১. ৱিভঙ্গৱাৰো

নহেতুপচ্চযো

৩৫১. অকুসলং ধম্মং সংসট্ঠো অকুসলো ধম্মো উপ্পজ্জতি নহেতুপচ্চযা – ৱিচিকিচ্ছাসহগতে উদ্ধচ্চসহগতে খন্ধে সংসট্ঠো ৱিচিকিচ্ছাসহগতো উদ্ধচ্চসহগতো মোহো. (১)

অব্যাকতং ধম্মং সংসট্ঠো অব্যাকতো ধম্মো উপ্পজ্জতি নহেতুপচ্চযা – অহেতুকং ৱিপাকাব্যাকতং কিৰিযাব্যাকতং একং খন্ধং সংসট্ঠা তযো খন্ধা, তযো খন্ধে সংসট্ঠো একো খন্ধো, দ্ৱে খন্ধে সংসট্ঠা দ্ৱে খন্ধা; অহেতুকপটিসন্ধিক্খণে ৱিপাকাব্যাকতং একং খন্ধং সংসট্ঠা তযো খন্ধা, তযো খন্ধে সংসট্ঠো একো খন্ধো, দ্ৱে খন্ধে সংসট্ঠা দ্ৱে খন্ধা. (১)

নঅধিপতিআদিপচ্চযা

৩৫২. কুসলং ধম্মং সংসট্ঠো কুসলো ধম্মো উপ্পজ্জতি নঅধিপতিপচ্চযা… নপুৰেজাতপচ্চযা – অৰূপে [আৰুপ্পে (সব্বত্থ)] কুসলং একং খন্ধং সংসট্ঠা তযো খন্ধা…পে… দ্ৱে খন্ধে সংসট্ঠা দ্ৱে খন্ধা. অকুসলং ধম্মং…পে… অব্যাকতং ধম্মং…পে….

নপচ্ছাজাত-নআসেৱনপচ্চযা

৩৫৩. কুসলং ধম্মং সংসট্ঠো কুসলো ধম্মো উপ্পজ্জতি নপচ্ছাজাতপচ্চযা… তীণি. নআসেৱনপচ্চযা… তীণি.

নকম্মপচ্চযো

৩৫৪. কুসলং ধম্মং সংসট্ঠো কুসলো ধম্মো উপ্পজ্জতি নকম্মপচ্চযা. কুসলে খন্ধে সংসট্ঠা কুসলা চেতনা. (১)

অকুসলং ধম্মং সংসট্ঠো অকুসলো ধম্মো উপ্পজ্জতি নকম্মপচ্চযা. অকুসলে খন্ধে সংসট্ঠা অকুসলা চেতনা. (১)

অব্যাকতং ধম্মং সংসট্ঠো অব্যাকতো ধম্মো উপ্পজ্জতি নকম্মপচ্চযা. কিৰিযাব্যাকতে খন্ধে সংসট্ঠা কিৰিযাব্যাকতা চেতনা. (১)

নৱিপাকপচ্চযো

৩৫৫. কুসলং ধম্মং সংসট্ঠো…পে… অকুসলং ধম্মং…পে… অব্যাকতং ধম্মং সংসট্ঠো অব্যাকতো ধম্মো উপ্পজ্জতি নৱিপাকপচ্চযা – কিৰিযাব্যাকতং একং খন্ধং.

(সংসট্ঠৱাৰে পচ্চনীযৱিভঙ্গে নকম্মে চ নৱিপাকে চ পটিসন্ধি নত্থি; অৱসেসেসু সব্বত্থ অত্থি.)

নঝানপচ্চযো

৩৫৬. অব্যাকতং ধম্মং সংসট্ঠো অব্যাকতো ধম্মো উপ্পজ্জতি নঝানপচ্চযা – পঞ্চৱিঞ্ঞাণসহগতং একং খন্ধং সংসট্ঠা তযো খন্ধা…পে… দ্ৱে খন্ধে সংসট্ঠা দ্ৱে খন্ধা. (১)

নমগ্গপচ্চযো

৩৫৭. অব্যাকতং ধম্মং সংসট্ঠো অব্যাকতো ধম্মো উপ্পজ্জতি নমগ্গপচ্চযা – অহেতুকং ৱিপাকাব্যাকতং কিৰিযাব্যাকতং একং খন্ধং সংসট্ঠা তযো খন্ধা…পে… দ্ৱে খন্ধে সংসট্ঠা দ্ৱে খন্ধা; অহেতুকপটিসন্ধিক্খণে…পে…. (১)

নৱিপ্পযুত্তপচ্চযো

৩৫৮. কুসলং ধম্মং সংসট্ঠো কুসলো ধম্মো উপ্পজ্জতি নৱিপ্পযুত্তপচ্চযা – অৰূপে কুসলং একং খন্ধং সংসট্ঠা তযো খন্ধা…পে… দ্ৱে খন্ধে সংসট্ঠা দ্ৱে খন্ধা. (১)

অকুসলং ধম্মং সংসট্ঠো অকুসলো ধম্মো উপ্পজ্জতি নৱিপ্পযুত্তপচ্চযা – অৰূপে অকুসলং একং খন্ধং সংসট্ঠা তযো খন্ধা…পে… দ্ৱে খন্ধে সংসট্ঠা দ্ৱে খন্ধা. (১)

অব্যাকতং ধম্মং সংসট্ঠো অব্যাকতো ধম্মো উপ্পজ্জতি নৱিপ্পযুত্তপচ্চযা – অৰূপে ৱিপাকাব্যাকতং কিৰিযাব্যাকতং একং খন্ধং সংসট্ঠা তযো খন্ধা…পে… দ্ৱে খন্ধে সংসট্ঠা দ্ৱে খন্ধা. (নৱিপ্পযুত্তে পটিসন্ধি নত্থি.) (১)