১. ৱিভঙ্গৱাৰো

হেতুপচ্চযো

১৩৬. হেতু চেৱ সহেতুকো চ ধম্মো হেতুস্স চেৱ সহেতুকস্স চ ধম্মস্স হেতুপচ্চযেন পচ্চযো – অলোভো অদোসস্স অমোহস্স হেতুপচ্চযেন পচ্চযো (যথা পটিচ্চৱাৰসদিসং). (১)

হেতু চেৱ সহেতুকো চ ধম্মো সহেতুকস্স চেৱ ন চ হেতুস্স ধম্মস্স হেতুপচ্চযেন পচ্চযো – হেতূ সম্পযুত্তকানং খন্ধানং হেতুপচ্চযেন পচ্চযো; পটিসন্ধিক্খণে…পে…. (২)

হেতু চেৱ সহেতুকো চ ধম্মো হেতুস্স চেৱ সহেতুকস্স চ সহেতুকস্স চেৱ ন চ হেতুস্স চ ধম্মস্স হেতুপচ্চযেন পচ্চযো – অলোভো অদোসস্স অমোহস্স সম্পযুত্তকানঞ্চ খন্ধানং হেতুপচ্চযেন পচ্চযো (ৱিত্থাৰেতব্বং). (৩)

আৰম্মণপচ্চযো

১৩৭. হেতু চেৱ সহেতুকো চ ধম্মো হেতুস্স চেৱ সহেতুকস্স চ ধম্মস্স আৰম্মণপচ্চযেন পচ্চযো – হেতুং আৰব্ভ হেতূ উপ্পজ্জন্তি. (১)

হেতু চেৱ সহেতুকো চ ধম্মো সহেতুকস্স চেৱ ন চ হেতুস্স ধম্মস্স আৰম্মণপচ্চযেন পচ্চযো – হেতুং আৰব্ভ সহেতুকা চেৱ ন চ হেতূ খন্ধা উপ্পজ্জন্তি. (২)

হেতু চেৱ সহেতুকো চ ধম্মো হেতুস্স চেৱ সহেতুকস্স চ সহেতুকস্স চেৱ ন চ হেতুস্স চ ধম্মস্স আৰম্মণপচ্চযেন পচ্চযো – হেতুং আৰব্ভ হেতূ চ সম্পযুত্তকা চ খন্ধা উপ্পজ্জন্তি. (৩)

সহেতুকো চেৱ ন চ হেতু ধম্মো সহেতুকস্স চেৱ ন চ হেতুস্স ধম্মস্স আৰম্মণপচ্চযেন পচ্চযো – দানং দত্ৱা সীলং…পে… উপোসথকম্মং কত্ৱা তং পচ্চৱেক্খতি, পুব্বে সুচিণ্ণানি পচ্চৱেক্খতি. ঝানা ৱুট্ঠহিত্ৱা…পে… অৰিযা মগ্গা ৱুট্ঠহিত্ৱা মগ্গং পচ্চৱেক্খন্তি, ফলং পচ্চৱেক্খন্তি. পহীনে কিলেসে…পে… ৱিক্খম্ভিতে কিলেসে পচ্চৱেক্খন্তি, পুব্বে সমুদাচিণ্ণে কিলেসে জানন্তি. সহেতুকে চেৱ ন চ হেতূ খন্ধে অনিচ্চতো…পে… দোমনস্সং উপ্পজ্জতি. চেতোপৰিযঞাণেন সহেতুকা চেৱ ন চ হেতুচিত্তসমঙ্গিস্স চিত্তং জানাতি; আকাসানঞ্চাযতনং ৱিঞ্ঞাণঞ্চাযতনস্স…পে… আকিঞ্চঞ্ঞাযতনং নেৱসঞ্ঞানাসঞ্ঞাযতনস্স…পে… সহেতুকা চেৱ ন চ হেতূ খন্ধা ইদ্ধিৱিধঞাণস্স, চেতোপৰিযঞাণস্স, পুব্বেনিৱাসানুস্সতিঞাণস্স, যথাকম্মূপগঞাণস্স, অনাগতংসঞাণস্স আৰম্মণপচ্চযেন পচ্চযো. (১)

