১৭. উপ্পন্নত্তিকং

৭. পঞ্হাৱাৰো

১. পচ্চযানুলোমং

১. ৱিভঙ্গৱাৰো

হেতুপচ্চযো

১. উপ্পন্নো ধম্মো উপ্পন্নস্স ধম্মস্স হেতুপচ্চযেন পচ্চযো – উপ্পন্না হেতূ সম্পযুত্তকানং খন্ধানং চিত্তসমুট্ঠানানঞ্চ ৰূপানং হেতুপচ্চযেন পচ্চযো. পটিসন্ধিক্খণে উপ্পন্না হেতূ সম্পযুত্তকানং খন্ধানং কটত্তা চ ৰূপানং হেতুপচ্চযেন পচ্চযো. (১)

আৰম্মণপচ্চযো

২. উপ্পন্নো ধম্মো উপ্পন্নস্স ধম্মস্স আৰম্মণপচ্চযেন পচ্চযো – উপ্পন্নং চক্খুং অনিচ্চতো দুক্খতো অনত্ততো ৱিপস্সতি, অস্সাদেতি অভিনন্দতি, তং আৰব্ভ ৰাগো উপ্পজ্জতি, দিট্ঠি উপ্পজ্জতি, ৱিচিকিচ্ছা…পে… উদ্ধচ্চং…পে… দোমনস্সং উপ্পজ্জতি. উপ্পন্নং সোতং… ঘানং… জিৱ্হং… কাযং… ৰূপে… সদ্দে… গন্ধে… ৰসে… ফোট্ঠব্বে… ৱত্থুং… উপ্পন্নে খন্ধে অনিচ্চতো দুক্খতো অনত্ততো ৱিপস্সতি…পে… দোমনস্সং উপ্পজ্জতি. দিব্বেন চক্খুনা ৰূপং পস্সতি, দিব্বায সোতধাতুযা সদ্দং সুণাতি, ৰূপাযতনং চক্খুৱিঞ্ঞাণস্স …পে… ফোট্ঠব্বাযতনং কাযৱিঞ্ঞাণস্স…পে… উপ্পন্না খন্ধা ইদ্ধিৱিধঞাণস্স আৱজ্জনায আৰম্মণপচ্চযেন পচ্চযো. (১)

৩. অনুপ্পন্নো ধম্মো উপ্পন্নস্স ধম্মস্স আৰম্মণপচ্চযেন পচ্চযো – অনুপ্পন্নে ৰূপে… সদ্দে… গন্ধে… ৰসে… ফোট্ঠব্বে… অনুপ্পন্নে খন্ধে অনিচ্চতো দুক্খতো অনত্ততো ৱিপস্সতি…পে… দোমনস্সং উপ্পজ্জতি. অনুপ্পন্না খন্ধা ইদ্ধিৱিধঞাণস্স, চেতোপৰিযঞাণস্স, অনাগতংসঞাণস্স, আৱজ্জনায আৰম্মণপচ্চযেন পচ্চযো. (১)

৪. উপ্পাদী ধম্মো উপ্পন্নস্স ধম্মস্স আৰম্মণপচ্চযেন পচ্চযো – উপ্পাদিং চক্খুং…পে… কাযং… ৰূপে… গন্ধে… ৰসে… ফোট্ঠব্বে… ৱত্থুং… উপ্পাদী খন্ধে অনিচ্চতো দুক্খতো অনত্ততো…পে… দোমনস্সং উপ্পজ্জতি. উপ্পাদী খন্ধা ইদ্ধিৱিধঞাণস্স, চেতোপৰিযঞাণস্স, অনাগতংসঞাণস্স, আৱজ্জনায আৰম্মণপচ্চযেন পচ্চযো. (১)

