(২২০-৪) ৩-৭. ইস্সৰিযকামকাৰিকাদিকথা

৯১০. বোধিসত্তো ইস্সৰিযকামকাৰিকাহেতু ৱিনিপাতং গচ্ছতীতি? আমন্তা. বোধিসত্তো ইস্সৰিযকামকাৰিকাহেতু নিৰযং গচ্ছতি, সঞ্জীৱং গচ্ছতি, কালসুত্তং গচ্ছতি, তাপনং গচ্ছতি, মহাতাপনং [পতাপনং (সী. স্যা. কং. পী.)] গচ্ছতি, সঙ্ঘাতকং গচ্ছতি, ৰোৰুৱং গচ্ছতি…পে… অৱীচিং গচ্ছতীতি? ন হেৱং ৱত্তব্বে…পে….

বোধিসত্তো ইস্সৰিযকামকাৰিকাহেতু ৱিনিপাতং গচ্ছতীতি? আমন্তা. ‘‘বোধিসত্তো ইস্সৰিযকামকাৰিকাহেতু ৱিনিপাতং গচ্ছতী’’তি – অত্থেৱ সুত্তন্তোতি? নত্থি. হঞ্চি ‘‘বোধিসত্তো ইস্সৰিযকামকাৰিকাহেতু ৱিনিপাতং গচ্ছতী’’তি – নত্থেৱ সুত্তন্তো, নো চ ৱত ৰে ৱত্তব্বে – ‘‘বোধিসত্তো ইস্সৰিযকামকাৰিকাহেতু ৱিনিপাতং গচ্ছতী’’তি.

৯১১. বোধিসত্তো ইস্সৰিযকামকাৰিকাহেতু গব্ভসেয্যং ওক্কমতীতি? আমন্তা. বোধিসত্তো ইস্সৰিযকামকাৰিকাহেতু নিৰযং উপপজ্জেয্য, তিৰচ্ছানযোনিং উপপজ্জেয্যাতি? ন হেৱং ৱত্তব্বে…পে….

বোধিসত্তো ইস্সৰিযকামকাৰিকাহেতু গব্ভসেয্যং ওক্কমতীতি? আমন্তা. বোধিসত্তো ইদ্ধিমাতি? ন হেৱং ৱত্তব্বে…পে… বোধিসত্তো ইদ্ধিমাতি? আমন্তা. বোধিসত্তেন ছন্দিদ্ধিপাদো ভাৱিতো…পে… ৱীৰিযিদ্ধিপাদো…পে… চিত্তিদ্ধিপাদো…পে… ৱীমংসিদ্ধিপাদো ভাৱিতোতি? ন হেৱং ৱত্তব্বে…পে….

বোধিসত্তো ইস্সৰিযকামকাৰিকাহেতু গব্ভসেয্যং ওক্কমতীতি? আমন্তা. ‘‘বোধিসত্তো ইস্সৰিযকামকাৰিকাহেতু গব্ভসেয্যং ওক্কমতী’’তি – অত্থেৱ সুত্তন্তোতি? নত্থি. হঞ্চি ‘‘বোধিসত্তো ইস্সৰিযকামকাৰিকাহেতু গব্ভসেয্যং ওক্কমতী’’তি – নত্থেৱ সুত্তন্তো, নো চ ৱত ৰে ৱত্তব্বে – ‘‘বোধিসত্তো ইস্সৰিযকামকাৰিকাহেতু গব্ভসেয্যং ওক্কমতী’’তি.

৯১২. বোধিসত্তো ইস্সৰিযকামকাৰিকাহেতু দুক্কৰকাৰিকং অকাসীতি? আমন্তা. বোধিসত্তো ইস্সৰিযকামকাৰিকাহেতু ‘‘সস্সতো লোকো’’তি পচ্চাগচ্ছি, ‘‘অসস্সতো লোকো’’তি…পে… ‘‘অন্তৱা লোকো’’তি…পে… ‘‘অনন্তৱা লোকো’’তি… ‘‘তং জীৱং তং সৰীৰ’’ন্তি … ‘‘অঞ্ঞং জীৱং অঞ্ঞং সৰীৰ’’ন্তি… ‘‘হোতি তথাগতো পৰং মৰণা’’তি… ‘‘ন হোতি তথাগতো পৰং মৰণা’’তি… ‘‘হোতি চ ন চ হোতি তথাগতো পৰং মৰণা’’তি…পে… ‘‘নেৱ হোতি ন ন হোতি তথাগতো পৰং মৰণা’’তি পচ্চাগচ্ছীতি? ন হেৱং ৱত্তব্বে…পে….

বোধিসত্তো ইস্সৰিযকামকাৰিকাহেতু দুক্কৰকাৰিকং অকাসীতি? আমন্তা. ‘‘বোধিসত্তো ইস্সৰিযকামকাৰিকাহেতু দুক্কৰকাৰিকং অকাসী’’তি – অত্থেৱ সুত্তন্তোতি? নত্থি. হঞ্চি ‘‘বোধিসত্তো ইস্সৰিযকামকাৰিকাহেতু দুক্কৰকাৰিকং অকাসী’’তি – নত্থেৱ সুত্তন্তো, নো চ ৱত ৰে ৱত্তব্বে – ‘‘বোধিসত্তো ইস্সৰিযকামকাৰিকাহেতু দুক্কৰকাৰিকং অকাসী’’তি.

৯১৩. বোধিসত্তো ইস্সৰিযকামকাৰিকাহেতু অপৰন্তপং [অমৰং তপং (সং. নি. ১.১৩৭)] অকাসি, অঞ্ঞং সত্থাৰং উদ্দিসীতি? আমন্তা. বোধিসত্তো ইস্সৰিযকামকাৰিকাহেতু ‘‘সস্সতো লোকো’’তি পচ্চাগচ্ছি…পে… ‘‘নেৱ হোতি ন ন হোতি তথাগতো পৰং মৰণা’’তি পচ্চাগচ্ছীতি? ন হেৱং ৱত্তব্বে…পে….

৯১৪. বোধিসত্তো ইস্সৰিযকামকাৰিকাহেতু অঞ্ঞং সত্থাৰং উদ্দিসীতি? আমন্তা. ‘‘বোধিসত্তো ইস্সৰিযকামকাৰিকাহেতু অঞ্ঞং সত্থাৰং উদ্দিসী’’তি – অত্থেৱ সুত্তন্তোতি? নত্থি. হঞ্চি ‘‘বোধিসত্তো ইস্সৰিযকামকাৰিকাহেতু অঞ্ঞং সত্থাৰং উদ্দিসী’’তি – নত্থেৱ সুত্তন্তো, নো চ ৱত ৰে ৱত্তব্বে – ‘‘বোধিসত্তো ইস্সৰিযকামকাৰিকাহেতু অঞ্ঞং সত্থাৰং উদ্দিসী’’তি.

ইস্সৰিযকামকাৰিকাকথা নিট্ঠিতা.