সহেতুকো চেৱ ন চ হেতু ধম্মো হেতুস্স চেৱ সহেতুকস্স চ ধম্মস্স আৰম্মণপচ্চযেন পচ্চযো – দানং দত্ৱা… (যথা পঠমগমনং এৱং নিন্নানং). (২)

সহেতুকো চেৱ ন চ হেতু ধম্মো হেতুস্স চেৱ সহেতুকস্স চ সহেতুকস্স চেৱ ন চ হেতুস্স চ ধম্মস্স আৰম্মণপচ্চযেন পচ্চযো – দানং দত্ৱা… (যথা পঠমগমনং এৱং নিন্নানং). (৩)

১৩৮. হেতু চেৱ সহেতুকো চ সহেতুকো চেৱ ন চ হেতু চ ধম্মা হেতুস্স চেৱ সহেতুকস্স চ ধম্মস্স আৰম্মণপচ্চযেন পচ্চযো – হেতুঞ্চ সম্পযুত্তকে চ খন্ধে আৰব্ভ হেতূ উপ্পজ্জন্তি. (১)

হেতু চেৱ সহেতুকো চ সহেতুকো চেৱ ন চ হেতু চ ধম্মা সহেতুকস্স চেৱ ন চ হেতুস্স ধম্মস্স আৰম্মণপচ্চযেন পচ্চযো – হেতুঞ্চ সম্পযুত্তকে চ খন্ধে আৰব্ভ সহেতুকা চেৱ ন চ হেতূ খন্ধা উপ্পজ্জন্তি. (২)

হেতু চেৱ সহেতুকো চ সহেতুকো চেৱ ন চ হেতু চ ধম্মা হেতুস্স চেৱ সহেতুকস্স চ সহেতুকস্স চেৱ ন চ হেতুস্স চ ধম্মস্স আৰম্মণপচ্চযেন পচ্চযো – হেতুঞ্চ সম্পযুত্তকে চ খন্ধে আৰব্ভ হেতূ চ সম্পযুত্তকা চ খন্ধা উপ্পজ্জন্তি. (৩)

অধিপতিপচ্চযো

১৩৯. হেতু চেৱ সহেতুকো চ ধম্মো হেতুস্স চেৱ সহেতুকস্স চ ধম্মস্স অধিপতিপচ্চযেন পচ্চযো – আৰম্মণাধিপতি, সহজাতাধিপতি. আৰম্মণাধিপতি – হেতুং গৰুং কত্ৱা হেতূ উপ্পজ্জন্তি. সহজাতাধিপতি – হেতু চেৱ সহেতুকাধিপতি সম্পযুত্তকানং হেতূনং অধিপতিপচ্চযেন পচ্চযো. (১)

হেতু চেৱ সহেতুকো চ ধম্মো সহেতুকস্স চেৱ ন চ হেতুস্স ধম্মস্স অধিপতিপচ্চযেন পচ্চযো – আৰম্মণাধিপতি, সহজাতাধিপতি. আৰম্মণাধিপতি – হেতুং গৰুং কত্ৱা সহেতুকা চেৱ ন চ হেতূ খন্ধা উপ্পজ্জন্তি. সহজাতাধিপতি – হেতু চেৱ সহেতুকাধিপতি সম্পযুত্তকানং খন্ধানং অধিপতিপচ্চযেন পচ্চযো. (২)

হেতু চেৱ সহেতুকো চ ধম্মো হেতুস্স চেৱ সহেতুকস্স চ সহেতুকস্স চেৱ ন চ হেতুস্স চ ধম্মস্স অধিপতিপচ্চযেন পচ্চযো – আৰম্মণাধিপতি, সহজাতাধিপতি. আৰম্মণাধিপতি – হেতুং গৰুং কত্ৱা হেতূ চ সম্পযুত্তকা চ খন্ধা উপ্পজ্জন্তি. সহজাতাধিপতি – হেতু চেৱ সহেতুকাধিপতি সম্পযুত্তকানং খন্ধানং হেতূনঞ্চ অধিপতিপচ্চযেন পচ্চযো. (৩)