অধিপতিপচ্চযো

৫. উপ্পন্নো ধম্মো উপ্পন্নস্স ধম্মস্স অধিপতিপচ্চযেন পচ্চযো – আৰম্মণাধিপতি, সহজাতাধিপতি. আৰম্মণাধিপতি – উপ্পন্নং চক্খুং গৰুং কত্ৱা অস্সাদেতি অভিনন্দতি, তং গৰুং কত্ৱা ৰাগো উপ্পজ্জতি, দিট্ঠি উপ্পজ্জতি. উপ্পন্নং সোতং… ঘানং… জিৱ্হং… কাযং… ৰূপে… সদ্দে… গন্ধে… ৰসে… ফোট্ঠব্বে… ৱত্থুং… উপ্পন্নে খন্ধে গৰুং কত্ৱা অস্সাদেতি অভিনন্দতি, তং গৰুং কত্ৱা ৰাগো উপ্পজ্জতি…পে…. সহজাতাধিপতি – উপ্পন্না অধিপতি সম্পযুত্তকানং খন্ধানং চিত্তসমুট্ঠানানঞ্চ ৰূপানং অধিপতিপচ্চযেন পচ্চযো. (১)

অনুপ্পন্নো ধম্মো উপ্পন্নস্স ধম্মস্স অধিপতিপচ্চযেন পচ্চযো. আৰম্মণাধিপতি – অনুপ্পন্নে ৰূপে… সদ্দে… গন্ধে… ৰসে… ফোট্ঠব্বে… অনুপ্পন্নে খন্ধে গৰুং কত্ৱা অস্সাদেতি অভিনন্দতি, তং গৰুং কত্ৱা ৰাগো উপ্পজ্জতি, দিট্ঠি উপ্পজ্জতি. (১)

উপ্পাদী ধম্মো উপ্পন্নস্স ধম্মস্স অধিপতিপচ্চযেন পচ্চযো. আৰম্মণাধিপতি – উপ্পাদিং চক্খুং…পে… কাযং… ৰূপে…পে… ফোট্ঠব্বে… ৱত্থুং… উপ্পাদী খন্ধে গৰুং কত্ৱা অস্সাদেতি অভিনন্দতি, তং গৰুং কত্ৱা ৰাগো উপ্পজ্জতি, দিট্ঠি উপ্পজ্জতি. (১)

সহজাতপচ্চযো

৬. উপ্পন্নো ধম্মো উপ্পন্নস্স ধম্মস্স সহজাতপচ্চযেন পচ্চযো – উপ্পন্নো একো খন্ধো তিণ্ণন্নং খন্ধানং চিত্তসমুট্ঠানানঞ্চ ৰূপানং সহজাতপচ্চযেন পচ্চযো…পে… দ্ৱে খন্ধা দ্ৱিন্নং খন্ধানং চিত্তসমুট্ঠানানঞ্চ ৰূপানং সহজাতপচ্চযেন পচ্চযো. পটিসন্ধিক্খণে উপ্পন্নো একো খন্ধো তিণ্ণন্নং খন্ধানং কটত্তা চ ৰূপানং সহজাতপচ্চযেন পচ্চযো…পে… দ্ৱে খন্ধা দ্ৱিন্নং খন্ধানং কটত্তা চ ৰূপানং সহজাতপচ্চযেন পচ্চযো. খন্ধা ৱত্থুস্স সহজাতপচ্চযেন পচ্চযো. ৱত্থু খন্ধানং সহজাতপচ্চযেন পচ্চযো. একং মহাভূতং তিণ্ণন্নং মহাভূতানং সহজাতপচ্চযেন পচ্চযো…পে… দ্ৱে মহাভূতা…পে… মহাভূতা চিত্তসমুট্ঠানানং ৰূপানং কটত্তাৰূপানং উপাদাৰূপানং সহজাতপচ্চযেন পচ্চযো. বাহিৰং… আহাৰসমুট্ঠানং… উতুসমুট্ঠানং… অসঞ্ঞসত্তানং একং মহাভূতং…পে… দ্ৱে মহাভূতা…পে… মহাভূতা কটত্তাৰূপানং উপাদাৰূপানং সহজাতপচ্চযেন পচ্চযো. (১)

