(২) পচ্চযনিদ্দেসো

১. হেতুপচ্চযোতি – হেতূ হেতুসম্পযুত্তকানং ধম্মানং তংসমুট্ঠানানঞ্চ ৰূপানং হেতুপচ্চযেন পচ্চযো [পচ্চযোতি (স্যা.)].

২. আৰম্মণপচ্চযোতি – ৰূপাযতনং চক্খুৱিঞ্ঞাণধাতুযা তংসম্পযুত্তকানঞ্চ ধম্মানং আৰম্মণপচ্চযেন পচ্চযো. সদ্দাযতনং সোতৱিঞ্ঞাণধাতুযা তংসম্পযুত্তকানঞ্চ ধম্মানং আৰম্মণপচ্চযেন পচ্চযো. গন্ধাযতনং ঘানৱিঞ্ঞাণধাতুযা তংসম্পযুত্তকানঞ্চ ধম্মানং আৰম্মণপচ্চযেন পচ্চযো. ৰসাযতনং জিৱ্হাৱিঞ্ঞাণধাতুযা তংসম্পযুত্তকানঞ্চ ধম্মানং আৰম্মণপচ্চযেন পচ্চযো. ফোট্ঠব্বাযতনং কাযৱিঞ্ঞাণধাতুযা তংসম্পযুত্তকানঞ্চ ধম্মানং আৰম্মণপচ্চযেন পচ্চযো. ৰূপাযতনং সদ্দাযতনং গন্ধাযতনং ৰসাযতনং ফোট্ঠব্বাযতনং মনোধাতুযা তংসম্পযুত্তকানঞ্চ ধম্মানং আৰম্মণপচ্চযেন পচ্চযো. সব্বে ধম্মা মনোৱিঞ্ঞাণধাতুযা তংসম্পযুত্তকানঞ্চ ধম্মানং আৰম্মণপচ্চযেন পচ্চযো.

যং যং ধম্মং আৰব্ভ যে যে ধম্মা উপ্পজ্জন্তি চিত্তচেতসিকা ধম্মা, তে তে ধম্মা তেসং তেসং ধম্মানং আৰম্মণপচ্চযেন পচ্চযো.

৩. অধিপতিপচ্চযোতি – ছন্দাধিপতি ছন্দসম্পযুত্তকানং ধম্মানং তংসমুট্ঠানানঞ্চ ৰূপানং অধিপতিপচ্চযেন পচ্চযো. ৱীৰিযাধিপতি ৱীৰিযসম্পযুত্তকানং ধম্মানং তংসমুট্ঠানানঞ্চ ৰূপানং অধিপতিপচ্চযেন পচ্চযো. চিত্তাধিপতি চিত্তসম্পযুত্তকানং ধম্মানং তংসমুট্ঠানানঞ্চ ৰূপানং অধিপতিপচ্চযেন পচ্চযো. ৱীমংসাধিপতি ৱীমংসসম্পযুত্তকানং ধম্মানং তংসমুট্ঠানানঞ্চ ৰূপানং অধিপতিপচ্চযেন পচ্চযো.

যং যং ধম্মং গৰুং কত্ৱা যে যে ধম্মা উপ্পজ্জন্তি চিত্তচেতসিকা ধম্মা, তে তে ধম্মা তেসং তেসং ধম্মানং অধিপতিপচ্চযেন পচ্চযো.

৪. অনন্তৰপচ্চযোতি – চক্খুৱিঞ্ঞাণধাতু তংসম্পযুত্তকা চ ধম্মা মনোধাতুযা তংসম্পযুত্তকানঞ্চ ধম্মানং অনন্তৰপচ্চযেন পচ্চযো. মনোধাতু তংসম্পযুত্তকা চ ধম্মা মনোৱিঞ্ঞাণধাতুযা তংসম্পযুত্তকানঞ্চ ধম্মানং অনন্তৰপচ্চযেন পচ্চযো.