১৪০. সহেতুকো চেৱ ন চ হেতু ধম্মো সহেতুকস্স চেৱ ন চ হেতুস্স ধম্মস্স অধিপতিপচ্চযেন পচ্চযো – আৰম্মণাধিপতি, সহজাতাধিপতি. আৰম্মণাধিপতি – দানং দত্ৱা সীলং…পে… উপোসথকম্মং কত্ৱা তং গৰুং কত্ৱা পচ্চৱেক্খতি, পুব্বে সুচিণ্ণানি…পে… ঝানা ৱুট্ঠহিত্ৱা ঝানং গৰুং কত্ৱা পচ্চৱেক্খতি, অৰিযা মগ্গা ৱুট্ঠহিত্ৱা মগ্গং গৰুং কত্ৱা পচ্চৱেক্খন্তি, ফলং গৰুং কত্ৱা পচ্চৱেক্খন্তি, সহেতুকে চেৱ ন চ হেতূ খন্ধে গৰুং কত্ৱা অস্সাদেতি অভিনন্দতি; তং গৰুং কত্ৱা ৰাগো উপ্পজ্জতি, দিট্ঠি উপ্পজ্জতি. সহজাতাধিপতি – সহেতুকো চেৱ ন চ হেতু অধিপতি সম্পযুত্তকানং খন্ধানং অধিপতিপচ্চযেন পচ্চযো. (১)

সহেতুকো চেৱ ন চ হেতু ধম্মো হেতুস্স চেৱ সহেতুকস্স চ ধম্মস্স অধিপতিপচ্চযেন পচ্চযো – আৰম্মণাধিপতি, সহজাতাধিপতি. আৰম্মণাধিপতি – দানং দত্ৱা… (পঠমগমনংযেৱ). সহজাতাধিপতি – সহেতুকো চেৱ ন চ হেতু অধিপতি সম্পযুত্তকানং হেতূনং অধিপতিপচ্চযেন পচ্চযো. (২)

সহেতুকো চেৱ ন চ হেতু ধম্মো হেতুস্স চেৱ সহেতুকস্স চ সহেতুকস্স চেৱ ন চ হেতুস্স চ ধম্মস্স অধিপতিপচ্চযেন পচ্চযো – আৰম্মণাধিপতি, সহজাতাধিপতি. আৰম্মণাধিপতি – দানং দত্ৱা… (পঠমগমনংযেৱ). সহজাতাধিপতি – সহেতুকো চেৱ ন চ হেতু অধিপতি সম্পযুত্তকানং খন্ধানং হেতূনঞ্চ অধিপতিপচ্চযেন পচ্চযো. (৩)

১৪১. হেতু চেৱ সহেতুকো চ সহেতুকো চেৱ ন চ হেতু চ ধম্মা হেতুস্স চেৱ সহেতুকস্স চ ধম্মস্স অধিপতিপচ্চযেন পচ্চযো. আৰম্মণাধিপতি – হেতূ চ সম্পযুত্তকে চ খন্ধে গৰুং কত্ৱা হেতূ উপ্পজ্জন্তি. (১)

হেতু চেৱ সহেতুকো চ সহেতুকো চেৱ ন চ হেতু চ ধম্মা সহেতুকস্স চেৱ ন চ হেতুস্স ধম্মস্স অধিপতিপচ্চযেন পচ্চযো. আৰম্মণাধিপতি – হেতুঞ্চ সম্পযুত্তকে চ খন্ধে গৰুং কত্ৱা সহেতুকা চেৱ ন চ হেতূ খন্ধা উপ্পজ্জন্তি. (২)

হেতু চেৱ সহেতুকো চ সহেতুকো চেৱ ন চ হেতু চ ধম্মা হেতুস্স চেৱ সহেতুকস্স চ সহেতুকস্স চেৱ ন চ হেতুস্স চ ধম্মস্স অধিপতিপচ্চযেন পচ্চযো. আৰম্মণাধিপতি – হেতুঞ্চ সম্পযুত্তকে চ খন্ধে গৰুং কত্ৱা হেতূ চ সম্পযুত্তকা চ খন্ধা উপ্পজ্জন্তি. (৩)

অনন্তৰপচ্চযো

১৪২. হেতু চেৱ সহেতুকো চ ধম্মো হেতুস্স চেৱ সহেতুকস্স চ ধম্মস্স অনন্তৰপচ্চযেন পচ্চযো – পুৰিমা পুৰিমা হেতূ পচ্ছিমানং পচ্ছিমানং হেতূনং অনন্তৰপচ্চযেন পচ্চযো. (১)

