১০. দসমৱগ্গো

(৯৯) ৫. সাভোগাতিকথা

৫৮৪. পঞ্চৱিঞ্ঞাণা সাভোগাতি? আমন্তা. ননু পঞ্চৱিঞ্ঞাণা উপ্পন্নৱত্থুকা উপ্পন্নাৰম্মণাতি? আমন্তা. হঞ্চি পঞ্চৱিঞ্ঞাণা উপ্পন্নৱত্থুকা উপ্পন্নাৰম্মণা, নো চ ৱত ৰে ৱত্তব্বে – ‘‘পঞ্চৱিঞ্ঞাণা সাভোগা’’তি. ননু পঞ্চৱিঞ্ঞাণা পুৰেজাতৱত্থুকা পুৰেজাতাৰম্মণা অজ্ঝত্তিকৱত্থুকা বাহিৰাৰম্মণা অসম্ভিন্নৱত্থুকা অসম্ভিন্নাৰম্মণা নানাৱত্থুকা নানাৰম্মণা ন অঞ্ঞমঞ্ঞস্স গোচৰৱিসযং পচ্চনুভোন্তি, ন অসমন্নাহাৰা উপ্পজ্জন্তি, ন অমনসিকাৰা উপ্পজ্জন্তি, ন অব্বোকিণ্ণা উপ্পজ্জন্তি, ন অপুব্বং অচৰিমং উপ্পজ্জন্তি, ননু পঞ্চৱিঞ্ঞাণা ন অঞ্ঞমঞ্ঞস্স সমনন্তৰা উপ্পজ্জন্তীতি? আমন্তা. হঞ্চি পঞ্চৱিঞ্ঞাণা ন অঞ্ঞমঞ্ঞস্স সমনন্তৰা উপ্পজ্জন্তি, নো চ ৱত ৰে ৱত্তব্বে – ‘‘পঞ্চৱিঞ্ঞাণা সাভোগা’’তি.

৫৮৫. চক্খুৱিঞ্ঞাণং সাভোগন্তি? আমন্তা. চক্খুৱিঞ্ঞাণং সুঞ্ঞতং আৰব্ভ উপ্পজ্জতীতি? ন হেৱং ৱত্তব্বে…পে… চক্খুৱিঞ্ঞাণং সুঞ্ঞতং আৰব্ভ উপ্পজ্জতীতি? আমন্তা. চক্খুঞ্চ পটিচ্চ সুঞ্ঞতঞ্চ উপ্পজ্জতি চক্খুৱিঞ্ঞাণন্তি? ন হেৱং ৱত্তব্বে…পে… চক্খুঞ্চ পটিচ্চ সুঞ্ঞতঞ্চ উপ্পজ্জতি চক্খুৱিঞ্ঞাণন্তি? আমন্তা. ‘‘চক্খুঞ্চ পটিচ্চ সুঞ্ঞতঞ্চ উপ্পজ্জতি চক্খুৱিঞ্ঞাণ’’ন্তি – অত্থেৱ সুত্তন্তোতি? নত্থি…পে… ‘‘চক্খুঞ্চ পটিচ্চ ৰূপে চ উপ্পজ্জতি চক্খুৱিঞ্ঞাণ’’ন্তি – অত্থেৱ সুত্তন্তোতি? আমন্তা. হঞ্চি ‘‘চক্খুঞ্চ পটিচ্চ ৰূপে চ উপ্পজ্জতি চক্খুৱিঞ্ঞাণ’’ন্তি – অত্থেৱ সুত্তন্তো, নো চ ৱত ৰে ৱত্তব্বে – ‘‘চক্খুঞ্চ পটিচ্চ সুঞ্ঞতঞ্চ উপ্পজ্জতি চক্খুৱিঞ্ঞাণ’’ন্তি.

চক্খুৱিঞ্ঞাণং সাভোগন্তি? আমন্তা. চক্খুৱিঞ্ঞাণং অতীতানাগতং আৰব্ভ উপ্পজ্জতীতি? ন হেৱং ৱত্তব্বে…পে… চক্খুৱিঞ্ঞাণং সাভোগন্তি? আমন্তা. চক্খুৱিঞ্ঞাণং ফস্সং আৰব্ভ…পে… ফোট্ঠব্বং আৰব্ভ উপ্পজ্জতীতি? ন হেৱং ৱত্তব্বে…পে… মনোৱিঞ্ঞাণং সাভোগং, মনোৱিঞ্ঞাণং সুঞ্ঞতং আৰব্ভ উপ্পজ্জতীতি? আমন্তা. চক্খুৱিঞ্ঞাণং সাভোগং, চক্খুৱিঞ্ঞাণং সুঞ্ঞতং আৰব্ভ উপ্পজ্জতীতি? ন হেৱং ৱত্তব্বে…পে… মনোৱিঞ্ঞাণং সাভোগং, মনোৱিঞ্ঞাণং অতীতানাগতং আৰব্ভ উপ্পজ্জতীতি? আমন্তা. চক্খুৱিঞ্ঞাণং সাভোগং, চক্খুৱিঞ্ঞাণং অতীতানাগতং আৰব্ভ উপ্পজ্জতীতি? ন হেৱং ৱত্তব্বে…পে… মনোৱিঞ্ঞাণং সাভোগং, মনোৱিঞ্ঞাণং ফস্সং আৰব্ভ…পে… ফোট্ঠব্বং আৰব্ভ উপ্পজ্জতীতি? আমন্তা. চক্খুৱিঞ্ঞাণং সাভোগং, চক্খুৱিঞ্ঞাণং ফস্সং আৰব্ভ…পে… ফোট্ঠব্বং আৰব্ভ উপ্পজ্জতীতি? ন হেৱং ৱত্তব্বে…পে….

৫৮৬. ন ৱত্তব্বং – ‘‘পঞ্চৱিঞ্ঞাণা সাভোগা’’তি? আমন্তা. ননু ৱুত্তং ভগৱতা – ‘‘ইধ, ভিক্খৱে, ভিক্খু চক্খুনা ৰূপং দিস্ৱা নিমিত্তগ্গাহী হোতি…পে… ন নিমিত্তগ্গাহী হোতি…পে… কাযেন ফোট্ঠব্বং ফুসিত্ৱা নিমিত্তগ্গাহী হোতি…পে… ন নিমিত্তগ্গাহী হোতী’’তি! অত্থেৱ সুত্তন্তোতি? আমন্তা. তেন হি পঞ্চৱিঞ্ঞাণা সাভোগাতি…পে….

সাভোগাতিকথা নিট্ঠিতা.