ৰূপৱিভত্তি

এককনিদ্দেসো

৫৯৪. সব্বং ৰূপং ন হেতুমেৱ, অহেতুকমেৱ, হেতুৱিপ্পযুত্তমেৱ, সপ্পচ্চযমেৱ, সঙ্খতমেৱ, ৰূপমেৱ, লোকিযমেৱ, সাসৱমেৱ, সংযোজনিযমেৱ, গন্থনিযমেৱ, ওঘনিযমেৱ, যোগনিযমেৱ, নীৱৰণিযমেৱ, পৰামট্ঠমেৱ, উপাদানিযমেৱ, সংকিলেসিকমেৱ, অব্যাকতমেৱ, অনাৰম্মণমেৱ, অচেতসিকমেৱ, চিত্তৱিপ্পযুত্তমেৱ, নেৱৱিপাকনৱিপাকধম্মধম্মমেৱ, অসংকিলিট্ঠসংকিলেসিকমেৱ, ন সৱিতক্কসৱিচাৰমেৱ, ন অৱিতক্কৱিচাৰমত্তমেৱ, অৱিতক্কঅৱিচাৰমেৱ, ন পীতিসহগতমেৱ, ন সুখসহগতমেৱ, ন উপেক্খাসহগতমেৱ, নেৱ দস্সনেন ন ভাৱনায পহাতব্বমেৱ, নেৱ দস্সনেন ন ভাৱনায পহাতব্বহেতুকমেৱ, নেৱ আচযগামি ন অপচযগামিমেৱ, নেৱসেক্খনাসেক্খমেৱ, পৰিত্তমেৱ, কামাৱচৰমেৱ, ন ৰূপাৱচৰমেৱ, ন অৰূপাৱচৰমেৱ, পৰিযাপন্নমেৱ, নো অপৰিযাপন্নমেৱ, অনিযতমেৱ, অনিয্যানিকমেৱ, উপ্পন্নং ছহি ৱিঞ্ঞাণেহি ৱিঞ্ঞেয্যমেৱ, অনিচ্চমেৱ, জৰাভিভূতমেৱ.

এৱং একৱিধেন ৰূপসঙ্গহো.

এককনিদ্দেসো.

দুকনিদ্দেসো

উপাদাভাজনীযং

৫৯৫. কতমং তং ৰূপং উপাদা? চক্খাযতনং, সোতাযতনং, ঘানাযতনং, জিৱ্হাযতনং, কাযাযতনং, ৰূপাযতনং, সদ্দাযতনং, গন্ধাযতনং, ৰসাযতনং, ইত্থিন্দ্ৰিযং, পুৰিসিন্দ্ৰিযং, জীৱিতিন্দ্ৰিযং, কাযৱিঞ্ঞত্তি, ৱচীৱিঞ্ঞত্তি, আকাসধাতু, ৰূপস্স লহুতা, ৰূপস্স মুদুতা, ৰূপস্স কম্মঞ্ঞতা, ৰূপস্স উপচযো, ৰূপস্স সন্ততি, ৰূপস্স জৰতা, ৰূপস্স অনিচ্চতা, কবড়ীকাৰো আহাৰো.

৫৯৬. কতমং তং ৰূপং চক্খাযতনং? যং চক্খু [চক্খুং (সী. স্যা.)] চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যেন চক্খুনা অনিদস্সনেন সপ্পটিঘেন ৰূপং সনিদস্সনং সপ্পটিঘং পস্সি ৱা পস্সতি ৱা পস্সিস্সতি ৱা পস্সে ৱা, চক্খুং পেতং চক্খাযতনং পেতং চক্খুধাতু পেসা চক্খুন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং নেত্তং পেতং নযনং পেতং ওৰিমং তীৰং পেতং সুঞ্ঞো গামোপেসো – ইদং তং ৰূপং চক্খাযতনং.

৫৯৭. কতমং তং ৰূপং চক্খাযতনং? যং চক্খু চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যম্হি চক্খুম্হি অনিদস্সনম্হি সপ্পটিঘম্হি ৰূপং সনিদস্সনং সপ্পটিঘং পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, চক্খুং পেতং চক্খাযতনং পেতং চক্খুধাতু পেসা চক্খুন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং নেত্তং পেতং নযনং পেতং ওৰিমং তীৰং পেতং সুঞ্ঞো গামো পেসো – ইদং তং ৰূপং চক্খাযতনং.

৫৯৮. কতমং তং ৰূপং চক্খাযতনং? যং চক্খু চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যং চক্খু অনিদস্সনং সপ্পটিঘং ৰূপম্হি সনিদস্সনম্হি সপ্পটিঘম্হি পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, চক্খুং পেতং চক্খাযতনং পেতং চক্খুধাতু পেসা চক্খুন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং নেত্তং পেতং নযনং পেতং ওৰিমং তীৰং পেতং সুঞ্ঞো গামো পেসো – ইদং তং ৰূপং চক্খাযতনং.

৫৯৯. কতমং তং ৰূপং চক্খাযতনং? যং চক্খু চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যং চক্খুং নিস্সায ৰূপং আৰব্ভ চক্খুসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং চক্খুং নিস্সায ৰূপং আৰব্ভ চক্খুসম্ফস্সজা ৱেদনা…পে… সঞ্ঞা…পে… চেতনা…পে… চক্খুৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং চক্খুং নিস্সায ৰূপাৰম্মণো চক্খুসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং চক্খুং নিস্সায ৰূপাৰম্মণা চক্খুসম্ফস্সজা ৱেদনা…পে… সঞ্ঞা…পে… চেতনা…পে… চক্খুৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা, চক্খুং পেতং চক্খাযতনং পেতং চক্খুধাতু পেসা চক্খুন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং নেত্তং পেতং নযনং পেতং ওৰিমং তীৰং পেতং সুঞ্ঞো গামো পেসো – ইদং তং ৰূপং চক্খাযতনং.

৬০০. কতমং তং ৰূপং সোতাযতনং? যং সোতং চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যেন সোতেন অনিদস্সনেন সপ্পটিঘেন সদ্দং অনিদস্সনং সপ্পটিঘং সুণি ৱা সুণাতি ৱা সুণিস্সতি ৱা সুণে ৱা, সোতং পেতং সোতাযতনং পেতং সোতধাতু পেসা সোতিন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং ওৰিমং তীৰং পেতং সুঞ্ঞো গামো পেসো – ইদং তং ৰূপং সোতাযতনং.

৬০১. কতমং তং ৰূপং সোতাযতনং? যং সোতং চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যম্হি সোতম্হি অনিদস্সনম্হি সপ্পটিঘম্হি সদ্দো অনিদস্সনো সপ্পটিঘো পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, সোতং পেতং সোতাযতনং পেতং সোতধাতু পেসা সোতিন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং ওৰিমং তীৰং পেতং সুঞ্ঞো গামো পেসো – ইদং তং ৰূপং সোতাযতনং.

৬০২. কতমং তং ৰূপং সোতাযতনং? যং সোতং চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যং সোতং অনিদস্সনং সপ্পটিঘং সদ্দম্হি অনিদস্সনম্হি সপ্পটিঘম্হি পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, সোতং পেতং সোতাযতনং পেতং সোতধাতু পেসা সোতিন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং ওৰিমং তীৰং পেতং সুঞ্ঞো গামো পেসো – ইদং তং ৰূপং সোতাযতনং.

৬০৩. কতমং তং ৰূপং সোতাযতনং? যং সোতং চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যং সোতং নিস্সায সদ্দং আৰব্ভ সোতসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং সোতং নিস্সায সদ্দং আৰব্ভ সোতসম্ফস্সজা ৱেদনা…পে… সঞ্ঞা…পে… চেতনা…পে… সোতৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং সোতং নিস্সায সদ্দাৰম্মণো সোতসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং সোতং নিস্সায সদ্দাৰম্মণা সোতসম্ফস্সজা ৱেদনা…পে… সঞ্ঞা…পে… চেতনা…পে… সোতৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা, সোতং পেতং সোতাযতনং পেতং সোতধাতু পেসা সোতিন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং ওৰিমং তীৰং পেতং সুঞ্ঞো গামো পেসো – ইদং তং ৰূপং সোতাযতনং.

৬০৪. কতমং তং ৰূপং ঘানাযতনং? যং ঘানং চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যেন ঘানেন অনিদস্সনেন সপ্পটিঘেন গন্ধং অনিদস্সনং সপ্পটিঘং ঘাযি ৱা ঘাযতি ৱা ঘাযিস্সতি ৱা ঘাযে ৱা, ঘানং পেতং ঘানাযতনং পেতং ঘানধাতু পেসা ঘানিন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং ওৰিমং তীৰং পেতং সুঞ্ঞো গামো পেসো – ইদং তং ৰূপং ঘানাযতনং.

৬০৫. কতমং তং ৰূপং ঘানাযতনং? যং ঘানং চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যম্হি ঘানম্হি অনিদস্সনম্হি সপ্পটিঘম্হি গন্ধো অনিদস্সনো সপ্পটিঘো পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, ঘানং পেতং ঘানাযতনং পেতং ঘানধাতু পেসা ঘানিন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং ওৰিমং তীৰং পেতং সুঞ্ঞো গামো পেসো – ইদং তং ৰূপং ঘানাযতনং.