সোতৱিঞ্ঞাণধাতু তংসম্পযুত্তকা চ ধম্মা মনোধাতুযা তংসম্পযুত্তকানঞ্চ ধম্মানং অনন্তৰপচ্চযেন পচ্চযো. মনোধাতু তংসম্পযুত্তকা চ ধম্মা মনোৱিঞ্ঞাণধাতুযা তংসম্পযুত্তকানঞ্চ ধম্মানং অনন্তৰপচ্চযেন পচ্চযো.

ঘানৱিঞ্ঞাণধাতু তংসম্পযুত্তকা চ ধম্মা মনোধাতুযা তংসম্পযুত্তকানঞ্চ ধম্মানং অনন্তৰপচ্চযেন পচ্চযো. মনোধাতু তংসম্পযুত্তকা চ ধম্মা মনোৱিঞ্ঞাণধাতুযা তংসম্পযুত্তকানঞ্চ ধম্মানং অনন্তৰপচ্চযেন পচ্চযো.

জিৱ্হাৱিঞ্ঞাণধাতু তংসম্পযুত্তকা চ ধম্মা মনোধাতুযা তংসম্পযুত্তকানঞ্চ ধম্মানং অনন্তৰপচ্চযেন পচ্চযো. মনোধাতু তংসম্পযুত্তকা চ ধম্মা মনোৱিঞ্ঞাণধাতুযা তংসম্পযুত্তকানঞ্চ ধম্মানং অনন্তৰপচ্চযেন পচ্চযো.

কাযৱিঞ্ঞাণধাতু তংসম্পযুত্তকা চ ধম্মা মনোধাতুযা তংসম্পযুত্তকানঞ্চ ধম্মানং অনন্তৰপচ্চযেন পচ্চযো. মনোধাতু তংসম্পযুত্তকা চ ধম্মা মনোৱিঞ্ঞাণধাতুযা তংসম্পযুত্তকানঞ্চ ধম্মানং অনন্তৰপচ্চযেন পচ্চযো.

পুৰিমা পুৰিমা কুসলা ধম্মা পচ্ছিমানং পচ্ছিমানং কুসলানং ধম্মানং অনন্তৰপচ্চযেন পচ্চযো. পুৰিমা পুৰিমা কুসলা ধম্মা পচ্ছিমানং পচ্ছিমানং অব্যাকতানং ধম্মানং অনন্তৰপচ্চযেন পচ্চযো.

পুৰিমা পুৰিমা অকুসলা ধম্মা পচ্ছিমানং পচ্ছিমানং অকুসলানং ধম্মানং অনন্তৰপচ্চযেন পচ্চযো. পুৰিমা পুৰিমা অকুসলা ধম্মা পচ্ছিমানং পচ্ছিমানং অব্যাকতানং ধম্মানং অনন্তৰপচ্চযেন পচ্চযো.

পুৰিমা পুৰিমা অব্যাকতা ধম্মা পচ্ছিমানং পচ্ছিমানং অব্যাকতানং ধম্মানং অনন্তৰপচ্চযেন পচ্চযো. পুৰিমা পুৰিমা অব্যাকতা ধম্মা পচ্ছিমানং পচ্ছিমানং কুসলানং ধম্মানং অনন্তৰপচ্চযেন পচ্চযো. পুৰিমা পুৰিমা অব্যাকতা ধম্মা পচ্ছিমানং পচ্ছিমানং অকুসলানং ধম্মানং অনন্তৰপচ্চযেন পচ্চযো.

যেসং যেসং ধম্মানং অনন্তৰা যে যে ধম্মা উপ্পজ্জন্তি চিত্তচেতসিকা ধম্মা, তে তে ধম্মা তেসং তেসং ধম্মানং অনন্তৰপচ্চযেন পচ্চযো.

৫. সমনন্তৰপচ্চযোতি – চক্খুৱিঞ্ঞাণধাতু তংসম্পযুত্তকা চ ধম্মা মনোধাতুযা তংসম্পযুত্তকানঞ্চ ধম্মানং সমনন্তৰপচ্চযেন পচ্চযো. মনোধাতু তংসম্পযুত্তকা চ ধম্মা মনোৱিঞ্ঞাণধাতুযা তংসম্পযুত্তকানঞ্চ ধম্মানং সমনন্তৰপচ্চযেন পচ্চযো.