হেতু চেৱ সহেতুকো চ ধম্মো সহেতুকস্স চেৱ ন চ হেতুস্স ধম্মস্স অনন্তৰপচ্চযেন পচ্চযো – পুৰিমা পুৰিমা হেতূ পচ্ছিমানং পচ্ছিমানং সহেতুকানঞ্চেৱ ন চ হেতূনং খন্ধানং অনন্তৰপচ্চযেন পচ্চযো. (২)

হেতু চেৱ সহেতুকো চ ধম্মো হেতুস্স চেৱ সহেতুকস্স চ সহেতুকস্স চেৱ ন চ হেতুস্স চ ধম্মস্স অনন্তৰপচ্চযেন পচ্চযো – পুৰিমা পুৰিমা হেতূ পচ্ছিমানং পচ্ছিমানং হেতূনং সম্পযুত্তকানঞ্চ খন্ধানং অনন্তৰপচ্চযেন পচ্চযো. (৩)

১৪৩. সহেতুকো চেৱ ন চ হেতু ধম্মো সহেতুকস্স চেৱ ন চ হেতুস্স ধম্মস্স অনন্তৰপচ্চযেন পচ্চযো – পুৰিমা পুৰিমা সহেতুকা চেৱ ন চ হেতূ খন্ধা পচ্ছিমানং পচ্ছিমানং সহেতুকানঞ্চেৱ ন চ হেতূনং খন্ধানং অনন্তৰপচ্চযেন পচ্চযো; অনুলোমং গোত্ৰভুস্স… অনুলোমং ৱোদানস্স…পে… নিৰোধা ৱুট্ঠহন্তস্স, নেৱসঞ্ঞানাসঞ্ঞাযতনং ফলসমাপত্তিযা অনন্তৰপচ্চযেন পচ্চযো. (১)

সহেতুকো চেৱ ন চ হেতু ধম্মো হেতুস্স চেৱ সহেতুকস্স চ ধম্মস্স অনন্তৰপচ্চযেন পচ্চযো – পুৰিমা পুৰিমা সহেতুকা চেৱ ন চ হেতূ খন্ধা পচ্ছিমানং পচ্ছিমানং হেতূনং অনন্তৰপচ্চযেন পচ্চযো; অনুলোমং গোত্ৰভুস্স… (সংখিত্তং). (২)

সহেতুকো চেৱ ন চ হেতু ধম্মো হেতুস্স চেৱ সহেতুকস্স চ সহেতুকস্স চেৱ ন চ হেতুস্স চ ধম্মস্স অনন্তৰপচ্চযেন পচ্চযো – পুৰিমা পুৰিমা সহেতুকা চেৱ ন চ হেতূ খন্ধা পচ্ছিমানং পচ্ছিমানং হেতূনং সম্পযুত্তকানঞ্চ খন্ধানং অনন্তৰপচ্চযেন পচ্চযো; অনুলোমং গোত্ৰভুস্স…পে…. (৩)

(সহেতুকো চেৱ ন চ হেতুমূলকং তীণিপি একসদিসা.)

১৪৪. হেতু চেৱ সহেতুকো চ সহেতুকো চেৱ ন চ হেতু চ ধম্মা হেতুস্স চেৱ সহেতুকস্স চ ধম্মস্স অনন্তৰপচ্চযেন পচ্চযো – পুৰিমা পুৰিমা হেতূ চ সম্পযুত্তকা চ খন্ধা পচ্ছিমানং পচ্ছিমানং হেতূনং অনন্তৰপচ্চযেন পচ্চযো. (১)

হেতু চেৱ সহেতুকো চ সহেতুকো চেৱ ন চ হেতু চ ধম্মা সহেতুকস্স চেৱ ন চ হেতুস্স ধম্মস্স অনন্তৰপচ্চযেন পচ্চযো – পুৰিমা পুৰিমা হেতূ চ সম্পযুত্তকা চ খন্ধা পচ্ছিমানং পচ্ছিমানং সহেতুকানঞ্চেৱ ন চ হেতূনং খন্ধানং অনন্তৰপচ্চযেন পচ্চযো.(২)