অঞ্ঞমঞ্ঞপচ্চযো

৭. উপ্পন্নো ধম্মো উপ্পন্নস্স ধম্মস্স অঞ্ঞমঞ্ঞপচ্চযেন পচ্চযো – উপ্পন্নো একো খন্ধো তিণ্ণন্নং খন্ধানং অঞ্ঞমঞ্ঞপচ্চযেন পচ্চযো…পে… দ্ৱে খন্ধা…পে… পটিসন্ধিক্খণে উপ্পন্নো একো খন্ধো তিণ্ণন্নং খন্ধানং ৱত্থুস্স চ অঞ্ঞমঞ্ঞপচ্চযেন পচ্চযো. দ্ৱে খন্ধা…পে… খন্ধা ৱত্থুস্স অঞ্ঞমঞ্ঞপচ্চযেন পচ্চযো. ৱত্থু খন্ধানং অঞ্ঞমঞ্ঞপচ্চযেন পচ্চযো. একং মহাভূতং…পে… বাহিৰং… আহাৰসমুট্ঠানং… উতুসমুট্ঠানং… অসঞ্ঞসত্তানং একং মহাভূতং তিণ্ণন্নং মহাভূতানং অঞ্ঞমঞ্ঞপচ্চযেন পচ্চযো…পে… দ্ৱে মহাভূতা…পে…. (১)

নিস্সযপচ্চযো

৮. উপ্পন্নো ধম্মো উপ্পন্নস্স ধম্মস্স নিস্সযপচ্চযেন পচ্চযো – উপ্পন্নো একো খন্ধো তিণ্ণন্নং খন্ধানং চিত্তসমুট্ঠানানঞ্চ ৰূপানং নিস্সযপচ্চযেন পচ্চযো…পে… দ্ৱে খন্ধা…পে… পটিসন্ধিক্খণে…পে… খন্ধা ৱত্থুস্স…পে… ৱত্থু খন্ধানং…পে… একং মহাভূতং…পে… বাহিৰং… আহাৰসমুট্ঠানং… উতুসমুট্ঠানং… অসঞ্ঞসত্তানং একং মহাভূতং…পে… মহাভূতা চিত্তসমুট্ঠানানং ৰূপানং কটত্তাৰূপানং উপাদাৰূপানং চক্খাযতনং চক্খুৱিঞ্ঞাণস্স…পে… কাযাযতনং কাযৱিঞ্ঞাণস্স…পে… ৱত্থু উপ্পন্নানং খন্ধানং নিস্সযপচ্চযেন পচ্চযো. (১)

উপনিস্সযপচ্চযো

৯. উপ্পন্নো ধম্মো উপ্পন্নস্স ধম্মস্স উপনিস্সযপচ্চযেন পচ্চযো – আৰম্মণূপনিস্সযো, পকতূপনিস্সযো…পে… পকতূপনিস্সযো – উপ্পন্নং উতুং উপনিস্সায ঝানং উপ্পাদেতি, ৱিপস্সনং…পে… মগ্গং…পে… অভিঞ্ঞং…পে… সমাপত্তিং উপ্পাদেতি, মানং জপ্পেতি, দিট্ঠিং গণ্হাতি. উপ্পন্নং ভোজনং…পে… সেনাসনং উপনিস্সায ঝানং উপ্পাদেতি ৱিপস্সনং…পে… মগ্গং…পে… অভিঞ্ঞং…পে… সমাপত্তিং উপ্পাদেতি, মানং জপ্পেতি, দিট্ঠিং গণ্হাতি. উপ্পন্নং উতু… ভোজনং… সেনাসনং উপ্পন্নায সদ্ধায…পে… পঞ্ঞায, কাযিকস্স সুখস্স, কাযিকস্স দুক্খস্স, মগ্গস্স, ফলসমাপত্তিযা উপনিস্সযপচ্চযেন পচ্চযো. (১)

অনুপ্পন্নো ধম্মো উপ্পন্নস্স ধম্মস্স উপনিস্সযপচ্চযেন পচ্চযো – আৰম্মণূপনিস্সযো, পকতূপনিস্সযো…পে…. পকতূপনিস্সযো – অনুপ্পন্নং ৱণ্ণসম্পদং পত্থযমানো দানং দেতি, সীলং সমাদিযতি, উপোসথকম্মং কৰোতি. অনুপ্পন্নং সদ্দসম্পদং… গন্ধসম্পদং… ৰসসম্পদং… ফোট্ঠব্বসম্পদং… অনুপ্পন্নে খন্ধে পত্থযমানো দানং দেতি, সীলং সমাদিযতি, উপোসথকম্মং কৰোতি. অনুপ্পন্না ৱণ্ণসম্পদা…পে… অনুপ্পন্না খন্ধা উপ্পন্নায সদ্ধায…পে… পঞ্ঞায, কাযিকস্স সুখস্স, কাযিকস্স দুক্খস্স, মগ্গস্স, ফলসমাপত্তিযা উপনিস্সযপচ্চযেন পচ্চযো. (১)

