাৰো

হেতুপচ্চযো

৯৮. উপাদানো চেৱ উপাদানিযো চ ধম্মো উপাদানস্স চেৱ উপাদানিযস্স চ ধম্মস্স হেতুপচ্চযেন পচ্চযো – উপাদানা চেৱ উপাদানিযা চ হেতূ সম্পযুত্তকানং উপাদানানং হেতুপচ্চযেন পচ্চযো. (১)

উপাদানো চেৱ উপাদানিযো চ ধম্মো উপাদানিযস্স চেৱ নো চ উপাদানস্স ধম্মস্স হেতুপচ্চযেন পচ্চযো – উপাদানা চেৱ উপাদানিযা চ হেতূ সম্পযুত্তকানং খন্ধানং চিত্তসমুট্ঠানানঞ্চ ৰূপানং হেতুপচ্চযেন পচ্চযো (উপাদানদুকসদিসা নিন্নানা, নৱ পঞ্হা).

আৰম্মণপচ্চযো

৯৯. উপাদানো চেৱ উপাদানিযো চ ধম্মো উপাদানস্স চেৱ উপাদানিযস্স চ ধম্মস্স আৰম্মণপচ্চযেন পচ্চযো – উপাদানে আৰব্ভ উপাদানা উপ্পজ্জন্তি… তীণি.

উপাদানিযো চেৱ নো চ উপাদানো ধম্মো উপাদানিযস্স চেৱ নো চ উপাদানস্স ধম্মস্স আৰম্মণপচ্চযেন পচ্চযো – দানং…পে… ঝানা ৱুট্ঠহিত্ৱা ঝানং পচ্চৱেক্খতি, অস্সাদেতি অভিনন্দতি, তং আৰব্ভ ৰাগো উপ্পজ্জতি, দিট্ঠি উপ্পজ্জতি, ৱিচিকিচ্ছা উদ্ধচ্চং দোমনস্সং উপ্পজ্জতি; অৰিযা গোত্ৰভুং পচ্চৱেক্খন্তি, ৱোদানং পচ্চৱেক্খন্তি, পহীনে কিলেসে…পে… ৱিক্খম্ভিতে কিলেসে…পে… পুব্বে সমুদাচিণ্ণে…পে… চক্খুং…পে… ৱত্থুং…পে… (সংখিত্তং) অনাগতংসঞাণস্স আৱজ্জনায আৰম্মণপচ্চযেন পচ্চযো. (১)

উপাদানিযো চেৱ নো চ উপাদানো ধম্মো উপাদানস্স চেৱ উপাদানিযস্স চ ধম্মস্স আৰম্মণপচ্চযেন পচ্চযো (সংখিত্তং, ইতৰে দ্ৱে উপাদানদুকসদিসা). (৩)

উপাদানো চেৱ উপাদানিযো চ উপাদানিযো চেৱ নো চ উপাদানো চ ধম্মা উপাদানস্স চেৱ উপাদানিযস্স চ ধম্মস্স আৰম্মণপচ্চযেন পচ্চযো… তীণি (হেট্ঠা অধিপতি তীণি, উপাদানদুকসদিসা).

অধিপতিপচ্চযো

১০০. উপাদানিযো চেৱ নো চ উপাদানো ধম্মো উপাদানিযস্স চেৱ নো চ উপাদানস্স চ ধম্মস্স অধিপতিপচ্চযেন পচ্চযো – আৰম্মণাধিপতি, সহজাতাধিপতি. আৰম্মণাধিপতি – দানং…পে… ঝানা ৱুট্ঠহিত্ৱা ঝানং গৰুং কত্ৱা পচ্চৱেক্খতি, অস্সাদেতি অভিনন্দতি, তং গৰুং কত্ৱা ৰাগো উপ্পজ্জতি, দিট্ঠি উপ্পজ্জতি; সেক্খা গোত্ৰভুং গৰুং কত্ৱা…পে… ৱোদানং…পে… চক্খুং…পে… ৱত্থুং উপাদানিযে চেৱ নো চ উপাদানে খন্ধে গৰুং কত্ৱা উপাদানিযা চেৱ নো চ উপাদানা খন্ধা উপ্পজ্জন্তি. সহজাতাধিপতি – উপাদানিযা চেৱ নো চ উপাদানাধিপতি সম্পযুত্তকানং খন্ধানং চিত্তসমুট্ঠানানঞ্চ ৰূপানং অধিপতিপচ্চযেন পচ্চযো (অৱসেসা দ্ৱেপি আৰম্মণাধিপতি সহজাতাধিপতিপি উপাদানদুকসদিসা). (৩)

(ঘটনা অধিপতি তীণি, উপাদানদুকসদিসা. সব্বে পচ্চযা উপাদানদুকসদিসা. উপাদানিযে লোকুত্তৰং নত্থি, পচ্চনীযম্পি ইতৰে দ্ৱে গণনাপি উপাদানদুকসদিসং.)

উপাদানউপাদানিযদুকং নিট্ঠিতং.