৬০৬. কতমং তং ৰূপং ঘানাযতনং? যং ঘানং চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যং ঘানং অনিদস্সনং সপ্পটিঘং গন্ধম্হি অনিদস্সনম্হি সপ্পটিঘম্হি পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, ঘানং পেতং ঘানাযতনং পেতং ঘানধাতু পেসা ঘানিন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং ওৰিমং তীৰং পেতং সুঞ্ঞো গামোপেসো – ইদং তং ৰূপং ঘানাযতনং.

৬০৭. কতমং তং ৰূপং ঘানাযতনং? যং ঘানং চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যং ঘানং নিস্সায গন্ধং আৰব্ভ ঘানসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং ঘানং নিস্সায গন্ধং আৰব্ভ ঘানসম্ফস্সজা ৱেদনা…পে… সঞ্ঞা…পে… চেতনা…পে… ঘানৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং ঘানং নিস্সায গন্ধাৰম্মণো ঘানসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং ঘানং নিস্সায গন্ধাৰম্মণা ঘানসম্ফস্সজা ৱেদনা…পে… সঞ্ঞা…পে… চেতনা…পে… ঘানৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা, ঘানং পেতং ঘানাযতনং পেতং ঘানধাতু পেসা ঘানিন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং ওৰিমং তীৰং পেতং সুঞ্ঞো গামো পেসো – ইদং তং ৰূপং ঘানাযতনং.

৬০৮. কতমং তং ৰূপং জিৱ্হাযতনং? যা জিৱ্হা চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যায জিৱ্হায অনিদস্সনায সপ্পটিঘায ৰসং অনিদস্সনং সপ্পটিঘং সাযি ৱা সাযতি ৱা সাযিস্সতি ৱা সাযে ৱা, জিৱ্হা পেসা জিৱ্হাযতনং পেতং জিৱ্হাধাতু পেসা জিৱ্হিন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং ওৰিমং তীৰং পেতং সুঞ্ঞো গামো পেসো – ইদং তং ৰূপং জিৱ্হাযতনং.

৬০৯. কতমং তং ৰূপং জিৱ্হাযতনং? যা জিৱ্হা চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যায জিৱ্হায অনিদস্সনায সপ্পটিঘায ৰসো অনিদস্সনো সপ্পটিঘো পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, জিৱ্হা পেসা জিৱ্হাযতনং পেতং জিৱ্হাধাতু পেসা জিৱ্হিন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং ওৰিমং তীৰং পেতং সুঞ্ঞো গামো পেসো – ইদং তং ৰূপং জিৱ্হাযতনং.

৬১০. কতমং তং ৰূপং জিৱ্হাযতনং? যা জিৱ্হা চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যা জিৱ্হা অনিদস্সনা সপ্পটিঘা ৰসম্হি অনিদস্সনম্হি সপ্পটিঘম্হি পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, জিৱ্হা পেসা জিৱ্হাযতনং পেতং জিৱ্হাধাতু পেসা জিৱ্হিন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং ওৰিমং তীৰং পেতং সুঞ্ঞো গামো পেসো – ইদং তং ৰূপং জিৱ্হাযতনং.

৬১১. কতমং তং ৰূপং জিৱ্হাযতনং? যা জিৱ্হা চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যং জিৱ্হং নিস্সায ৰসং আৰব্ভ জিৱ্হাসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং জিৱ্হং নিস্সায ৰসং আৰব্ভ জিৱ্হাসম্ফস্সজা ৱেদনা…পে… সঞ্ঞা…পে… চেতনা…পে… জিৱ্হাৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং জিৱ্হং নিস্সায ৰসাৰম্মণো জিৱ্হাসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং জিৱ্হং নিস্সায ৰসাৰম্মণা জিৱ্হাসম্ফস্সজা ৱেদনা…পে… সঞ্ঞা…পে… চেতনা…পে… জিৱ্হাৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা, জিৱ্হা পেসা জিৱ্হাযতনং পেতং জিৱ্হাধাতু পেসা জিৱ্হিন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং ওৰিমং তীৰং পেতং সুঞ্ঞো গামো পেসো – ইদং তং ৰূপং জিৱ্হাযতনং.

৬১২. কতমং তং ৰূপং কাযাযতনং? যো কাযো চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যেন কাযেন অনিদস্সনেন সপ্পটিঘেন ফোট্ঠব্বং অনিদস্সনসপ্পটিঘং ফুসি ৱা ফুসতি ৱা ফুসিস্সতি ৱা ফুসে ৱা, কাযো পেসো কাযাযতনং পেতং কাযধাতু পেসা কাযিন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং ওৰিমং তীৰং পেতং সুঞ্ঞো গামো পেসো – ইদং তং ৰূপং কাযাযতনং.

৬১৩. কতমং তং ৰূপং কাযাযতনং? যো কাযো চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যম্হি কাযম্হি অনিদস্সনম্হি সপ্পটিঘম্হি ফোট্ঠব্বো অনিদস্সনো সপ্পটিঘো পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, কাযো পেসো কাযাযতনং পেতং কাযধাতু পেসা কাযিন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং ওৰিমং তীৰং পেতং সুঞ্ঞো গামো পেসো – ইদং তং ৰূপং কাযাযতনং.

৬১৪. কতমং তং ৰূপং কাযাযতনং? যো কাযো চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যো কাযো অনিদস্সনো সপ্পটিঘো ফোট্ঠব্বম্হি অনিদস্সনম্হি সপ্পটিঘম্হি পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, কাযো পেসো কাযাযতনং পেতং কাযধাতু পেসা কাযিন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং ওৰিমং তীৰং পেতং সুঞ্ঞো গামো পেসো – ইদং তং ৰূপং কাযাযতনং.

৬১৫. কতমং তং ৰূপং কাযাযতনং? যো কাযো চতুন্নং মহাভূতানং উপাদায পসাদো অত্তভাৱপৰিযাপন্নো অনিদস্সনো সপ্পটিঘো, যং কাযং নিস্সায ফোট্ঠব্বং আৰব্ভ কাযসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং কাযং নিস্সায ফোট্ঠব্বং আৰব্ভ কাযসম্ফস্সজা ৱেদনা…পে… সঞ্ঞা…পে… চেতনা…পে… কাযৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং কাযং নিস্সায ফোট্ঠব্বাৰম্মণো কাযসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং কাযং নিস্সায ফোট্ঠব্বাৰম্মণা কাযসম্ফস্সজা ৱেদনা…পে… সঞ্ঞা…পে… চেতনা…পে… কাযৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা, কাযো পেসো কাযাযতনং পেতং কাযধাতু পেসা কাযিন্দ্ৰিযং পেতং লোকো পেসো দ্ৱাৰা পেসা সমুদ্দো পেসো পণ্ডৰং পেতং খেত্তং পেতং ৱত্থুং পেতং ওৰিমং তীৰং পেতং সুঞ্ঞো গামো পেসো – ইদং তং ৰূপং কাযাযতনং.

৬১৬. কতমং তং ৰূপং ৰূপাযতনং? যং ৰূপং চতুন্নং মহাভূতানং উপাদায ৱণ্ণনিভা সনিদস্সনং সপ্পটিঘং নীলং পীতকং লোহিতকং ওদাতং কাড়কং মঞ্জিট্ঠকং [মঞ্জেট্ঠকং (সী. স্যা.)] হৰি হৰিৱণ্ণং অম্বঙ্কুৰৱণ্ণং দীঘং ৰস্সং অণুং থূলং ৱট্টং পৰিমণ্ডলং চতুৰংসং [চতুৰস্সং (সী. ক.)] ছড়ংসং অট্ঠংসং সোড়সংসং নিন্নং থলং ছাযা আতপো আলোকো অন্ধকাৰো অব্ভা মহিকা ধূমো ৰজো চন্দমণ্ডলস্স ৱণ্ণনিভা সূৰিযমণ্ডলস্স [সুৰিযমণ্ডলস্স (সী. স্যা.)] ৱণ্ণনিভা তাৰকৰূপানং ৱণ্ণনিভা আদাসমণ্ডলস্স ৱণ্ণনিভা মণিসঙ্খমুত্তাৱেড়ুৰিযস্স ৱণ্ণনিভা জাতৰূপৰজতস্স ৱণ্ণনিভা, যং ৱা পনঞ্ঞম্পি অত্থি ৰূপং চতুন্নং মহাভূতানং উপাদায ৱণ্ণনিভা সনিদস্সনং সপ্পটিঘং, যং ৰূপং সনিদস্সনং সপ্পটিঘং চক্খুনা অনিদস্সনেন সপ্পটিঘেন পস্সি ৱা পস্সতি ৱা পস্সিস্সতি ৱা পস্সে ৱা, ৰূপং পেতং ৰূপাযতনং পেতং ৰূপধাতু পেসা – ইদং তং ৰূপং ৰূপাযতনং.

