(১০০) ৬. দ্ৱীহিসীলেহিকথা

৫৮৭. মগ্গসমঙ্গী দ্ৱীহি সীলেহি সমন্নাগতোতি? আমন্তা. মগ্গসমঙ্গী দ্ৱীহি ফস্সেহি দ্ৱীহি ৱেদনাহি দ্ৱীহি সঞ্ঞাহি দ্ৱীহি চেতনাহি দ্ৱীহি চিত্তেহি দ্ৱীহি সদ্ধাহি দ্ৱীহি ৱীৰিযেহি দ্ৱীহি সতীহি দ্ৱীহি সমাধীহি দ্ৱীহি পঞ্ঞাহি সমন্নাগতোতি? ন হেৱং ৱত্তব্বে…পে….

মগ্গসমঙ্গী লোকিযেন সীলেন সমন্নাগতোতি? আমন্তা. মগ্গসমঙ্গী লোকিযেন ফস্সেন লোকিযায ৱেদনায লোকিযায পঞ্ঞায লোকিযায চেতনায লোকিযেন চিত্তেন লোকিযায সদ্ধায লোকিযেন ৱীৰিযেন লোকিযায সতিযা লোকিযেন সমাধিনা লোকিযায পঞ্ঞায সমন্নাগতোতি? ন হেৱং ৱত্তব্বে…পে….

মগ্গসমঙ্গী লোকিযেন চ লোকুত্তৰেন চ সীলেন সমন্নাগতোতি? আমন্তা. মগ্গসমঙ্গী লোকিযেন চ লোকুত্তৰেন চ ফস্সেন সমন্নাগতো…পে… লোকিযায চ লোকুত্তৰায চ পঞ্ঞায সমন্নাগতোতি? ন হেৱং ৱত্তব্বে…পে… মগ্গসমঙ্গী লোকিযেন সীলেন সমন্নাগতোতি? আমন্তা. মগ্গসমঙ্গী পুথুজ্জনোতি? ন হেৱং ৱত্তব্বে…পে….

৫৮৮. মগ্গসমঙ্গী লোকিযায সম্মাৱাচায সমন্নাগতোতি? আমন্তা. মগ্গসমঙ্গী লোকিযায সম্মাদিট্ঠিযা সমন্নাগতোতি? ন হেৱং ৱত্তব্বে…পে… মগ্গসমঙ্গী লোকিযায সম্মাৱাচায সমন্নাগতোতি? আমন্তা. মগ্গসমঙ্গী লোকিযেন সম্মাসঙ্কপ্পেন…পে… লোকিযেন সম্মাৱাযামেন…পে… লোকিযায সম্মাসতিযা…পে… লোকিযেন সম্মাসমাধিনা সমন্নাগতোতি? ন হেৱং ৱত্তব্বে…পে… মগ্গসমঙ্গী লোকিযেন সম্মাকম্মন্তেন…পে… লোকিযেন সম্মাআজীৱেন সমন্নাগতোতি? আমন্তা. মগ্গসমঙ্গী লোকিযায সম্মাদিট্ঠিযা…পে… লোকিযেন সম্মাসমাধিনা সমন্নাগতোতি? ন হেৱং ৱত্তব্বে…পে….

মগ্গসমঙ্গী লোকিযায চ লোকুত্তৰায চ সম্মাৱাচায সমন্নাগতোতি? আমন্তা. মগ্গসমঙ্গী লোকিযায চ লোকুত্তৰায চ সম্মাদিট্ঠিযা সমন্নাগতোতি? ন হেৱং ৱত্তব্বে…পে… মগ্গসমঙ্গী লোকিযায চ লোকুত্তৰায চ সম্মাৱাচায সমন্নাগতোতি? আমন্তা. মগ্গসমঙ্গী লোকিযেন চ লোকুত্তৰেন চ সম্মাসঙ্কপ্পেন…পে… লোকিযেন চ লোকুত্তৰেন চ সম্মাৱাযামেন …পে… লোকিযায চ লোকুত্তৰায চ সম্মাসতিযা…পে… লোকিযেন চ লোকুত্তৰেন চ সম্মাসমাধিনা সমন্নাগতোতি? ন হেৱং ৱত্তব্বে…পে….

মগ্গসমঙ্গী লোকিযেন চ লোকুত্তৰেন চ সম্মাকম্মন্তেন…পে… সম্মাআজীৱেন সমন্নাগতোতি? আমন্তা. মগ্গসমঙ্গী লোকিযায চ লোকুত্তৰায চ সম্মাদিট্ঠিযা সমন্নাগতোতি? ন হেৱং ৱত্তব্বে…পে… মগ্গসমঙ্গী লোকিযেন চ লোকুত্তৰেন চ সম্মাআজীৱেন সমন্নাগতোতি? আমন্তা. মগ্গসমঙ্গী লোকিযেন চ লোকুত্তৰেন চ সম্মাসঙ্কপ্পেন…পে… লোকিযেন চ লোকুত্তৰেন চ সম্মাসমাধিনা সমন্নাগতোতি? ন হেৱং ৱত্তব্বে…পে….

৫৮৯. ন ৱত্তব্বং – ‘‘মগ্গসমঙ্গী দ্ৱীহি সীলেহি সমন্নাগতো’’তি? আমন্তা. লোকিযে সীলে নিৰুদ্ধে মগ্গো উপ্পজ্জতীতি? আমন্তা. দুস্সীলো খণ্ডসীলো ছিন্নসীলো মগ্গং ভাৱেতীতি? ন হেৱং ৱত্তব্বে …পে… তেন হি মগ্গসমঙ্গী দ্ৱীহি সীলেহি সমন্নাগতোতি.

দ্ৱীহিসীলেহিকথা নিট্ঠিতা.