সোতৱিঞ্ঞাণধাতু তংসম্পযুত্তকা চ ধম্মা মনোধাতুযা তংসম্পযুত্তকানঞ্চ ধম্মানং সমনন্তৰপচ্চযেন পচ্চযো. মনোধাতু তংসম্পযুত্তকা চ ধম্মা মনোৱিঞ্ঞাণধাতুযা তংসম্পযুত্তকানঞ্চ ধম্মানং সমনন্তৰপচ্চযেন পচ্চযো.

ঘাণৱিঞ্ঞাণধাতু তংসম্পযুত্তকা চ ধম্মা মনোধাতুযা তংসম্পযুত্তকানঞ্চ ধম্মানং সমনন্তৰপচ্চযেন পচ্চযো. মনোধাতু তংসম্পযুত্তকা চ ধম্মা মনোৱিঞ্ঞাণধাতুযা তংসম্পযুত্তকানঞ্চ ধম্মানং সমনন্তৰপচ্চযেন পচ্চযো.

জিৱ্হাৱিঞ্ঞাণধাতু তংসম্পযুত্তকা চ ধম্মা মনোধাতুযা তংসম্পযুত্তকানঞ্চ ধম্মানং সমনন্তৰপচ্চযেন পচ্চযো. মনোধাতু তংসম্পযুত্তকা চ ধম্মা মনোৱিঞ্ঞাণধাতুযা তংসম্পযুত্তকানঞ্চ ধম্মানং সমনন্তৰপচ্চযেন পচ্চযো.

কাযৱিঞ্ঞাণধাতু তংসম্পযুত্তকা চ ধম্মা মনোধাতুযা তংসম্পযুত্তকানঞ্চ ধম্মানং সমনন্তৰপচ্চযেন পচ্চযো. মনোধাতু তংসম্পযুত্তকা চ ধম্মা মনোৱিঞ্ঞাণধাতুযা তংসম্পযুত্তকানঞ্চ ধম্মানং সমনন্তৰপচ্চযেন পচ্চযো.

পুৰিমা পুৰিমা কুসলা ধম্মা পচ্ছিমানং পচ্ছিমানং কুসলানং ধম্মানং সমনন্তৰপচ্চযেন পচ্চযো. পুৰিমা পুৰিমা কুসলা ধম্মা পচ্ছিমানং পচ্ছিমানং অব্যাকতানং ধম্মানং সমনন্তৰপচ্চযেন পচ্চযো.

পুৰিমা পুৰিমা অকুসলা ধম্মা পচ্ছিমানং পচ্ছিমানং অকুসলানং ধম্মানং সমনন্তৰপচ্চযেন পচ্চযো. পুৰিমা পুৰিমা অকুসলা ধম্মা পচ্ছিমানং পচ্ছিমানং অব্যাকতানং ধম্মানং সমনন্তৰপচ্চযেন পচ্চযো.

পুৰিমা পুৰিমা অব্যাকতা ধম্মা পচ্ছিমানং পচ্ছিমানং অব্যাকতানং ধম্মানং সমনন্তৰপচ্চযেন পচ্চযো. পুৰিমা পুৰিমা অব্যাকতা ধম্মা পচ্ছিমানং পচ্ছিমানং কুসলানং ধম্মানং সমনন্তৰপচ্চযেন পচ্চযো. পুৰিমা পুৰিমা অব্যাকতা ধম্মা পচ্ছিমানং পচ্ছিমানং অকুসলানং ধম্মানং সমনন্তৰপচ্চযেন পচ্চযো.

যেসং যেসং ধম্মানং সমনন্তৰা যে যে ধম্মা উপ্পজ্জন্তি চিত্তচেতসিকা ধম্মা, তে তে ধম্মা তেসং তেসং ধম্মানং সমনন্তৰপচ্চযেন পচ্চযো.