৬১৭. কতমং তং ৰূপং ৰূপাযতনং? যং ৰূপং চতুন্নং মহাভূতানং উপাদায ৱণ্ণনিভা সনিদস্সনং সপ্পটিঘং নীলং পীতকং লোহিতকং ওদাতং কাড়কং মঞ্জিট্ঠকং হৰি হৰিৱণ্ণং অম্বঙ্কুৰৱণ্ণং দীঘং ৰস্সং অণুং থূলং ৱট্টং পৰিমণ্ডলং চতুৰংসং ছড়ংসং অট্ঠংসং সোড়সংসং নিন্নং থলং ছাযা আতপো আলোকো অন্ধকাৰো অব্ভা মহিকা ধূমো ৰজো চন্দমণ্ডলস্স ৱণ্ণনিভা সূৰিযমণ্ডলস্স ৱণ্ণনিভা তাৰকৰূপানং ৱণ্ণনিভা আদাসমণ্ডলস্স ৱণ্ণনিভা মণিসঙ্খমুত্তাৱেড়ুৰিযস্স ৱণ্ণনিভা জাতৰূপৰজতস্স ৱণ্ণনিভা, যং ৱা পনঞ্ঞম্পি অত্থি ৰূপং চতুন্নং মহাভূতানং উপাদায ৱণ্ণনিভা সনিদস্সনং সপ্পটিঘং, যম্হি ৰূপম্হি সনিদস্সনম্হি সপ্পটিঘম্হি চক্খুং অনিদস্সনং সপ্পটিঘং পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, ৰূপং পেতং ৰূপাযতনং পেতং ৰূপধাতু পেসা – ইদং তং ৰূপং ৰূপাযতনং.

৬১৮. কতমং তং ৰূপং ৰূপাযতনং? যং ৰূপং চতুন্নং মহাভূতানং উপাদায ৱণ্ণনিভা সনিদস্সনং সপ্পটিঘং নীলং পীতকং লোহিতকং ওদাতং কাড়কং মঞ্জিট্ঠকং হৰি হৰিৱণ্ণং অম্বঙ্কুৰৱণ্ণং দীঘং ৰস্সং অণুং থূলং ৱট্টং পৰিমণ্ডলং চতুৰংসং ছড়ংসং অট্ঠংসং সোড়সংসং নিন্নং থলং ছাযা আতপো আলোকো অন্ধকাৰো অব্ভা মহিকা ধূমো ৰজো চন্দমণ্ডলস্স ৱণ্ণনিভা সূৰিযমণ্ডলস্স ৱণ্ণনিভা তাৰকৰূপানং ৱণ্ণনিভা আদাসমণ্ডলস্স ৱণ্ণনিভা মণিসঙ্খমুত্তাৱেড়ুৰিযস্স ৱণ্ণনিভা জাতৰূপৰজতস্স ৱণ্ণনিভা, যং ৱা পনঞ্ঞম্পি অত্থি ৰূপং চতুন্নং মহাভূতানং উপাদায ৱণ্ণনিভা সনিদস্সনং সপ্পটিঘং, যং ৰূপং সনিদস্সনং সপ্পটিঘং চক্খুম্হি অনিদস্সনম্হি সপ্পটিঘম্হি পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, ৰূপং পেতং ৰূপাযতনং পেতং ৰূপধাতু পেসা – ইদং তং ৰূপং ৰূপাযতনং.

৬১৯. কতমং তং ৰূপং ৰূপাযতনং? যং ৰূপং চতুন্নং মহাভূতানং উপাদায ৱণ্ণনিভা সনিদস্সনং সপ্পটিঘং নীলং পীতকং লোহিতকং ওদাতং কাড়কং মঞ্জিট্ঠকং হৰি হৰিৱণ্ণং অম্বঙ্কুৰৱণ্ণং দীঘং ৰস্সং অণুং থূলং ৱট্টং পৰিমণ্ডলং চতুৰংসং ছড়ংসং অট্ঠংসং সোড়সংসং নিন্নং থলং ছাযা আতপো আলোকো অন্ধকাৰো অব্ভা মহিকা ধূমো ৰজো চন্দমণ্ডলস্স ৱণ্ণনিভা সূৰিযমণ্ডলস্স ৱণ্ণনিভা তাৰকৰূপানং ৱণ্ণনিভা আদাসমণ্ডলস্স ৱণ্ণনিভা মণিসঙ্খমুত্তাৱেড়ুৰিযস্স ৱণ্ণনিভা জাতৰূপৰজতস্স ৱণ্ণনিভা, যং ৱা পনঞ্ঞম্পি অত্থি ৰূপং চতুন্নং মহাভূতানং উপাদায ৱণ্ণনিভা সনিদস্সনং সপ্পটিঘং, যং ৰূপং আৰব্ভ চক্খুং নিস্সায চক্খুসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং ৰূপং আৰব্ভ চক্খুং নিস্সায চক্খুসম্ফস্সজা ৱেদনা…পে… সঞ্ঞা…পে… চেতনা…পে… চক্খুৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং ৰূপাৰম্মণো চক্খুং নিস্সায চক্খুসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং ৰূপাৰম্মণা চক্খুং নিস্সায চক্খুসম্ফস্সজা ৱেদনা…পে… সঞ্ঞা…পে… চেতনা…পে… চক্খুৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা, ৰূপং পেতং ৰূপাযতনং পেতং ৰূপধাতু পেসা – ইদং তং ৰূপং ৰূপাযতনং.

৬২০. কতমং তং ৰূপং সদ্দাযতনং? যো সদ্দো চতুন্নং মহাভূতানং উপাদায অনিদস্সনো সপ্পটিঘো ভেৰিসদ্দো মুদিঙ্গসদ্দো সঙ্খসদ্দো পণৱসদ্দো গীতসদ্দো ৱাদিতসদ্দো সম্মসদ্দো পাণিসদ্দো সত্তানং নিগ্ঘোসসদ্দো ধাতূনং সন্নিঘাতসদ্দো ৱাতসদ্দো উদকসদ্দো মনুস্সসদ্দো অমনুস্সসদ্দো, যো ৱা পনঞ্ঞোপি অত্থি সদ্দো চতুন্নং মহাভূতানং উপাদায অনিদস্সনো সপ্পটিঘো, যং সদ্দং অনিদস্সনং সপ্পটিঘং সোতেন অনিদস্সনেন সপ্পটিঘেন সুণি ৱা সুণাতি ৱা সুণিস্সতি ৱা সুণে ৱা, সদ্দো পেসো সদ্দাযতনং পেতং সদ্দধাতু পেসা – ইদং তং ৰূপং সদ্দাযতনং.

৬২১. কতমং তং ৰূপং সদ্দাযতনং? যো সদ্দো চতুন্নং মহাভূতানং উপাদায অনিদস্সনো সপ্পটিঘো ভেৰিসদ্দো মুদিঙ্গসদ্দো সঙ্খসদ্দো পণৱসদ্দো গীতসদ্দো ৱাদিতসদ্দো সম্মসদ্দো পাণিসদ্দো সত্তানং নিগ্ঘোসসদ্দো ধাতূনং সন্নিঘাতসদ্দো ৱাতসদ্দো উদকসদ্দো মনুস্সসদ্দো অমনুস্সসদ্দো, যো ৱা পনঞ্ঞোপি অত্থি সদ্দো চতুন্নং মহাভূতানং উপাদায অনিদস্সনো সপ্পটিঘো, যম্হি সদ্দম্হি অনিদস্সনম্হি সপ্পটিঘম্হি সোতং অনিদস্সনং সপ্পটিঘং পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, সদ্দো পেসো সদ্দাযতনং পেতং সদ্দধাতু পেসা – ইদং তং ৰূপং সদ্দাযতনং.

৬২২. কতমং তং ৰূপং সদ্দাযতনং? যো সদ্দো চতুন্নং মহাভূতানং উপাদায অনিদস্সনো সপ্পটিঘো ভেৰিসদ্দো মুদিঙ্গসদ্দো সঙ্খসদ্দো পণৱসদ্দো গীতসদ্দো ৱাদিতসদ্দো সম্মসদ্দো পাণিসদ্দো সত্তানং নিগ্ঘোসসদ্দো ধাতূনং সন্নিঘাতসদ্দো ৱাতসদ্দো উদকসদ্দো মনুস্সসদ্দো অমনুস্সসদ্দো, যো ৱা পনঞ্ঞোপি অত্থি সদ্দো চতুন্নং মহাভূতানং উপাদায অনিদস্সনো সপ্পটিঘো, যো সদ্দো অনিদস্সনো সপ্পটিঘো সোতম্হি অনিদস্সনম্হি সপ্পটিঘম্হি পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, সদ্দো পেসো সদ্দাযতনং পেতং সদ্দধাতু পেসা – ইদং তং ৰূপং সদ্দাযতনং.