উপ্পাদী ধম্মো উপ্পন্নস্স ধম্মস্স উপনিস্সযপচ্চযেন পচ্চযো – আৰম্মণূপনিস্সযো, পকতূপনিস্সযো…পে…. পকতূপনিস্সযো – উপ্পাদিং চক্খুসম্পদং পত্থযমানো দানং দেতি, সীলং সমাদিযতি, উপোসথকম্মং কৰোতি. উপ্পাদিং সোতসম্পদং…পে… কাযসম্পদং…পে… ৱণ্ণসম্পদং … গন্ধসম্পদং… ৰসসম্পদং… ফোট্ঠব্বসম্পদং… উপ্পাদী খন্ধে পত্থযমানো দানং দেতি, সীলং সমাদিযতি, উপোসথকম্মং কৰোতি. উপ্পাদী চক্খুসম্পদা…পে… কাযসম্পদা… ৱণ্ণসম্পদা…পে… ফোট্ঠব্বসম্পদা… উপ্পাদী খন্ধা উপ্পন্নায সদ্ধায…পে… পঞ্ঞায, কাযিকস্স সুখস্স, কাযিকস্স দুক্খস্স, মগ্গস্স, ফলসমাপত্তিযা উপনিস্সযপচ্চযেন পচ্চযো. (১)

পুৰেজাতপচ্চযো

১০. উপ্পন্নো ধম্মো উপ্পন্নস্স ধম্মস্স পুৰেজাতপচ্চযেন পচ্চযো – আৰম্মণপুৰেজাতং, ৱত্থুপুৰেজাতং. আৰম্মণপুৰেজাতং – চক্খুং…পে… ৱত্থুং অনিচ্চতো দুক্খতো অনত্ততো ৱিপস্সতি, অস্সাদেতি অভিনন্দতি, তং আৰব্ভ ৰাগো উপ্পজ্জতি…পে… দোমনস্সং উপ্পজ্জতি দিব্বেন চক্খুনা ৰূপং পস্সতি, দিব্বায সোতধাতুযা সদ্দং সুণাতি, ৰূপাযতনং চক্খুৱিঞ্ঞাণস্স…পে… ফোট্ঠব্বাযতনং কাযৱিঞ্ঞাণস্স পুৰেজাতপচ্চযেন পচ্চযো. ৱত্থুপুৰেজাতং – চক্খাযতনং চক্খুৱিঞ্ঞাণস্স…পে… ৱত্থু উপ্পন্নানং খন্ধানং পুৰেজাতপচ্চযেন পচ্চযো. (১)

পচ্ছাজাতপচ্চযো

১১. উপ্পন্নো ধম্মো উপ্পন্নস্স ধম্মস্স পচ্ছাজাতপচ্চযেন পচ্চযো – পচ্ছাজাতা উপ্পন্না খন্ধা পুৰেজাতস্স ইমস্স কাযস্স পচ্ছাজাতপচ্চযেন পচ্চযো. (১)

কম্মপচ্চযো

১২. উপ্পন্নো ধম্মো উপ্পন্নস্স ধম্মস্স কম্মপচ্চযেন পচ্চযো – উপ্পন্না চেতনা সম্পযুত্তকানং খন্ধানং চিত্তসমুট্ঠানানঞ্চ ৰূপানং কম্মপচ্চযেন পচ্চযো. পটিসন্ধিক্খণে উপ্পন্না চেতনা সম্পযুত্তকানং খন্ধানং কটত্তা চ ৰূপানং কম্মপচ্চযেন পচ্চযো. (১)

ৱিপাকপচ্চযো

১৩. উপ্পন্নো ধম্মো উপ্পন্নস্স ধম্মস্স ৱিপাকপচ্চযেন পচ্চযো – ৱিপাকো উপ্পন্নো একো খন্ধো তিণ্ণন্নং খন্ধানং চিত্তসমুট্ঠানানঞ্চ ৰূপানং ৱিপাকপচ্চযেন পচ্চযো…পে… দ্ৱে খন্ধা…পে… পটিসন্ধিক্খণে উপ্পন্নো একো খন্ধো তিণ্ণন্নং খন্ধানং কটত্তা চ ৰূপানং…পে… দ্ৱে খন্ধা…পে… খন্ধা ৱত্থুস্স ৱিপাকপচ্চযেন পচ্চযো. (১)

