২. পচ্চযপচ্চনীযং

৪২. সিযা কুসলং ধম্মং পটিচ্চ কুসলো ধম্মো উপ্পজ্জেয্য নহেতুপচ্চযা.

(যথা অনুলোমে হেতুপচ্চযো ৱিত্থাৰিতো, এৱং পচ্চনীযেপি নহেতুপচ্চযো ৱিত্থাৰেতব্বো.)

৪৩. সিযা কুসলং ধম্মং পটিচ্চ কুসলো ধম্মো উপ্পজ্জেয্য নআৰম্মণপচ্চযা… নঅধিপতিপচ্চযা… নঅনন্তৰপচ্চযা… নসমনন্তৰপচ্চযা… নসহজাতপচ্চযা… নঅঞ্ঞমঞ্ঞপচ্চযা… ননিস্সযপচ্চযা… নউপনিস্সযপচ্চযা… নপুৰেজাতপচ্চযা… নপচ্ছাজাতপচ্চযা … নআসেৱনপচ্চযা… নকম্মপচ্চযা… নৱিপাকপচ্চযা… নআহাৰপচ্চযা… নইন্দ্ৰিযপচ্চযা… নঝানপচ্চযা… নমগ্গপচ্চযা… নসম্পযুত্তপচ্চযা… নৱিপ্পযুত্তপচ্চযা… নোঅত্থিপচ্চযা… নোনত্থিপচ্চযা… নোৱিগতপচ্চযা… নোঅৱিগতপচ্চযা.

৪৪. সিযা কুসলং ধম্মং পটিচ্চ কুসলো ধম্মো উপ্পজ্জেয্য নহেতুপচ্চযা নআৰম্মণপচ্চযা….

(যথা অনুলোমে একেকস্স পদস্স একমূলকং, দুমূলকং, তিমূলকং, চতুমূলকং, যাৱ তেৱীসতিমূলকং এৱং পচ্চনীযেপি ৱিত্থাৰেতব্বং. )

(খ) তিকঞ্চ পট্ঠানৱৰং দুকুত্তমং,

দুকং তিকঞ্চেৱ তিকং দুকঞ্চ;

তিকং তিকঞ্চেৱ দুকং দুকঞ্চ,

ছ পচ্চনীযম্হি নযা সুগম্ভীৰাতি.