৬২৩. কতমং তং ৰূপং সদ্দাযতনং? যো সদ্দো চতুন্নং মহাভূতানং উপাদায অনিদস্সনো সপ্পটিঘো ভেৰিসদ্দো মুদিঙ্গসদ্দো সঙ্খসদ্দো পণৱসদ্দো গীতসদ্দো ৱাদিতসদ্দো সম্মসদ্দো পাণিসদ্দো সত্তানং নিগ্ঘোসসদ্দো ধাতূনং সন্নিঘাতসদ্দো ৱাতসদ্দো উদকসদ্দো মনুস্সসদ্দো অমনুস্সসদ্দো, যো ৱা পনঞ্ঞোপি অত্থি সদ্দো চতুন্নং মহাভূতানং উপাদায অনিদস্সনো সপ্পটিঘো, যং সদ্দং আৰব্ভ সোতং নিস্সায সোতসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং সদ্দং আৰব্ভ সোতং নিস্সায সোতসম্ফস্সজা ৱেদনা…পে… সঞ্ঞা…পে… চেতনা…পে… সোতৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং সদ্দাৰম্মণো সোতং নিস্সায সোতসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং সদ্দাৰম্মণা সোতং নিস্সায সোতসম্ফস্সজা ৱেদনা…পে… সঞ্ঞা…পে… চেতনা…পে… সোতৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা, সদ্দো পেসো সদ্দাযতনং পেতং সদ্দধাতু পেসা – ইদং তং ৰূপং সদ্দাযতনং.

৬২৪. কতমং তং ৰূপং গন্ধাযতনং? যো গন্ধো চতুন্নং মহাভূতানং উপাদায অনিদস্সনো সপ্পটিঘো মূলগন্ধো সাৰগন্ধো তচগন্ধো পত্তগন্ধো পুপ্ফগন্ধো ফলগন্ধো আমকগন্ধো ৱিস্সগন্ধো সুগন্ধো দুগ্গন্ধো, যো ৱা পনঞ্ঞোপি অত্থি গন্ধো চতুন্নং মহাভূতানং উপাদায অনিদস্সনো সপ্পটিঘো, যং গন্ধং অনিদস্সনং সপ্পটিঘং ঘানেন অনিদস্সনেন সপ্পটিঘেন ঘাযি ৱা ঘাযতি ৱা ঘাযিস্সতি ৱা ঘাযে ৱা, গন্ধো পেসো গন্ধাযতনং পেতং গন্ধধাতু পেসা – ইদং তং ৰূপং গন্ধাযতনং.

৬২৫. কতমং তং ৰূপং গন্ধাযতনং? যো গন্ধো চতুন্নং মহাভূতানং উপাদায অনিদস্সনো সপ্পটিঘো মূলগন্ধো সাৰগন্ধো তচগন্ধো পত্তগন্ধো পুপ্ফগন্ধো ফলগন্ধো আমকগন্ধো ৱিস্সগন্ধো সুগন্ধো দুগ্গন্ধো, যো ৱা পনঞ্ঞোপি অত্থি গন্ধো চতুন্নং মহাভূতানং উপাদায অনিদস্সনো সপ্পটিঘো, যম্হি গন্ধম্হি অনিদস্সনম্হি সপ্পটিঘম্হি ঘানং অনিদস্সনং সপ্পটিঘং পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, গন্ধো পেসো গন্ধাযতনং পেতং গন্ধধাতু পেসা – ইদং তং ৰূপং গন্ধাযতনং.

৬২৬. কতমং তং ৰূপং গন্ধাযতনং? যো গন্ধো চতুন্নং মহাভূতানং উপাদায অনিদস্সনো সপ্পটিঘো মূলগন্ধো সাৰগন্ধো তচগন্ধো পত্তগন্ধো পুপ্ফগন্ধো ফলগন্ধো আমকগন্ধো ৱিস্সগন্ধো সুগন্ধো দুগ্গন্ধো, যো ৱা পনঞ্ঞোপি অত্থি গন্ধো চতুন্নং মহাভূতানং উপাদায অনিদস্সনো সপ্পটিঘো, যো গন্ধো অনিদস্সনো সপ্পটিঘো ঘানম্হি অনিদস্সনম্হি সপ্পটিঘম্হি পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, গন্ধো পেসো গন্ধাযতনং পেতং গন্ধধাতু পেসা – ইদং তং ৰূপং গন্ধাযতনং.

৬২৭. কতমং তং ৰূপং গন্ধাযতনং? যো গন্ধো চতুন্নং মহাভূতানং উপাদায অনিদস্সনো সপ্পটিঘো মূলগন্ধো সাৰগন্ধো তচগন্ধো পত্তগন্ধো পুপ্ফগন্ধো ফলগন্ধো আমকগন্ধো ৱিস্সগন্ধো সুগন্ধো দুগ্গন্ধো, যো ৱা পনঞ্ঞোপি অত্থি গন্ধো চতুন্নং মহাভূতানং উপাদায অনিদস্সনো সপ্পটিঘো, যং গন্ধং আৰব্ভ ঘানং নিস্সায ঘানসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং গন্ধং আৰব্ভ ঘানং নিস্সায ঘানসম্ফস্সজা ৱেদনা…পে… সঞ্ঞা…পে… চেতনা…পে… ঘানৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং গন্ধাৰম্মণো ঘানং নিস্সায ঘানসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং গন্ধাৰম্মণা ঘানং নিস্সায ঘানসম্ফস্সজা ৱেদনা…পে… সঞ্ঞা…পে… চেতনা…পে… ঘানৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা, গন্ধো পেসো গন্ধাযতনং পেতং গন্ধধাতু পেসা – ইদং তং ৰূপং গন্ধাযতনং.

৬২৮. কতমং তং ৰূপং ৰসাযতনং? যো ৰসো চতুন্নং মহাভূতানং উপাদায অনিদস্সনো সপ্পটিঘো মূলৰসো খন্ধৰসো তচৰসো পত্তৰসো পুপ্ফৰসো ফলৰসো অম্বিলং মধুৰং তিত্তকং কটুকং লোণিকং খাৰিকং লম্বিলং [লপিলকং (সী.)] কসাৱো সাদু অসাদু, যো ৱা পনঞ্ঞোপি অত্থি ৰসো চতুন্নং মহাভূতানং উপাদায অনিদস্সনো সপ্পটিঘো, যং ৰসং অনিদস্সনং সপ্পটিঘং জিৱ্হায অনিদস্সনায সপ্পটিঘায সাযি ৱা সাযতি ৱা সাযিস্সতি ৱা সাযে ৱা, ৰসো পেসো ৰসাযতনং পেতং ৰসধাতু পেসা – ইদং তং ৰূপং ৰসাযতনং.

৬২৯. কতমং তং ৰূপং ৰসাযতনং? যো ৰসো চতুন্নং মহাভূতানং উপাদায অনিদস্সনো সপ্পটিঘো মূলৰসো খন্ধৰসো তচৰসো পত্তৰসো পুপ্ফৰসো ফলৰসো অম্বিলং মধুৰং তিত্তকং কটুকং লোণিকং খাৰিকং লম্বিলং কসাৱো সাদু অসাদু, যো ৱা পনঞ্ঞোপি অত্থি ৰসো চতুন্নং মহাভূতানং উপাদায অনিদস্সনো সপ্পটিঘো, যম্হি ৰসম্হি অনিদস্সনম্হি সপ্পটিঘম্হি জিৱ্হা অনিদস্সনা সপ্পটিঘা পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, ৰসো পেসো ৰসাযতনং পেতং ৰসধাতু পেসা – ইদং তং ৰূপং ৰসাযতনং.

৬৩০. কতমং তং ৰূপং ৰসাযতনং? যো ৰসো চতুন্নং মহাভূতানং উপাদায অনিদস্সনো সপ্পটিঘো মূলৰসো খন্ধৰসো তচৰসো পত্তৰসো পুপ্ফৰসো ফলৰসো অম্বিলং মধুৰং তিত্তকং কটুকং লোণিকং খাৰিকং লম্বিলং কসাৱো সাদু অসাদু, যো ৱা পনঞ্ঞোপি অত্থি ৰসো চতুন্নং মহাভূতানং উপাদায অনিদস্সনো সপ্পটিঘো, যো ৰসো অনিদস্সনো সপ্পটিঘো জিৱ্হায অনিদস্সনায সপ্পটিঘায পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, ৰসো পেসো ৰসাযতনং পেতং ৰসধাতু পেসা – ইদং তং ৰূপং ৰসাযতনং.

৬৩১. কতমং তং ৰূপং ৰসাযতনং? যো ৰসো চতুন্নং মহাভূতানং উপাদায অনিদস্সনো সপ্পটিঘো মূলৰসো খন্ধৰসো তচৰসো পত্তৰসো পুপ্ফৰসো ফলৰসো অম্বিলং মধুৰং তিত্তকং কটুকং লোণিকং খাৰিকং লম্বিলং কসাৱো সাদু অসাদু, যো ৱা পনঞ্ঞোপি অত্থি ৰসো চতুন্নং মহাভূতানং উপাদায অনিদস্সনো সপ্পটিঘো, যং ৰসং আৰব্ভ জিৱ্হং নিস্সায জিৱ্হাসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং ৰসং আৰব্ভ জিৱ্হং নিস্সায জিৱ্হাসম্ফস্সজা ৱেদনা…পে… সঞ্ঞা…পে… চেতনা…পে… জিৱ্হাৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং ৰসাৰম্মণো জিৱ্হং নিস্সায জিৱ্হাসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং ৰসাৰম্মণা জিৱ্হং নিস্সায জিৱ্হাসম্ফস্সজা ৱেদনা…পে… সঞ্ঞা…পে… চেতনা…পে… জিৱ্হাৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা, ৰসো পেসো ৰসাযতনং পেতং ৰসধাতু পেসা – ইদং তং ৰূপং ৰসাযতনং.