হেতু চেৱ সহেতুকো চ সহেতুকো চেৱ ন চ হেতু চ ধম্মা হেতুস্স চেৱ সহেতুকস্স চ সহেতুকস্স চেৱ ন চ হেতুস্স চ ধম্মস্স অনন্তৰপচ্চযেন পচ্চযো – পুৰিমা পুৰিমা হেতূ চ সম্পযুত্তকা চ খন্ধা পচ্ছিমানং পচ্ছিমানং হেতূনং সম্পযুত্তকানঞ্চ খন্ধানং অনন্তৰপচ্চযেন পচ্চযো. (৩)

সহজাতপচ্চযাদি

১৪৫. হেতু চেৱ সহেতুকো চ ধম্মো হেতুস্স চেৱ সহেতুকস্স চ ধম্মস্স সহজাতপচ্চযেন পচ্চযো… অঞ্ঞমঞ্ঞপচ্চযেন পচ্চযো… নিস্সযপচ্চযেন পচ্চযো (তীণিপি পচ্চযা পটিচ্চৱাৰে হেতুসদিসা).

উপনিস্সযপচ্চযো

১৪৬. হেতু চেৱ সহেতুকো চ ধম্মো হেতুস্স চেৱ সহেতুকস্স চ ধম্মস্স উপনিস্সযপচ্চযেন পচ্চযো – আৰম্মণূপনিস্সযো, অনন্তৰূপনিস্সযো, পকতূপনিস্সযো…পে…. পকতূপনিস্সযো – হেতূ হেতূনং উপনিস্সযপচ্চযেন পচ্চযো. (মূলং কাতব্বং) হেতূ সহেতুকানঞ্চেৱ ন চ হেতূনং খন্ধানং উপনিস্সযপচ্চযেন পচ্চযো. (মূলং কাতব্বং) হেতূ হেতূনং সম্পযুত্তকানঞ্চ খন্ধানং উপনিস্সযপচ্চযেন পচ্চযো (ইমেসং দ্ৱিন্নম্পি পঞ্হানং মূলানি পুচ্ছিতব্বানি).

সহেতুকো চেৱ ন চ হেতু ধম্মো সহেতুকস্স চেৱ ন চ হেতুস্স চ ধম্মস্স উপনিস্সযপচ্চযেন পচ্চযো – আৰম্মণূপনিস্সযো, অনন্তৰূপনিস্সযো, পকতূপনিস্সযো…পে…. পকতূপনিস্সযো – সদ্ধং উপনিস্সায দানং দেতি…পে… সমাপত্তিং উপ্পাদেতি, মানং জপ্পেতি, দিট্ঠিং গণ্হাতি, সীলং…পে… পত্থনং উপনিস্সায দানং দেতি…পে… সঙ্ঘং ভিন্দতি; সদ্ধা…পে… পত্থনা সদ্ধায…পে… পত্থনায মগ্গস্স ফলসমাপত্তিযা উপনিস্সযপচ্চযেন পচ্চযো. (১)

(সহেতুকো চেৱ ন চ হেতুমূলকে ইমিনাকাৰেন ৱিত্থাৰেতব্বা অৱসেসা দ্ৱে পঞ্হা.)

হেতু চেৱ সহেতুকো চ সহেতুকো চেৱ ন চ হেতু চ ধম্মা হেতুস্স চেৱ সহেতুকস্স চ ধম্মস্স উপনিস্সযপচ্চযেন পচ্চযো – আৰম্মণূপনিস্সযো, অনন্তৰূপনিস্সযো, পকতূপনিস্সযো…পে…. পকতূপনিস্সযো – হেতূ চ সম্পযুত্তকা চ খন্ধা হেতূনং উপনিস্সযপচ্চযেন পচ্চযো. (দ্ৱে মূলানি পুচ্ছিতব্বানি) হেতূ চ সম্পযুত্তকা চ খন্ধা সহেতুকানঞ্চেৱ ন চ হেতূনং খন্ধানং উপনিস্সযপচ্চযেন পচ্চযো. (মূলং পুচ্ছিতব্বং) হেতূ চ সম্পযুত্তকা চ খন্ধা হেতূনং সম্পযুত্তকানঞ্চ খন্ধানং উপনিস্সযপচ্চযেন পচ্চযো. (১)

আসেৱনপচ্চযো

১৪৭. হেতু চেৱ সহেতুকো চ ধম্মো হেতুস্স চেৱ সহেতুকস্স চ ধম্মস্স আসেৱনপচ্চযেন পচ্চযো (অনন্তৰসদিসং).