আহাৰপচ্চযো

১৪. উপ্পন্নো ধম্মো উপ্পন্নস্স ধম্মস্স আহাৰপচ্চযেন পচ্চযো – উপ্পন্না আহাৰা সম্পযুত্তকানং খন্ধানং চিত্তসমুট্ঠানানঞ্চ ৰূপানং আহাৰপচ্চযেন পচ্চযো. পটিসন্ধিক্খণে…পে… কবড়ীকাৰো আহাৰো ইমস্স কাযস্স আহাৰপচ্চযেন পচ্চযো. (১)

ইন্দ্ৰিযপচ্চযো

১৫. উপ্পন্নো ধম্মো উপ্পন্নস্স ধম্মস্স ইন্দ্ৰিযপচ্চযেন পচ্চযো – উপ্পন্না ইন্দ্ৰিযা সম্পযুত্তকানং খন্ধানং চিত্তসমুট্ঠানানঞ্চ ৰূপানং ইন্দ্ৰিযপচ্চযেন পচ্চযো. পটিসন্ধিক্খণে…পে… চক্খুন্দ্ৰিযং চক্খুৱিঞ্ঞাণস্স…পে… কাযিন্দ্ৰিযং কাযৱিঞ্ঞাণস্স…পে… ৰূপজীৱিতিন্দ্ৰিযং কটত্তাৰূপানং ইন্দ্ৰিযপচ্চযেন পচ্চযো. (১)

ঝানপচ্চযাদি

১৬. উপ্পন্নো ধম্মো উপ্পন্নস্স ধম্মস্স ঝানপচ্চযেন পচ্চযো… মগ্গপচ্চযেন পচ্চযো… সম্পযুত্তপচ্চযেন পচ্চযো… ৱিপ্পযুত্তপচ্চযেন পচ্চযো – সহজাতং, পুৰেজাতং, পচ্ছাজাতং. সহজাতা – উপ্পন্না খন্ধা চিত্তসমুট্ঠানানং ৰূপানং ৱিপ্পযুত্তপচ্চযেন পচ্চযো. পটিসন্ধিক্খণে উপ্পন্না খন্ধা কটত্তাৰূপানং ৱিপ্পযুত্তপচ্চযেন পচ্চযো. খন্ধা ৱত্থুস্স, ৱত্থু খন্ধানং ৱিপ্পযুত্তপচ্চযেন পচ্চযো. পুৰেজাতং – চক্খাযতনং চক্খুৱিঞ্ঞাণস্স …পে… কাযাযতনং কাযৱিঞ্ঞাণস্স… ৱত্থু উপ্পন্নানং খন্ধানং ৱিপ্পযুত্তপচ্চযেন পচ্চযো. পচ্ছাজাতা – উপ্পন্না খন্ধা পুৰেজাতস্স ইমস্স কাযস্স ৱিপ্পযুত্তপচ্চযেন পচ্চযো. (১)