৬৩২. কতমং তং ৰূপং ইত্থিন্দ্ৰিযং? যং ইত্থিযা ইত্থিলিঙ্গং ইত্থিনিমিত্তং ইত্থিকুত্তং ইত্থাকপ্পো ইত্থত্তং ইত্থিভাৱো [ইত্থিত্তং ইত্থীভাৱো (স্যা.)] – ইদং তং ৰূপং ইত্থিন্দ্ৰিযং.

৬৩৩. কতমং তং ৰূপং পুৰিসিন্দ্ৰিযং? যং পুৰিসস্স পুৰিসলিঙ্গং পুৰিসনিমিত্তং পুৰিসকুত্তং পুৰিসাকপ্পো পুৰিসত্তং পুৰিসভাৱো – ইদং তং ৰূপং পুৰিসিন্দ্ৰিযং.

৬৩৪. কতমং তং ৰূপং জীৱিতিন্দ্ৰিযং? যো তেসং ৰূপীনং ধম্মানং আযু ঠিতি যপনা যাপনা ইৰিযনা ৱত্তনা পালনা জীৱিতং জীৱিতিন্দ্ৰিযং – ইদং তং ৰূপং জীৱিতিন্দ্ৰিযং.

৬৩৫. কতমং তং ৰূপং কাযৱিঞ্ঞত্তি? যা কুসলচিত্তস্স ৱা অকুসলচিত্তস্স ৱা অব্যাকতচিত্তস্স ৱা অভিক্কমন্তস্স ৱা পটিক্কমন্তস্স ৱা আলোকেন্তস্স ৱা ৱিলোকেন্তস্স ৱা সমিঞ্জেন্তস্স ৱা পসাৰেন্তস্স ৱা কাযস্স থম্ভনা সন্থম্ভনা সন্থম্ভিতত্তং ৱিঞ্ঞত্তি ৱিঞ্ঞাপনা ৱিঞ্ঞাপিতত্তং – ইদং তং ৰূপং কাযৱিঞ্ঞত্তি.

৬৩৬. কতমং তং ৰূপং ৱচীৱিঞ্ঞত্তি? যা কুসলচিত্তস্স ৱা অকুসলচিত্তস্স ৱা অব্যাকতচিত্তস্স ৱা ৱাচা গিৰা ব্যপ্পথো উদীৰণং ঘোসো ঘোসকম্মং ৱাচা ৱচীভেদো – অযং ৱুচ্চতি ৱাচা. যা তায ৱাচায ৱিঞ্ঞত্তি ৱিঞ্ঞাপনা ৱিঞ্ঞাপিতত্তং – ইদং তং ৰূপং ৱচীৱিঞ্ঞত্তি.

৬৩৭. কতমং তং ৰূপং আকাসধাতু? যো আকাসো আকাসগতং অঘং অঘগতং ৱিৱৰো ৱিৱৰগতং অসম্ফুট্ঠং চতূহি মহাভূতেহি – ইদং তং ৰূপং আকাসধাতু.

৬৩৮. কতমং তং ৰূপং ৰূপস্স লহুতা? যা ৰূপস্স লহুতা লহুপৰিণামতা অদন্ধনতা অৱিত্থনতা – ইদং তং ৰূপং ৰূপস্স লহুতা.

৬৩৯. কতমং তং ৰূপং ৰূপস্স মুদুতা? যা ৰূপস্স মুদুতা মদ্দৱতা অকক্খড়তা অকথিনতা – ইদং তং ৰূপং ৰূপস্স মুদুতা.

৬৪০. কতমং তং ৰূপং ৰূপস্স কম্মঞ্ঞতা? যা ৰূপস্স কম্মঞ্ঞতা কম্মঞ্ঞত্তং কম্মঞ্ঞভাৱো – ইদং তং ৰূপং ৰূপস্স কম্মঞ্ঞতা.

৬৪১. কতমং তং ৰূপং ৰূপস্স উপচযো? যো আযতনানং আচযো, সো ৰূপস্স উপচযো – ইদং তং ৰূপং ৰূপস্স উপচযো.

৬৪২. কতমং তং ৰূপং ৰূপস্স সন্ততি? যো ৰূপস্স উপচযো, সা ৰূপস্স সন্ততি – ইদং তং ৰূপং ৰূপস্স সন্ততি.

৬৪৩. কতমং তং ৰূপং ৰূপস্স জৰতা? যা ৰূপস্স জৰা জীৰণতা খণ্ডিচ্চং পালিচ্চং ৱলিত্তচতা আযুনো সংহানি ইন্দ্ৰিযানং পৰিপাকো – ইদং তং ৰূপং ৰূপস্স জৰতা.

৬৪৪. কতমং তং ৰূপং ৰূপস্স অনিচ্চতা? যো ৰূপস্স খযো ৱযো ভেদো পৰিভেদো অনিচ্চতা অন্তৰধানং – ইদং তং ৰূপং ৰূপস্স অনিচ্চতা.

৬৪৫. কতমং তং ৰূপং কবড়ীকাৰো আহাৰো? ওদনো কুম্মাসো সত্তু মচ্ছো মংসং খীৰং দধি সপ্পি নৱনীতং তেলং মধু ফাণিতং, যং ৱা পনঞ্ঞম্পি অত্থি ৰূপং যম্হি যম্হি জনপদে তেসং তেসং সত্তানং মুখাসিযং দন্তৱিখাদনং গলজ্ঝোহৰণীযং কুচ্ছিৱিত্থম্ভনং, যায ওজায সত্তা যাপেন্তি – ইদং তং ৰূপং কবড়ীকাৰো আহাৰো.

ইদং তং ৰূপং উপাদা.

উপাদাভাজনীযং.

ৰূপকণ্ডে পঠমভাণৱাৰো.

৬৪৬. কতমং তং ৰূপং নো উপাদা? ফোট্ঠব্বাযতনং, আপোধাতু.

৬৪৭. কতমং তং ৰূপং ফোট্ঠব্বাযতনং? পথৱীধাতু তেজোধাতু ৱাযোধাতু কক্খড়ং মুদুকং সণ্হং ফৰুসং সুখসম্ফস্সং দুক্খসম্ফস্সং গৰুকং লহুকং, যং ফোট্ঠব্বং অনিদস্সনং সপ্পটিঘং কাযেন অনিদস্সনেন সপ্পটিঘেন ফুসি ৱা ফুসতি ৱা ফুসিস্সতি ৱা ফুসে ৱা ফোট্ঠব্বো পেসো ফোট্ঠব্বাযতনং পেতং ফোট্ঠব্বধাতু পেসা – ইদং তং ৰূপং ফোট্ঠব্বাযতনং.

৬৪৮. কতমং তং ৰূপং ফোট্ঠব্বাযতনং? পথৱীধাতু তেজোধাতু ৱাযোধাতু কক্খড়ং মুদুকং সণ্হং ফৰুসং সুখসম্ফস্সং দুক্খসম্ফস্সং গৰুকং লহুকং, যম্হি ফোট্ঠব্বম্হি অনিদস্সনম্হি সপ্পটিঘম্হি কাযো অনিদস্সনো সপ্পটিঘো পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, ফোট্ঠব্বো পেসো ফোট্ঠব্বাযতনং পেতং ফোট্ঠব্বধাতু পেসা – ইদং তং ৰূপং ফোট্ঠব্বাযতনং.

৬৪৯. কতমং তং ৰূপং ফোট্ঠব্বাযতনং? পথৱীধাতু তেজোধাতু ৱাযোধাতু কক্খড়ং মুদুকং সণ্হং ফৰুসং সুখসম্ফস্সং দুক্খসম্ফস্সং গৰুকং লহুকং, যো ফোট্ঠব্বো অনিদস্সনো সপ্পটিঘো কাযম্হি অনিদস্সনম্হি সপ্পটিঘম্হি পটিহঞ্ঞি ৱা পটিহঞ্ঞতি ৱা পটিহঞ্ঞিস্সতি ৱা পটিহঞ্ঞে ৱা, ফোট্ঠব্বো পেসো ফোট্ঠব্বাযতনং পেতং ফোট্ঠব্বধাতু পেসা – ইদং তং ৰূপং ফোট্ঠব্বাযতনং.