কম্মপচ্চযো

১৪৮. সহেতুকো চেৱ ন চ হেতু ধম্মো সহেতুকস্স চেৱ ন চ হেতুস্স ধম্মস্স কম্মপচ্চযেন পচ্চযো – সহজাতা, নানাক্খণিকা. সহজাতা – সহেতুকা চেৱ ন চ হেতূ চেতনা সম্পযুত্তকানং খন্ধানং কম্মপচ্চযেন পচ্চযো; পটিসন্ধিক্খণে…পে…. নানাক্খণিকা – সহেতুকা চেৱ ন চ হেতূ চেতনা ৱিপাকানং সহেতুকানঞ্চেৱ ন চ হেতূনং খন্ধানং কম্মপচ্চযেন পচ্চযো. (১)

সহেতুকো চেৱ ন চ হেতু ধম্মো হেতুস্স চেৱ সহেতুকস্স চ ধম্মস্স কম্মপচ্চযেন পচ্চযো – সহজাতা, নানাক্খণিকা. সহজাতা – সহেতুকা চেৱ ন চ হেতূ চেতনা সম্পযুত্তকানং হেতূনং কম্মপচ্চযেন পচ্চযো; পটিসন্ধিক্খণে…পে…. নানাক্খণিকা – সহেতুকা চেৱ ন চ হেতূ চেতনা ৱিপাকানং হেতূনং কম্মপচ্চযেন পচ্চযো. (২)

সহেতুকো চেৱ ন চ হেতু ধম্মো হেতুস্স চেৱ সহেতুকস্স চ সহেতুকস্স চেৱ ন চ হেতুস্স চ ধম্মস্স কম্মপচ্চযেন পচ্চযো – সহজাতা, নানাক্খণিকা. সহজাতা – সহেতুকা চেৱ ন চ হেতূ চেতনা সম্পযুত্তকানং খন্ধানং হেতূনঞ্চ কম্মপচ্চযেন পচ্চযো; পটিসন্ধিক্খণে…পে…. নানাক্খণিকা – সহেতুকা চেৱ ন চ হেতূ চেতনা ৱিপাকানং খন্ধানং হেতূনঞ্চ কম্মপচ্চযেন পচ্চযো. (৩)

ৱিপাকপচ্চযো

১৪৯. হেতু চেৱ সহেতুকো চ ধম্মো হেতুস্স চেৱ সহেতুকস্স চ ধম্মস্স ৱিপাকপচ্চযেন পচ্চযো – ৱিপাকো অলোভো অদোসস্স অমোহস্স চ ৱিপাকপচ্চযেন পচ্চযো (চক্কং); পটিসন্ধিক্খণে অলোভো (যথা হেতুপচ্চযা এৱং ৱিত্থাৰেতব্বং, নৱপি ৱিপাকন্তি নিযামেতব্বং).

আহাৰপচ্চযাদি

১৫০. সহেতুকো চেৱ ন চ হেতু ধম্মো সহেতুকস্স চেৱ ন চ হেতুস্স ধম্মস্স আহাৰপচ্চযেন পচ্চযো… তীণি.

হেতু চেৱ সহেতুকো চ ধম্মো হেতুস্স চেৱ সহেতুকস্স চ ধম্মস্স ইন্দ্ৰিযপচ্চযেন পচ্চযো (ইন্দ্ৰিযন্তি নিযামেতব্বং, নৱপি পৰিপুণ্ণং).

সহেতুকো চেৱ ন চ হেতু ধম্মো সহেতুকস্স চেৱ ন চ হেতুস্স ধম্মস্স ঝানপচ্চযেন পচ্চযো… তীণি.

হেতু চেৱ সহেতুকো চ ধম্মো হেতুস্স চেৱ সহেতুকস্স চ ধম্মস্স মগ্গপচ্চযেন পচ্চযো … সম্পযুত্তপচ্চযেন পচ্চযো… অত্থিপচ্চযেন পচ্চযো… নত্থিপচ্চযেন পচ্চযো… ৱিগতপচ্চযেন পচ্চযো… অৱিগতপচ্চযেন পচ্চযো.