১. ৱিভঙ্গৱাৰো

হেতুপচ্চযো

৫৭. উপাদানসম্পযুত্তং ধম্মং পচ্চযা উপাদানসম্পযুত্তো ধম্মো উপ্পজ্জতি হেতুপচ্চযা… তীণি (পটিচ্চসদিসং).

উপাদানৱিপ্পযুত্তং ধম্মং পচ্চযা উপাদানৱিপ্পযুত্তো ধম্মো উপ্পজ্জতি হেতুপচ্চযা – উপাদানৱিপ্পযুত্তং একং খন্ধং পচ্চযা…পে… (যাৱ অজ্ঝত্তিকা মহাভূতা) ৱত্থুং পচ্চযা উপাদানৱিপ্পযুত্তা খন্ধা, ৱত্থুং পচ্চযা দিট্ঠিগতৱিপ্পযুত্তো লোভো. (১)

উপাদানৱিপ্পযুত্তং ধম্মং পচ্চযা উপাদানসম্পযুত্তো ধম্মো উপ্পজ্জতি হেতুপচ্চযা – ৱত্থুং পচ্চযা উপাদানসম্পযুত্তা খন্ধা, দিট্ঠিগতৱিপ্পযুত্তং লোভং পচ্চযা সম্পযুত্তকা খন্ধা. (২)

উপাদানৱিপ্পযুত্তং ধম্মং পচ্চযা উপাদানসম্পযুত্তো চ উপাদানৱিপ্পযুত্তো চ ধম্মা উপ্পজ্জন্তি হেতুপচ্চযা – ৱত্থুং পচ্চযা উপাদানসম্পযুত্তকা খন্ধা, মহাভূতে পচ্চযা চিত্তসমুট্ঠানং ৰূপং; দিট্ঠিগতৱিপ্পযুত্তং লোভং পচ্চযা সম্পযুত্তকা খন্ধা চিত্তসমুট্ঠানঞ্চ ৰূপং, ৱত্থুং পচ্চযা দিট্ঠিগতৱিপ্পযুত্তলোভসহগতা খন্ধা চ লোভো চ. (৩)

৫৮. উপাদানসম্পযুত্তঞ্চ উপাদানৱিপ্পযুত্তঞ্চ ধম্মং পচ্চযা উপাদানসম্পযুত্তো ধম্মো উপ্পজ্জতি হেতুপচ্চযা – উপাদানসম্পযুত্তং একং খন্ধঞ্চ ৱত্থুঞ্চ পচ্চযা তযো খন্ধা…পে… দ্ৱে খন্ধে চ…পে… দিট্ঠিগতৱিপ্পযুত্তলোভসহগতং একং খন্ধঞ্চ লোভঞ্চ পচ্চযা তযো খন্ধা…পে… দ্ৱে খন্ধে চ…পে…. (১)

উপাদানসম্পযুত্তঞ্চ উপাদানৱিপ্পযুত্তঞ্চ ধম্মং পচ্চযা উপাদানৱিপ্পযুত্তো ধম্মো উপ্পজ্জতি হেতুপচ্চযা – উপাদানসম্পযুত্তে খন্ধে চ মহাভূতে চ পচ্চযা চিত্তসমুট্ঠানং ৰূপং, দিট্ঠিগতৱিপ্পযুত্তলোভসহগতে খন্ধে চ লোভঞ্চ পচ্চযা চিত্তসমুট্ঠানং ৰূপং, দিট্ঠিগতৱিপ্পযুত্তলোভসহগতে খন্ধে চ ৱত্থুঞ্চ পচ্চযা লোভো. (২)

উপাদানসম্পযুত্তঞ্চ উপাদানৱিপ্পযুত্তঞ্চ ধম্মং পচ্চযা উপাদানসম্পযুত্তো চ উপাদানৱিপ্পযুত্তো চ ধম্মা উপ্পজ্জন্তি হেতুপচ্চযা – উপাদানসম্পযুত্তং একং খন্ধঞ্চ ৱত্থুঞ্চ পচ্চযা তযো খন্ধা…পে… দ্ৱে খন্ধে চ…পে… উপাদানসম্পযুত্তে খন্ধে চ মহাভূতে চ পচ্চযা চিত্তসমুট্ঠানং ৰূপং; দিট্ঠিগতৱিপ্পযুত্তলোভসহগতং একং খন্ধঞ্চ ৱত্থুঞ্চ পচ্চযা তযো খন্ধা লোভো চ…পে… দ্ৱে খন্ধে চ…পে…. (৩) (সংখিত্তং. আৰম্মণপচ্চযম্হি পঞ্চ ৱিঞ্ঞাণা কাতব্বা.)