৬৫০. কতমং তং ৰূপং ফোট্ঠব্বাযতনং? পথৱীধাতু তেজোধাতু ৱাযোধাতু কক্খড়ং মুদুকং সণ্হং ফৰুসং সুখসম্ফস্সং দুক্খসম্ফস্সং গৰুকং লহুকং, যং ফোট্ঠব্বং আৰব্ভ কাযং নিস্সায কাযসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং ফোট্ঠব্বং আৰব্ভ কাযং নিস্সায কাযসম্ফস্সজা ৱেদনা…পে… সঞ্ঞা…পে… চেতনা…পে… কাযৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং ফোট্ঠব্বাৰম্মণো কাযং নিস্সায কাযসম্ফস্সো উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা…পে… যং ফোট্ঠব্বাৰম্মণা কাযং নিস্সায কাযসম্ফস্সজা ৱেদনা…পে… সঞ্ঞা…পে… চেতনা…পে… কাযৱিঞ্ঞাণং উপ্পজ্জি ৱা উপ্পজ্জতি ৱা উপ্পজ্জিস্সতি ৱা উপ্পজ্জে ৱা, ফোট্ঠব্বো পেসো ফোট্ঠব্বাযতনং পেতং ফোট্ঠব্বধাতু পেসা – ইদং তং ৰূপং ফোট্ঠব্বাযতনং.

৬৫১. কতমং তং ৰূপং আপোধাতু? যং আপো আপোগতং সিনেহো সিনেহগতং বন্ধনত্তং ৰূপস্স – ইদং তং ৰূপং আপোধাতু.

ইদং তং ৰূপং নো উপাদা.

৬৫২. কতমং তং ৰূপং উপাদিণ্ণং? চক্খাযতনং সোতাযতনং ঘানাযতনং জিৱ্হাযতনং কাযাযতনং ইত্থিন্দ্ৰিযং পুৰিসিন্দ্ৰিযং জীৱিতিন্দ্ৰিযং, যং ৱা পনঞ্ঞম্পি অত্থি ৰূপং কম্মস্স কতত্তা ৰূপাযতনং গন্ধাযতনং ৰসাযতনং ফোট্ঠব্বাযতনং আকাসধাতু আপোধাতু ৰূপস্স উপচযো ৰূপস্স সন্ততি কবড়ীকাৰো আহাৰো – ইদং তং ৰূপং উপাদিণ্ণং.

৬৫৩. কতমং তং ৰূপং অনুপাদিণ্ণং? সদ্দাযতনং কাযৱিঞ্ঞত্তি ৱচীৱিঞ্ঞত্তি ৰূপস্স লহুতা ৰূপস্স মুদুতা ৰূপস্স কম্মঞ্ঞতা ৰূপস্স জৰতা ৰূপস্স অনিচ্চতা, যং ৱা পনঞ্ঞম্পি অত্থি ৰূপং ন কম্মস্স কতত্তা ৰূপাযতনং গন্ধাযতনং ৰসাযতনং ফোট্ঠব্বাযতনং আকাসধাতু আপোধাতু ৰূপস্স উপচযো ৰূপস্স সন্ততি কবড়ীকাৰো আহাৰো – ইদং তং ৰূপং অনুপাদিণ্ণং.

৬৫৪. কতমং তং ৰূপং উপাদিণ্ণুপাদানিযং? চক্খাযতনং…পে… কাযাযতনং ইত্থিন্দ্ৰিযং পুৰিসিন্দ্ৰিযং জীৱিতিন্দ্ৰিযং, যং ৱা পনঞ্ঞম্পি অত্থি ৰূপং কম্মস্স কতত্তা ৰূপাযতনং গন্ধাযতনং ৰসাযতনং ফোট্ঠব্বাযতনং আকাসধাতু আপোধাতু ৰূপস্স উপচযো ৰূপস্স সন্ততি কবড়ীকাৰো আহাৰো – ইদং তং ৰূপং উপাদিণ্ণুপাদানিযং.

৬৫৫. কতমং তং ৰূপং অনুপাদিণ্ণুপাদানিযং? সদ্দাযতনং কাযৱিঞ্ঞত্তি ৱচীৱিঞ্ঞত্তি ৰূপস্স লহুতা ৰূপস্স মুদুতা ৰূপস্স কম্মঞ্ঞতা ৰূপস্স জৰতা ৰূপস্স অনিচ্চতা, যং ৱা পনঞ্ঞম্পি অত্থি ৰূপং ন কম্মস্স কতত্তা, ৰূপাযতনং গন্ধাযতনং ৰসাযতনং ফোট্ঠব্বাযতনং আকাসধাতু আপোধাতু ৰূপস্স উপচযো ৰূপস্স সন্ততি কবড়ীকাৰো আহাৰো – ইদং তং ৰূপং অনুপাদিণ্ণুপাদানিযং.

৬৫৬. কতমং তং ৰূপং সনিদস্সনং? ৰূপাযতনং – ইদং তং ৰূপং সনিদস্সনং.

৬৫৭. কতমং তং ৰূপং অনিদস্সনং? চক্খাযতনং…পে… কবড়ীকাৰো আহাৰো – ইদং তং ৰূপং অনিদস্সনং.

৬৫৮. কতমং তং ৰূপং সপ্পটিঘং? চক্খাযতনং সোতাযতনং ঘানাযতনং জিৱ্হাযতনং কাযাযতনং ৰূপাযতনং সদ্দাযতনং গন্ধাযতনং ৰসাযতনং ফোট্ঠব্বাযতনং – ইদং তং ৰূপং সপ্পটিঘং.

৬৫৯. কতমং তং ৰূপং অপ্পটিঘং? ইত্থিন্দ্ৰিযং…পে… কবড়ীকাৰো আহাৰো – ইদং তং ৰূপং অপ্পটিঘং.

৬৬০. কতমং তং ৰূপং ইন্দ্ৰিযং? চক্খুন্দ্ৰিযং সোতিন্দ্ৰিযং ঘানিন্দ্ৰিযং জিৱ্হিন্দ্ৰিযং কাযিন্দ্ৰিযং ইত্থিন্দ্ৰিযং পুৰিসিন্দ্ৰিযং জীৱিতিন্দ্ৰিযং – ইদং তং ৰূপং ইন্দ্ৰিযং.

৬৬১. কতমং তং ৰূপং ন ইন্দ্ৰিযং? ৰূপাযতনং…পে… কবড়ীকাৰো আহাৰো – ইদং তং ৰূপং ন ইন্দ্ৰিযং.

৬৬২. কতমং তং ৰূপং মহাভূতং? ফোট্ঠব্বাযতনং আপোধাতু – ইদং তং ৰূপং মহাভূতং.

৬৬৩. কতমং তং ৰূপং ন মহাভূতং? চক্খাযতনং…পে… কবড়ীকাৰো আহাৰো – ইদং তং ৰূপং ন মহাভূতং.

৬৬৪. কতমং তং ৰূপং ৱিঞ্ঞত্তি? কাযৱিঞ্ঞত্তি ৱচীৱিঞ্ঞত্তি – ইদং তং ৰূপং ৱিঞ্ঞত্তি.

৬৬৫. কতমং তং ৰূপং ন ৱিঞ্ঞত্তি? চক্খাযতনং…পে… কবড়ীকাৰো আহাৰো – ইদং তং ৰূপং ন ৱিঞ্ঞত্তি.

৬৬৬. কতমং তং ৰূপং চিত্তসমুট্ঠানং? কাযৱিঞ্ঞত্তি ৱচীৱিঞ্ঞত্তি যং ৱা পনঞ্ঞম্পি অত্থি ৰূপং চিত্তজং চিত্তহেতুকং চিত্তসমুট্ঠানং ৰূপাযতনং সদ্দাযতনং গন্ধাযতনং ৰসাযতনং ফোট্ঠব্বাযতনং আকাসধাতু আপোধাতু ৰূপস্স লহুতা ৰূপস্স মুদুতা ৰূপস্স কম্মঞ্ঞতা ৰূপস্স উপচযো ৰূপস্স সন্ততি কবড়ীকাৰো আহাৰো – ইদং তং ৰূপং চিত্তসমুট্ঠানং.

৬৬৭. কতমং তং ৰূপং ন চিত্তসমুট্ঠানং? চক্খাযতনং…পে… কাযাযতনং ইত্থিন্দ্ৰিযং পুৰিসিন্দ্ৰিযং জীৱিতিন্দ্ৰিযং ৰূপস্স জৰতা ৰূপস্স অনিচ্চতা, যং ৱা পনঞ্ঞম্পি অত্থি ৰূপং ন চিত্তজং ন চিত্তহেতুকং ন চিত্তসমুট্ঠানং ৰূপাযতনং সদ্দাযতনং গন্ধাযতনং ৰসাযতনং ফোট্ঠব্বাযতনং আকাসধাতু আপোধাতু ৰূপস্স লহুতা ৰূপস্স মুদুতা ৰূপস্স কম্মঞ্ঞতা ৰূপস্স উপচযো ৰূপস্স সন্ততি কবড়ীকাৰো আহাৰো – ইদং তং ৰূপং ন চিত্তসমুট্ঠানং.

৬৬৮. কতমং তং ৰূপং চিত্তসহভু? কাযৱিঞ্ঞত্তি ৱচীৱিঞ্ঞত্তি – ইদং তং ৰূপং চিত্তসহভু.