৬. সহজাতপচ্চযোতি – চত্তাৰো খন্ধা অৰূপিনো অঞ্ঞমঞ্ঞং সহজাতপচ্চযেন পচ্চযো. চত্তাৰো মহাভূতা অঞ্ঞমঞ্ঞং সহজাতপচ্চযেন পচ্চযো. ওক্কন্তিক্খণে নামৰূপং অঞ্ঞমঞ্ঞং সহজাতপচ্চযেন পচ্চযো. চিত্তচেতসিকা ধম্মা চিত্তসমুট্ঠানানং ৰূপানং সহজাতপচ্চযেন পচ্চযো. মহাভূতা উপাদাৰূপানং সহজাতপচ্চযেন পচ্চযো. ৰূপিনো ধম্মা অৰূপীনং ধম্মানং কিঞ্চি কালে [কঞ্চি কালং (স্যা.)] সহজাতপচ্চযেন পচ্চযো, কিঞ্চি কালে ন সহজাতপচ্চযেন পচ্চযো.

৭. অঞ্ঞমঞ্ঞপচ্চযোতি – চত্তাৰো খন্ধা অৰূপিনো অঞ্ঞমঞ্ঞপচ্চযেন পচ্চযো. চত্তাৰো মহাভূতা অঞ্ঞমঞ্ঞপচ্চযেন পচ্চযো. ওক্কন্তিক্খণে নামৰূপং অঞ্ঞমঞ্ঞপচ্চযেন পচ্চযো.

৮. নিস্সযপচ্চযোতি – চত্তাৰো খন্ধা অৰূপিনো অঞ্ঞমঞ্ঞং নিস্সযপচ্চযেন পচ্চযো. চত্তাৰো মহাভূতা অঞ্ঞমঞ্ঞং নিস্সযপচ্চযেন পচ্চযো. ওক্কন্তিক্খণে নামৰূপং অঞ্ঞমঞ্ঞং নিস্সযপচ্চযেন পচ্চযো. চিত্তচেতসিকা ধম্মা চিত্তসমুট্ঠানানং ৰূপানং নিস্সযপচ্চযেন পচ্চযো. মহাভূতা উপাদাৰূপানং নিস্সযপচ্চযেন পচ্চযো.

চক্খাযতনং চক্খুৱিঞ্ঞাণধাতুযা তংসম্পযুত্তকানঞ্চ ধম্মানং নিস্সযপচ্চযেন পচ্চযো. সোতাযতনং সোতৱিঞ্ঞাণধাতুযা তংসম্পযুত্তকানঞ্চ ধম্মানং নিস্সযপচ্চযেন পচ্চযো. ঘানাযতনং ঘানৱিঞ্ঞাণধাতুযা তংসম্পযুত্তকানঞ্চ ধম্মানং নিস্সযপচ্চযেন পচ্চযো. জিৱ্হাযতনং জিৱ্হাৱিঞ্ঞাণধাতুযা তংসম্পযুত্তকানঞ্চ ধম্মানং নিস্সযপচ্চযেন পচ্চযো. কাযাযতনং কাযৱিঞ্ঞাণধাতুযা তংসম্পযুত্তকানঞ্চ ধম্মানং নিস্সযপচ্চযেন পচ্চযো. যং ৰূপং নিস্সায মনোধাতু চ মনোৱিঞ্ঞাণধাতু চ ৱত্তন্তি, তং ৰূপং মনোধাতুযা চ মনোৱিঞ্ঞাণধাতুযা চ তংসম্পযুত্তকানঞ্চ ধম্মানং নিস্সযপচ্চযেন পচ্চযো.

৯. উপনিস্সযপচ্চযোতি – পুৰিমা পুৰিমা কুসলা ধম্মা পচ্ছিমানং পচ্ছিমানং কুসলানং ধম্মানং উপনিস্সযপচ্চযেন পচ্চযো. পুৰিমা পুৰিমা কুসলা ধম্মা পচ্ছিমানং পচ্ছিমানং অকুসলানং ধম্মানং কেসঞ্চি উপনিস্সযপচ্চযেন পচ্চযো. পুৰিমা পুৰিমা কুসলা ধম্মা পচ্ছিমানং পচ্ছিমানং অব্যাকতানং ধম্মানং উপনিস্সযপচ্চযেন পচ্চযো.

