(২২৬) ৯. অপৰিনিপ্ফন্নকথা

৯১৭. ৰূপং অপৰিনিপ্ফন্নন্তি? আমন্তা. ৰূপং ন অনিচ্চং ন সঙ্খতং ন পটিচ্চসমুপ্পন্নং ন খযধম্মং ন ৱযধম্মং ন ৱিৰাগধম্মং ন নিৰোধধম্মং ন ৱিপৰিণামধম্মন্তি? ন হেৱং ৱত্তব্বে…পে… ননু ৰূপং অনিচ্চং সঙ্খতং পটিচ্চসমুপ্পন্নং খযধম্মং ৱযধম্মং ৱিৰাগধম্মং নিৰোধধম্মং ৱিপৰিণামধম্মন্তি? আমন্তা. হঞ্চি ৰূপং অনিচ্চং সঙ্খতং…পে… ৱিপৰিণামধম্মং, নো চ ৱত ৰে ৱত্তব্বে – ‘‘ৰূপং অপৰিনিপ্ফন্ন’’ন্তি.

দুক্খঞ্ঞেৱ পৰিনিপ্ফন্নন্তি? আমন্তা. ননু যদনিচ্চং তং দুক্খং [সং. নি. ৩.১৫] ৱুত্তং ভগৱতা – ‘‘ৰূপং অনিচ্চ’’ন্তি? আমন্তা. হঞ্চি যদনিচ্চং তং দুক্খং ৱুত্তং ভগৱতা – ‘‘ৰূপং অনিচ্চং’’, নো চ ৱত ৰে ৱত্তব্বে – ‘‘দুক্খঞ্ঞেৱ পৰিনিপ্ফন্ন’’ন্তি…পে….

৯১৮. ৱেদনা …পে… সঞ্ঞা… সঙ্খাৰা… ৱিঞ্ঞাণং… চক্খাযতনং…পে… ধম্মাযতনং… চক্খুধাতু… ধম্মধাতু… চক্খুন্দ্ৰিযং…পে… অঞ্ঞাতাৱিন্দ্ৰিযং অপৰিনিপ্ফন্নন্তি? আমন্তা. অঞ্ঞাতাৱিন্দ্ৰিযং ন অনিচ্চং…পে… ন ৱিপৰিণামধম্মন্তি? ন হেৱং ৱত্তব্বে…পে… ননু অঞ্ঞাতাৱিন্দ্ৰিযং অনিচ্চং সঙ্খতং…পে… ৱিপৰিণামধম্মন্তি? আমন্তা. হঞ্চি অঞ্ঞাতাৱিন্দ্ৰিযং অনিচ্চং সঙ্খতং পটিচ্চসমুপ্পন্নং খযধম্মং ৱযধম্মং ৱিৰাগধম্মং নিৰোধধম্মং ৱিপৰিণামধম্মং, নো চ ৱত ৰে ৱত্তব্বে – ‘‘অঞ্ঞাতাৱিন্দ্ৰিযং অপৰিনিপ্ফন্ন’’ন্তি.

দুক্খঞ্ঞেৱ পৰিনিপ্ফন্নন্তি? আমন্তা. ননু যদনিচ্চং তং দুক্খং ৱুত্তং ভগৱতা – ‘‘অঞ্ঞাতাৱিন্দ্ৰিযং অনিচ্চ’’ন্তি? আমন্তা. হঞ্চি যদনিচ্চং তং দুক্খং ৱুত্তং ভগৱতা – ‘‘অঞ্ঞাতাৱিন্দ্ৰিযং অনিচ্চং’’, নো চ ৱত ৰে ৱত্তব্বে – ‘‘দুক্খঞ্ঞেৱ পৰিনিপ্ফন্ন’’ন্তি.

অপৰিনিপ্ফন্নকথা নিট্ঠিতা.

তেৱীসতিমৱগ্গো.

তস্সুদ্দানং –

একাধিপ্পাযেন মেথুনো ধম্মো পটিসেৱিতব্বো, অৰহন্তানং ৱণ্ণেন অমনুস্সা মেথুনং ধম্মং পটিসেৱন্তি, বোধিসত্তো ইস্সৰিযকামকাৰিকাহেতু ৱিনিপাতং গচ্ছতি, গব্ভসেয্যং ওক্কমতি, দুক্কৰকাৰিকং অকাসি, অপৰন্তপং অকাসি, অঞ্ঞং সত্থাৰং উদ্দিসি, অত্থি ন ৰাগো ৰাগপতিৰূপকো অত্থি ন দোসো দোসপতিৰূপকো অত্থি ন মোহো মোহপতিৰূপকো অত্থি ন কিলেসো কিলেসপতিৰূপকো, ৰূপং অপৰিনিপ্ফন্নং অঞ্ঞাতাৱিন্দ্ৰিযং অপৰিনিপ্ফন্নন্তি.

খুদ্দকো অড্ঢপণ্ণাসকো.

তস্সুদ্দানং –

নৱং, নিব্বুতি, একাধিপ্পাযোতি.

পণ্ণাসকুদ্দানং –

মহানিযামো, অনুসযা, নিগ্গহো, খুদ্দকপঞ্চমো;

পৰপ্পৱাদমদ্দনা, সুত্তমূলসমাহিতা;

উজ্জোতনা সত্থুসমযে, কথাৱত্থুপকৰণেতি.

পঞ্চত্তিংসভাণৱাৰং

কথাৱত্থুপকৰণং নিট্ঠিতং.