৬৬৯. কতমং তং ৰূপং ন চিত্তসহভু? চক্খাযতনং…পে… কবড়ীকাৰো আহাৰো – ইদং তং ৰূপং ন চিত্তসহভু.

৬৭০. কতমং তং ৰূপং চিত্তানুপৰিৱত্তি? কাযৱিঞ্ঞত্তি ৱচীৱিঞ্ঞত্তি – ইদং তং ৰূপং চিত্তানুপৰিৱত্তি.

৬৭১. কতমং তং ৰূপং ন চিত্তানুপৰিৱত্তি? চক্খাযতনং…পে… কবড়ীকাৰো আহাৰো – ইদং তং ৰূপং ন চিত্তানুপৰিৱত্তি.

৬৭২. কতমং তং ৰূপং অজ্ঝত্তিকং? চক্খাযতনং…পে… কাযাযতনং – ইদং তং ৰূপং অজ্ঝত্তিকং.

৬৭৩. কতমং তং ৰূপং বাহিৰং? ৰূপাযতনং…পে… কবড়ীকাৰো আহাৰো – ইদং তং ৰূপং বাহিৰং.

৬৭৪. কতমং তং ৰূপং ওড়াৰিকং? চক্খাযতনং…পে… ফোট্ঠব্বাযতনং – ইদং তং ৰূপং ওড়াৰিকং.

৬৭৫. কতমং তং ৰূপং সুখুমং? ইত্থিন্দ্ৰিযং…পে… কবড়ীকাৰো আহাৰো – ইদং তং ৰূপং সুখুমং.

৬৭৬. কতমং তং ৰূপং দূৰে? ইত্থিন্দ্ৰিযং…পে… কবড়ীকাৰো আহাৰো – ইদং তং ৰূপং দূৰে.

৬৭৭. কতমং তং ৰূপং সন্তিকে? চক্খাযতনং…পে… ফোট্ঠব্বাযতনং – ইদং তং ৰূপং সন্তিকে.

৬৭৮. কতমং তং ৰূপং চক্খুসম্ফস্সস্স ৱত্থু? চক্খাযতনং – ইদং তং ৰূপং চক্খুসম্ফস্সস্স ৱত্থু.

৬৭৯. কতমং তং ৰূপং চক্খুসম্ফস্সস্স ন ৱত্থু? সোতাযতনং…পে… কবড়ীকাৰো আহাৰো – ইদং তং ৰূপং চক্খুসম্ফস্সস্স ন ৱত্থু.

৬৮০. কতমং তং ৰূপং চক্খুসম্ফস্সজায ৱেদনায…পে… সঞ্ঞায…পে… চেতনায …পে… চক্খুৱিঞ্ঞাণস্স ৱত্থু? চক্খাযতনং – ইদং তং ৰূপং চক্খুৱিঞ্ঞাণস্স ৱত্থু.

৬৮১. কতমং তং ৰূপং চক্খুৱিঞ্ঞাণস্স ন ৱত্থু? সোতাযতনং…পে… কবড়ীকাৰো আহাৰো – ইদং তং ৰূপং চক্খুৱিঞ্ঞাণস্স ন ৱত্থু.

৬৮২. কতমং তং ৰূপং সোতসম্ফস্সস্স…পে… ঘানসম্ফস্সস্স…পে… জিৱ্হাসম্ফস্সস্স…পে… কাযসম্ফস্সস্স ৱত্থু? কাযাযতনং – ইদং তং ৰূপং কাযসম্ফস্সস্স ৱত্থু.

৬৮৩. কতমং তং ৰূপং কাযসম্ফস্সস্স ন ৱত্থু? চক্খাযতনং…পে… কবড়ীকাৰো আহাৰো – ইদং তং ৰূপং কাযসম্ফস্সস্স ন ৱত্থু.

৬৮৪. কতমং তং ৰূপং কাযসম্ফস্সজায ৱেদনায…পে… সঞ্ঞায…পে… চেতনায…পে… কাযৱিঞ্ঞাণস্স ৱত্থু? কাযাযতনং – ইদং তং ৰূপং কাযৱিঞ্ঞাণস্স ৱত্থু.

৬৮৫. কতমং তং ৰূপং কাযৱিঞ্ঞাণস্স ন ৱত্থু? চক্খাযতনং…পে… কবড়ীকাৰো আহাৰো – ইদং তং ৰূপং কাযৱিঞ্ঞাণস্স ন ৱত্থু.

৬৮৬. কতমং তং ৰূপং চক্খুসম্ফস্সস্স আৰম্মণং? ৰূপাযতনং – ইদং তং ৰূপং চক্খুসম্ফস্সস্স আৰম্মণং.

৬৮৭. কতমং তং ৰূপং চক্খুসম্ফস্সস্স ন আৰম্মণং? চক্খাযতনং…পে… কবড়ীকাৰো আহাৰো – ইদং তং ৰূপং চক্খুসম্ফস্সস্স ন আৰম্মণং.

৬৮৮. কতমং তং ৰূপং চক্খুসম্ফস্সজায ৱেদনায…পে… সঞ্ঞায…পে… চেতনায…পে… চক্খুৱিঞ্ঞাণস্স আৰম্মণং? ৰূপাযতনং – ইদং তং ৰূপং চক্খুৱিঞ্ঞাণস্স আৰম্মণং.

৬৮৯. কতমং তং ৰূপং চক্খুৱিঞ্ঞাণস্স ন আৰম্মণং? চক্খাযতনং…পে… কবড়ীকাৰো আহাৰো – ইদং তং ৰূপং চক্খুৱিঞ্ঞাণস্স ন আৰম্মণং.

৬৯০. কতমং তং ৰূপং সোতসম্ফস্সস্স…পে… ঘানসম্ফস্সস্স …পে… জিৱ্হাসম্ফস্সস্স…পে… কাযসম্ফস্সস্স আৰম্মণং? ফোট্ঠব্বাযতনং – ইদং তং ৰূপং কাযসম্ফস্সস্স আৰম্মণং.

৬৯১. কতমং তং ৰূপং কাযসম্ফস্সস্স ন আৰম্মণং? চক্খাযতনং…পে… কবড়ীকাৰো আহাৰো – ইদং তং ৰূপং কাযসম্ফস্সস্স ন আৰম্মণং.

৬৯২. কতমং তং ৰূপং কাযসম্ফস্সজায ৱেদনায…পে… সঞ্ঞায…পে… চেতনায…পে… কাযৱিঞ্ঞাণস্স আৰম্মণং? ফোট্ঠব্বাযতনং – ইদং তং ৰূপং কাযৱিঞ্ঞাণস্স আৰম্মণং.

৬৯৩. কতমং তং ৰূপং কাযৱিঞ্ঞাণস্স ন আৰম্মণং? চক্খাযতনং…পে… কবড়ীকাৰো আহাৰো – ইদং তং ৰূপং কাযৱিঞ্ঞাণস্স ন আৰম্মণং.

৬৯৪. কতমং তং ৰূপং চক্খাযতনং? যং চক্খু চতুন্নং মহাভূতানং উপাদায পসাদো…পে… সুঞ্ঞো গামো পেসো – ইদং তং ৰূপং চক্খাযতনং.

৬৯৫. কতমং তং ৰূপং ন চক্খাযতনং? সোতাযতনং…পে… কবড়ীকাৰো আহাৰো – ইদং তং ৰূপং ন চক্খাযতনং.

৬৯৬. কতমং তং ৰূপং সোতাযতনং…পে… ঘানাযতনং…পে… জিৱ্হাযতনং…পে… কাযাযতনং? যো কাযো চতুন্নং মহাভূতানং উপাদায পসাদো…পে… সুঞ্ঞো গামো পেসো – ইদং তং ৰূপং কাযাযতনং.

৬৯৭. কতমং তং ৰূপং ন কাযাযতনং? চক্খাযতনং…পে… কবড়ীকাৰো আহাৰো – ইদং তং ৰূপং ন কাযাযতনং.

৬৯৮. কতমং তং ৰূপং ৰূপাযতনং? যং ৰূপং চতুন্নং মহাভূতানং উপাদায ৱণ্ণনিভা…পে… ৰূপধাতু পেসা – ইদং তং ৰূপং ৰূপাযতনং.

৬৯৯. কতমং তং ৰূপং ন ৰূপাযতনং? চক্খাযতনং…পে… কবড়ীকাৰো আহাৰো – ইদং তং ৰূপং ন ৰূপাযতনং.

৭০০. কতমং তং ৰূপং সদ্দাযতনং…পে… গন্ধাযতনং …পে… ৰসাযতনং…পে… ফোট্ঠব্বাযতনং? পথৱীধাতু…পে… ফোট্ঠব্বধাতু পেসা – ইদং তং ৰূপং ফোট্ঠব্বাযতনং.

৭০১. কতমং তং ৰূপং ন ফোট্ঠব্বাযতনং? চক্খাযতনং…পে… কবড়ীকাৰো আহাৰো – ইদং তং ৰূপং ন ফোট্ঠব্বাযতনং.

৭০২. কতমং তং ৰূপং চক্খুধাতু? চক্খাযতনং – ইদং তং ৰূপং চক্খুধাতু.