পুৰিমা পুৰিমা অকুসলা ধম্মা পচ্ছিমানং পচ্ছিমানং অকুসলানং ধম্মানং উপনিস্সযপচ্চযেন পচ্চযো. পুৰিমা পুৰিমা অকুসলা ধম্মা পচ্ছিমানং পচ্ছিমানং কুসলানং ধম্মানং কেসঞ্চি উপনিস্সযপচ্চযেন পচ্চযো. পুৰিমা পুৰিমা অকুসলা ধম্মা পচ্ছিমানং পচ্ছিমানং অব্যাকতানং ধম্মানং উপনিস্সযপচ্চযেন পচ্চযো.

পুৰিমা পুৰিমা অব্যাকতা ধম্মা পচ্ছিমানং পচ্ছিমানং অব্যাকতানং ধম্মানং উপনিস্সযপচ্চযেন পচ্চযো. পুৰিমা পুৰিমা অব্যাকতা ধম্মা পচ্ছিমানং পচ্ছিমানং কুসলানং ধম্মানং উপনিস্সযপচ্চযেন পচ্চযো. পুৰিমা পুৰিমা অব্যাকতা ধম্মা পচ্ছিমানং পচ্ছিমানং অকুসলানং ধম্মানং উপনিস্সযপচ্চযেন পচ্চযো.

উতুভোজনম্পি উপনিস্সযপচ্চযেন পচ্চযো. পুগ্গলোপি উপনিস্সযপচ্চযেন পচ্চযো. সেনাসনম্পি উপনিস্সযপচ্চযেন পচ্চযো.

১০. পুৰেজাতপচ্চযোতি – চক্খাযতনং চক্খুৱিঞ্ঞাণধাতুযা তংসম্পযুত্তকানঞ্চ ধম্মানং পুৰেজাতপচ্চযেন পচ্চযো. সোতাযতনং সোতৱিঞ্ঞাণধাতুযা তংসম্পযুত্তকানঞ্চ ধম্মানং পুৰেজাতপচ্চযেন পচ্চযো. ঘানাযতনং ঘানৱিঞ্ঞাণধাতুযা তংসম্পযুত্তকানঞ্চ ধম্মানং পুৰেজাতপচ্চযেন পচ্চযো. জিৱ্হাযতনং জিৱ্হাৱিঞ্ঞাণধাতুযা তংসম্পযুত্তকানঞ্চ ধম্মানং পুৰেজাতপচ্চযেন পচ্চযো. কাযাযতনং কাযৱিঞ্ঞাণধাতুযা তংসম্পযুত্তকানঞ্চ ধম্মানং পুৰেজাতপচ্চযেন পচ্চযো.

ৰূপাযতনং চক্খুৱিঞ্ঞাণধাতুযা তংসম্পযুত্তকানঞ্চ ধম্মানং পুৰেজাতপচ্চযেন পচ্চযো. সদ্দাযতনং সোতৱিঞ্ঞাণধাতুযা তংসম্পযুত্তকানঞ্চ ধম্মানং পুৰেজাতপচ্চযেন পচ্চযো. গন্ধাযতনং ঘানৱিঞ্ঞাণধাতুযা তংসম্পযুত্তকানঞ্চ ধম্মানং পুৰেজাতপচ্চযেন পচ্চযো. ৰসাযতনং জিৱ্হাৱিঞ্ঞাণধাতুযা তংসম্পযুত্তকানঞ্চ ধম্মানং পুৰেজাতপচ্চযেন পচ্চযো. ফোট্ঠব্বাযতনং কাযৱিঞ্ঞাণধাতুযা তংসম্পযুত্তকানঞ্চ ধম্মানং পুৰেজাতপচ্চযেন পচ্চযো. ৰূপাযতনং সদ্দাযতনং গন্ধাযতনং ৰসাযতনং ফোট্ঠব্বাযতনং মনোধাতুযা তংসম্পযুত্তকানঞ্চ ধম্মানং পুৰেজাতপচ্চযেন পচ্চযো.

যং ৰূপং নিস্সায মনোধাতু চ মনোৱিঞ্ঞাণধাতু চ ৱত্তন্তি, তং ৰূপং মনোধাতুযা তংসম্পযুত্তকানঞ্চ ধম্মানং পুৰেজাতপচ্চযেন পচ্চযো. মনোৱিঞ্ঞাণধাতুযা তংসম্পযুত্তকানঞ্চ ধম্মানং কিঞ্চি কালে পুৰেজাতপচ্চযেন পচ্চযো, কিঞ্চি কালে ন পুৰেজাতপচ্চযেন পচ্চযো.