অত্থিপচ্চযো

১৭. উপ্পন্নো ধম্মো উপ্পন্নস্স ধম্মস্স অত্থিপচ্চযেন পচ্চযো – সহজাতং, পুৰেজাতং, পচ্ছাজাতং, আহাৰং, ইন্দ্ৰিযং. সহজাতো – উপ্পন্নো একো খন্ধো তিণ্ণন্নং খন্ধানং চিত্তসমুট্ঠানানঞ্চ ৰূপানং অত্থিপচ্চযেন পচ্চযো…পে… দ্ৱে খন্ধা…পে… পটিসন্ধিক্খণে…পে… একং মহাভূতং…পে… বাহিৰং… আহাৰসমুট্ঠানং… উতুসমুট্ঠানং… অসঞ্ঞসত্তানং…পে…. পুৰেজাতং – চক্খুং অনিচ্চতো…পে… ৱত্থুং অনিচ্চতো…পে… দোমনস্সং উপ্পজ্জতি, দিব্বেন চক্খুনা ৰূপং পস্সতি, দিব্বায সোতুধাতুযা সদ্দং সুণাতি, ৰূপাযতনং চক্খুৱিঞ্ঞাণস্স…পে… ফোট্ঠব্বাযতনং কাযৱিঞ্ঞাণস্স অত্থিপচ্চযেন পচ্চযো. চক্খাযতনং চক্খুৱিঞ্ঞাণস্স…পে… কাযাযতনং কাযৱিঞ্ঞাণস্স…পে… ৱত্থু উপ্পন্নানং খন্ধানং অত্থিপচ্চযেন পচ্চযো. পচ্ছাজাতা – উপ্পন্না খন্ধা পুৰেজাতস্স ইমস্স কাযস্স অত্থিপচ্চযেন পচ্চযো. কবড়ীকাৰো আহাৰো ইমস্স কাযস্স অত্থিপচ্চযেন পচ্চযো. ৰূপজীৱিতিন্দ্ৰিযং কটত্তাৰূপানং অত্থিপচ্চযেন পচ্চযো. (১)

অৱিগতপচ্চযো

১৮. উপ্পন্নো ধম্মো উপ্পন্নস্স ধম্মস্স অৱিগতপচ্চযেন পচ্চযো…পে….

১. পচ্চযানুলোমং

২. সঙ্খ্যাৱাৰো

১৯. হেতুযা একং, আৰম্মণে তীণি, অধিপতিযা তীণি, সহজাতে একং, অঞ্ঞমঞ্ঞে একং, নিস্সযে একং, উপনিস্সযে তীণি, পুৰেজাতে একং, পচ্ছাজাতে কম্মে ৱিপাকে আহাৰে ইন্দ্ৰিযে ঝানে মগ্গে সম্পযুত্তে ৱিপ্পযুত্তে অত্থিযা অৱিগতে একং (এৱং গণেতব্বং).

অনুলোমং.

পচ্চনীযুদ্ধাৰো

২০. উপ্পন্নো ধম্মো উপ্পন্নস্স ধম্মস্স আৰম্মণপচ্চযেন পচ্চযো… সহজাতপচ্চযেন পচ্চযো… উপনিস্সযপচ্চযেন পচ্চযো… পুৰেজাতপচ্চযেন পচ্চযো… পচ্ছাজাতপচ্চযেন পচ্চযো… আহাৰপচ্চযেন পচ্চযো… ইন্দ্ৰিযপচ্চযেন পচ্চযো. (১)

অনুপ্পন্নো ধম্মো উপ্পন্নস্স ধম্মস্স আৰম্মণপচ্চযেন পচ্চযো, উপনিস্সযপচ্চযেন পচ্চযো. (১)

উপ্পাদী ধম্মো উপ্পন্নস্স ধম্মস্স আৰম্মণপচ্চযেন পচ্চযো… উপনিস্সযপচ্চযেন পচ্চযো. (১)

২. পচ্চযপচ্চনীযং

২. সঙ্খ্যাৱাৰো

২১. নহেতুযা তীণি, নআৰম্মণে তীণি, নঅধিপতিযা তীণি…পে… নৱিপ্পযুত্তে তীণি, নোঅত্থিযা দ্ৱে, নোনত্থিযা তীণি, নোৱিগতে তীণি, নোঅৱিগতে দ্ৱে (এৱং গণেতব্বং).

পচ্চনীযং.

৩. পচ্চযানুলোমপচ্চনীযং

২২. হেতুপচ্চযা নআৰম্মণে একং…পে… নোনত্থিযা নোৱিগতে একং.

অনুলোমপচ্চনীযং.

৪. পচ্চনীযানুলোমং

২৩. নহেতুপচ্চযা আৰম্মণে তীণি, অধিপতিযা তীণি, সহজাতে একং, অঞ্ঞমঞ্ঞে একং, নিস্সযে একং, উপনিস্সযে তীণি, পুৰেজাতে একং, পচ্ছাজাতে একং, কম্মে ৱিপাকে আহাৰে ইন্দ্ৰিযে ঝানে মগ্গে সম্পযুত্তে ৱিপ্পযুত্তে অত্থিযা অৱিগতে একং.

পচ্চনীযানুলোমং.

উপ্পন্নত্তিকং নিট্ঠিতং.