৭০৩. কতমং তং ৰূপং ন চক্খুধাতু? সোতাযতনং…পে… কবড়ীকাৰো আহাৰো – ইদং তং ৰূপং ন চক্খুধাতু.

৭০৪. কতমং তং ৰূপং সোতধাতু…পে… ঘানধাতু…পে… জিৱ্হাধাতু…পে… কাযধাতু? কাযাযতনং – ইদং তং ৰূপং কাযধাতু.

৭০৫. কতমং তং ৰূপং ন কাযধাতু? চক্খাযতনং…পে… কবড়ীকাৰো আহাৰো – ইদং তং ৰূপং ন কাযধাতু.

৭০৬. কতমং তং ৰূপং ৰূপধাতু? ৰূপাযতনং – ইদং তং ৰূপং ৰূপধাতু.

৭০৭. কতমং তং ৰূপং ন ৰূপধাতু? চক্খাযতনং…পে… কবড়ীকাৰো আহাৰো – ইদং তং ৰূপং ন ৰূপধাতু.

৭০৮. কতমং তং ৰূপং সদ্দধাতু…পে… গন্ধধাতু…পে… ৰসধাতু…পে… ফোট্ঠব্বধাতু? ফোট্ঠব্বাযতনং – ইদং তং ৰূপং ফোট্ঠব্বধাতু.

৭০৯. কতমং তং ৰূপং ন ফোট্ঠব্বধাতু? চক্খাযতনং…পে… কবড়ীকাৰো আহাৰো – ইদং তং ৰূপং ন ফোট্ঠব্বধাতু.

৭১০. কতমং তং ৰূপং চক্খুন্দ্ৰিযং? যং চক্খু চতুন্নং মহাভূতানং উপাদায পসাদো…পে… সুঞ্ঞো গামো পেসো – ইদং তং ৰূপং চক্খুন্দ্ৰিযং.

৭১১. কতমং তং ৰূপং ন চক্খুন্দ্ৰিযং? সোতাযতনং…পে… কবড়ীকাৰো আহাৰো – ইদং তং ৰূপং ন চক্খুন্দ্ৰিযং.

৭১২. কতমং তং ৰূপং সোতিন্দ্ৰিযং…পে… ঘানিন্দ্ৰিযং…পে… জিৱ্হিন্দ্ৰিযং…পে… কাযিন্দ্ৰিযং? যো কাযো চতুন্নং মহাভূতানং উপাদায পসাদো…পে… সুঞ্ঞো গামো পেসো – ইদং তং ৰূপং কাযিন্দ্ৰিযং.

৭১৩. কতমং তং ৰূপং ন কাযিন্দ্ৰিযং? চক্খাযতনং…পে… কবড়ীকাৰো আহাৰো – ইদং তং ৰূপং ন কাযিন্দ্ৰিযং.

৭১৪. কতমং তং ৰূপং ইত্থিন্দ্ৰিযং? যং ইত্থিযা ইত্থিলিঙ্গং ইত্থিনিমিত্তং ইত্থিকুত্তং ইত্থাকপ্পো ইত্থত্তং ইত্থিভাৱো – ইদং তং ৰূপং ইত্থিন্দ্ৰিযং.

৭১৫. কতমং তং ৰূপং ন ইত্থিন্দ্ৰিযং? চক্খাযতনং…পে… কবড়ীকাৰো আহাৰো – ইদং তং ৰূপং ন ইত্থিন্দ্ৰিযং.

৭১৬. কতমং তং ৰূপং পুৰিসিন্দ্ৰিযং? যং পুৰিসস্স পুৰিসলিঙ্গং পুৰিসনিমিত্তং পুৰিসকুত্তং পুৰিসাকপ্পো পুৰিসত্তং পুৰিসভাৱো – ইদং তং ৰূপং পুৰিসিন্দ্ৰিযং.

৭১৭. কতমং তং ৰূপং ন পুৰিসিন্দ্ৰিযং? চক্খাযতনং…পে… কবড়ীকাৰো আহাৰো – ইদং তং ৰূপং ন পুৰিসিন্দ্ৰিযং.

৭১৮. কতমং তং ৰূপং জীৱিতিন্দ্ৰিযং? যো তেসং ৰূপীনং ধম্মানং আযু ঠিতি যপনা যাপনা ইৰিযনা ৱত্তনা পালনা জীৱিতং জীৱিতিন্দ্ৰিযং – ইদং তং ৰূপং জীৱিতিন্দ্ৰিযং.

৭১৯. কতমং তং ৰূপং ন জীৱিতিন্দ্ৰিযং? চক্খাযতনং…পে… কবড়ীকাৰো আহাৰো – ইদং তং ৰূপং ন জীৱিতিন্দ্ৰিযং.

৭২০. কতমং তং ৰূপং কাযৱিঞ্ঞত্তি? যা কুসলচিত্তস্স ৱা অকুসলচিত্তস্স ৱা অব্যাকতচিত্তস্স ৱা অভিক্কমন্তস্স ৱা পটিক্কমন্তস্স ৱা আলোকেন্তস্স ৱা ৱিলোকেন্তস্স ৱা সমিঞ্জেন্তস্স ৱা পসাৰেন্তস্স ৱা কাযস্স থম্ভনা সন্থম্ভনা সন্থম্ভিতত্তং ৱিঞ্ঞত্তি ৱিঞ্ঞাপনা ৱিঞ্ঞাপিতত্তং – ইদং তং ৰূপং কাযৱিঞ্ঞত্তি.

৭২১. কতমং তং ৰূপং ন কাযৱিঞ্ঞত্তি? চক্খাযতনং…পে… কবড়ীকাৰো আহাৰো – ইদং তং ৰূপং ন কাযৱিঞ্ঞত্তি.

৭২২. কতমং তং ৰূপং ৱচীৱিঞ্ঞত্তি? যা কুসলচিত্তস্স ৱা অকুসলচিত্তস্স ৱা অব্যাকতচিত্তস্স ৱা ৱাচা গিৰা ব্যপ্পথো উদীৰণং ঘোসো ঘোসকম্মং ৱাচা ৱচীভেদো, অযং ৱুচ্চতি ৱাচা. যা তায ৱাচায ৱিঞ্ঞত্তি ৱিঞ্ঞাপনা ৱিঞ্ঞাপিতত্তং – ইদং তং ৰূপং ৱচীৱিঞ্ঞত্তি.

৭২৩. কতমং তং ৰূপং ন ৱচীৱিঞ্ঞত্তি? চক্খাযতনং…পে… কবড়ীকাৰো আহাৰো – ইদং তং ৰূপং ন ৱচীৱিঞ্ঞত্তি.

৭২৪. কতমং তং ৰূপং আকাসধাতু? যো আকাসো আকাসগতং অঘং অঘগতং ৱিৱৰো ৱিৱৰগতং অসম্ফুট্ঠং চতূহি মহাভূতেহি – ইদং তং ৰূপং আকাসধাতু.

৭২৫. কতমং তং ৰূপং ন আকাসধাতু? চক্খাযতনং …পে… কবড়ীকাৰো আহাৰো – ইদং তং ৰূপং ন আকাসধাতু.

৭২৬. কতমং তং ৰূপং আপোধাতু? যং আপো আপোগতং সিনেহো সিনেহগতং বন্ধনত্তং ৰূপস্স – ইদং তং ৰূপং আপোধাতু.

৭২৭. কতমং তং ৰূপং ন আপোধাতু? চক্খাযতনং…পে… কবড়ীকাৰো আহাৰো – ইদং তং ৰূপং ন আপোধাতু.

৭২৮. কতমং তং ৰূপং ৰূপস্স লহুতা? যা ৰূপস্স লহুতা লহুপৰিণামতা অদন্ধনতা অৱিত্থনতা – ইদং তং ৰূপং ৰূপস্স লহুতা.

৭২৯. কতমং তং ৰূপং ৰূপস্স ন লহুতা? চক্খাযতনং…পে… কবড়ীকাৰো আহাৰো – ইদং তং ৰূপং ৰূপস্স ন লহুতা.

৭৩০. কতমং তং ৰূপং ৰূপস্স মুদুতা? যা ৰূপস্স মুদুতা মদ্দৱতা অকক্খড়তা অকথিনতা – ইদং তং ৰূপং ৰূপস্স মুদুতা.

৭৩১. কতমং তং ৰূপং ৰূপস্স ন মুদুতা? চক্খাযতনং…পে… কবড়ীকাৰো আহাৰো – ইদং তং ৰূপং ৰূপস্স ন মুদুতা.

৭৩২. কতমং তং ৰূপং ৰূপস্স কম্মঞ্ঞতা? যা ৰূপস্স কম্মঞ্ঞতা কম্মঞ্ঞত্তং কম্মঞ্ঞভাৱো – ইদং তং ৰূপং ৰূপস্স কম্মঞ্ঞতা.

৭৩৩. কতমং তং ৰূপং ৰূপস্স ন কম্মঞ্ঞতা? চক্খাযতনং…পে… কবড়ীকাৰো আহাৰো – ইদং তং ৰূপং ৰূপস্স ন কম্মঞ্ঞতা.