১১. পচ্ছাজাতপচ্চযোতি – পচ্ছাজাতা চিত্তচেতসিকা ধম্মা পুৰেজাতস্স ইমস্স কাযস্স পচ্ছাজাতপচ্চযেন পচ্চযো.

১২. আসেৱনপচ্চযোতি – পুৰিমা পুৰিমা কুসলা ধম্মা পচ্ছিমানং পচ্ছিমানং কুসলানং ধম্মানং আসেৱনপচ্চযেন পচ্চযো. পুৰিমা পুৰিমা অকুসলা ধম্মা পচ্ছিমানং পচ্ছিমানং অকুসলানং ধম্মানং আসেৱনপচ্চযেন পচ্চযো. পুৰিমা পুৰিমা কিৰিযাব্যাকতা ধম্মা পচ্ছিমানং পচ্ছিমানং কিৰিযাব্যাকতানং ধম্মানং আসেৱনপচ্চযেন পচ্চযো.

১৩. কম্মপচ্চযোতি – কুসলাকুসলং কম্মং ৱিপাকানং খন্ধানং কটত্তা চ ৰূপানং কম্মপচ্চযেন পচ্চযো. চেতনা সম্পযুত্তকানং ধম্মানং তংসমুট্ঠানানঞ্চ ৰূপানং কম্মপচ্চযেন পচ্চযো.

১৪. ৱিপাকপচ্চযোতি – ৱিপাকা চত্তাৰো খন্ধা অৰূপিনো অঞ্ঞমঞ্ঞং ৱিপাকপচ্চযেন পচ্চযো.

১৫. আহাৰপচ্চযোতি – কবড়ীকাৰো [কবড়িঙ্কাৰো (ক. সী. স্যা.)] আহাৰো ইমস্স কাযস্স আহাৰপচ্চযেন পচ্চযো. অৰূপিনো আহাৰা সম্পযুত্তকানং ধম্মানং তংসমুট্ঠানানঞ্চ ৰূপানং আহাৰপচ্চযেন পচ্চযো.

১৬. ইন্দ্ৰিযপচ্চযোতি – চক্খুন্দ্ৰিযং চক্খুৱিঞ্ঞাণধাতুযা তংসম্পযুত্তকানঞ্চ ধম্মানং ইন্দ্ৰিযপচ্চযেন পচ্চযো. সোতিন্দ্ৰিযং সোতৱিঞ্ঞাণধাতুযা তংসম্পযুত্তকানঞ্চ ধম্মানং ইন্দ্ৰিযপচ্চযেন পচ্চযো. ঘানিন্দ্ৰিযং ঘানৱিঞ্ঞাণধাতুযা তংসম্পযুত্তকানঞ্চ ধম্মানং ইন্দ্ৰিযপচ্চযেন পচ্চযো. জিৱ্হিন্দ্ৰিযং জিৱ্হাৱিঞ্ঞাণধাতুযা তংসম্পযুত্তকানঞ্চ ধম্মানং ইন্দ্ৰিযপচ্চযেন পচ্চযো. কাযিন্দ্ৰিযং কাযৱিঞ্ঞাণধাতুযা তংসম্পযুত্তকানঞ্চ ধম্মানং ইন্দ্ৰিযপচ্চযেন পচ্চযো. ৰূপজীৱিতিন্দ্ৰিযং কটত্তাৰূপানং ইন্দ্ৰিযপচ্চযেন পচ্চযো.

অৰূপিনো ইন্দ্ৰিযা সম্পযুত্তকানং ধম্মানং তংসমুট্ঠানানঞ্চ ৰূপানং ইন্দ্ৰিযপচ্চযেন পচ্চযো.

১৭. ঝানপচ্চযোতি – ঝানঙ্গানি ঝানসম্পযুত্তকানং ধম্মানং তংসমুট্ঠানানঞ্চ ৰূপানং ঝানপচ্চযেন পচ্চযো.

১৮. মগ্গপচ্চযোতি – মগ্গঙ্গানি মগ্গসম্পযুত্তকানং ধম্মানং তংসমুট্ঠানানঞ্চ ৰূপানং মগ্গপচ্চযেন পচ্চযো.

১৯. সম্পযুত্তপচ্চযোতি – চত্তাৰো খন্ধা অৰূপিনো অঞ্ঞমঞ্ঞং সম্পযুত্তপচ্চযেন পচ্চযো.

২০. ৱিপ্পযুত্তপচ্চযোতি – ৰূপিনো ধম্মা অৰূপীনং ধম্মানং ৱিপ্পযুত্তপচ্চযেন পচ্চযো. অৰূপিনো ধম্মা ৰূপীনং ধম্মানং ৱিপ্পযুত্তপচ্চযেন পচ্চযো.

২১. অত্থিপচ্চযোতি – চত্তাৰো খন্ধা অৰূপিনো অঞ্ঞমঞ্ঞং অত্থিপচ্চযেন পচ্চযো. চত্তাৰো মহাভূতা অঞ্ঞমঞ্ঞং অত্থিপচ্চযেন পচ্চযো. ওক্কন্তিক্খণে নামৰূপং অঞ্ঞমঞ্ঞং অত্থিপচ্চযেন পচ্চযো. চিত্তচেতসিকা ধম্মা চিত্তসমুট্ঠানানং ৰূপানং অত্থিপচ্চযেন পচ্চযো. মহাভূতা উপাদাৰূপানং অত্থিপচ্চযেন পচ্চযো.

চক্খাযতনং চক্খুৱিঞ্ঞাণধাতুযা তংসম্পযুত্তকানঞ্চ ধম্মানং অত্থিপচ্চযেন পচ্চযো. সোতাযতনং সোতৱিঞ্ঞাণধাতুযা তংসম্পযুত্তকানঞ্চ ধম্মানং অত্থিপচ্চযেন পচ্চযো. ঘানাযতনং ঘানৱিঞ্ঞাণধাতুযা তংসম্পযুত্তকানঞ্চ ধম্মানং অত্থিপচ্চযেন পচ্চযো. জিৱ্হাযতনং জিৱ্হাৱিঞ্ঞাণধাতুযা তংসম্পযুত্তকানঞ্চ ধম্মানং অত্থিপচ্চযেন পচ্চযো. কাযাযতনং কাযৱিঞ্ঞাণধাতুযা তংসম্পযুত্তকানঞ্চ ধম্মানং অত্থিপচ্চযেন পচ্চযো.

ৰূপাযতনং চক্খুৱিঞ্ঞাণধাতুযা তংসম্পযুত্তকানঞ্চ ধম্মানং অত্থিপচ্চযেন পচ্চযো. সদ্দাযতনং সোতৱিঞ্ঞাণধাতুযা তংসম্পযুত্তকানঞ্চ ধম্মানং অত্থিপচ্চযেন পচ্চযো. গন্ধাযতনং ঘানৱিঞ্ঞাণধাতুযা তংসম্পযুত্তকানঞ্চ ধম্মানং অত্থিপচ্চযেন পচ্চযো. ৰসাযতনং জিৱ্হাৱিঞ্ঞাণধাতুযা তংসম্পযুত্তকানঞ্চ ধম্মানং অত্থিপচ্চযেন পচ্চযো. ফোট্ঠব্বাযতনং কাযৱিঞ্ঞাণধাতুযা তংসম্পযুত্তকানঞ্চ ধম্মানং অত্থিপচ্চযেন পচ্চযো. ৰূপাযতনং সদ্দাযতনং গন্ধাযতনং ৰসাযতনং ফোট্ঠব্বাযতনং মনোধাতুযা তংসম্পযুত্তকানঞ্চ ধম্মানং অত্থিপচ্চযেন পচ্চযো.

যং ৰূপং নিস্সায মনোধাতু চ মনোৱিঞ্ঞাণধাতু চ ৱত্তন্তি, তং ৰূপং মনোধাতুযা চ মনোৱিঞ্ঞাণধাতুযা চ তংসম্পযুত্তকানঞ্চ ধম্মানং অত্থিপচ্চযেন পচ্চযো.

২২. নত্থিপচ্চযোতি – সমনন্তৰনিৰুদ্ধা চিত্তচেতসিকা ধম্মা পটুপ্পন্নানং চিত্তচেতসিকানং ধম্মানং নত্থিপচ্চযেন পচ্চযো.

২৩. ৱিগতপচ্চযোতি – সমনন্তৰৱিগতা চিত্তচেতসিকা ধম্মা পটুপ্পন্নানং চিত্তচেতসিকানং ধম্মানং ৱিগতপচ্চযেন পচ্চযো.

২৪. অৱিগতপচ্চযোতি – চত্তাৰো খন্ধা অৰূপিনো অঞ্ঞমঞ্ঞং অৱিগতপচ্চযেন পচ্চযো. চত্তাৰো মহাভূতা অঞ্ঞমঞ্ঞং অৱিগতপচ্চযেন পচ্চযো. ওক্কন্তিক্খণে নামৰূপং অঞ্ঞমঞ্ঞং অৱিগতপচ্চযেন পচ্চযো. চিত্তচেতসিকা ধম্মা চিত্তসমুট্ঠানানং ৰূপানং অৱিগতপচ্চযেন পচ্চযো. মহাভূতা উপাদাৰূপানং অৱিগতপচ্চযেন পচ্চযো.

চক্খাযতনং চক্খুৱিঞ্ঞাণধাতুযা তংসম্পযুত্তকানঞ্চ ধম্মানং অৱিগতপচ্চযেন পচ্চযো. সোতাযতনং সোতৱিঞ্ঞাণধাতুযা তংসম্পযুত্তকানঞ্চ ধম্মানং অৱিগতপচ্চযেন পচ্চযো. ঘানাযতনং ঘানৱিঞ্ঞাণধাতুযা তংসম্পযুত্তকানঞ্চ ধম্মানং অৱিগতপচ্চযেন পচ্চযো. জিৱ্হাযতনং জিৱ্হাৱিঞ্ঞাণধাতুযা তংসম্পযুত্তকানঞ্চ ধম্মানং অৱিগতপচ্চযেন পচ্চযো. কাযাযতনং কাযৱিঞ্ঞাণধাতুযা তংসম্পযুত্তকানঞ্চ ধম্মানং অৱিগতপচ্চযেন পচ্চযো.

ৰূপাযতনং চক্খুৱিঞ্ঞাণধাতুযা তংসম্পযুত্তকানঞ্চ ধম্মানং অৱিগতপচ্চযেন পচ্চযো. সদ্দাযতনং সোতৱিঞ্ঞাণধাতুযা তংসম্পযুত্তকানঞ্চ ধম্মানং অৱিগতপচ্চযেন পচ্চযো. গন্ধাযতনং ঘানৱিঞ্ঞাণধাতুযা তংসম্পযুত্তকানঞ্চ ধম্মানং অৱিগতপচ্চযেন পচ্চযো. ৰসাযতনং জিৱ্হাৱিঞ্ঞাণধাতুযা তংসম্পযুত্তকানঞ্চ ধম্মানং অৱিগতপচ্চযেন পচ্চযো. ফোট্ঠব্বাযতনং কাযৱিঞ্ঞাণধাতুযা তংসম্পযুত্তকানঞ্চ ধম্মানং অৱিগতপচ্চযেন পচ্চযো. ৰূপাযতনং সদ্দাযতনং গন্ধাযতনং ৰসাযতনং ফোট্ঠব্বাযতনং মনোধাতুযা তংসম্পযুত্তকানঞ্চ ধম্মানং অৱিগতপচ্চযেন পচ্চযো.

যং ৰূপং নিস্সায মনোধাতু চ মনোৱিঞ্ঞাণধাতু চ ৱত্তন্তি, তং ৰূপং মনোধাতুযা চ মনোৱিঞ্ঞাণধাতুযা চ তংসম্পযুত্তকানঞ্চ ধম্মানং অৱিগতপচ্চযেন পচ্চযো.

পচ্চযনিদ্দেসো.